Friday, March 21, 2014

(جوانيات وصعبانيات ما قبل النوم......(10

كالعادة
ملخبطة
مجتش بقالي كتير
مقرتش بقالي كتير
والغريب ان معظم المدونين اللي عندي هجروا مدوناتهم برضه
..........
بزعل لما بحس الاحساس ده
انك تبقي عاوز تعمل حاجة ومش قادر تعملها
عدم القدرة بييجي من قلة وقت أو قلة تركيز أو قلة مزاج أو ان دماغك تبقى عاملة ديماً زي الخلاط اللي فيه كوكتيل محترم من حاجات
كتير ليها لازمة وملهاش لازمة
يمكن يكون بسبب 
فترة صعبة بمر بيها
صحياً ونفسياً وظروف متلخبطة
اختبار صعب في وقت صعب
وقت ممكن الناس من براك يحسدوك عليه عشان محدش يعرف اللي جوه
مريت بفترات زي كدة ويمكن اصعب او اسهل من كدة ولما بفتكر اللي فات بقول ان شاء الله حعدي زي ما ربنا نجاني كتير
لكن مع انتظار.....وخوف.......وتعب.........وحزن
ويااااااارب

................................................................................
sliding doors
فيلم شوفته من فترة وكل فكرته كانت عن البطلة اللي كانت رايحة تركب المترو وملحقتهوش ومش قادرة تشيل من دماغها فكرة انها لو كانت لحقته كان ايه اللي حصل
الفيلم ماشي في خط متوازي بين الحقيقة اللي حصلت وبين اللي كان ممكن يحصل
الغريب في الفيلم ان النتيجة كانت بترجع لنفس النقطة في الحالتين يعني اللي مكتوب برضه حتشوفه مهما عملت المهم ترضي باللي انت فيه ولو قعدت تفكر لو كنت عملت كدة كان حيحصل كدة ده مجرد هبل وتضييع وقت واختياراتك ديماً بايديك ولو معملتش خطوة دلوقتي انت السبب انها تتأخر عنك وتبعد هيا كمان
ممممممممممم
مع كل ده الفيلم ده كل شوية بفتكره لمجرد فكرة بتجيلي كل وقت وبتضايق لما بتجيلي
الفكرة عن موقف حصل من حوالي سنتين واني لو كنت اتصرفت فيه بطريقة معينة كان ايه حصل
انا عارفة اني المفروض مافكرش كدة بس فعلاً غصب عني زي الفيلم بالظبط بلقطة الحياة التانية اللي كان ممكن تحصل
وارجع اقول القدر ووووو....واسكت
والحمد لله

..............................................
فرحانة ان مبادئي زي ما هي متغيرتش رغم رهان ناس كتير حواليا عليا اني حغير فكري مع تغيير ظروف حياتي
لكن الحمد لله لسه صامدة وده بيقويني اكتر ان افضل كدة
.................................................................

نفس الاحلام
بنفس الناس
بنفس العلاقات...اللي كانت
بنفس الاحساس
بنفس السؤال ....ليه؟؟
ليه احلم بالناس دول
ونفس الاجابة
مش عارفة

..........................................................
نفسي اخرج
نفسي اروح 
cinnabon
واكل
cinnabon with extra caramel souse

 
ونفسي اكل الاكلة اللي بحبها عند
roastry
اللي جوة المنتزة
واحلى بال
banana split
واتمشي بعدها على الكوبري اللي بطول البحر
يااااااااااااااااااااااااااه
وحشني اوي اووي البحر

.......................................................................

البحر
مش مصدقة اني مبقتش اشوفه
حتى وانا راكبة المواصلات مش ببص عليه
والصبح مبقاش ينفع ولا اقدر امشي للشغل زي ما كنت بعمل الحكاية دي مأثرة جداً في نفسيتي
وفي نفس الوقت
البحر مرتبط عندي بأفكار وذكريات كتير
بحس ان عقلي الباطن كرد فعل مش عاوزني افتكر حاجات معينة وبيخليني ابعد عن البحر
بس وحشني
وحشني اووووي
ووحشني كلامي وفضفضتي معاه
وحشني اني اسمع فيروز وانا بتمشى علي الكورنيش الساعة 7 ونص والدنيا هدوء ومافيش غير ريحة البحر وصوت امواجه
آآآآآآآآآآآآآآآآآآآآآآآآآآآه يا ني
):


القمر كمان اللي كنت بدور عليه كل يوم وعارفة معاده مبقتش بشوفه خااااااااالص ولا حتى صدفة
انت كمان وحشتني
..............................
بس كفاية كدة