Friday, July 06, 2012

عني...وعن مدونتي :)

التدوينة دي مشاركة في حدث
التدوين اليومي
وهو بوست موحد فيه أسئلة نجاوب عليها
انا عاجباني الفكرة جداااااً
نبدأ باسم الله
:)

السؤال الأول
عرف نفسك

لو الاسم يبقي سُهاد
لو تعريف ممكن اقول اغنية اليسا عشان عاجباني وحاساها شبهي
:))
انا واحدة عادية رايحة مع الدنيا وجاية بني آدمة ليا وعليا أنا مش مثالية..بأقل كلمة انا بتضايق  لكني برجع في دقايق واتراضى بسرعة
أنا أصلي من جوايا طفلة وساعات كتيرة بكون عاقلة وساعات مندفعة
******************

السؤال الثاني
ما اكثر ما يميز شخصيتك

مش عارفة اجاوب على السؤال ده بس انا أكتر حاجة بحبها في نفسي هي الكتابة ولولا الكتابة مكنش زماني قادرة أعيش

******************

السؤال الثالث
ما هي أهم نقطة تحول في حياتك

اكيد برضه لما بدأت أكتب اتغيرت كتيييييير وبدأت أتكلم وأحكي كل اللي مكنتش بقدر أعمله قبل كدة ولما بدأت أشتغل

******************


السؤال الرابع
كيف دخلت عالم التدوين

كنت في أولي كلية وطبعاً كلية الصيدلة صعبة ومكنتش باخد نفسي خالص في أي حاجة حضرت ندوة فيها شعر وحاجات أدبية وكانت حلوة جداااً وعرفت منها عالم المدونات وقلت ساعتها ليه معملش مدونة وأكتب وأقول اللي جوايا
وفعلاً عملت المدونة
:))

******************


السؤال الخامس
ما هو اسم مدونتك وكيف اخترته

اسم مدونتي نهر الحب
اخترته لأن الفيلم ده اكتر فيلم بحبه في حياتي بعيداً عن قصة الخيانة اللي فيه لكن بحب المشاعر اللي ملياه وكل كلمة فيه وبحب فاتن حمامة جداً وكان نفسي اعمل حاجة شبه العالم ده عالم الأبيض وأسود بتاع زمان لأني شايفاه أحلي وقت وأرقى حب وأنقى مشاعر
ونفسي أعيش في الزمن الأبيض وأسود ده

******************


السؤال السادس
صف مدونتك

مدونتي عبارة عن كلمات...انا ديماً بقول اللي بكتبه مجرد كلمات جوايا وجوه ناس كتير كلمات عن الحب والحزن والحرية
ساعات عن الأمل وساعات عن اليأس فيها كل مشاعر ممكن أي حد يمر بيها وميقدرش يعبر عنها ويمكن ربنا ادانا القدرة على التعبير دي عشان نعبر عن مشاعر بعض وعن ناس فعلاً مبتقدرش تقول اللي جواها
.....
مدونتي هي حياتي
..........

******************


السؤال السابع
من هم اكثر ثلاث شخصيات أثروا بك من داخل عالم التدوين ومن خارجه

حبدأ بخارج عالم التدوين
 ومن المشاهير...الكاتبة أحلام مستغانمي
قد إيه بجد تقدر توصف أدق المشاعر  وقد إيه حاسة اني اتأثرت بيها جداااً في كل اللي بكتبه

تاني حد هي دكتورة صيدلانية اسمها دكتورة سلوي كنت بتدرب معاها من تاني سنة كلية  واتعلمت منها كتيييير في الحياة وفي الشغل وليها فضل كبير عليا بعد ربنا طبعاً
حكتفي بدول

داخل التدوين
 اول حد ابراهيم عادل
صاحب مدونة
انا وانا
ابراهيم صديقي من بداية التدوين لحد دلوقتي وبصراحة هو لازمله بوست لوحده بس أهم حاجة عملهالي ابراهيم انه خلاني أحب القراءة أوووي أوووي وكنت بغير منه لما الاقيه بيتكلم عن كتب هنا وهناك وبقيت لما اقرأ أي رواية اخد رأيه فيها
ابراهيم مبيدخلش مدونتي بقاله كتييير جداً وبيكتب قليل في مدونته بس مش مشكلة
:))

 تاني حد
ريماس
و ريماس
و دعاء
لازم يتقالوا مع بعض بصراحة يمكن لأني عرفتهم في نفس ذات الوقت
ريماس "نور" ودعاء شبههي جداااً في احساسي وكتاباتي بحب ادخل عندهم عشان أقرأ نفسي في كلماتهم

ريماس
"نافذة حلم"
الانسانة الرقيقة الرومانسية أووي اووي اللي الوحيدة اللي بتحسسني انه فيه أمل وان الحب أقوى من أي حاجة
بدخل عندها لما ببقى فاقدة الأمل في كل حاجة حواليا
بس بسكت كتير قدام كلماتها
:))

تالت حد
تامر مغازي
صاحب مدونة
آسف على الازعاج
مدونته مختلفة جداااً أول مرة دخلتها قعدت قريت كل التدوينات اللي فيها تقريباً
هو مش بيكتب كتير بس عشان كل كلمة بيكتبها بحس ليها قيمة ومعنى وده مش موجود عند أي حد
بحس اني بتعلم منها وفيها تدوينات وكلمات عميقة أوي
من اكتر المدونات اللي بدخلها أقرأ فيها حتى لو حافظة اللي مكتوب
******************
السؤال الثامن
ما هي طقوسك الخاصة عند الكتابة

هي مش طقوس ولا حاجة انا البوست عندي بيبدأ بكلمة تيجي على بالي في لحظة أي لحظة حتى لو نايمة بس المعظم بيكون قبل ما انام على طول تفضل الكلمات تيجي على بالي زي المطر بالظبط وانام وأصحي فاكرة الكلمات دي واول فرصة الاقيها بكتبها وبنشرها على طول بس انا مش من النوع اللي بيمسك ورقة وقلم ويقول ها عايزة اكتب بقي دي بتحصل في حالات قليلة أووي اووي وانا متضايقة وحاسة جوايا كلام ومش عارفاه إيه هو ده بيكون في التدوينات اللي عبارة عن فضفضة زي دي كدة

******************


السؤال التاسع
ما هو اسلوبك المفضل في التدوين

هو مش فاهمة السؤال اوي بس حعتبر اجابته في السؤال اللي فات
:DDD

******************

السؤال العاشر
ما اهم ما يميز تدويناتك

برضه مش عارفة بس زي ما قلت قبل كدة انا اكتر حاجة بحبها وبتفرحني بجد لما اكتب حاجة تلمس حد حتي لو بكلمة أو سطر ويقولي انتي عبرتي عن اللي جوايا
بس
:)

******************


السؤال الحادي عشر

انا تعبت بقي
:DD
ماهو تقييمك لعالم التدوين في الفترة الأخيرة
بما اني مدونة من زمن مش قليل اللي هو 6 سنين ده متهيألي دلوقتي احسن كتير من زمان أنا افتكر اول ما بدأت كانت لسه فكرة المدونات منتشرتش وكانوا بيهاجموها في الجرايد بس دلوقتي العالم بقى مفتوح جداااً احسن من الأول

******************


السؤال الثاني عشر
ما هي اقرب تدويناتك إلى نفسك

هو أي حاجة بكتبها بحبها بحس انها بنتي مش عارفة ليه بس انا فاكرة اليومين دول تدوينة كنت كاتباها السنة اللي فاتت في نفس التوقيت ده تقريباً بس بحبها جداً وقريبة من قلبي اوووي اوووي اسمها
بين اللحظات....حياة

******************


السؤال الثالث عشر
استعرض اهم المواقف الطريفة الي صادفتك مع التدوين

مش فاكرة حاجة طريفة بس حصلتلي صدفة جميلة جمعتني بأحد المدونين
بس دي حكاية طويلة مش ححكيها
:DDD

******************


السؤال الرابع عشر
هل احدث التدوين تأثيراً عليك؟ وكيف؟

اكيد انا حاسة اني بقيت على الأقل بقول اللي جوايا ومش بخاف منه
مش بخاف أعبر عن مشاعر الحب وكنت بخاف اوي زمان أني لو كتبت كلام عن الحب الناس تفهمني غلط
النسبة الغالبة هنا ان الناس بتحس اللي انت كاتبه وخلاص لأن مش ديماً اللي بتكتبه بيكون بيوصفك قد ما بيكون بيوصف حاجة حسيتها انت بنفسك او في حد حواليك

******************


السؤال الخامس عشر
اختر اي مدون ووجه له سؤال

مممم
مين مين  مين؟؟
مش عارف
انا ممكن أسألكوا كلكم انتوا بتحبوا تيجوا هنا واللا لأ؟؟
:)))
..........

انا بحب ناس كتير وكل المدونين واللي بييجوا يزوروني ومعرفتش اقول عنهم كلهم
يا ريت تسامحوني ومحدش يزعل مني


14 comments:

ريـــمـــاس said...

صباح الغاردينيا سوسو
صباحك حب وشوق لأنك واحشاني وحجاوب على أخر سؤال ايوة بحب اجي هنا عشان بحبك وبحب رقتك ورومانسيتك واحساسك الحلو وكمان أكتشفت حاجة مشتركة بينا أنا بحب أفلام الأسود وابيض :) عشان غالباً رومانسية هههههههههه
سوسو بجد دمعت عيني وماكنتش فاكرة اني حلاقي اسمي هنا رغم أني متأكدة أنه جوا قلبك لانه مش معقولة ابقى بحبك الحب دا وماتحبينيش هههههههه <<< هو الحب بالعافية
يلا بقى حمشي ماأنتي عارفاني رغاية "
؛؛
؛
لروحك عبق الغاردينيا
reemaas

;كارولين فاروق said...

طبعا انا بحب اجي مدونتك
وانتي عارفه كده
وجميل اعرف معلومات عنكِ
جميله
وانا بحب الابيض والاسود في الافلام
بس مش كلها
تحياتي

rona ali said...

مدونتك اولا من وقت ما ظهرلى انك رديتى علي الاسئله مكنتش راضيه تفتح اساسا
وفضلت كده ليومين احم بقي

بصي بقي اجباتك اجمل اجابات صادقه وواضحه شوفتها يابنت انتى
قربتنى وعرفتنى منك كتييير :)

البوست اللى بتعتزى بيه انا قرأت منه شويه وهكمله بقي اهو اكيد لانه باين عليه انه فظييع من اول سطرين

سؤالك بقي
انا معرفش بدخل هنا بحس بحاجات كتير اوى ولما بحسها بحس ان دة جزء من نجاحك او تحقيق لاهدافك :\

انتى شخصيه حاله فعلا علي بعضها بيكون صعب اوقات كتير تتوقع رغم بسطاتها بمشاعرها في اللحظه دى ايه
بس بتعرفي توصلي مشاعرك واحاسيسك وافكارك حلو ودة اكتر شئ بيعجبنى

انا بحبك يا بنت انتى كدهو لله في لله بقي :)

reemaas said...

:)


طبعا بحب اجى هنا

كفاية اسمع بس الاغانى هنا حتى لو ماكتبتيش جديد ثم انك قولتيها

انتى شبهى..يعنى لو مكتبتش وجيت هنا يبقى كانى كتبت :)


هعمل الواجب النهاردة باليل ان شاء الله

ابراهيم رزق said...

احنا بنحب مدونتك بس هى مش بتحب
مكنتش عايزة تفتح
هههههههههههههههههههه

بجد مدونتك جميلة
و بعدين ايه حكاية صيدلة
واضح ان انتوا هتحتلوا بلوجر

تحياتى

هبة فاروق said...

اولا اسمك تحفه يا سهاد
ثانيا سؤالك بنحب نيجى هنا ..طبعا هو ده برضو سؤال بنيجى علشان نشرب من نهرك الرومانسى الرائع وكلماتك الصادقه
مدونتك حلوه وكلامك حلو
انتى كده على بعضك جميله يا سوسو

نهر الحب said...

ريماس
انتي رغاية
يا سلام طيب يا ريت الرغي كله يبقي دة يا ريت
اه طبعا انتي عندك شك انك جوه قلبي واللا ايه؟

:))

نهر الحب said...

كارولين
:))
وانا بحبك تيجي هنا اوووي
:))
وانا اكيد مش كل الابيض واسود ناس معينة كدة زي عمر الشريف وصالح سليم
:DDD

نهر الحب said...

رونا
عارفة قريت كلامك وفرحني اووووووووي متتصوريش قد ايه

عايزاكي تكملي التدونية اللي بحبها عشان ليها معاني كتير اوي حتعجبك

يا ريت فعلا ابقي عملت اللي بتمناه لما حد يحس اللي بكتبه

نهر الحب said...

ريماس
*_*

دي حقيقة احنا شبه بعض جدااا هي صيدلة بتعمل كدة واللا ايه
:))
مستنية بفارغ الصبر

نهر الحب said...

ابراهيم رزق
:))))))))
المدونة مكنتش بتفتح لسبب ما كدة انا عارفاه وهو اني كنت عاملاها يشوفها البلوجرز بس يعني اللي يقرا لازم يكون داخل علي الاكونت بتاعه وبعدين منفعش بقي
:DD

مالها بقي صيدلة مش عباقرة والنبي

نهر الحب said...

هبة
ربنا يخليكي
:)))))

انا كمان بحب مدونتك
انا محضرالكوا تدوينة مفاجئة واعتراف جامد جداااا قريبا ان شاء الله

Nour said...

اولا عايزة اقولك اني كل مرة بدخل هنا بكون متأكدة اني هقرا حاجة متميزة وكمان بتلمسني جدا
بحب احساسك اوي ووصفك للمشاعر ورقتها
من اول اسم المدونة نفسه اختيارك للفيلم وزمن الابيض واسود في حد ذاته متميز والاغاني دي بقى حاجة تانية خالص

بحسك كتير جواكي حزن او حتة ضلمة كده بس بتحاولي دايما تداريها او تتغلبي عليها بالكتابة مش عارفة اذا كان احساسي صح او لأ

انا كمان الكتابة ضافتلي كتير وخلتني اتغلب على حاجات كتيرة جدا الحمد لله

البوست هقراه ان شاء الله واقولك رأيي وفي الاخر بقى بعد الرغي ده كله احب اشكر عالم التدوين كله انه عرفني على شخصية زيك بجد
انا بحبك جدا جدا على فكرة <3

نهر الحب said...

نور
:))))))))))

ممم
انا كمان والله فرحانة اني عرفتك انتي ناس كتير

حتة ضلمة وحزن اكيد جوانا كلنا وبتظهر معايا في الكتابة كتير
مش بعرف اداريها

وووبس
كان نفسي اقرا عنك
ومازلت منتظراكي