Sunday, July 29, 2012

(جوانيات وصعبانيات ما قبل النوم......(1

 


ساعات بيكون قدامنا اختيارات كتير  وبنحس ان دي مشكلة

بس هي المشكلة مش في الاختيارات دي....المشكلة لما تبقى عايز تختار حاجة...ولازم تختار حاجة تانية
يعني بمعني تاني..تعمل عكس اللي انت حابه وعايزه..ببساطة لأن اللي انت عايزة ده هو مش عايزك
...حاجة محيرة
جداااً صدقوني
.......
اختيار انك تبقى لوحدك من الاختيارات دي
اكيد مافيش حد بيحب يحس ولو للحظة انه لوحده....لكن
ساعات بنختار الوحدة بإدينا لما نحس ان اللي حوالينا بيخلونا نحس الاحساس ده طووول الوقت
وده بيكون أصعب لما ناس حواليك..المفروض انك بتحبهم وبيحبوك يحسسوك الاحساس ده
ولما بتختار انك تبعد وتبقى لوحدك بيبقي عشان تحس مجرد احساس...انك مبقتش انت اللي مستسلم طول الوقت ومحتاج حد جمبه عايز تحس انك تقدر تعيش لوحدك....حتى برضه لو لوقت قليل
عايز كمان تحس انك تقدر تسيب الناس وتبعد....مش زي كل مرة الناس هما اللي بيسيبوك...بارادتهم او غصب عنهم
...
الاحاسيس دي كلها بتكون صعبة على حد مبيعرفش يعيش لوحده...ومبيعرفش ازاي يسيب
بيفضل ماسك اوي في اللي بيحبهم مهما يعملوا فيه...ساعات ده بيكون كويس لو هما كمان ماسكين فيه
لكن لما يحس أنه عمال  يوقع مشاعره على الأرض لناس مش حاسينها يبقى اكيد فيه حاجة غلط

وممكن كمان متكونش مشكلة الناس
هي بتكون مشكلته هو....انه عايز حاجة بسيطة جداااً
ان أي حد يعامله زي ما هو بيعامله..مش حاجة صعبة على فكرة
بس الفكرة انك لما توصل متأخر اوووي أوووي وتعرف..وتتأكد...أن مافيش حد حيحطك في مكانة كبيرة زي ما انت متصور
ولو حصل ده لوقت قصير ...بعدين حتعرف ان كل واحد عمره ما حيفكر غير في مصلحته هو بس أو على أقل تقدير هو نفسه أول حاجة عنده...إزاي في لحظة اتمنيت وتوقعت ان ممكن حد يفكر فيك ويعمل حسابك اكتر من نفسه؟؟؟
ممكن يكون غباء منك....أو عبط....وممكن طيبة
مش مهم المسمى...بس ساعتها بتوصل لمرحلة بتبقى مش عارف نفسك انت كدة صح واللي حواليك مش حاسينك ومش فاهمينك واللا العكس
بيوصل بيك الحال ساعتها يا إما تقرر تتغير...والتغيير ده بيكون كويس لكل اللي حواليك لكن سيء ليك انت لوحدك
حتبقى بتعمل كل حاجة وانت مش مقتنع بيها ولا بنفسك...بتبقى واحد تاني....مش عايز تعمل حساب حد إلا نفسك
حتفضل تحسب كل تصرف بتعمله وكل حاجة تقدر تديها ترجع في كلامك وتقول بلاش
تتعلم إزاي تقول لأ بجد...مش حعمل كذا سواء أقدر اعمله أو مقدرش
لما اللي حواليك شايفينك حاجة ديماً مضمونة وطول الوقت موجود وعمرك ما حتمشي وعمرك ما حتسيب
لما تيجي تسيب الحبل اللي طول عمرك ماسكه من ناحيتك بس.....ساعتها بس ممكن يبدأوا يفكروا أنت مشيت ليه
ده لو لسه أصلاً فارق معاهم...بس هما ميعرفوش إن اللي بيفرق مع حد بيفرق وهو موجود جمبه
مش لما يسيب ويمشي ويختفي...ووقتها بيبقى الغلط واللوم عليه
ويبقى هو اللي مشى وهو اللي ساب وهو اللي باع
.......
وممكن ماتتغيرش....تفضل زي ما انت بالظبط....ومش مهم اللي حواليك عاملين إزاي المهم انك تعمل اللي عايز تعمله
تتصرف زي ما بتحس ومن غير ما تحسبها بالورقة والقلم
بس ساعتها حتوصل برضه لنفس المرحلة اللي مش حتقدر فيها تعمل اللي ديماً بتعمله
بس ممكن تنسحب في صمت تااام....تمشي برضه ومحدش يحس بيك ومن غير ما تلوم ولا تعاتب
يمكن تحقق المقولة دي
"ما اعظم ان تكون غائباً حاضر على ان تكون حاضراً غائب"
يمكن في رحيلك ده الناس يفضلوا فاكرينك ويفضل عملك باقيلك يفكرهم طول الوقت بيك
ويمكن يحسوا قد إيه وجودك كان بيعمل فرق حتى لو فرق بسيط
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

الكلام ده صعبانياتي وجوانياتي اللي قبل النوم.....هي مش قبل النوم اوي هي الأفكار دي يا اما بتجيلي قبل النوم فامش بتخليني أنام خالص أو مش ببقى عارفة انام فبتجيلي الافكار دي
المهم يعني إني في الآخر مش بعرف انام
فقلت اكتبها بقى هنا يمكن ماتجيش على بالي تاني وانام عشان محتاجة انام جدااااً
وشكلى كدة حعملها سلسلة لأي حاجة بتجيلي قبل النوم

Thursday, July 19, 2012

رمضان كريم

كل سنة وانتوا طيبين
النهاردة اول ليالي رمضان
وآخر يوم في حملة التدوين
اتبسطت جداً منها مع اني منشرتش ال 30 يوم
لكن شاركت باللي مقتنعة بيه واللي قدرت عليه
.......
رمضان كلامي عنه مايخلصش أبداً
مممم
ربنا عالم باللي في قلبي لكل حد
أتمني يستجيب لي دعواتي
.........
بحب أوي الدعوة دي
"اللهم لا تعلق قلوبنا بما ليس لنا واجعل لنا فيما نحب نصيب"
"اللهم يا مصرف القلوب صرف قلوبنا على طاعتك"
آمين يا رب
.........
رمضان كريم عليكم جميعاً
..........

"على فكرة انا محدش جابلي فانوس وزعلانة أوووي"
:D
كالعادة يعني


"على فكرة انا محدش جابلي فانوس وزعلانة أوووي"
:D
كالعادة يعني

Wednesday, July 18, 2012

يوم .......جمييييييييل...أوووي

ساعات 
فيه حاجات بتحصل كدة إذ فجاتن من غير ميعاد ولا ترتيب منك في عز ما تكون زعلاااااااااااااااان أووووي من كل حاجة حواليك لدرجة الوصول للانهيار التااااام
وقبل ما تقع بلحظة....ييجوا ناس متهيألك أنهم بعيييد أوووي وصعب في لحظة يقربوا منك
تلاقيهم جمبك اوووي
يطبطبوا عليك حتي وهما مش حاسين
يخلوك ببساطة ....تفرح...وتبتسم
وووبس
..............
انا تقريباً حصلي كدة بالظبط
مش لازم احكي عن الانهيار بس هو فعلاً وصلت لمرحلة ان كفاية كدة بقى لا انا عارفة أتكلم ولا عارفة أسكت
يمكن ساعتها قررت الهروب...ويمكن مايكونش هروب بالمعني الصحيح للهروب
لكن فيه حاجات حوالينا ملهاش حل غير انك تسيبها وتمشي وانت عارف ان اللي انت رايحله مش حترتاح فيه بس علي ااقل تبقي حاولت تغير اللي انت فيه ومحستش انك واقف في نفس النقطة وخايف تتحرك منها
........
كتير كنت بتمني أروح القاهرة أعمل أي حاجة هو كان حلم مجرد حلم كتبت حتى عنه قبل كدة
وفي عز مرحلة الانهيار بقي دي كانت الخطوة اللي حتساعدني أغير اللي انا فيه لازم فيها اسافر القاهرة
وفعلاً سافرت بدون أي ترتيب غير قبلها بيوم
وكأن ربنا بيحط قصادنا ناس يعوضونا وقوعنا وزعلنا ويخلونا نضحك من قلبنا ولو لحظات سريعة وسط زحمة المواصلات والحر والدوشة والتوهان
عايزة أعمل كدة
:)))))))))
كتير أووي أوووي
نور خطاب

اللي كانت معايا من بداية الطريق مش حعرف أوصفها بكلمات أوي
لكن قد إيه بجد نقية وطيبة وشبههي في حاجات كتير كانت هي حساها من قبل ما نشوف بعض
غلبتها معايا لأقصى درجة لأني فعلاً كنت عاملة زي السياح اللي مش عارفين أي حاجة بس هي كانت مستحملاني أوووي اوووي
الظروف خلتني ملحقش آخد منها اهداء غير كلمتين
"انتي عارفة"
:)))
كان نفسي أعرف البقية....بس يمكن الذكرى مش بالكلمات اللي مكتوبة ولا حتى الصور
الذكرى الحلوة اللي بناخدها من الناس بناخدها في قلوبنا اللي بتحس قد إيه اللي قدامها ده بيحبها من غير أي مقابل

.........
نور
شكراً على وقتك وتعبك
شكراً علي كل حاجة
........
شوفت موها كمان سريعاً سريعاً ومشبعتش منها بس ان شاء الله نشوف بعض تاني
...........
وصديقي العزيييييييييييييز جداً
ابراهيم
 اللي برضه تعب معايا أوي لحد ما وصلت
وكالعادة منسيش يجيبلي
"جالاكسي"
:)))
وكام كتاب زي ما هو متعود
........
مبسوطة أوي بجد انه من اجمل أيام حياتي رغم التعب اللي تعبته
والحمد لله اللي بيعوضنا باللي يفرحنا ديماً
:))
وووووووووووووبس

Friday, July 13, 2012

سكوووووت



ساعات بيكون الكلام مش قادر يعبر أبداً عن اللي جواك فتسكت

السكوت يمكن يعبر عنك أكتر
 يفضل كلامك جواك بس وممكن تقوله لأي حد بس الحد ده برضه بيبقى جواك

...............

......مممم

........مش فاهمين

اصلي هي حاجة معقدة كدة....زي ما تكون بتكلم نفسك...بس وأنت ساكت

صدقوني ...يمكن أكون مجنونة....بس دي الحقيقة انا بيحصل لي كدة

بفضل ساكتة كتييييييييييير اوووي اوووي مش قادرة ولا عارفة اتكلم مع حد فبحتفظ بالكلام وأفضفض مع حد موجود بس في خيالي انا بس
 حد بيسمعني وساعات كمان بسمعه بيرد عليا...احساس زي وانا ماشية علي البحر....مش ببقي حاسة
بأي حاجة حواليا غير أن قلبي بيتكلم

مش ببقى مبسوطة بعدها لأني ببقى عارفة ان دي تهيؤات واني لوحدي ومافيش أصلاً حد جمبي أكلمه في الحقيقة.........ولو فيه.....إيه فايدة انك تتكلم مع حد عمره ما حيفهمك ويحس بيك


كتير بنتكلم ونقرب من ناس وفجأة منلاقيش الناس دول جمبنا...لأي سبب...مبقوش زي زمان...أو احنا اللي اتغيرنا يمكن....فارقونا..او احنا فارقناهم.......مش مهم....فيه حاجات كتيرة بقت مش مهمة بس للأسف على ما نفهم بيكون عدى كتيييييييير أووووي واحنا بنتعلق بسراب معاه وفي آخره بنقع....لازم نقع
..........
................
وكتير قلوبنا بتتملي كلام ولما بتتملى بتحس كأنك كنت عمال تجري بقالك مليووون سنة ومن كتر الجرى نفسك راح
انا كتير بحس ان نفسي راح خلاص.....وكل ما بيروح....برجع وبعاند وبقوم أجرى تاني
وتالت.....يمكن لحد ما اموت حفضل أجري من غير ما أقف
بس نفسي وانا بجري مابصش ورايا ولا حواليا.......اجري وخلاص لا اسابق حد ولا حد يسابقني ولا حد يكعبلني.....نفسي يسيبوني في حالي ولو قلبي اتملي ومقدرتش اخد نفسي حموت...حموت لوحدي وانا واقفة في مكاني وخلاص....مش عاوزة حد وهو معدي ينتبه ليا ولا يشفق عليا ولا حتى يبقي يعرفني....يمكن دي قسوة.....لكن صدقوني مافيش أي أهمية لناس حواليك شكلاً....لكن سايبين جواك فراااااااااغ كبييييييييير اووووي



البوست مشاركة في حدث
التدوين اليومي

Wednesday, July 11, 2012

شايف البحر شو كبيييير

شايف البحر شو كبييير
...كبر البحر
بحبك
.....

شايف السما شو بعييييييييييدة
...بعد السما
بحبك
.........
البحر هو أكتر حاجة مشتركة بيني وبينك
علي قد حبي وحبك ليه
بحس حبنا بوسعه
يعني ملهوش نهاية
....
مهما نكون بعيد عن بعض
وانا شايفه البحر قدامي ببقي عارفة أنك شايفه وبتسأله عني
كفاية اني أحس ان طيف عيونك ظاهرلي بين الموج
وأن صوت البحر بيوصل لي شوقك وانت بتقوللي
وحشتيني
.........
متأكدة اني لو حطيت كل رسايلي ليك في ازازة واديتها للبحر حيوصلهالك
انت بس ومش حتتوه منه أبداً
علشان هو عارفك....من كتر ما بكلمه عنك
وعشان كمان هو عارف قد ايه انت شبهه
في هدوءه...وجنونه
في حنانه....وقسوته
في سكوته
في غموضه
...
...أوعدني
لما تشوف البحر تسأله عني
وهو حيقولك كل حاجة
..
.....احضنه
 حتحس قد ايه محتاجالك تضمني
....المسه
حتحس بسلام ايدي
.......
.............
ولما الشمس تغرب وتغرق في حضن البحر
اعرف ساعتها انك غايب عن كل الدنيا
لكن شمسك بتشرق جوه قلبي


Tuesday, July 10, 2012

أقر وأعترف...أنا نكدية

أقر وأعترف....أن أن أن تشششششششش......أيوة أيوة انا حعترف أهو....اقولكم بس الأول  جاتلي منين حكاية أقر وأعترف دي
  بما اني بقيت متابعة الراديو بإدمان فظييييييع فكنت من كام يوم كدة بسمع برنامج اسمه اقر و اعترف اي حد ممكن يبعت ويعترف بأي حاجة...انا بقى معترفتش عندهم..انا قلت اعترف هنا انتوا مننا وعلينا
....طيب
أقر واعترف ان انا......نكدية
ممم.....نكدية من النكد يعني  اه والله انا نكدية
هما بقى بيقولوا....مين اللي بيقولوا مش عارفة بس المرة دي بقى انا أؤيدهم جداً..بيقولوا ايه ؟؟....بيقولوا ان الستات يموتوا في النكد يحبوا النكد زي عينيهم واكتشفت ان دي حقيقة علمية فعلااااااااً
بس انا  ليه نكدية....هو مش بحب النكد اوي يعني والله هو جايز هو بيعزني حبتين تلاتة كدة
هو بداية من اسمي اصلاً ممكن تكتئبوا....سهاد يعني أرق يعني حد قلقان ومش عارف ينام...فيه ناس كتير أول ما أقولهم اسمي يقولوا "يا عيني" اللي هو اشفاق على حالي...بس فعلاً بحسه اسم حزين رغم اني بحب اسمي عشان مختلف..ما علينا

ايه تاني ايه تاني....العهدة اللي مسكاها في شغلي هي عهدة النفسية...خير اللهم اجعله خير يعني صباح الاكتئاب والسكيزوفرينيا على الانهيار العصبي....ومن العهدة دي اللي حواليا يقعدوا يقولولي حرام عليكي من العهدة بتاعتك دي ومن كتر ما بتشوفي فيلم آسف على الازعاج حتتجنني...وانا عادي عادي....اكتئاب ..نكد...أهلاً اهلاً وسهلاً دانا ممكن
اجيلهم شاي والله

إيه كمان
حتى المدونة اسمها نهر الحب اللي هو عمر الشريف بيموت في الآخر وكمان فاتن
حمامة وناقص يموت المخرج والمنتج كمان
عامة كل الأفلام اللي بحبها كئيبة ولازم حد يموت في الآخر ومرة قلت طيب لو عارفين انه حد حيموت في آخر الفيلم يكتبوا بس في أوله كدة عشان ماشوفهوش وماحبهوش برضه مافيش فايدة

النغمة اللي حاطاها علي الموبيل " حتعمل ايه لو نمت يوم وصحيت ولقيت أقرب ماليك في الدنيا مش حواليك" ولما صحابي ألحوا اني اغيرها غيرتها  وبقت" عارفة سواد العسل اهو ده اللي حالك ليه وصل" أعمل ايه طيب بحبهم بقى
:DD


اهو الاكتئاب بيحبني واللا لأ؟؟؟؟
انا عن نفسي مش حغلط فيه ولا حتكلم انا اعترفت ان انا نكدية وطول الوقت بقيت كدة
 بس بجد بجد بجد النكد غيرني كتييير كتييير..انا بقيت بسكت  بسكت ونكدي بستحمله وبيستحملني مع نفسنا وما شاء الله عليا ضحكتي اعلي ضحكة  بشهادة الجميع يعني مش حرماكوا من حاجة..نكد تلاقي ضحك تلاقي يعني سكيزوفرينيا عالية جداً واعترافات وآخر حلاوة

كفاية عليكوا بقى لحسن تتعدوا عشان مقولكوش النكد ده مُعدي جداًًً انا حذرتكوا وماليييييييش دعوة
:DDD




ده مشاركة في  حدث
التدوين اليومي

Friday, July 06, 2012

أنتي...أملي

عارفة
بحب أشوفك بتبكي
..
صدقيني مش بحب أبداً أشوفك حزينة
....لكن
بحب أشوفك بتبكي عشان أنا الوحيد اللي بتبكي قدامي
..بتكوني ضعيفة
بحسك بين إيديا
زي طفلة صغيرة خايفة من الدنيا كلها إلا مني
محدش يقدر يحس بيكي ولا يفهمك غيري
...محدش يعرف يمسح دموعك إلا أنا
...بتبقي محتاجالي أكتر من أي وقت
ببقى عايزك تسمعي دقات قلبي وهي بتطبطب عليكي
ببقي نفسي اضمك وماسيبكيش أبداً
بحس قلبي ماليه حنان وسع البحر كله
وخايف ما يكفكيش
.....
عارفة
بخاف أوي لو تبكي بسببي
و بتمنى ساعتها كل دمعة تنزل تجرح قلبي وما تنزلش على خدك
ولو بإيدي ارجع الزمن عشان متزعليش  كنت أرجعه
.......
...........

بحب كمان أشوف ضحكتك
عشان عيونك مبتلمعش وانتي بتضحكي غير ليا انا وبس
عشان صوتك وانتي بتضحكي بيحييني
....
بحبك عشان أنتي....أنتي
....لما بتبكي
...ولما بتضحكي
...بحبك بعقلك
...بجنونك
بكل حاجة فيكي يتخليني أعيش
...عشان أنتي
....أملي
وبتديني أمل طول مانا عايش



البوست مشاركة في حدث
التدوين اليومي

عني...وعن مدونتي :)

التدوينة دي مشاركة في حدث
التدوين اليومي
وهو بوست موحد فيه أسئلة نجاوب عليها
انا عاجباني الفكرة جداااااً
نبدأ باسم الله
:)

السؤال الأول
عرف نفسك

لو الاسم يبقي سُهاد
لو تعريف ممكن اقول اغنية اليسا عشان عاجباني وحاساها شبهي
:))
انا واحدة عادية رايحة مع الدنيا وجاية بني آدمة ليا وعليا أنا مش مثالية..بأقل كلمة انا بتضايق  لكني برجع في دقايق واتراضى بسرعة
أنا أصلي من جوايا طفلة وساعات كتيرة بكون عاقلة وساعات مندفعة
******************

السؤال الثاني
ما اكثر ما يميز شخصيتك

مش عارفة اجاوب على السؤال ده بس انا أكتر حاجة بحبها في نفسي هي الكتابة ولولا الكتابة مكنش زماني قادرة أعيش

******************

السؤال الثالث
ما هي أهم نقطة تحول في حياتك

اكيد برضه لما بدأت أكتب اتغيرت كتيييييير وبدأت أتكلم وأحكي كل اللي مكنتش بقدر أعمله قبل كدة ولما بدأت أشتغل

******************


السؤال الرابع
كيف دخلت عالم التدوين

كنت في أولي كلية وطبعاً كلية الصيدلة صعبة ومكنتش باخد نفسي خالص في أي حاجة حضرت ندوة فيها شعر وحاجات أدبية وكانت حلوة جداااً وعرفت منها عالم المدونات وقلت ساعتها ليه معملش مدونة وأكتب وأقول اللي جوايا
وفعلاً عملت المدونة
:))

******************


السؤال الخامس
ما هو اسم مدونتك وكيف اخترته

اسم مدونتي نهر الحب
اخترته لأن الفيلم ده اكتر فيلم بحبه في حياتي بعيداً عن قصة الخيانة اللي فيه لكن بحب المشاعر اللي ملياه وكل كلمة فيه وبحب فاتن حمامة جداً وكان نفسي اعمل حاجة شبه العالم ده عالم الأبيض وأسود بتاع زمان لأني شايفاه أحلي وقت وأرقى حب وأنقى مشاعر
ونفسي أعيش في الزمن الأبيض وأسود ده

******************


السؤال السادس
صف مدونتك

مدونتي عبارة عن كلمات...انا ديماً بقول اللي بكتبه مجرد كلمات جوايا وجوه ناس كتير كلمات عن الحب والحزن والحرية
ساعات عن الأمل وساعات عن اليأس فيها كل مشاعر ممكن أي حد يمر بيها وميقدرش يعبر عنها ويمكن ربنا ادانا القدرة على التعبير دي عشان نعبر عن مشاعر بعض وعن ناس فعلاً مبتقدرش تقول اللي جواها
.....
مدونتي هي حياتي
..........

******************


السؤال السابع
من هم اكثر ثلاث شخصيات أثروا بك من داخل عالم التدوين ومن خارجه

حبدأ بخارج عالم التدوين
 ومن المشاهير...الكاتبة أحلام مستغانمي
قد إيه بجد تقدر توصف أدق المشاعر  وقد إيه حاسة اني اتأثرت بيها جداااً في كل اللي بكتبه

تاني حد هي دكتورة صيدلانية اسمها دكتورة سلوي كنت بتدرب معاها من تاني سنة كلية  واتعلمت منها كتيييير في الحياة وفي الشغل وليها فضل كبير عليا بعد ربنا طبعاً
حكتفي بدول

داخل التدوين
 اول حد ابراهيم عادل
صاحب مدونة
انا وانا
ابراهيم صديقي من بداية التدوين لحد دلوقتي وبصراحة هو لازمله بوست لوحده بس أهم حاجة عملهالي ابراهيم انه خلاني أحب القراءة أوووي أوووي وكنت بغير منه لما الاقيه بيتكلم عن كتب هنا وهناك وبقيت لما اقرأ أي رواية اخد رأيه فيها
ابراهيم مبيدخلش مدونتي بقاله كتييير جداً وبيكتب قليل في مدونته بس مش مشكلة
:))

 تاني حد
ريماس
و ريماس
و دعاء
لازم يتقالوا مع بعض بصراحة يمكن لأني عرفتهم في نفس ذات الوقت
ريماس "نور" ودعاء شبههي جداااً في احساسي وكتاباتي بحب ادخل عندهم عشان أقرأ نفسي في كلماتهم

ريماس
"نافذة حلم"
الانسانة الرقيقة الرومانسية أووي اووي اللي الوحيدة اللي بتحسسني انه فيه أمل وان الحب أقوى من أي حاجة
بدخل عندها لما ببقى فاقدة الأمل في كل حاجة حواليا
بس بسكت كتير قدام كلماتها
:))

تالت حد
تامر مغازي
صاحب مدونة
آسف على الازعاج
مدونته مختلفة جداااً أول مرة دخلتها قعدت قريت كل التدوينات اللي فيها تقريباً
هو مش بيكتب كتير بس عشان كل كلمة بيكتبها بحس ليها قيمة ومعنى وده مش موجود عند أي حد
بحس اني بتعلم منها وفيها تدوينات وكلمات عميقة أوي
من اكتر المدونات اللي بدخلها أقرأ فيها حتى لو حافظة اللي مكتوب
******************
السؤال الثامن
ما هي طقوسك الخاصة عند الكتابة

هي مش طقوس ولا حاجة انا البوست عندي بيبدأ بكلمة تيجي على بالي في لحظة أي لحظة حتى لو نايمة بس المعظم بيكون قبل ما انام على طول تفضل الكلمات تيجي على بالي زي المطر بالظبط وانام وأصحي فاكرة الكلمات دي واول فرصة الاقيها بكتبها وبنشرها على طول بس انا مش من النوع اللي بيمسك ورقة وقلم ويقول ها عايزة اكتب بقي دي بتحصل في حالات قليلة أووي اووي وانا متضايقة وحاسة جوايا كلام ومش عارفاه إيه هو ده بيكون في التدوينات اللي عبارة عن فضفضة زي دي كدة

******************


السؤال التاسع
ما هو اسلوبك المفضل في التدوين

هو مش فاهمة السؤال اوي بس حعتبر اجابته في السؤال اللي فات
:DDD

******************

السؤال العاشر
ما اهم ما يميز تدويناتك

برضه مش عارفة بس زي ما قلت قبل كدة انا اكتر حاجة بحبها وبتفرحني بجد لما اكتب حاجة تلمس حد حتي لو بكلمة أو سطر ويقولي انتي عبرتي عن اللي جوايا
بس
:)

******************


السؤال الحادي عشر

انا تعبت بقي
:DD
ماهو تقييمك لعالم التدوين في الفترة الأخيرة
بما اني مدونة من زمن مش قليل اللي هو 6 سنين ده متهيألي دلوقتي احسن كتير من زمان أنا افتكر اول ما بدأت كانت لسه فكرة المدونات منتشرتش وكانوا بيهاجموها في الجرايد بس دلوقتي العالم بقى مفتوح جداااً احسن من الأول

******************


السؤال الثاني عشر
ما هي اقرب تدويناتك إلى نفسك

هو أي حاجة بكتبها بحبها بحس انها بنتي مش عارفة ليه بس انا فاكرة اليومين دول تدوينة كنت كاتباها السنة اللي فاتت في نفس التوقيت ده تقريباً بس بحبها جداً وقريبة من قلبي اوووي اوووي اسمها
بين اللحظات....حياة

******************


السؤال الثالث عشر
استعرض اهم المواقف الطريفة الي صادفتك مع التدوين

مش فاكرة حاجة طريفة بس حصلتلي صدفة جميلة جمعتني بأحد المدونين
بس دي حكاية طويلة مش ححكيها
:DDD

******************


السؤال الرابع عشر
هل احدث التدوين تأثيراً عليك؟ وكيف؟

اكيد انا حاسة اني بقيت على الأقل بقول اللي جوايا ومش بخاف منه
مش بخاف أعبر عن مشاعر الحب وكنت بخاف اوي زمان أني لو كتبت كلام عن الحب الناس تفهمني غلط
النسبة الغالبة هنا ان الناس بتحس اللي انت كاتبه وخلاص لأن مش ديماً اللي بتكتبه بيكون بيوصفك قد ما بيكون بيوصف حاجة حسيتها انت بنفسك او في حد حواليك

******************


السؤال الخامس عشر
اختر اي مدون ووجه له سؤال

مممم
مين مين  مين؟؟
مش عارف
انا ممكن أسألكوا كلكم انتوا بتحبوا تيجوا هنا واللا لأ؟؟
:)))
..........

انا بحب ناس كتير وكل المدونين واللي بييجوا يزوروني ومعرفتش اقول عنهم كلهم
يا ريت تسامحوني ومحدش يزعل مني