Wednesday, December 12, 2012

تلاكيك


حياتنا بقت كلها تلاكيك

بقينا بنتلكك عشان نفرح........نجري ونمسك في أي حاجة تفرحنا عشان نلحق ومتسيبناش
وتهرب....
....................

بندور علي لحظة نضحك فيها من قلبنا وسط مليون لحظة حزن مبنقدرش نمنع فيها بكانا........


....................
نتلكك عشان نجمع بعضنا في خروجة واللا مناسبة...من غير مناسبة..عشان بس نحس اننا لسه عايشين وبنعرف نخلق حياة وسط دنيا بتموت حوالينا....

....................
نتلكك ونفتح الراديو ندور علي أي حاجة ولو لقينا فيروز نعلي الراديو علي آخره عشان منسمعش

الدنيا حوالينا ونتدفي بصوتها يمكن تنسينا العالم...

....................

نستني يوم العيد عشان نجيب التليفون وننفض التراب عن ارقام ناس بقالنا زمن مسألناش عليهم....ومش عارفين ليه هما كمان مبيسألوش علينا.....

....................

والحنين يبقى مالينا لحد ما يغرقنا لناس مش المفروض نفكر فيهم ونتلكك عشان نشوفهم وبساطة نحلم بيهم.....كل يوم ...نعرف اننا لسه من جوانا قادرين نحب ناس حتى وهما ميستاهلوش ......

....................
بقينا بنتلكك للحب نفسه...ندور بعدسة مكبرة علي الحب في كل مكان عشان نحب ونشتاق ونستني
لحظة تجمعنا باللي بنحبه بعد الغياب

.....
....................
ونتلكك علي الغيرة ....ونغير.....ونسكت عشان قلوبنا هي اللي تتكلم ونتخاصم عشان نرجع ونتعاتب ونسمع كلمة حب بتتوه وسط زحمة الدنيا

....................
نتلكك بحب الشتا والبرد.....عشان بس بنشتاق للحظة دفا في ايدينا نحسها بعد البرد ده....لحظة الدفا اللي بتطمنا وتعيشنا يمكن سنة كاملة لحد ما ييجي شتا وبرد تاني

....................
نتلكك بلحظة حزن نبكي فيها نشوف مين أول حضن حيسبق ويحضننا ويحمينا ويطبطب علينا ويمسح دموعنا عشان بس نتأكد اننا مش لوحدنا........

....................
ونتلكك عشان نبقى لوحدنا ونبعد ونبعد ونبعد...عن كل الناس عشان نشوف حنوحشهم قد إيه

 
ونستني لحظة سؤال وشوق ولهفة وأجمل لقا بعد البعاد....
وليه مينفعش يحصل كل ده من غير ما نكون بنتلكك؟؟؟؟؟


********************************

على الهامش
النهاردة
12/12/2012

كلنا اتمنينا التاريخ ده يحصل فيه حاجة مميزة واستنيناه أوووي اوووي

بس انا شايفة ان اللي يبحصل في اليوم هو اللي بيميز التاريخ مش العكس

يا رب كل أيامنا تكون حلوة
.....
انا عن نفسي حستني 2013

:)

Tuesday, November 20, 2012

(جوانيات وصعبانيات ما قبل النوم......(5

أنا زي ما انا متغيرتش ولا عاوزة اتغير...عاوزة افضل بتعامل بنفس الطريقة..أحب الناس بنفس الطريقة...وأضحك وأبكي ....زي ما انا
هو انا لازم اتغير؟؟؟
واللا لازم لو حاجة جديدة حصلت في حياتي تغيرني...لأ مش لازم خالص
وهو ده الجميل في الموضوع كله


***********************

اتخنقت من تدخل الناس في حياتي وكأني صغيرة مش بعرف أفكر ولا اتصرف ولا اتكلم ولا اتعامل...والمشكلة اني مش بعرف اوقف الناس دي وبكل جرأة أقولهم ملكوش دعوة بيا سيبوني في حالي...لأنهم أحياناً بيكونوا ناس بيحبوني وشايفين انهم كدة بيساعدوني وعاوزين مصلحتي
بس بجد الحكاية دي بتخنق جداً  لما تبقى مش عايز فعلاً تدخل من حد

***********************

"رد مقدرتش أقوله"

"كدة"
...................
...........
عشان أنا ديماً بحاول أربط كل حاجة ببعض...وأدور بين الكلمات عن حاجة تدلني علي الحقيقة...ودي مشكلتي...إني لسه مزقهتش وبدور علي الحقيقة دي غصب عني ويمكن محتاجة حاجة معينة عشان أبطل أفكر فيها
............
!!!!!!!!!!!!!

***********************

"عندي حنين ما بعرف لمين"
الاغنية دي بترن معايا اليومين دول اوووي بس انا بعرف لمين
...............
فيه ناس كتير واحشني أوووي
هما موجودين وبكلمهم علي التليفون او علي الفيس...بس اللي واحشني وجودنا في مكان واحد بضحكنا وهزارنا وحتى ببكانا...ولمتنا حوالين الفطار الصبح ولمتنا في خروجة حلوة بره مليانة ضحك وصور
ومبقاش من كل ده غير ذكريات
صحيح الشغل كان متعب جداً وكان لازم اسيبه بس صعبان عليا الأوقات الحلوة اللي مش بتتعوض
..........................
 

***********************


لأول مرة.....أسيب الحلم
" الوهم"
عشان أروح للحلم
" الحقيقى"
ولأول مرة أبقى عاوزة اعيش في الحقيقة ومش انام
وتبقى احلامي كلها مرتبطة بشخص واحد بساعده وبيساعدني علي تحقيق الأحلام دي

***********************

احساس الانتماء ده اكتر من رائع...انك تنتمي لحد وتبقى مسئول منه ويكون هو سندك طول الوقت....محدش بيتمني أكتر من كدة أصلاً

***********************

ممكن حد يوحشك عشان مش بتشوفه
وممكن حد تاني يوحشك كل ما بتشوفه
!!!!!!!!
لأن كل ما بتشوفه بيبقى نفسك تفضل معاه اكتر وأكتر
بتبقى بس متطمن وأنت جمبه
ف بيوحشك أول ما يسيبك
وساعات كمان كلمة
"وحشتني"
بتبقى مش لايقة على احساسك
زي كلام كتييييير اوووي
..............
وووووبس
:)



Saturday, November 10, 2012

!!...عن الحب...والحيرة



...وسط زحام الأفكار...والذكريات....والماضي


أجد نفسي اليوم في حاضري ومعه....أعيشه بكل تفاصيله ولحظاته

ذلك الحلم..الحادث أمامي....أكاد أستيقظ منه....كل شيء يوقظنى رغماً عني


اتوسل إليهم...دعوني أرجوكم...أريد ان أموت هناك..حيث أنا

حيث 
الحلم....والحياة الأخرى

حتى ورداتي الجميلة أراها أمامي..مائلة نحو الذبول

تخبرني كم هي ضعيفة أمام 
حقيقة ذبولها الحتمي

!!!.....فكل شيء يذبل يوماً ما...الورود...والحب

لا اعلم...أحقاً يذبل الحب يوماً...ويموت...لنجد فقط بقاياه كذكريات جميلة لن تتكرر؟؟

لا....يمكننا ان نموت معه حينها كي لا نتركه
.............

تلك السعادة تمر علىّ سريعاً...تستوقفني قائلة

 "أنا هنا امسكي بي لا تتركيني "


.. فلا أتركها


أقترب...وأصدق...أعيش معها قليلاً...ثم..أخاف...فأبتعد شيئاً فشيئاً 


اجلس في ركن غرفتي وحيدة كما انا....تائهة بين الحلم والحقيقة

حولي 
مظلم....وقلبي يرتعد خوفاً


امسك برأسي أحاول أن أتذكر...أين كنت؟؟...وكيف صرت.؟؟؟


....اللحظات تمر علي ذاكرتي كفلاش باك سريع لا ألتقط منه شيئاً

..أبحث عن سعادتي التي وعدتها ووعدتني ألا تتركني...فأجدها أيضاً مختبئة مني
فكيف أجري بحثاً عنها في ظلام لا أرى منه شيئاً ولا أشعر فيه إلا بالخوف الشديد
...........
....أنظر إلى يدي....أتأملها جيداً....أتأكد من وجودك...من انك حقيقة
أين انت الآن؟؟
أتفتقد لحظات قليلة معي؟؟
أتفتقد كلماتي..وصمتي الذي يحيرك كثيراً..؟؟
..اغمض عيني في الظلام كي لا أشعر بما حولي

لأشعر يديك فقط تلامس
يدي...فأطمئن
أتضاءل لأبدو صغيرة جداً وأنت حولي...فتخبئني داخلك
........
.....الحب حيرة....وخوف...واطمئنان

.....فقط لا تتركني في بحر الحيرة
....وإن خفت أن تمتليء بي...فاملأني بك

دعني أبحث عن عطرك في كل مكان...فأتنفسك لأجدك حولى
حقاً أريد أن أدمنك بشدة...ولكنى اخاف من ذلك كثيراً
..........
أن أصبح مريضة بك
 ولا أُشفى إلا بك وحدك
....فهل حقاً أخاف ان ادمنك

أم تراني أدمنتك بالفعل....؟؟

Saturday, October 27, 2012

حكايتي مع الدبلومة



كان لازم أحكيلكم عن المأساه دي...أه والله مأساه أصلي انتوا مش متخيلين يعني إيه في بلدنا الجميلة دي حد عايز يدرس زيادة...يدرس لسبب بسيط جداً انه عاوز يتعلم حتى لو حاجة صغيرة جديدة ولو قدر يطور في شغله ويطبق اللي اتعلمه ده حيبقى أكتر حاجة اتمناها طول عمره

المهم ده اللي حصل معايا أنا وحوالي خمسة زميلاتي
بيبدأ التقديم لدبلومة الكلينيكال "الصيدلة الاكلينيكة" دي في شهر ابريل...وبيكون ليها شروط كتير اهمها بالنسبة لينا يكون مر علي شغلنا في التكليف سنتين مش أقل...ودي كانت المشكلة الكبرى..وهي اننا متمناش السنتين دول...يعني بمعنى بسيط...انا استلمت تكليفي في شهر 8/2010 والتقديم صحيح في شهر 4/2012 والدراسة بتبدأ في شهر 10/2012 يعني عملياً حبقى تميت السنتين قبل ما السنة الدراسية تبدأ لكن هما كان ليهم رأي تاني وهو اني المفروض في شهر 4 ابقى فعلاً تميت السنتين وغير كدة يبقى متوفرتش الشروط فيا وفي باقي زميلاتي اللي هما نفس الدفعة ومستلمين شغلنا في نفس الوقت
اللي يغيظ مش المواعيد دي خالص اللي يغيظ فعلاً انه مكنش لينا أي ذنب اننا نستلم في شهر 8 مش في شهر 4 لأن المواعيد دي هي اللي بتبدأ تعلن عنها الوزارة وعلى أساسه انا المفروض اتذنب سنة كمان عشان اعرف اقدم
المهم اننا ميأسناش وقلنا نحاول نقدم باعتبار انه فيه ناس كانت ظروفهم نفس ظروفنا وقبلوا...... ازاي متسألوش!!!!
بدأنا نحضر الورق المطلوب وزي فيلم "عسل أسود" كدة و رشا واللا بما يرضي الله طبعاً كان لازم نقدم بما يرضي الله عشان ربنا يكرمنا
وبداية من شهادتين تخرج من الكلية على شوية أوراق كمان ودول مكنوش صعبين
الصعب كان في مكان ما يدعي "مديرية الشئون الصحية" ومكان تاني اسمه "منطقة الجمرك الطبية" المكانين دول مرتبط بيهم أي ورق وأي حاجة في شغلنا
سحبنا اوراق من المديرية عشان نملاها ونمضيها من المستشفي....كان فيه حاجة اسمها تقرير سري بيطلع لنا كل سنة وبرضه نفس المشكلة مكناش تمينا السنتين وبالتالي طلع لينا تقرير واحد والتاني لسه متعملش
فضلنا نلف في المستشفى ويهديكوا يرضيكوا تطلعوا التقرير والموظفين ابدأ ماينفعش..
أتاري ماينفعش دي تتحل بحاجة بسيطة جداً وهي ان نائب المدير دي دكتورة لذيذة وكلنا نعرفها كلمناها وراحت للشخص اللي مش راضي يطلع التقرير ده وهو المحقق بتاع الشئون القانونية وبكل بساطة راحت جمبه كدة وقالت له ايه يا مصطفى ما تطلع التقرير يا مصطفي ومشي الشغل بتاع الدكاترة...
راح الراجل بكل بساطة راح يعمل التقارير....تقريباً دي كانت كلمة السر في الموضوع وقالت لنا انه الموضوع يخلص بشريط مضاد حيوي " واه مأستاه"
L
هو ماخدش الشريط بس هو طول عمره بياخد وهو حن علينا بالكلمتين الحلوين اللي قالتهمله الدكتورة
المهم بعد لف طول اليوم ده خلصنا الورق وروحنا قدمناه في المديرية قالوا لنا لأ روحوا المنطقة روحنا المنطقة وهناك البني آدمة اللي المفروض تمضي علي الورق بعد كذا امضاء مكنتش موجودة.....وهنا قالوا فوتوا علينا بكرة
ولما روحنا تاني يوم اكتشفنا ان اللي مكنتش موجودة دي كان ممكن التانية اللي موجودة تمضي مكانها لكن عشان هي مش بتحبها مارضتش تمضي
^_^ يبقي انت أكيد أكيد في مصر
مضينا الورق وخلاص قدمناه والحمد لله....
نتيجة التقديم دي تظهر في خلال شهرين تقريباً وفعلا في شهر 6 تقريباً ظهرت النتيجة والدفعات اللي اقدم مننا اتقبلوا واحنا ورقنا رجع......:(
احبااااط....بجد عمر ما جالي احباط قد اللحظة دي....وهنا كان لازم استني اتم السنتين بتوعي اللي كان ناقص عليهم شهرين واحاول معاهم تاني
فعلاً استنيت لشهر 8 وتميت السنتين وسألت في المديرية قالولي مينفعش لازم في شهر 4 بس ولو كدة سافري مصر "القاهرة يعني" جيبي الموافقة من هناك .....
وقررت أسافر القاهرة مع واحدة صحبتي نجيب الموافقة من وزارة الصحة نفسها
وعشان نسافر كان لازم نعمل شوية ورق الأول عشان محدش يرجعنا لو ناقص ورقة
كانوا حوالي 3 ورقات كل ورقة اخدت قدام كل موظفة 3 ساعات والله مش ببالغ منهم خناقة في المستشفي لأن الموظفة كسلانة تطلع للمدير ومش راضية تديني الورقة امضيها بنفسي إلا بعد ما كلمت المدير في التليفون وقلتله
وموظفة تانية في المديرية بتكتب الورقة على الآلة الكاتبة وحرف الواو معلق وقعدت تكتب فيها ساعتين بعد ما كانت قايلالنا تعالوا خدوها بعد اسبوع
وموظفة تالتة هي كويسة بس من كتر الشغل عليها وقفت قدامها 3 ساعات كمان عشان تطلعلي من عندهم تاريخ استلامي العمل .....يبقى انت أكيد أكيد في مصر
وسافرنا مصر وجينا نقدم الورق قالت الموظفة تاني لأ ولازم التقديم في شهر 4 بس..يخرب بيت كدة..... وكان فيه أخر حل وآخر أمل اننا نقدم في نفس المبنى في دور فوقيهم بس التقديم ده بيكون مش تبع الوزارة يعني مايدوناش اجازة عشان نروح الكلية ولا اجازة لما نيجي نمتحن وعلي كدة نبقى نتصرف بقي بأي طريقة عشان نروح الكلية
وعملنا كدة فعلاً ومكنتش مصدقة انهم وافقوا خلاص وعشان يطبعوا الورقة اللي فيها اسامينا اخدنا كمان 3 ساعات عشان البرينتر كانت بتعطل والموظف اللي عنده البرينتر شغالة كويس مجاش ومش راضيين حد يشتغل علي الكمبيوتر اللي علي مكتبه على أساس انه كمبيوتر ورثه عن اجداده وفيه اسرار الدولة
وفي الاخر بقى اخدنا الورقة ورجعنا اسكندرية...
ساعتها كنت مستغربة نفسي اووي لأني عمري ما عافرت عشان حاجة اوووي كدة يمكن عشان كنت مصرة عليها وعايزاه اوي ويمكن انا من الناس اللي كل ما الدنيا وقفت قصادي عشان حاجة تعبت أكتر عشان اوصلها وعاندت كمان....
لسه لسه..انتوا فاكرين كدة خلاص لأ والله..لسه
كان ناقص التقديم للكلية وده لوحده ممكن يوافقوا علينا او لأ بعد كل ده ممكن يرفضوا...أه طبعاً..حقهم...
قدمنا ورقنا في الكلية وقالوا انه فيه انترفيو اليوم الفلاني وروحنا الانترفيو والدكاترة سألونا ليه بتقدموا في الدبلومة وحتعملوا بيها ايه واللي اكتشفناه انهم مش عارفين اي حاجة عن الواقع اللي احنا عايشينه ولا شغلنا ولا وزارة الصحة عاملة ازاي...
خلصنا معاهم وقالوا ندفع 100 جنيه عشان نمتحن امتحان صغيور كدة قال ايه عشان يختاروا مننا مين حيقبل ومين لأ
وروحنا امتحنا امتحان منيل بنيلا في المنهج بتاع الكلية اللي طبعا مش فاكرين معظمه لأننا مبقيناش نتعامل مع كل ده في شغلنا العادي
المهم...ظهرت النتيجة وقبلنا الحمد لله
وهنا بجد بقى مكنتش مصدقة نفسي واني بعد الكفاح ده قبلت وأخيراً حروح الدبلومة...

بجد بلدنا دي غريبة جدا مش عايزة حد يتعلم ولا حد يبقى كويس وكله ماشي بالواسطة والكوسة وقلة الأدب...اللي بيشتغل بتطلع عينه واللي مش بيشتغل بيفضل مبطلج طول عمره...
ياللا بقي...
ادينا قبلنا وشغالين مذاكرة اهو يا رب تكون بفايدة بس



Thursday, October 25, 2012

عيد سعيد

عاوزة أقول كلام كتير
.....
ومش عارفة
....
المهم
كل سنة وانتوا طيبين
انا مقصرة معاكوا اوي
ومع نفسي اني مش بكتب زي الأول
بس بجد مافيش وقت خالص
والدبلومة اللي حلمت بيها من فترة بدأت فيها وواخدة مني وقت كتير
الحمد لله
بس لازم صحيح ابقي احكي لكم عن رحلة الكفاح في التقديم للدبلومة المرة الجاية ان شاء الله
..........
كل عيد وانتوا بخير وبصحة وبسعادة ديماً يا رب
مفتقداكم جداااً

ووووبس


Friday, October 12, 2012

إليك

"كلماتنا في الحب تقتل حبنا فالحروف تموت حين تقال"

أحياناً كثيرة تكون الكلمات داخلك أكبر من ان تعبر عنها حروف اللغة العادية
فتصبح قانعاً أن تبقى فقط داخلك..يراها الآخر في عينيك
ويكتفي
.............

...وأنت
الحلم الذي تحقق بكل تفاصيله
حتى لم أعد أحب الأحلام لأن الحقيقة معك
 أجمل بكثيييير
......
إليك
..رجل الخريف
..وربيعي القادم
...وشتائي الدافيء

من كتبت عنه كل ما مضي بصيغة مجهولة
والآن أنت أمامي ولم أعد استطيع الكتابة عنك
لا أريد إلا أن أقول "الحمد لله" ألف مرة
لأنك معي
..........
وكلماتي عنك
...ستكون فقط إليك
وسأكون أنا لك وحدك
وأنت...لي

Monday, September 24, 2012

(جوانيات وصعبانيات ما قبل النوم......(4

أكتب إيه؟؟؟
بيجيلي الصوت الغريب ده يقوللي
عايزة اكتب...عايزة اكتب....عايزة اكتب
ومش ديماً بكتب بالطريقة دي
.... بكتب لما تجيلي فكرة
.... لما احس احساس
.... لما احس كلمة
.....ولما امشي على البحر
.............
***************************

ليه مش بنسى؟؟؟؟
كل حاجة بقت مرتبطة بكل حاجة
مش قادرة اكره الفيلم...ده بالذات اللي بحبه أووي وكل كلمة فيه ليا معاها ذكرى وحاجة حلوة
والأغنية دي...اللي كمان شغالة دلوقتي بالصدفة
ومش قادرة خااالص اعرف حعمل ايه بعد كدة
...حقدر
واللا مش حقدر؟؟
.............
***************************

 اشارات واللا تهيؤات؟؟
اشارات تاني وتالت ورابع
هنا وهناك وفي كل حتة
اصلي الفيلم والاغنية مش اشارة
بس الظهور فجأة..ده اشارة
اني اعدي على نفس المكان من غير ما اقصد..ده اشارة
الاحساس ...والحلم ده اشارة
ويمكن حتى علبة الدواء دي اشارة
...آآه
....لأ
...آآآه
....لأ
!!!...مش عارفة
..........
***************************

بنبقى عاوزين نروح مكان
نروح وخلاص...والفرص كتير
عاوزين نودع حاجة ممكن منعرفش نقربلها تاني
ومش قادرين حتى علي لحظة الوداع دي
بنفضل من بعيد نودع كل حاجة ونراقب اللي بيحصل وندمع
ومحدش أبداً بيعرف
.........................
***************************

هو أنا ....صح
واللا غلط؟؟؟
اتسرعت
لسه مش عارفة
بس خايفة
......مرعوبة
مبحبش اخاف من بكرة كدة
ولا ابقى مش مركزة كدة
....بصراحة
كتير بحب حياتي مرتبة حتى لو كانت مملة وتقليدية إلى حد ما
بس لما تتغير لدرجة الكعبلة بتخلبط وبحس اني تايهة
كأن حد رماني وسط البحر وسابني
...........
***************************

خايفة من إيه؟؟؟
زي ما قلت
...من بكرة
....من الفشل
من حاجة تاخد مني حريتي اللي بحبها
حتى لو دي حاجة بتمناها
مش بحب حاجة...أو"حد" يتحكم فيا
مش قادرة ارسم مستقبلي وحتى اتخيل بكرة عامل ازاي
مش لازم يكون حلو...أو وحش
بس أحاول أرسم ملامح منه أشوفها بعيني محسش أني ماشية مغمضة عيني ومش عايزة افتحها وممكن في أي لحظة اتكعبل وأقع
المستقبل وبكرة بإيد ربنا اكيد
...صدقوني ملهاش علاقة باللي بقوله
..........
***************************

ديماً بحس جوايا اتنين
حد من بره فرحان وبيضحك طول الوقت ماشي بيعمل اللي المفروض يتعمل
مش بيقول لأ..ومش متضايق...وماشي الخطوات اللي كل الناس ماشياها
وحد جواه متضايق من الحد اللي بره ده أووي
حد زعلان ومش موافق علي أي حاجة التاني بيعملها
مش قادرة اوفق بين الاتنين دول
أبداً
وده متعب جدااااً
............
***************************

بحب غزل البنات جدااااً
ونفسي أشتريه وبشوف الراجل معدي  قدامي ومش بعرف اقوله عاوزة
مش عارفة ليه
:((
.............
***************************

آخر حاجة
.....نفسي أعرف
أنا.....إيه؟؟؟؟

Monday, September 17, 2012

(جوانيات وصعبانيات ما قبل النوم......(3

امبارح بالذات معرفتش أنام غير بصعوبة
بحس من التعب بيغمي عليا
وكنت بفكر في مليون حاجة تخليني فعلاً مانمش
معلش اعزروني
يمكن يكون كلامي هنا مش مفهوم وملخبط وملهوش لازمة بس بجد محتاجة اتكلم
..................
....................
الحاجات اللي ممكن تخليك تفرح كتييييييييرة أوووي
والشاطر اللي يعرف يدور عليها ويلاقيها ويمسك فيها عشان ماتضعش منه
....لكن
مش دي أبدأ المشكلة
المشكلة لما يبقى فيه حاجات كتيرة حواليك ممكن فعلاُ تفرحك وتخليك تضحك من قلبك وتحسسك إحساس حلو حتى لو لثواني
.....لكن
ساعات  الحزن بيكون مغطي أووي على قلبك

ومش عايز يسمحلك أبداً تحس بالفرحة دي
.............
...................
لاحظت إني اكتر حاجة بكتب عنها هي الأحلام
آخر حاجة اكتشفتها إن فيه أحلام لازم تفضل زي ما هي كدة
....حلم
...مجرد حلم
يمكن لو اتحقق كان حيفقد حلاوته ومعناه
...و ممكن لأ
حخليه زي رسايل كتبتها وعمرها ما وصلت
حطبقها وأشيلها في صندوق واخبي الصندوق جوة قلبي
جوة أووي عشان محدش يوصل لها
....
....بس
...معرفش
يمكن صحيح
مش كل حلم نشوفه سهل هنبقى حققناه"
"ده ساعات بيبقى السهل صعب لما نتنمناه
.............
.......................
فيه حاجات لما بتيجي مش في معادها
أو متأخرة...شوية....أو كتييير
بنحس احساس وحش جداً
ان فيه حاجة غلط
كأن حاجة جوانا اتكسرت....اتدشدشت كمان
بتبقى حاجة مش مفهومة وملهاش معني وملهاش لازمة
ممكن نقعد وقت طويييييييييييل نستني كلمة
...كلمة واحدة
....ولما تتقال
....نقول لنفسنا
ياااااااااااااااااه
يا ريتها ما اتقالت
!!!!!!!!!
.....أو
يا ريتها اتقالت من لحظة فاتت
...يمكن كانت تفرق
لكن ...دي حكمة القدر
...............

"it is a sign"
ساعات بركز في حكاية الاشارات الكونية دي
خصوصاً في مواقف معينة كدة
المشكلة بقى لما تلاقى كل حاجة بتحصلك عبارة عن اشارة بتفكرك بحاجة معينة
بس هي مش بتبقى كدة اوي
هي بتكون انك مرتبط بكل حاجة بتحصل في حياتك في فترة معينة بناس معينين
الناس ممكن ينتهوا من حياتك
لكن الحاجات دي بتفضل موجودة
ساعتها مش بحب اعتبرها اشارات

.....لأ
بعتبرها محاولات من ذاكرتي اللي مش عاوزة تنسى انها تفكرني وترجعني عن قراراتي

........
لكن المرة دي مختلفة
رغم كل الاشارات الوهمية دي إلا إني قررت أكمل ومبصلهاش خااالص وانا ماشية في طريقي
مهما كانت بتشدني لورا
!!!!!!!!!!!!
...................................
..........
احساسي بيكون صادق أوي في أوقات كتيرة في حاجات صغيرة
افكر في حاجة الاقيها تحصل بالظبط
الحكاية دي على قد ما هي حلوة على قد ما هي متعبة ومرهقة جداً أحياناً
الاحساس كمان بتعبره من الاشارات اللي مش بفهمها أبداً
ده بيخليني اتمني اني مافكرش...وماحسش
!!!!!!!!
............
.....................


رسالة ليك
أنت بس
وعارفة انك عمرك ما حتقراها
اسمحلي اكتبها عشان اجي وافكر نفسي بيها
....انا حلمت احلام كتير وماتحققتش
مبزعلش عشان عارفة ديماً ان ربنا بيعمل لنا الاحسن حتي لو مش شايفين ده
انا دلوقتي زي ما قلت حطيت كل احلامي اللي فاتت في صندوق وخبيته
واتمنيت تكون انت....كل أحلامي
وتعوضني عن كل حاجة فاتت معرفتش احققها
وتنسيني أي جرح
يا ترى حتقدر تعمل ده وحقدر انا كمان؟؟؟؟
واللا حاجي في يوم أقرأ الكلام ده وأندم على أحلامي اللي ماقدرتش أتمسك بيها؟؟؟؟..................
شكراً نور
ريماس
اخدتي كتير من كلام كنت محتاجة أقوله
بجد شكراااً
:))

Friday, September 14, 2012

رجل الخريف

 تلك النقطة
التي تصل الأرض بالسماء
هناك على مد البصر
حيث لا أحد يصل
...فقط نراها ونتأمل
...ونأمل

...لكني
 أراك
عند اللا نهاية
...والتي أراها بداية لكل ما أتمني
...الجميع يرونها مجرد احلام
...وعندما أراك
... تنتهي الأحلام

وتبدأ معك الحقيقة
فلا أغمض عيني
.......
............

رجل في عينيه بحر يغرقني فلا أتنفس غيره
احلامي معه لا نهائية
...وأعشق جنونه
وهدوءه الغير مفهوم أحياناً
..........
..........

رجل الخريف.....المتناقض
..أجمل ما فيه الشعور بالبرد
والدفء...معاً
يمطر فجأة.....بالحب
وكثيراً بالأعاصير
ويتحول إلى شتاء لأحتمي به وحده
.........
..........
أنت رجل اقرأه فقط في الروايات والأساطير
...وأسكبه حبراً على أوراقي
....وأكتفي
أضع صورتك في برواز وأحفظها بقلبي
 ...لتبقى
ولا أعتقد أنك ستبقى إلا كصورة
....وحلم
.....وأمل
....وربما
....ذكرى
ذكرى لأمرأة عاشقة للخيال
امرأة بحثت عنك كثيراً حتى خذلها الكثيرون في طريقها إليك
.....فتعبت
امرأة أحبت الأحلام
فعاشت بها.....حتى الموت
....ولا يهم الموت حينها
...فهي تأمل في لقاء
ما بعد الحياة



Saturday, September 08, 2012

اشرب بق مية قبل ما تنام

قلبي بيدق بطريقة غريبة أووووي
تفتكر ليه؟؟؟
...
مش عارف
بس عندي حل حلو أوي

ايه؟؟؟؟؟
اشربي بق مية قبل ما تنامي
حتبقي كويسة
...........

......يا سلاااام
دي بقى حتبقي مشكلة كبيرة جداااً
اصلي انا أصلاً كل يوم بشرب بق مية قبل ما انام
...وبغمض عيني
...ف
.... بحلم.... بيك
!!!يمكن عشان كدة قلبي بيدق بسرعة
...هو مش بيدق بسرعة اووي
...هو ملخبط كدة
مممم
عامل زي حد ماسكه بين كفوفه خلاه متلخبط ومش على بعضه
...
ثواني بس ثواني
ايه ده؟؟
هو قلبي مش جوايا؟؟
هو صحيح بين ايديك؟
......
انت ليه لخبطتني كدة بس
انت مين اصلاً
........
هو كووووووول ده من بق مية بس
...
امال لو كنت فعلاً هنا
!!جمبي
....
انا بخرف أصلاً
أه والله بخرف
محدش حيصدق أصلاً ان ده كلام في الهوا
.....
مش مهم مش مهم
بس انا بكلمك
عاوزة اكلمك انت وخلاص
...
انت متعرفش اني بكلمك طول الوقت
...بحكيلك كل حاجة
..بيقولوا عني مجنونة
....
...يمكن
.... عادي
...مجنونة بيك
حتى وانت مش هنا
وانا مش عارفة انت حتقرا الكلام ده واللا لأ
...ومش عارفة
...لو قريته
!!...حتعرف انه قصدي عليك انت واللا لأ
...مش مهم مش مهم
..مش مهم كل الكلام ده
.... المهم
 
....انك هنا
...حواليا
...جوايا
...موجود
...مهما كذبوني
...ومهما كذبت نفسي
وعمري ما حفقد ايماني بيك
.............
...عشان كدة
...حطلب منك طلب صغير
........
...كل يوم
اشرب بق مية 
قبل ما تنام
....ونتقابل
...هناااااااااااااك
...في الحلم
:)

Monday, September 03, 2012

كنّا معاً...

بالأمس
كنت أسمع حليم يغني
يغني لي وحدي

...حبيبي"
والله لسه حبيبي والله وحبيبي
مهما تنسي حبيبي والله وحبيبي
عمري ما انسي حبيبي
...وابقى
..افتكرني
...حاول حاول
تفتكرني
....حاول تفتكرني
...لو مريت في طريق مشينا مرة فيه
"أو عديت في مكان كان لينا ذكري فيه
............
لم أكن أعلم أني سأسمعها يوماً وأبكي
...
نعم
أذكر جيداً كيف كنا نسمعها سوياً ونبتسم علي كلماتها الجميلة...المؤلمة
..كنا سوياً ولو كنا نعلم أننا سنرحل
لما تلاقينا
...
...لا
..صدقيني
كنا حتماً سنلتقي
فلقاؤنا كان قدراً
وحبنا كان أيضاً قدراً
فهل أصبح اليوم ماضياً؟؟؟؟
....لا اعلم
......
...تمنيت كثيراً أن تقرأي تلك الكلمات
تعرفي أني أحبك وأراكي في كل تفاصيلي اليومية
فهل حقاً نسيتيني؟
!!!...أم تتناسيني
تريني أظهر حولك فتهربي وترمي الضحكات هنا وهناك بعيداً عني
...........
ألا تذكرين كم كنا نضحك سوياً
نتحدث بالساعات عن كل شيء
...وعن أي شيء
...نبكي
...نضحك
...نسرق الابتسامة من أقل الأشياء
ومازلت لا أعرف
كيف ينتهي كل شيء هكذا
!!!...في لحظة ضيق
في لحظة لم أعرف من منا حينها المخطيء
وأياً كان المخطيء فلماذا لم يسامحه الآخر؟
..........
انا الأن لي كبرياء
فلم أعد اقدر أن أسألك
"كيف حالك"
ولم يعد لي الحق حتى لأشتاقك
...
كيف أنتي الآن
...بدوني

بدوننا معاً
..
!!...هل تفكرين بي
..تحلمي بي مثلما أحلم بك
حلم بسيط يراودني يومياُ أني آخذك بين أحضاني
وأستيقظ علي اللا شيء
.........
كأنه حقاً لا شيء قد كان غير أننا
...كنّا معاً
يوماً ما
.....





Friday, August 31, 2012

أنا زي مانا واللا اتقسمت اتنين؟؟؟؟


المراية من الحاجات اللي مش باخد بالي منها معظم الوقت
النظر فيها بالنسبة لي مجرد ثواني..
نظرة عامة على نفسي من بره..وخلاص
.................
كتير بحس اني بخاف أبص في المراية كأني لو بصيت ليها حتكلمني وحتعاتبني....
على إيه...
معرفش...!!!
.............
بخاف أبص في عيوني...
ببقى عارفة قد إيه حشوفها حزينة...
حتى لو من غير سبب معروف...
حتصعب عليا أوي البنت اللي في المراية دي

بحس كأني معرفهاش...
بمعنى أصح...بنكر معرفتها ديماً
.............

هي شايفة اللي كل الناس بيعملوه في شكلهم عشان يبانوا أحلى حاجة ملهاش لازمة

عشان هي شايفة الناس من جوه...
مش من بره

وعشان شايفة إن الأصل هو شكلنا العادي مش صورتنا اللي بنحاول نرسمها بالألوان قدام الناس

أصلها طول عمرها بتحب الأبيض وأسود

قديمة أوي....
كل الناس شافينها كدة..
احساسها قديم..
كلامها قديم..
هي جات في زمن غلط أصلاً

كأن حد جابها من زمانها وحبسها جوه مراية في زماننا ده ومرضاش يطلعها..
ففضلت..جوه..بصورتها الحزينة ديماً..مش عارفة تهرب ولا تتحرك
..................................
...........

بتلومني كتير..

انتي ليه بتهربي مني؟؟؟
وأقولها سامحيني....
أصلي أنتي محبوسة جوه...
لكن...
أنا براكي ومحبوسة برضه...!!
أنتي مقتنعة بإحساسك وزمنك اللي جيتي منه...
لكن......
أنا....
كتير باجي على احساسي وأفكر بعقلي
عشان عارفة أنه هو الصح...
.........
بشوفك جوه دموعك نازلة....
ببصلك وأرسم ابتسامة علي وشي
 وضحكة تبين لكل الناس إني مبسوطة
...............
احنا شبه بعض أوي علي فكرة
انتي صحيح ديماً لوحدك ....
لكن أنا حواليا كل الناس
"من بره"
..........
بنحب بعض كمان لكن كل حاجة بتفرقنا 
الازاز اللي بيننا أكبر حاجز نفسك تكسريه وتطلعي تدخلي جوايا
وأنا....

أنا خايفة ينكسر وتنكسر صورتي
وأجي في لحظة
أتقسم اتنين
ومعرفش أنا مين

18/1/2012

Monday, August 20, 2012

(جوانيات وصعبانيات ما قبل النوم......(2

...العيدية مش بس فلوس
...العيدية كلمة حلوة من حد بتحبه
هي تليفون يجيلك من حد بس عشان يسبق ويقولك كل سنة وانت طيب قبل ما انت تسبقه
......والعيد انك تفرح بعد تعب رمضان
مع انك زعلان اوووي أن رمضان خلص وحيوحشك أوووي
>>>>>>>>>>>>>>>>>>>

اكتشفت في نفسي حاجة جديدة
انا كل عيد بمسك الموبيل وبشوف اسم اسم ...فيه ناس بكلمهم وفيه ناس ببعتلهم رسايل
بعمل الحكاية دي عشان بحب أسبق الناس اللي بحبهم عشان ابقى فاكراهم
.....بس
اكتشفت اني ممكن اكون بعمل كدة عشان من جوايا بكون خايفة الناس دول ميفتكرونيش فمبحبش أحط نفسي في حيرة انهم ممكن ميفكروش فيا فبسبق أنا
بس ده مايمنعش اني بفرح زي الأطفال بالناس اللي بيعيدوا عليا
:)

>>>>>>>>>>>>>>>>>>>

مبحبش أبداً حد يوعدني بحاجة ومايوفيش بيها....أصلي لو حد طلب مني حاجة وانا مش عارفة حقدر اعملها واللا لأ ممكن أقول اني مش عارفة ...لكن مقولش آه حعملها واللي قدامي يبقى متأكد من ده وبعدين أخزله

>>>>>>>>>>>>>>>>>>>

فيه ناس بيوصلوك لمرحلة مبترجعش فيها زي ما كنت
بتكره نفسك أوي لما تتحول لشخصية مش أنت
وبتكره أكتر اللي كانوا السبب في ده
لازم نتعلم بقى ان ميبقاش الناس اللي حوالينا هما الهم اللي شاغلنا طول الوقت
ونتعلم يبقى تفكيرنا لوحدنا وفرحتنا لوحدنا وحزننا لوحدنا

>>>>>>>>>>>>>>>>>>>

حاسة إني اتغيرت كتير
يمكن زي ما بيقولوا كتر البكا يعلم الأسى
وكمان كتر القسوة يعلم  القسوة لأن محدش بيحب ييجي على نفسه طول الوقت

>>>>>>>>>>>>>>>>>>>

المدونة والناس اللي عرفتهم منها هما اكتر ناس بحبهم وبفكر فيهم وبهتم بحضورهم وغيابهم
احساس غريب لما يبقي ده مع ناس شوفتهم مرات قليلة او مرة واحدة او ماشوفتهمش خالص
والناس اللي جمبي وحواليا والمفروض اني بقيت معاهم عشرة  مش بيخلوني احس ليهم نفس احساس الاهتمام ده
نفسي اعرف هما السبب واللا انا السبب

>>>>>>>>>>>>>>>>>>>

كتير بنبقى عاوزين نعرف احنا صح واللا غلط في كل تصرفاتنا وفي الأغلب مش بنعرف لأن ساعات الصح والغلط بيكونوا حاجة نسبية او بتتشاف من وجهة نظر كل واحد والقيم والحاجات اللي اتربى عليها

التفكير في كل حاجة ده بيخليني بجد مش عارفة انام وبيجيلي احساس نفسي أطفي دماغي وأشيل الفيشة فعلاً
بس مبعرفش مفكرش دي طبيعة فيا بجد من الحاجات اللي مش عارفة اغيرها
لولاها بقى مكنتش كتبت الصعبانيات دي
:DDD

Sunday, July 29, 2012

(جوانيات وصعبانيات ما قبل النوم......(1

 


ساعات بيكون قدامنا اختيارات كتير  وبنحس ان دي مشكلة

بس هي المشكلة مش في الاختيارات دي....المشكلة لما تبقى عايز تختار حاجة...ولازم تختار حاجة تانية
يعني بمعني تاني..تعمل عكس اللي انت حابه وعايزه..ببساطة لأن اللي انت عايزة ده هو مش عايزك
...حاجة محيرة
جداااً صدقوني
.......
اختيار انك تبقى لوحدك من الاختيارات دي
اكيد مافيش حد بيحب يحس ولو للحظة انه لوحده....لكن
ساعات بنختار الوحدة بإدينا لما نحس ان اللي حوالينا بيخلونا نحس الاحساس ده طووول الوقت
وده بيكون أصعب لما ناس حواليك..المفروض انك بتحبهم وبيحبوك يحسسوك الاحساس ده
ولما بتختار انك تبعد وتبقى لوحدك بيبقي عشان تحس مجرد احساس...انك مبقتش انت اللي مستسلم طول الوقت ومحتاج حد جمبه عايز تحس انك تقدر تعيش لوحدك....حتى برضه لو لوقت قليل
عايز كمان تحس انك تقدر تسيب الناس وتبعد....مش زي كل مرة الناس هما اللي بيسيبوك...بارادتهم او غصب عنهم
...
الاحاسيس دي كلها بتكون صعبة على حد مبيعرفش يعيش لوحده...ومبيعرفش ازاي يسيب
بيفضل ماسك اوي في اللي بيحبهم مهما يعملوا فيه...ساعات ده بيكون كويس لو هما كمان ماسكين فيه
لكن لما يحس أنه عمال  يوقع مشاعره على الأرض لناس مش حاسينها يبقى اكيد فيه حاجة غلط

وممكن كمان متكونش مشكلة الناس
هي بتكون مشكلته هو....انه عايز حاجة بسيطة جداااً
ان أي حد يعامله زي ما هو بيعامله..مش حاجة صعبة على فكرة
بس الفكرة انك لما توصل متأخر اوووي أوووي وتعرف..وتتأكد...أن مافيش حد حيحطك في مكانة كبيرة زي ما انت متصور
ولو حصل ده لوقت قصير ...بعدين حتعرف ان كل واحد عمره ما حيفكر غير في مصلحته هو بس أو على أقل تقدير هو نفسه أول حاجة عنده...إزاي في لحظة اتمنيت وتوقعت ان ممكن حد يفكر فيك ويعمل حسابك اكتر من نفسه؟؟؟
ممكن يكون غباء منك....أو عبط....وممكن طيبة
مش مهم المسمى...بس ساعتها بتوصل لمرحلة بتبقى مش عارف نفسك انت كدة صح واللي حواليك مش حاسينك ومش فاهمينك واللا العكس
بيوصل بيك الحال ساعتها يا إما تقرر تتغير...والتغيير ده بيكون كويس لكل اللي حواليك لكن سيء ليك انت لوحدك
حتبقى بتعمل كل حاجة وانت مش مقتنع بيها ولا بنفسك...بتبقى واحد تاني....مش عايز تعمل حساب حد إلا نفسك
حتفضل تحسب كل تصرف بتعمله وكل حاجة تقدر تديها ترجع في كلامك وتقول بلاش
تتعلم إزاي تقول لأ بجد...مش حعمل كذا سواء أقدر اعمله أو مقدرش
لما اللي حواليك شايفينك حاجة ديماً مضمونة وطول الوقت موجود وعمرك ما حتمشي وعمرك ما حتسيب
لما تيجي تسيب الحبل اللي طول عمرك ماسكه من ناحيتك بس.....ساعتها بس ممكن يبدأوا يفكروا أنت مشيت ليه
ده لو لسه أصلاً فارق معاهم...بس هما ميعرفوش إن اللي بيفرق مع حد بيفرق وهو موجود جمبه
مش لما يسيب ويمشي ويختفي...ووقتها بيبقى الغلط واللوم عليه
ويبقى هو اللي مشى وهو اللي ساب وهو اللي باع
.......
وممكن ماتتغيرش....تفضل زي ما انت بالظبط....ومش مهم اللي حواليك عاملين إزاي المهم انك تعمل اللي عايز تعمله
تتصرف زي ما بتحس ومن غير ما تحسبها بالورقة والقلم
بس ساعتها حتوصل برضه لنفس المرحلة اللي مش حتقدر فيها تعمل اللي ديماً بتعمله
بس ممكن تنسحب في صمت تااام....تمشي برضه ومحدش يحس بيك ومن غير ما تلوم ولا تعاتب
يمكن تحقق المقولة دي
"ما اعظم ان تكون غائباً حاضر على ان تكون حاضراً غائب"
يمكن في رحيلك ده الناس يفضلوا فاكرينك ويفضل عملك باقيلك يفكرهم طول الوقت بيك
ويمكن يحسوا قد إيه وجودك كان بيعمل فرق حتى لو فرق بسيط
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

الكلام ده صعبانياتي وجوانياتي اللي قبل النوم.....هي مش قبل النوم اوي هي الأفكار دي يا اما بتجيلي قبل النوم فامش بتخليني أنام خالص أو مش ببقى عارفة انام فبتجيلي الافكار دي
المهم يعني إني في الآخر مش بعرف انام
فقلت اكتبها بقى هنا يمكن ماتجيش على بالي تاني وانام عشان محتاجة انام جدااااً
وشكلى كدة حعملها سلسلة لأي حاجة بتجيلي قبل النوم

Thursday, July 19, 2012

رمضان كريم

كل سنة وانتوا طيبين
النهاردة اول ليالي رمضان
وآخر يوم في حملة التدوين
اتبسطت جداً منها مع اني منشرتش ال 30 يوم
لكن شاركت باللي مقتنعة بيه واللي قدرت عليه
.......
رمضان كلامي عنه مايخلصش أبداً
مممم
ربنا عالم باللي في قلبي لكل حد
أتمني يستجيب لي دعواتي
.........
بحب أوي الدعوة دي
"اللهم لا تعلق قلوبنا بما ليس لنا واجعل لنا فيما نحب نصيب"
"اللهم يا مصرف القلوب صرف قلوبنا على طاعتك"
آمين يا رب
.........
رمضان كريم عليكم جميعاً
..........

"على فكرة انا محدش جابلي فانوس وزعلانة أوووي"
:D
كالعادة يعني


"على فكرة انا محدش جابلي فانوس وزعلانة أوووي"
:D
كالعادة يعني

Wednesday, July 18, 2012

يوم .......جمييييييييل...أوووي

ساعات 
فيه حاجات بتحصل كدة إذ فجاتن من غير ميعاد ولا ترتيب منك في عز ما تكون زعلاااااااااااااااان أووووي من كل حاجة حواليك لدرجة الوصول للانهيار التااااام
وقبل ما تقع بلحظة....ييجوا ناس متهيألك أنهم بعيييد أوووي وصعب في لحظة يقربوا منك
تلاقيهم جمبك اوووي
يطبطبوا عليك حتي وهما مش حاسين
يخلوك ببساطة ....تفرح...وتبتسم
وووبس
..............
انا تقريباً حصلي كدة بالظبط
مش لازم احكي عن الانهيار بس هو فعلاً وصلت لمرحلة ان كفاية كدة بقى لا انا عارفة أتكلم ولا عارفة أسكت
يمكن ساعتها قررت الهروب...ويمكن مايكونش هروب بالمعني الصحيح للهروب
لكن فيه حاجات حوالينا ملهاش حل غير انك تسيبها وتمشي وانت عارف ان اللي انت رايحله مش حترتاح فيه بس علي ااقل تبقي حاولت تغير اللي انت فيه ومحستش انك واقف في نفس النقطة وخايف تتحرك منها
........
كتير كنت بتمني أروح القاهرة أعمل أي حاجة هو كان حلم مجرد حلم كتبت حتى عنه قبل كدة
وفي عز مرحلة الانهيار بقي دي كانت الخطوة اللي حتساعدني أغير اللي انا فيه لازم فيها اسافر القاهرة
وفعلاً سافرت بدون أي ترتيب غير قبلها بيوم
وكأن ربنا بيحط قصادنا ناس يعوضونا وقوعنا وزعلنا ويخلونا نضحك من قلبنا ولو لحظات سريعة وسط زحمة المواصلات والحر والدوشة والتوهان
عايزة أعمل كدة
:)))))))))
كتير أووي أوووي
نور خطاب

اللي كانت معايا من بداية الطريق مش حعرف أوصفها بكلمات أوي
لكن قد إيه بجد نقية وطيبة وشبههي في حاجات كتير كانت هي حساها من قبل ما نشوف بعض
غلبتها معايا لأقصى درجة لأني فعلاً كنت عاملة زي السياح اللي مش عارفين أي حاجة بس هي كانت مستحملاني أوووي اوووي
الظروف خلتني ملحقش آخد منها اهداء غير كلمتين
"انتي عارفة"
:)))
كان نفسي أعرف البقية....بس يمكن الذكرى مش بالكلمات اللي مكتوبة ولا حتى الصور
الذكرى الحلوة اللي بناخدها من الناس بناخدها في قلوبنا اللي بتحس قد إيه اللي قدامها ده بيحبها من غير أي مقابل

.........
نور
شكراً على وقتك وتعبك
شكراً علي كل حاجة
........
شوفت موها كمان سريعاً سريعاً ومشبعتش منها بس ان شاء الله نشوف بعض تاني
...........
وصديقي العزيييييييييييييز جداً
ابراهيم
 اللي برضه تعب معايا أوي لحد ما وصلت
وكالعادة منسيش يجيبلي
"جالاكسي"
:)))
وكام كتاب زي ما هو متعود
........
مبسوطة أوي بجد انه من اجمل أيام حياتي رغم التعب اللي تعبته
والحمد لله اللي بيعوضنا باللي يفرحنا ديماً
:))
وووووووووووووبس

Friday, July 13, 2012

سكوووووت



ساعات بيكون الكلام مش قادر يعبر أبداً عن اللي جواك فتسكت

السكوت يمكن يعبر عنك أكتر
 يفضل كلامك جواك بس وممكن تقوله لأي حد بس الحد ده برضه بيبقى جواك

...............

......مممم

........مش فاهمين

اصلي هي حاجة معقدة كدة....زي ما تكون بتكلم نفسك...بس وأنت ساكت

صدقوني ...يمكن أكون مجنونة....بس دي الحقيقة انا بيحصل لي كدة

بفضل ساكتة كتييييييييييير اوووي اوووي مش قادرة ولا عارفة اتكلم مع حد فبحتفظ بالكلام وأفضفض مع حد موجود بس في خيالي انا بس
 حد بيسمعني وساعات كمان بسمعه بيرد عليا...احساس زي وانا ماشية علي البحر....مش ببقي حاسة
بأي حاجة حواليا غير أن قلبي بيتكلم

مش ببقى مبسوطة بعدها لأني ببقى عارفة ان دي تهيؤات واني لوحدي ومافيش أصلاً حد جمبي أكلمه في الحقيقة.........ولو فيه.....إيه فايدة انك تتكلم مع حد عمره ما حيفهمك ويحس بيك


كتير بنتكلم ونقرب من ناس وفجأة منلاقيش الناس دول جمبنا...لأي سبب...مبقوش زي زمان...أو احنا اللي اتغيرنا يمكن....فارقونا..او احنا فارقناهم.......مش مهم....فيه حاجات كتيرة بقت مش مهمة بس للأسف على ما نفهم بيكون عدى كتيييييييير أووووي واحنا بنتعلق بسراب معاه وفي آخره بنقع....لازم نقع
..........
................
وكتير قلوبنا بتتملي كلام ولما بتتملى بتحس كأنك كنت عمال تجري بقالك مليووون سنة ومن كتر الجرى نفسك راح
انا كتير بحس ان نفسي راح خلاص.....وكل ما بيروح....برجع وبعاند وبقوم أجرى تاني
وتالت.....يمكن لحد ما اموت حفضل أجري من غير ما أقف
بس نفسي وانا بجري مابصش ورايا ولا حواليا.......اجري وخلاص لا اسابق حد ولا حد يسابقني ولا حد يكعبلني.....نفسي يسيبوني في حالي ولو قلبي اتملي ومقدرتش اخد نفسي حموت...حموت لوحدي وانا واقفة في مكاني وخلاص....مش عاوزة حد وهو معدي ينتبه ليا ولا يشفق عليا ولا حتى يبقي يعرفني....يمكن دي قسوة.....لكن صدقوني مافيش أي أهمية لناس حواليك شكلاً....لكن سايبين جواك فراااااااااغ كبييييييييير اووووي



البوست مشاركة في حدث
التدوين اليومي

Wednesday, July 11, 2012

شايف البحر شو كبيييير

شايف البحر شو كبييير
...كبر البحر
بحبك
.....

شايف السما شو بعييييييييييدة
...بعد السما
بحبك
.........
البحر هو أكتر حاجة مشتركة بيني وبينك
علي قد حبي وحبك ليه
بحس حبنا بوسعه
يعني ملهوش نهاية
....
مهما نكون بعيد عن بعض
وانا شايفه البحر قدامي ببقي عارفة أنك شايفه وبتسأله عني
كفاية اني أحس ان طيف عيونك ظاهرلي بين الموج
وأن صوت البحر بيوصل لي شوقك وانت بتقوللي
وحشتيني
.........
متأكدة اني لو حطيت كل رسايلي ليك في ازازة واديتها للبحر حيوصلهالك
انت بس ومش حتتوه منه أبداً
علشان هو عارفك....من كتر ما بكلمه عنك
وعشان كمان هو عارف قد ايه انت شبهه
في هدوءه...وجنونه
في حنانه....وقسوته
في سكوته
في غموضه
...
...أوعدني
لما تشوف البحر تسأله عني
وهو حيقولك كل حاجة
..
.....احضنه
 حتحس قد ايه محتاجالك تضمني
....المسه
حتحس بسلام ايدي
.......
.............
ولما الشمس تغرب وتغرق في حضن البحر
اعرف ساعتها انك غايب عن كل الدنيا
لكن شمسك بتشرق جوه قلبي


Tuesday, July 10, 2012

أقر وأعترف...أنا نكدية

أقر وأعترف....أن أن أن تشششششششش......أيوة أيوة انا حعترف أهو....اقولكم بس الأول  جاتلي منين حكاية أقر وأعترف دي
  بما اني بقيت متابعة الراديو بإدمان فظييييييع فكنت من كام يوم كدة بسمع برنامج اسمه اقر و اعترف اي حد ممكن يبعت ويعترف بأي حاجة...انا بقى معترفتش عندهم..انا قلت اعترف هنا انتوا مننا وعلينا
....طيب
أقر واعترف ان انا......نكدية
ممم.....نكدية من النكد يعني  اه والله انا نكدية
هما بقى بيقولوا....مين اللي بيقولوا مش عارفة بس المرة دي بقى انا أؤيدهم جداً..بيقولوا ايه ؟؟....بيقولوا ان الستات يموتوا في النكد يحبوا النكد زي عينيهم واكتشفت ان دي حقيقة علمية فعلااااااااً
بس انا  ليه نكدية....هو مش بحب النكد اوي يعني والله هو جايز هو بيعزني حبتين تلاتة كدة
هو بداية من اسمي اصلاً ممكن تكتئبوا....سهاد يعني أرق يعني حد قلقان ومش عارف ينام...فيه ناس كتير أول ما أقولهم اسمي يقولوا "يا عيني" اللي هو اشفاق على حالي...بس فعلاً بحسه اسم حزين رغم اني بحب اسمي عشان مختلف..ما علينا

ايه تاني ايه تاني....العهدة اللي مسكاها في شغلي هي عهدة النفسية...خير اللهم اجعله خير يعني صباح الاكتئاب والسكيزوفرينيا على الانهيار العصبي....ومن العهدة دي اللي حواليا يقعدوا يقولولي حرام عليكي من العهدة بتاعتك دي ومن كتر ما بتشوفي فيلم آسف على الازعاج حتتجنني...وانا عادي عادي....اكتئاب ..نكد...أهلاً اهلاً وسهلاً دانا ممكن
اجيلهم شاي والله

إيه كمان
حتى المدونة اسمها نهر الحب اللي هو عمر الشريف بيموت في الآخر وكمان فاتن
حمامة وناقص يموت المخرج والمنتج كمان
عامة كل الأفلام اللي بحبها كئيبة ولازم حد يموت في الآخر ومرة قلت طيب لو عارفين انه حد حيموت في آخر الفيلم يكتبوا بس في أوله كدة عشان ماشوفهوش وماحبهوش برضه مافيش فايدة

النغمة اللي حاطاها علي الموبيل " حتعمل ايه لو نمت يوم وصحيت ولقيت أقرب ماليك في الدنيا مش حواليك" ولما صحابي ألحوا اني اغيرها غيرتها  وبقت" عارفة سواد العسل اهو ده اللي حالك ليه وصل" أعمل ايه طيب بحبهم بقى
:DD


اهو الاكتئاب بيحبني واللا لأ؟؟؟؟
انا عن نفسي مش حغلط فيه ولا حتكلم انا اعترفت ان انا نكدية وطول الوقت بقيت كدة
 بس بجد بجد بجد النكد غيرني كتييير كتييير..انا بقيت بسكت  بسكت ونكدي بستحمله وبيستحملني مع نفسنا وما شاء الله عليا ضحكتي اعلي ضحكة  بشهادة الجميع يعني مش حرماكوا من حاجة..نكد تلاقي ضحك تلاقي يعني سكيزوفرينيا عالية جداً واعترافات وآخر حلاوة

كفاية عليكوا بقى لحسن تتعدوا عشان مقولكوش النكد ده مُعدي جداًًً انا حذرتكوا وماليييييييش دعوة
:DDD




ده مشاركة في  حدث
التدوين اليومي

Friday, July 06, 2012

أنتي...أملي

عارفة
بحب أشوفك بتبكي
..
صدقيني مش بحب أبداً أشوفك حزينة
....لكن
بحب أشوفك بتبكي عشان أنا الوحيد اللي بتبكي قدامي
..بتكوني ضعيفة
بحسك بين إيديا
زي طفلة صغيرة خايفة من الدنيا كلها إلا مني
محدش يقدر يحس بيكي ولا يفهمك غيري
...محدش يعرف يمسح دموعك إلا أنا
...بتبقي محتاجالي أكتر من أي وقت
ببقى عايزك تسمعي دقات قلبي وهي بتطبطب عليكي
ببقي نفسي اضمك وماسيبكيش أبداً
بحس قلبي ماليه حنان وسع البحر كله
وخايف ما يكفكيش
.....
عارفة
بخاف أوي لو تبكي بسببي
و بتمنى ساعتها كل دمعة تنزل تجرح قلبي وما تنزلش على خدك
ولو بإيدي ارجع الزمن عشان متزعليش  كنت أرجعه
.......
...........

بحب كمان أشوف ضحكتك
عشان عيونك مبتلمعش وانتي بتضحكي غير ليا انا وبس
عشان صوتك وانتي بتضحكي بيحييني
....
بحبك عشان أنتي....أنتي
....لما بتبكي
...ولما بتضحكي
...بحبك بعقلك
...بجنونك
بكل حاجة فيكي يتخليني أعيش
...عشان أنتي
....أملي
وبتديني أمل طول مانا عايش



البوست مشاركة في حدث
التدوين اليومي

عني...وعن مدونتي :)

التدوينة دي مشاركة في حدث
التدوين اليومي
وهو بوست موحد فيه أسئلة نجاوب عليها
انا عاجباني الفكرة جداااااً
نبدأ باسم الله
:)

السؤال الأول
عرف نفسك

لو الاسم يبقي سُهاد
لو تعريف ممكن اقول اغنية اليسا عشان عاجباني وحاساها شبهي
:))
انا واحدة عادية رايحة مع الدنيا وجاية بني آدمة ليا وعليا أنا مش مثالية..بأقل كلمة انا بتضايق  لكني برجع في دقايق واتراضى بسرعة
أنا أصلي من جوايا طفلة وساعات كتيرة بكون عاقلة وساعات مندفعة
******************

السؤال الثاني
ما اكثر ما يميز شخصيتك

مش عارفة اجاوب على السؤال ده بس انا أكتر حاجة بحبها في نفسي هي الكتابة ولولا الكتابة مكنش زماني قادرة أعيش

******************

السؤال الثالث
ما هي أهم نقطة تحول في حياتك

اكيد برضه لما بدأت أكتب اتغيرت كتيييييير وبدأت أتكلم وأحكي كل اللي مكنتش بقدر أعمله قبل كدة ولما بدأت أشتغل

******************


السؤال الرابع
كيف دخلت عالم التدوين

كنت في أولي كلية وطبعاً كلية الصيدلة صعبة ومكنتش باخد نفسي خالص في أي حاجة حضرت ندوة فيها شعر وحاجات أدبية وكانت حلوة جداااً وعرفت منها عالم المدونات وقلت ساعتها ليه معملش مدونة وأكتب وأقول اللي جوايا
وفعلاً عملت المدونة
:))

******************


السؤال الخامس
ما هو اسم مدونتك وكيف اخترته

اسم مدونتي نهر الحب
اخترته لأن الفيلم ده اكتر فيلم بحبه في حياتي بعيداً عن قصة الخيانة اللي فيه لكن بحب المشاعر اللي ملياه وكل كلمة فيه وبحب فاتن حمامة جداً وكان نفسي اعمل حاجة شبه العالم ده عالم الأبيض وأسود بتاع زمان لأني شايفاه أحلي وقت وأرقى حب وأنقى مشاعر
ونفسي أعيش في الزمن الأبيض وأسود ده

******************


السؤال السادس
صف مدونتك

مدونتي عبارة عن كلمات...انا ديماً بقول اللي بكتبه مجرد كلمات جوايا وجوه ناس كتير كلمات عن الحب والحزن والحرية
ساعات عن الأمل وساعات عن اليأس فيها كل مشاعر ممكن أي حد يمر بيها وميقدرش يعبر عنها ويمكن ربنا ادانا القدرة على التعبير دي عشان نعبر عن مشاعر بعض وعن ناس فعلاً مبتقدرش تقول اللي جواها
.....
مدونتي هي حياتي
..........

******************


السؤال السابع
من هم اكثر ثلاث شخصيات أثروا بك من داخل عالم التدوين ومن خارجه

حبدأ بخارج عالم التدوين
 ومن المشاهير...الكاتبة أحلام مستغانمي
قد إيه بجد تقدر توصف أدق المشاعر  وقد إيه حاسة اني اتأثرت بيها جداااً في كل اللي بكتبه

تاني حد هي دكتورة صيدلانية اسمها دكتورة سلوي كنت بتدرب معاها من تاني سنة كلية  واتعلمت منها كتيييير في الحياة وفي الشغل وليها فضل كبير عليا بعد ربنا طبعاً
حكتفي بدول

داخل التدوين
 اول حد ابراهيم عادل
صاحب مدونة
انا وانا
ابراهيم صديقي من بداية التدوين لحد دلوقتي وبصراحة هو لازمله بوست لوحده بس أهم حاجة عملهالي ابراهيم انه خلاني أحب القراءة أوووي أوووي وكنت بغير منه لما الاقيه بيتكلم عن كتب هنا وهناك وبقيت لما اقرأ أي رواية اخد رأيه فيها
ابراهيم مبيدخلش مدونتي بقاله كتييير جداً وبيكتب قليل في مدونته بس مش مشكلة
:))

 تاني حد
ريماس
و ريماس
و دعاء
لازم يتقالوا مع بعض بصراحة يمكن لأني عرفتهم في نفس ذات الوقت
ريماس "نور" ودعاء شبههي جداااً في احساسي وكتاباتي بحب ادخل عندهم عشان أقرأ نفسي في كلماتهم

ريماس
"نافذة حلم"
الانسانة الرقيقة الرومانسية أووي اووي اللي الوحيدة اللي بتحسسني انه فيه أمل وان الحب أقوى من أي حاجة
بدخل عندها لما ببقى فاقدة الأمل في كل حاجة حواليا
بس بسكت كتير قدام كلماتها
:))

تالت حد
تامر مغازي
صاحب مدونة
آسف على الازعاج
مدونته مختلفة جداااً أول مرة دخلتها قعدت قريت كل التدوينات اللي فيها تقريباً
هو مش بيكتب كتير بس عشان كل كلمة بيكتبها بحس ليها قيمة ومعنى وده مش موجود عند أي حد
بحس اني بتعلم منها وفيها تدوينات وكلمات عميقة أوي
من اكتر المدونات اللي بدخلها أقرأ فيها حتى لو حافظة اللي مكتوب
******************
السؤال الثامن
ما هي طقوسك الخاصة عند الكتابة

هي مش طقوس ولا حاجة انا البوست عندي بيبدأ بكلمة تيجي على بالي في لحظة أي لحظة حتى لو نايمة بس المعظم بيكون قبل ما انام على طول تفضل الكلمات تيجي على بالي زي المطر بالظبط وانام وأصحي فاكرة الكلمات دي واول فرصة الاقيها بكتبها وبنشرها على طول بس انا مش من النوع اللي بيمسك ورقة وقلم ويقول ها عايزة اكتب بقي دي بتحصل في حالات قليلة أووي اووي وانا متضايقة وحاسة جوايا كلام ومش عارفاه إيه هو ده بيكون في التدوينات اللي عبارة عن فضفضة زي دي كدة

******************


السؤال التاسع
ما هو اسلوبك المفضل في التدوين

هو مش فاهمة السؤال اوي بس حعتبر اجابته في السؤال اللي فات
:DDD

******************

السؤال العاشر
ما اهم ما يميز تدويناتك

برضه مش عارفة بس زي ما قلت قبل كدة انا اكتر حاجة بحبها وبتفرحني بجد لما اكتب حاجة تلمس حد حتي لو بكلمة أو سطر ويقولي انتي عبرتي عن اللي جوايا
بس
:)

******************


السؤال الحادي عشر

انا تعبت بقي
:DD
ماهو تقييمك لعالم التدوين في الفترة الأخيرة
بما اني مدونة من زمن مش قليل اللي هو 6 سنين ده متهيألي دلوقتي احسن كتير من زمان أنا افتكر اول ما بدأت كانت لسه فكرة المدونات منتشرتش وكانوا بيهاجموها في الجرايد بس دلوقتي العالم بقى مفتوح جداااً احسن من الأول

******************


السؤال الثاني عشر
ما هي اقرب تدويناتك إلى نفسك

هو أي حاجة بكتبها بحبها بحس انها بنتي مش عارفة ليه بس انا فاكرة اليومين دول تدوينة كنت كاتباها السنة اللي فاتت في نفس التوقيت ده تقريباً بس بحبها جداً وقريبة من قلبي اوووي اوووي اسمها
بين اللحظات....حياة

******************


السؤال الثالث عشر
استعرض اهم المواقف الطريفة الي صادفتك مع التدوين

مش فاكرة حاجة طريفة بس حصلتلي صدفة جميلة جمعتني بأحد المدونين
بس دي حكاية طويلة مش ححكيها
:DDD

******************


السؤال الرابع عشر
هل احدث التدوين تأثيراً عليك؟ وكيف؟

اكيد انا حاسة اني بقيت على الأقل بقول اللي جوايا ومش بخاف منه
مش بخاف أعبر عن مشاعر الحب وكنت بخاف اوي زمان أني لو كتبت كلام عن الحب الناس تفهمني غلط
النسبة الغالبة هنا ان الناس بتحس اللي انت كاتبه وخلاص لأن مش ديماً اللي بتكتبه بيكون بيوصفك قد ما بيكون بيوصف حاجة حسيتها انت بنفسك او في حد حواليك

******************


السؤال الخامس عشر
اختر اي مدون ووجه له سؤال

مممم
مين مين  مين؟؟
مش عارف
انا ممكن أسألكوا كلكم انتوا بتحبوا تيجوا هنا واللا لأ؟؟
:)))
..........

انا بحب ناس كتير وكل المدونين واللي بييجوا يزوروني ومعرفتش اقول عنهم كلهم
يا ريت تسامحوني ومحدش يزعل مني


Wednesday, June 27, 2012

بلياتشو

حاسة اننا كلنا بقينا عاملين زي البلياشتو
بنضحك ونهزر من بره بس ومن جوانا مافيش ولا نقطة فرح

مش عايزين نفرح؟

أكيد لأ...
بس مش قادرين نفرح...حاسة كأن الابتسامة بتعدي كدة على وشنا بس عشان نجامل بيها حد بيشوفنا ومش لازم يحس اننا جوانا حزين
كأن الابتسامة شبح بيعدي علينا وبيدبل قبل حتي ما يكمل......

المشكلة لما تبقي شايف الحزن ده كمان جوة عيون الناس اللي حواليك وبتحبهم ولا انت عارف تطبطب عليهم ولا على نفسك...
احساس صعب ان كل احاسيسنا مزيفة ووشوشنا متلونة..مش كذب ولا نفاق لكنها غصب عننا عشان نظهر اننا اقوياء وبنعافر وبنقاوم وقادرين نعيش كدة

بقينا زي كل بلياتشو عنده حكاية مخبيها جواه وبيداريها بالألوان الكتيرة اللي على  وشه والحركات اللي بيعملها قدام الناس عشان بس يضحكوا...


مش عدم رضا ولا قلة ايمان لكن والله كتير بيكون الحزن حاجة من جوانا أووي أوووي ولما بتزيد مافيش أي حاجة تقدر تغلبها....



ساعات بحس اننا عواجيز أووي ....
الظروف اللي حوالينا مخليانا كدة أو احنا فعلاً كبرنا ومش حاسين أو مش مصدقين

حتى لما بتيجي أي حاجة تخليك تفرح للحظة...وقت ما تيجي تبتسم وتتفاءل..ترجع وتخاف لحسن الحاجة دي تروح منك أو تطلع وهم متغطي كمان بوش أنت مش شايفه.....
......
بعد وقت أكيد الحاجة اللي مخليانا حاسين الحزن بتروح وبننساها....عشان هي دي الدنيا
بس يا ريت....ياااريت....منوصلش لمرحلة يحبنا فيها الحزن وميجيش الوقت اللي يسيبنا فيه حتى لو شوية.....


مشاركة في حدث
التدوين اليومي

Sunday, June 24, 2012

انت فين يا حسيييييييييين؟؟؟؟

تقريباً كدة انا عمري ما كتبت هنا في المدونة حاجة تضحك
ديماً كآبة كآبة لحد يعني ما الاكتئاب زهق مني...ولو مش كآبة سهوكة كدة ورومانسية و بتاع  وحاجات متأكلش عيش
وبصراحة لما بقرأ الرومانسية بتاعة ابراهيم رزق  بحس انها احلى....ديماً بتفكرني بجملة "بلوبيف بلوبيف" بتاعة اللمبي
...
المهم
يوم الجمعة خير اللهم اجعله خير كدة لقيت قدامي فيلم الباب المفتوح بتاع "صالح سليم" وفاتن حمامة.....سيبكوا بقى من فاتن حمامة....كل العالم بقى كوم وصالح سليم ده كوم تاني....الراجل ده انا اشوفه من هنا والاقيني كدة عينيا دمعت وحالتي بقت صعبة الفيلم بقي ميبقاش محتاج عياط ولا حاجة انا بعيط عشان بتحسر على حالنا...
ان مافيش مرة كدة من ذات المرات الواحد لمح حد شبه صالح سليم كدة معدي حتي في شارع ....طيب نصه...ربعه...اي حاجة من ريحته طيب....أبداً....
هما ليه الرجالة زمان كانوا رجالة كدة ليهم هيئة مافيش زيها...

المهم بقي قعدت انا أشوف صالح سليم...وكان اسمه حسين....شوفته من هنا وقعدت اقول .....يا حسيييييييييييين..........يا حسيييييييييين ماليش دعوة انا عايزة حسيييييييييييين..هاتولي حسين.......وقلت لنفسي "مش لما تبقى فاتن حمامة الأول"...مبدأ برضه...
أهيء أهيء...ماااااااافيش فايدة

وبعدين فاتن حمامة هانم دي الراجل طول الفيلم يتحايل عليها ويقولها حتحبيني حتصحي يوم تلاقي نفسك بتحبيني...وهي...مافيش عند اللي جابوها دم الصراحة...طول الفيلم مبوزة في وش الراجل...اللي هو يعني نفسي بس اقوله انت تقف كدة ومتقولش ولا كلمة...ووبس يعني........

طيب ايه بقي...يعني حسين ده مش ناوي يظهر يعني...
والوقعة السودة بقي ان عمر الشريف كماااااااااان يبقى اسمه حسيييييييييين في " اشاعة حب" يا دي النيلا....لأ بقي ده استقصاد...ومحدش يقوللي مين عمر الشريف ده....عمر الشريف يعني " في بيتنا رجل" ...يعني نهر الحب...يعني أحلى واحد يلبس بدلة ميري فيكي يا مصر
:DDD
........
اهو انا بشوف الناس دول عشان تتفقع مرارتي ووبس واقعد اعيط علي حالنا يا عيني....لا تقولي كريم بقي ولا مهند ولا بتاع...
اهو صناعة مصرية اهو...يعني هو فيه أمل السلالة تتحسن يعني؟؟؟
طيب نشوف الهندسة الوراثية وال DNA  والا نعمل ايه بس.....
والله بجد انا مش بتكلم عن الوسامة قد ما بتكلم عن الرجولة......
مممممممممممم
يووووووه بقى ماهو نور الشريف كان آخر الرجال المحترمييييييييييييييين
عشان كدة خلصوا...
:DDDD
معلش بقى
يظهر فعلاً مافييييييييييش فايدة








البوست مشاركة لحدثالتدوين اليومي

Saturday, June 23, 2012

نفسي أطير



نفسي أطير
نفس الاحساس ده بالظبط
نفسي أفرد دراعاتي في الهوا
 والهوا ييجي على وشي و يدخل بين خصلات شعري
وبين انفاسي
 يدخل جوايا هوا نضييييييف أوي
يخليني أغمض عيني
وينسيني كل حاجة
.......


نفسي أركب مرجيحة تطلعني لفووووق
لحد السما
وأفضل هناك...فوق
مع الملايكة
أصلي بحب السما أوي يمكن عشان صافية ونقية
وقت ما بتزعل
بتبكي
نفسي أبكي معاها مرة وانا فوق السحاب
..........


ديماً بيفصلنا عن السما....وعن الهوا
ازاز
بنفضل وافقين وراه نتفرج بس علي الدنيا
خايفين
ويفضل الطيران مجرد حلم
بيخطر بس علي بالنا
لحد ما ييجي يوم نفتح الشباك
نكسر الازاز اللي حوالينا
ونطييييييييييييير
.................
.......
مشاركة في حدث التدوين اليومي