Monday, April 28, 2014

مع البحر.....والذكريات

لما تبقى فعلاً محتاج لتمشية ع البحر
تطفي فيها ذهنك....تغمض عينيك لحظات....تاخد نفس عميق
تشم ريحة البحر وتملا صدرك بهواه
تسيب رجليك تمشي لأي مكان حتى لو تعبان
لو رجليك وجعاك....ولو مش حاسس انك تقدر
حتقدر
من غير ما تاخد بالك
وحترتاح من كل التعب
حتلاقيك بتفتكر حاجات كتير .....لقطات عدت من حياتك
ذكريات...حلوة فوق العادة....ومش مجرد ذكريات
ساعات بيمر علي فكرنا أيام بطولها عشناها ازاي بتفاصيلها
 ولما نفوق نلاقينا في زمن تاني ومكان تاني
..................................
مش حتقدر أبداً تسكت الذكريات دي ولا حتقدر تقول لقلبك...لأ....وقف
مش عاوز أفتكر....مش عاوز أحس....مش عاوزك تدق الدقة دي بالذات
فعلاً مش حينفع
ينفع بس انك تسيب نفسك خالص وتسيب قلبك شوية يمشيك على مزاجه......مع انه طول عمره بيعمل كدة
بس كأنك حاسس انه عاوز حاجة بقالك كتير مش عاوز تعملها
مش مهم نفتكر ذكريات بنحاول ننساها
 وعادي لو قلبنا دق دقة بقت غريبة عليه
الغريب لو نحاول نعمل عكس ده
نحاول نكذب على نفسنا وبس نعمل اننا جدعان اوي واقوياء أوي وقلبنا مبيحسش حاجة وعقلنا مش بيفتكر حاجة
دي مش حقيقة ولا عمرها كانت ولا حتكون حقيقة
الذكريات بتبقى صندوق قافلين عليه بميت مفتاح الحاجات اللي جواه مبقتش تهمنا ولا بقينا نهمها غير انها موجودة معانا جوه القلب نطلعها وقت ما نحب ننفض من عليها التراب الكتير نضحك شوية ونبكى شويتين ونقفل الصندوق ونرجع لحياتنا عادي
بس ساعتها.....لازم....لازم نقفل الصندوق جامد أوي
لأنه لو فضل مفتوح لا حنعرف نرجع اللي فيه ولا حنعرف نعيش اللحظة اللي احنا فيها
..............................
حتلاقي نفسك خلصت كلام
حتفوق كأنك كنت في حلم طويل
حتبص حواليك ويمكن تستغرب
حتلاقي البحر زي ما هو
سمعك
 كويس....كويس أوووي
وأمواجه خبطت في الصخر بترد عليك وتطمنك ان سرك خلاص اتحفظ جواها
وعمرها ما حتطلعه
........................................
تمشي كمان شوية
تشغل فيروز....لازم فيروز
تلاقيها أغانيها كلها حنين وذكريات
تسرح تاني
وتفتكر حاجات أكتر وأكتر
وتفضل كدة لحد ما تقرر تقفل كل الصناديق
وتاخد بعضك وتروح
روحك مش هيّا
مغسولة بهوا وريحة البحر و طعمها مليان ذكريات
...........................................
وووووووووووووبس

شكراً أوووي أوووي أووووي
نور خطاب
:)