Friday, July 13, 2012

سكوووووت



ساعات بيكون الكلام مش قادر يعبر أبداً عن اللي جواك فتسكت

السكوت يمكن يعبر عنك أكتر
 يفضل كلامك جواك بس وممكن تقوله لأي حد بس الحد ده برضه بيبقى جواك

...............

......مممم

........مش فاهمين

اصلي هي حاجة معقدة كدة....زي ما تكون بتكلم نفسك...بس وأنت ساكت

صدقوني ...يمكن أكون مجنونة....بس دي الحقيقة انا بيحصل لي كدة

بفضل ساكتة كتييييييييييير اوووي اوووي مش قادرة ولا عارفة اتكلم مع حد فبحتفظ بالكلام وأفضفض مع حد موجود بس في خيالي انا بس
 حد بيسمعني وساعات كمان بسمعه بيرد عليا...احساس زي وانا ماشية علي البحر....مش ببقي حاسة
بأي حاجة حواليا غير أن قلبي بيتكلم

مش ببقى مبسوطة بعدها لأني ببقى عارفة ان دي تهيؤات واني لوحدي ومافيش أصلاً حد جمبي أكلمه في الحقيقة.........ولو فيه.....إيه فايدة انك تتكلم مع حد عمره ما حيفهمك ويحس بيك


كتير بنتكلم ونقرب من ناس وفجأة منلاقيش الناس دول جمبنا...لأي سبب...مبقوش زي زمان...أو احنا اللي اتغيرنا يمكن....فارقونا..او احنا فارقناهم.......مش مهم....فيه حاجات كتيرة بقت مش مهمة بس للأسف على ما نفهم بيكون عدى كتيييييييير أووووي واحنا بنتعلق بسراب معاه وفي آخره بنقع....لازم نقع
..........
................
وكتير قلوبنا بتتملي كلام ولما بتتملى بتحس كأنك كنت عمال تجري بقالك مليووون سنة ومن كتر الجرى نفسك راح
انا كتير بحس ان نفسي راح خلاص.....وكل ما بيروح....برجع وبعاند وبقوم أجرى تاني
وتالت.....يمكن لحد ما اموت حفضل أجري من غير ما أقف
بس نفسي وانا بجري مابصش ورايا ولا حواليا.......اجري وخلاص لا اسابق حد ولا حد يسابقني ولا حد يكعبلني.....نفسي يسيبوني في حالي ولو قلبي اتملي ومقدرتش اخد نفسي حموت...حموت لوحدي وانا واقفة في مكاني وخلاص....مش عاوزة حد وهو معدي ينتبه ليا ولا يشفق عليا ولا حتى يبقي يعرفني....يمكن دي قسوة.....لكن صدقوني مافيش أي أهمية لناس حواليك شكلاً....لكن سايبين جواك فراااااااااغ كبييييييييير اووووي



البوست مشاركة في حدث
التدوين اليومي

11 comments:

nesma ezzat/نسمه عزت said...

رائعه جدا عجبتنى بجد
مافيش أي أهمية لناس حواليك شكلاً....لكن سايبين جواك فراااااااااغ كبييييييييير اووووي

ابراهيم رزق said...

الصمت لغة و معبرة

فاحيانا الصمت حزنا
و الصمت فرحا
و الصمت اعتراضا
و الصمت موافقة
و الصمت حكمة
و الصمت تهورا

تحياتى

Bent Men ElZman Da !! said...

الصمت مش معناه ضعف او عدم وجود كلام نقوله
الصمت بيخبى وراه حاجات جوانا كتير اوى
بتكون اكبر حتى من اى كلام ممكن نقوله

Hebatullah said...

انتي جيتي علي جرحي والله

Nour said...

الجزء الأول ده بيحصل معايا كتير في الشارع وانا ماشية لوحدي او في المواصلات والاكتر على السرير قبل ما انام وساعات بيجيلي فترات طويلة من الصمت حتى مع نفسي
الناس كتير بتكون حوالينا شكلا بس فعلا لكن مع ذلك مش بنقدر نتخلى عنهم كتير بيجيلي نفش الشعور بتاع انا مش عايزة حد ده بس في الاخر بنلاقي نفسنا في النص تاني معاهم حد زقنا بقى او روحنا برجلينا مش بتفرق ساعتها :D
معلش طولت بس البوست حلو اوي اوي .. كتير بحس ان تفكيرنا متشابه بنسبة كبيرة
على فكرة انتي وحشاني اكتر

دعاء العطار said...

أنا جيت

:(

ليه كده ياساسو يوم مااجيلك الاقيكي زعلانة :(

بس عارفة احسن حاجة اننا نصاحب نفسنا لان صدقيني كل البشر مهما نتعلق بيهم ويتعلقوا بينا غصب عنا وعنهم بنبعد وبيبعدوا

ممكن اطلب طلب صغنتوت

كوني بخير عشان خاطري :)

ع فكرة قريت البوست اللي جيبتي سيرتي فيه

ربنا يخليكي ليا يارب ونفضل قريبين طول العمر :)

reemaas said...

كده مش شبهى كده توأم حبيبتى هههههههههههه
مش مستغربة اى حرف لان كل ده بعمله بكل تفاصيله وده بيخلينى مابقتش برتبط بالناس اوى وبتفهم غلط وبتبان انها قسوة
لا مش قسوة ده اكتفاء ذاتى من صورة البنى ادمين فى حياتى

rona ali said...

انا رديت علي البوست دة ردى اتاكل ولا ايه

نهر الحب said...

نسمة
:)
شكرا لوجودك

ابراهيم
بس هو مؤلم ومحير معظم الوقت

بنت من الزمن ده
اكيد بس لازم حد يفهمك صح

هبة الله
كلنا جوانا نفس الجروح

نوووووور
اكيد دلوقتي مش وحشاكي
:DDD


دعاء
:))
انا كويسة الحمد لله لا تقلقي
مقدرش ماجبش في سيرتك
:DD

ريماس
مش بقولك بلوتو
هو بلوتو
:DD

رونا
مش عارفة انا مش عارفة
:))

wella said...

ياااااااااااااااه البوست دة انا حسيت انى انا اللى كتباه من كتر ماهوة منطبق عليا
فعلا مع انى رغاية جدا بس اوقات كتير جدا بسكت مش بتكلم ولا بحكى بعد ساكتة واكلم نفسى وترد عليا دة حتى احيانا كتير بتخض لاكون بتكلم بصوت عالى وحد يسمعنى ههههههه
مع ان الحكاية دى بتدايق الناس اللى بيحبونى بجد عشان بيبقوا عاوزنى افضض لهم بس انا مابقاش قادرة اتكلم بحس ان السكوت احسن وبستريح فية فعلا السكوت بيبقى معبر اكتر اصل هقول اية البوست عجبنى اوى حسيت انى انا اللى كتبتة
انا بقالى كتير جدا مع دخلت مدونتك او مندونتى بس وحشتنى مدونتك واستيال فاتن حمامة وعمر الشريف بجد حلو اوى

نهر الحب said...

ويلا
:))
انتي كمان وحشتينا ووحشنا كلامك

السكوت حل مريح احيانا كتير بس صدقيني وقت ما ييجي وقت للكلام بيطلع كلام جارح جدا
:(