مالي النهاردة!!

 اليوم النهاردة

عادي

يمكن زي معظم الايام

لكن اللي مش عادي

اني اجي هنا

بيتي

وقلبي

والمكان اللي بطلع في ضعفي وحزني اللي مابقتش قادرة اطلعه لحد

المكان الوحيد اللي لما بدوس علي الكيبورد

بلاقيني بكتب

بلاقيني ببكي

............

خلصت مسلسل ليالي اوجيني

وساب جوايا علامات واسئلة كتيرة أوي

وكأن الحب حيفضل هو سبب حيرتنا

نفسي اكتب عن المسلسل احساسي اكتر

بس يمكن من كتر منا ملخبطة مش عارفة اوصف حاجة

.........

دخلت علي موقع

 future me

قريت رسالة من الماضي كنت بعتها للمستقبل

وكتبت رسالة جديدة للمستقبل

أكيد كان فيها جزء من اللي جوايا

فيها عتاب

وفيها تذكرة لنفسي 

يمكن لما توصلني الرسالة اكون ساعتها اتغيرت واتعلمت

................

حاطة سماعات

بسمع علي 

soundcloud

مكس مختارتهوش

عاوزة افصل عن اي صوت حواليا

وبالصدفة

اغنية

"محدش مرتاح"

ازاي بندور ع الفرحة واحنا بندور ف جراح

محدش مرتاح

بنعيش نتمني نروح سكة وسكك مختلفة بتتراح

يظهر عذاب الحب الله استحليناه

ومفرقين روحنا ف مليون اتجاه

واللي بيبكي علينا قصادنا ومش شايفينه بعنينا

وبنبكي علي اللي راح

..................

بكرة

بنج للمرة.....مش فاكرة

عادي

مش مهم

انا اخدت علي كدة

بس للاسف تعبت من دور المريضة اللي القدر كتبهولي وان ابقي ديما منتظرة النتيجة والاشعه وراي الدكاترة

وبدعي ربنا يعافيني من اي وجع

وبسال نفسي لو الدكتور بكل بساطة قادر يكشف وجع الجسم

ليه ميكونش فيه علم يكشف وجع الروح

يشيله

او يشيل من جوانا أي حد

كان سبب في الوجع ده لأقصى درجة

وجع الروح اسوء بكتير من اي وجع تحسه في الجسم واحتمال يخف....بمجرد....حباية بنادول

.............

نفسي اشوف نفسي ف عينيك

ان انا صعبان عليك

.....................

كتبت جزء كبير وللاسف الكيبورد قررت تمسحه وميرجعش

وكانه مكتوب بس اطلع اللي جوايا ومحدش يعرفهولا يحس بيه

..................

لسه سامع كل كلمة قالها ليا

لسه شايفه زي ميكون بين ايديا

اه يا شوق خليك بقي حنين عليا

وريحلي قلبي اللي مشغول ع اللي غايب

...................

جوايا غضب وحزن

زعل كبير

مبقاش فيه حاجة تغفره

بعدت

ومش عاوزة ارجع تاني

وبعاند

حتي لو نفسي وقلبي رافضين

بس حقي

لازم يبقي فيه قانون وعقاب يجرم الخذلان

يجرم قتل الروح

يجرم اي خيبة امل حد حسسنا بيها

............................

انا كل مادا بلاقي اللي فات

مصمم ميقلبش ليه ذكريات

وبتأكد اني ف غيابه ماليش 

نصيب تاني ارجع احس بحياة

....................

حكايات بيتوتية

الحقيقة الوضع اللي احنا فيه بقي غريب بنصحي كل يوم الصبح كأن امبارح كان حلم وكأن بكرة حاجة منقدرش نتوقع منه ولا ثانية واحدة

بقالي حوالي عشر أيام في البيت وبقالي كتير صامتة علي الفيس بوك بعيداً عن الصراعات والآراء الغريبة والفتي
افتكرت مدونتي الحبيبة قلت آجي هنا اتكلم مع الفراغ العظيم حيث مفيش حد يسمعك ولا يفكر يزورك
حيث كل شيء حواليك بقي عادي ...و انا لوحدي مع أم كلثوم ع الراديو بتغني حب إييييه اللي انت جاي تقول عليه

المهم
مع وجودك في البيت طول اليوم نظرتك للأمور بتختلف ورغم الراحة الجسمانية إلى حد كبير إلا اني برضه مش مرتاحة
ومشكلتي مع نفسي اني بحب الشغل برغم كل مساوئه وضغوطاته والغريب اني اصلا بشتغل في البيت برضه عادي جداً
بس الدنيا مختلفة
أحاسيسي مش حلوة وأنا من الناس اللي بيأنبوا نفسهم طول الوقت وده شيء مرهق وعندي اوفر ثينكينج طول الوقت ودي شيء مفزع 
فبقي اليوم عبارة عن شوية شغل مع وجود زين وده ارهاق زايد وكتييير من تأنيب الضمير
شوية اشتياق لناس مبقوش موجودين في حياتنا واسئلة كالعادة ملهاش اجابات
نفسي اقرأ ونفسي أكتب وماليش نفس ولا طاقة برضه
نفسي أعرف خيط المشكلة عندي فين ومش لقياه اللي خلاني مبعملش أي حاجة في حياتي تبسطني وأحس اني بعمل حاجة حباها ومختلفة
يعني كدة ممكن الواحد يموت وببساطة ولوحده وميبقاش عمل حاجة تذكر في حياته لنفسه أو لغيره
عندي احلام وحاجات بالهبل مؤجلة ونفسي اتحرك واعملها
انا حزينة اني كدة ومكنتش كدة
المهم بقي اننا مش عارفين كورونا حتقضي علينا والا ايه وحنفضل عايشين أصلاً والا لا والوضع حيوصل لإيه بس انا الغريب اني النهاردة متفائلة ان الدنيا حتبقى احسن ان شاء الله