Monday, May 19, 2014

الحمد لله

المرض
من أصعب الأحاسيس اللي ممكن حد فعلاً يحسها
خصوصاً لو المرض معاه ألم شديد مش محتمل
أكيد غير محتمل دي بتفرق من شخص للتاني
لكن طالما حد حس انه غير محتمل وفوق قوته بيبقى احساس صعب أوووي
الحمد لله فعلاً على نعمة الصحة
..............
رغم اني بكتب وشايفة الحروف بالعافية بسبب ميكروب جامد في عيني
وبعد نوبات برد وسخونية ونوم في السرير ل 3 مرات في 3 اسابيع بفواصل كام يوم...إلا اني كالعااادة عاوزة أكتب
بحب أكتب في اوقات غريبة ببقى حاسة فيها احاسيس غريبة
احساس بالضعف أوووي واني مش بقدر اتحمل حاجات غيري ممكن يتحملها عادي
ومش قادرة اعرف هل ده عيب فيا واللا ضعف ده فعلا لضعف جسمي وصحتي ونفسيتي بوجه عام
المهم ان ده بسبب لي تعب فوق مرضي تعب نفسي باحساس الضعف ده
بيخففه ان الحمد لله فيه حد جمبي واخد باله مني ومش بينام بسببي وده كمان بيتعب نفسيتي اني تاعبة حد معايا بالشكل ده...وطبعاً هو مش حد غريب عشان اقول كدة
وانا حساسة زيادة عن اللزوم زي ما بيقول وكل الناس بتقول
............
في المرض كمان ببقى محتاجة اسكت خالص مكلمش حد وفي نفس ذات الوقت ببقى محتاجة ناس معينة هي اللي تسأل عني وتقف جمبي وبتضايق أوي لما الناس دول مش هما اللي في خيالي ديماً هما المفروض الأبعد والأقل اهتمام عن ناس أقرب بحبهم المفروض يكونوا جمبي أكتر من كدة
.........
حسيت كمان اني بقيت بركز في حكاية الحسد بطريقة مبحبهاش بس الحسد موجود طبعاً بس احساس ان الناس شايفين حياتك كاملة أووي لدرجة ممكن يحسدوك عليها حاجة تخوف خصوصاً لو حياتك مش كاملة زي ما هما متصورين وان عندك مشكلة او أزمة محدش يعرفها ومش لازم تلف على الناس واحد واحد تحكي وتشكي عن مشاكلك الصغيرة او الكبيرة وكالعادة الناس بيحكموا عليك من بره وخلاص
بس عامة كله بيحصل لنا بأمر الله حتى لو ضرر من حسد او ممكن يكون ابتلاء أو عقاب عشان ننتبه لحاجة...وف الآخر أكيد بنقول الحمد لله ان فيه حاجات حلوة في حياتنا
وفيه ناس واقفين جمبنا رغم كل شيء واننا نفسنا قادرين نعافر ونكمل
................
وووووووووووووووووووبس