Monday, September 24, 2012

(جوانيات وصعبانيات ما قبل النوم......(4

أكتب إيه؟؟؟
بيجيلي الصوت الغريب ده يقوللي
عايزة اكتب...عايزة اكتب....عايزة اكتب
ومش ديماً بكتب بالطريقة دي
.... بكتب لما تجيلي فكرة
.... لما احس احساس
.... لما احس كلمة
.....ولما امشي على البحر
.............
***************************

ليه مش بنسى؟؟؟؟
كل حاجة بقت مرتبطة بكل حاجة
مش قادرة اكره الفيلم...ده بالذات اللي بحبه أووي وكل كلمة فيه ليا معاها ذكرى وحاجة حلوة
والأغنية دي...اللي كمان شغالة دلوقتي بالصدفة
ومش قادرة خااالص اعرف حعمل ايه بعد كدة
...حقدر
واللا مش حقدر؟؟
.............
***************************

 اشارات واللا تهيؤات؟؟
اشارات تاني وتالت ورابع
هنا وهناك وفي كل حتة
اصلي الفيلم والاغنية مش اشارة
بس الظهور فجأة..ده اشارة
اني اعدي على نفس المكان من غير ما اقصد..ده اشارة
الاحساس ...والحلم ده اشارة
ويمكن حتى علبة الدواء دي اشارة
...آآه
....لأ
...آآآه
....لأ
!!!...مش عارفة
..........
***************************

بنبقى عاوزين نروح مكان
نروح وخلاص...والفرص كتير
عاوزين نودع حاجة ممكن منعرفش نقربلها تاني
ومش قادرين حتى علي لحظة الوداع دي
بنفضل من بعيد نودع كل حاجة ونراقب اللي بيحصل وندمع
ومحدش أبداً بيعرف
.........................
***************************

هو أنا ....صح
واللا غلط؟؟؟
اتسرعت
لسه مش عارفة
بس خايفة
......مرعوبة
مبحبش اخاف من بكرة كدة
ولا ابقى مش مركزة كدة
....بصراحة
كتير بحب حياتي مرتبة حتى لو كانت مملة وتقليدية إلى حد ما
بس لما تتغير لدرجة الكعبلة بتخلبط وبحس اني تايهة
كأن حد رماني وسط البحر وسابني
...........
***************************

خايفة من إيه؟؟؟
زي ما قلت
...من بكرة
....من الفشل
من حاجة تاخد مني حريتي اللي بحبها
حتى لو دي حاجة بتمناها
مش بحب حاجة...أو"حد" يتحكم فيا
مش قادرة ارسم مستقبلي وحتى اتخيل بكرة عامل ازاي
مش لازم يكون حلو...أو وحش
بس أحاول أرسم ملامح منه أشوفها بعيني محسش أني ماشية مغمضة عيني ومش عايزة افتحها وممكن في أي لحظة اتكعبل وأقع
المستقبل وبكرة بإيد ربنا اكيد
...صدقوني ملهاش علاقة باللي بقوله
..........
***************************

ديماً بحس جوايا اتنين
حد من بره فرحان وبيضحك طول الوقت ماشي بيعمل اللي المفروض يتعمل
مش بيقول لأ..ومش متضايق...وماشي الخطوات اللي كل الناس ماشياها
وحد جواه متضايق من الحد اللي بره ده أووي
حد زعلان ومش موافق علي أي حاجة التاني بيعملها
مش قادرة اوفق بين الاتنين دول
أبداً
وده متعب جدااااً
............
***************************

بحب غزل البنات جدااااً
ونفسي أشتريه وبشوف الراجل معدي  قدامي ومش بعرف اقوله عاوزة
مش عارفة ليه
:((
.............
***************************

آخر حاجة
.....نفسي أعرف
أنا.....إيه؟؟؟؟

5 comments:

reemaas said...

علشان مكسوفة تقوليلى هات غزل البنات ههههههههههههههههههههههههههههههه

مقدرى جدا خوفك ده وحرصك على ترتيبها حتى ولو ترتيب ممل ده طبيعى زى ما قولتلك

الفشل وحش وخصوصا بعد استقرار وبالتالى بنخاف نجرب وده خوف البدايات اللى كنت حكيت عنه لو تفتكرى بس فى حالتنا لازم نجرب

لااااااااااااااااااااااااااازم

Nour said...

موضوع ترتيب الحياة ده انا كنت بعاني منه من شهر كده .. يمكن لما حد كان بيتكلم عنه كنت بحس امه حاجة عادية لكن لما جربتها بجد عرفت انه ممكن يبقى من اسوأ الحاجات اللي ممكن تقابلنا

اعتقد الخوف من بكرة ومن الفشل ده لازم .. بس طبعا كله بحدود وحد الخوف من بكرة او الفشل هو ان خوفنا ده مايوقفناش ابدا

انا كمان بحب غزل البنات بس بختف اجيبه عشان بيبهدلني لبس وشكل وكل حاجة :D:D


ديماً بحس جوايا اتنين
حد من بره فرحان وبيضحك طول الوقت ماشي بيعمل اللي المفروض يتعمل
مش بيقول لأ..ومش متضايق...وماشي الخطوات اللي كل الناس ماشياها
وحد جواه متضايق من الحد اللي بره ده أووي
حد زعلان ومش موافق علي أي حاجة التاني بيعملها
مش قادرة اوفق بين الاتنين دول
أبداً

دي بقى انا :)

ريـــمـــاس said...

صباح الغاردينيا سوسو
كلنا بنخاف من بكرة غصب عننا وكلنا بتتكعبل حياتنا لحد مانخاف بجد منها ومن الي حاسينه عارفة حسيت بكلامك دا اوي بس عارفة ماتكسفيش من بتاع غزل البنات ولما تشتري من عنده هاتي لي وحدة وكليها نيابه عني وأفتكريني وأبتسمي طبعاً :)
بحبك والله وبحب الطفلة الصغننه الحساسة اوي الي جواكي "
؛؛
؛
لروحك عبق الغاردينيا
كانت هنا
reemaas

momken said...

.....

نهر الحب

الخوف من بكره مش هيغيره
الافضل نستعد لبكره

...
الخوف على حريتنا بيسلبنا تلك الحريه نصبح عبيد لتلك الحريه حيث تفرض علينا الكثير وتمنعنا من الكثير

من مبادىء الحريه انلا نخضع حتى لمبادىء الحريه
.....

كثيرا جدا ما نقبل بواقع مر متصورين انه ليس فى الامكان افضل منه
ولكننا نكتشف فى كل مره اننا كنا نتحمل وملا يحتمل وان ما كنا نخشاه اصبح هو بعينه ما نهواه

كلماتك تدور بذهننا جميعا العام منها طبعا
اما الخاص فاستمتعت باسلوب سردك له رغم غموضه الشيق

تسلم ايديك

.....

نهر الحب said...

شكرا لوجودك يا حبابيبي
واسفة علي التأخير
:))