Sunday, July 29, 2012

(جوانيات وصعبانيات ما قبل النوم......(1

 


ساعات بيكون قدامنا اختيارات كتير  وبنحس ان دي مشكلة

بس هي المشكلة مش في الاختيارات دي....المشكلة لما تبقى عايز تختار حاجة...ولازم تختار حاجة تانية
يعني بمعني تاني..تعمل عكس اللي انت حابه وعايزه..ببساطة لأن اللي انت عايزة ده هو مش عايزك
...حاجة محيرة
جداااً صدقوني
.......
اختيار انك تبقى لوحدك من الاختيارات دي
اكيد مافيش حد بيحب يحس ولو للحظة انه لوحده....لكن
ساعات بنختار الوحدة بإدينا لما نحس ان اللي حوالينا بيخلونا نحس الاحساس ده طووول الوقت
وده بيكون أصعب لما ناس حواليك..المفروض انك بتحبهم وبيحبوك يحسسوك الاحساس ده
ولما بتختار انك تبعد وتبقى لوحدك بيبقي عشان تحس مجرد احساس...انك مبقتش انت اللي مستسلم طول الوقت ومحتاج حد جمبه عايز تحس انك تقدر تعيش لوحدك....حتى برضه لو لوقت قليل
عايز كمان تحس انك تقدر تسيب الناس وتبعد....مش زي كل مرة الناس هما اللي بيسيبوك...بارادتهم او غصب عنهم
...
الاحاسيس دي كلها بتكون صعبة على حد مبيعرفش يعيش لوحده...ومبيعرفش ازاي يسيب
بيفضل ماسك اوي في اللي بيحبهم مهما يعملوا فيه...ساعات ده بيكون كويس لو هما كمان ماسكين فيه
لكن لما يحس أنه عمال  يوقع مشاعره على الأرض لناس مش حاسينها يبقى اكيد فيه حاجة غلط

وممكن كمان متكونش مشكلة الناس
هي بتكون مشكلته هو....انه عايز حاجة بسيطة جداااً
ان أي حد يعامله زي ما هو بيعامله..مش حاجة صعبة على فكرة
بس الفكرة انك لما توصل متأخر اوووي أوووي وتعرف..وتتأكد...أن مافيش حد حيحطك في مكانة كبيرة زي ما انت متصور
ولو حصل ده لوقت قصير ...بعدين حتعرف ان كل واحد عمره ما حيفكر غير في مصلحته هو بس أو على أقل تقدير هو نفسه أول حاجة عنده...إزاي في لحظة اتمنيت وتوقعت ان ممكن حد يفكر فيك ويعمل حسابك اكتر من نفسه؟؟؟
ممكن يكون غباء منك....أو عبط....وممكن طيبة
مش مهم المسمى...بس ساعتها بتوصل لمرحلة بتبقى مش عارف نفسك انت كدة صح واللي حواليك مش حاسينك ومش فاهمينك واللا العكس
بيوصل بيك الحال ساعتها يا إما تقرر تتغير...والتغيير ده بيكون كويس لكل اللي حواليك لكن سيء ليك انت لوحدك
حتبقى بتعمل كل حاجة وانت مش مقتنع بيها ولا بنفسك...بتبقى واحد تاني....مش عايز تعمل حساب حد إلا نفسك
حتفضل تحسب كل تصرف بتعمله وكل حاجة تقدر تديها ترجع في كلامك وتقول بلاش
تتعلم إزاي تقول لأ بجد...مش حعمل كذا سواء أقدر اعمله أو مقدرش
لما اللي حواليك شايفينك حاجة ديماً مضمونة وطول الوقت موجود وعمرك ما حتمشي وعمرك ما حتسيب
لما تيجي تسيب الحبل اللي طول عمرك ماسكه من ناحيتك بس.....ساعتها بس ممكن يبدأوا يفكروا أنت مشيت ليه
ده لو لسه أصلاً فارق معاهم...بس هما ميعرفوش إن اللي بيفرق مع حد بيفرق وهو موجود جمبه
مش لما يسيب ويمشي ويختفي...ووقتها بيبقى الغلط واللوم عليه
ويبقى هو اللي مشى وهو اللي ساب وهو اللي باع
.......
وممكن ماتتغيرش....تفضل زي ما انت بالظبط....ومش مهم اللي حواليك عاملين إزاي المهم انك تعمل اللي عايز تعمله
تتصرف زي ما بتحس ومن غير ما تحسبها بالورقة والقلم
بس ساعتها حتوصل برضه لنفس المرحلة اللي مش حتقدر فيها تعمل اللي ديماً بتعمله
بس ممكن تنسحب في صمت تااام....تمشي برضه ومحدش يحس بيك ومن غير ما تلوم ولا تعاتب
يمكن تحقق المقولة دي
"ما اعظم ان تكون غائباً حاضر على ان تكون حاضراً غائب"
يمكن في رحيلك ده الناس يفضلوا فاكرينك ويفضل عملك باقيلك يفكرهم طول الوقت بيك
ويمكن يحسوا قد إيه وجودك كان بيعمل فرق حتى لو فرق بسيط
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

الكلام ده صعبانياتي وجوانياتي اللي قبل النوم.....هي مش قبل النوم اوي هي الأفكار دي يا اما بتجيلي قبل النوم فامش بتخليني أنام خالص أو مش ببقى عارفة انام فبتجيلي الافكار دي
المهم يعني إني في الآخر مش بعرف انام
فقلت اكتبها بقى هنا يمكن ماتجيش على بالي تاني وانام عشان محتاجة انام جدااااً
وشكلى كدة حعملها سلسلة لأي حاجة بتجيلي قبل النوم

12 comments:

Radwa Tarek.. said...

مش عارفة
متهيألي قبل كل شيء
هو قدر
أنت بتختار الحل الوسط دايماً
او عن نفسي باختار كده

اتعلمت ابقى مرنة مؤخراً نتيجة وقوفي ادام نفس الحيرة

ولو حاولتي انتي كمان هتحسي باختلاف :)
كوني بخير

ريبال بيهس said...

صباح الورد نهر الحب

كل سنة وانتِ طيبة

ورمضان كريم عليك وعلى كل العائلة

الكريمة ...

أعتقد هذي حالة معقدة جداً ومرهقة نفسياً

ولكن عندما لا يهتم بك أحد فقط لأنه يعلم

تماماً بأنك لن تغادري وستقدمي

التنازل الواحد تلو الواحد فهنا

يجب علينا التوقف قليلاً لمراجعة

حساباتنا فبرغم حبهم لنا إلا انهم

يهملونا لأنهم يعلمون تماماً أننا لن

نتخلى عنهم أبداً والعلاج في هذه

واضح جداً وهو بالإبتعاد قليلاً حتى

يعرفوا قدرنا ويشعروا بحجم ذنبهم وأن

الفراق قد يحدث والإهتمام قد يقل إذا

لم يكن هنا مقابل ....

أشاركك الرأي بأن تقومي بإنزالها

كسلسلة ففيها جانب نفسي وإجتماعي

جميل ...

تحياتي وإحترامي وأعتذاري على

التقصير .

ღ..Rozy.. ღ said...

طاب مساؤك اولاً ^_^
ثانياً حاسة بكلامك اوى ومريت بيه لما بنبقى حطين ناس فى مكانه معينة وبنعاملهم معامله معينة بنبقى من جوانا دايماً مستنين انهم يعاملونا بمعاملتنا ليهم واغلب الوقت بيخذلونا والمشكلة ان فى كل مرة بنقعد نبرر لنفسنا انه عادى وان الموضوع مش مستاهل اننا نزعل اوى كده وان كل واحد وله طريقه تفكير وان الناس مش شبه بعض بس بردو بنتعب من جوانا .. احساسا مؤلم اوى لما اللى حواليك يحسسوك انهم مش شايفينك بنفس الوضوع اللى انت شايفهم بيه بيوجعنا اوى لما نحس اننا ساعات مش فارقين معاهم ونقرر نبعد علشان زى ما انتى قولى بالظبط نقول لنفسنا اننا احنا كمان ممكن نختار اننا منشفهومش بالوضوح ده بنحاول ببعدنا عنهم نعمل ضباب او سحاب يخلينا نعمل اننا بقينا زى بعض ولما بنعيش بنفس منطقهم ونقرر نفكر اننا نستخدم اسلوبهم بيحسوا ساعتها هما بيحسوا اننا بقينا بنعاملهم وحش واننا بقينا غلطانين فى حقهم واننا بعدنا وبناخد جمب عنهم وف كل الاحوال يمكن كبرياء ضعفنا بيمنعنا من اننا نقول اللى انتى قولتيه واللى انا بقوله دلوقتى بالوضوح ده بنبقى مستنين انها تيجى منهم ويفهموا علشان لو جت بعد ما فهمناهم مش هنحس بطعم الحاجه وف كل الاحوال احنا اللى بنتعب وبنزعل ..

بغيب شويه لكن بحب اجى هنا بحس انك بتكلمينى عن مشاكلى وبنتناقش فيها ^_^

دمتى بسعادة عزيزتى ♥

نهر الحب said...

رضوي
المرونة مش ديما بتحل المشكلة لا مرونتك محتاجة مرونة اللي حواليكي كمان ولما اللي حواليكي بيوصلوكي لحيطة سد مش بتبقي عايزة تحاولي اكتر من كدة
الموضوع معقد حبتين
:))

نهر الحب said...

ريبال
وانت طيب وبألف خير
:))
دي الحقيقة اللي حصلت معايا
بس تفتكر في النهاية اللي بيعمل كدة بيعرف انه غلطان
يا ربت حتي دي تحصل
بالعكس بيزيد الجفاء لدرجة بتوصلك انه خلاص مينفعش رجوعك كما كنت
:)

تحياتي ومنور مدونتي دائما

نهر الحب said...

روزي
:))

بحب لما حد يحس الي بكتبه وينطبق عليه مع اني عارفة قد ايه الاحساس اللي كاتباه مؤلم ومحبش حد يحسه ابدأ
تخيلي التدوينة دي داخلة في شهر
ومافيش اي تغيير حصل بالعكس الوضع بيسوء
:(
الحمد لله
لكن صدقيني اي حاجة بتحصل لنا في حياتنا هي الخير ولو ربنا اراد اننا نبعد عن اشخاص معينين او هما يبعدوا عننا فده لحكمة هو يعرفها وانا راضيه بيها

تعالي هنا ديما عشان بفرح

منجي باكير said...

أهلا

كل عام و أنت بخير و عافية و رضاء

اللهم وحّد الأمّة و أزل الغُمّة

منجي

http://zaman-jamil.blogspot.com/

Timo.. said...

كل عيد وانت طيبة يا سهاد :)

نهر الحب said...

منجي باكير
اهلا بيك
وكل سنة وحضرتك طيب

نهر الحب said...

timo
كل عيد وانت طيب وكل ايامك سعادة ورضا ياااارب
:))))

reemaas said...

وجعتنى اوى يا سهاد اوى ماقولكيش ازاى

انا ديما بختار عكس الاختيار اللىعاوزاه لان اللى عوزاه مش عاوزنى..ديما

انا بفضل ماسكة فى اللىحواليا لانى مابحبش الوحدة

فى الغالب اللى بمسك فيه مش بيقدر اومش فاضى او الظروف

تعبت منالاحساس دهوقررت يبقى البعد قرارى رغم انى مش عارفه انفذه بس اخدته ومسيرى هتعلم اعمله هختارالمفروض عليا من باب الراحة

نهر الحب said...

ريماس
:((
زعلت اني وجعتك بس كلنا موجوعين عشان هي دي الحقيقة اللي بتحصلنا واحنا مش بتغير