Saturday, October 27, 2012

حكايتي مع الدبلومة



كان لازم أحكيلكم عن المأساه دي...أه والله مأساه أصلي انتوا مش متخيلين يعني إيه في بلدنا الجميلة دي حد عايز يدرس زيادة...يدرس لسبب بسيط جداً انه عاوز يتعلم حتى لو حاجة صغيرة جديدة ولو قدر يطور في شغله ويطبق اللي اتعلمه ده حيبقى أكتر حاجة اتمناها طول عمره

المهم ده اللي حصل معايا أنا وحوالي خمسة زميلاتي
بيبدأ التقديم لدبلومة الكلينيكال "الصيدلة الاكلينيكة" دي في شهر ابريل...وبيكون ليها شروط كتير اهمها بالنسبة لينا يكون مر علي شغلنا في التكليف سنتين مش أقل...ودي كانت المشكلة الكبرى..وهي اننا متمناش السنتين دول...يعني بمعنى بسيط...انا استلمت تكليفي في شهر 8/2010 والتقديم صحيح في شهر 4/2012 والدراسة بتبدأ في شهر 10/2012 يعني عملياً حبقى تميت السنتين قبل ما السنة الدراسية تبدأ لكن هما كان ليهم رأي تاني وهو اني المفروض في شهر 4 ابقى فعلاً تميت السنتين وغير كدة يبقى متوفرتش الشروط فيا وفي باقي زميلاتي اللي هما نفس الدفعة ومستلمين شغلنا في نفس الوقت
اللي يغيظ مش المواعيد دي خالص اللي يغيظ فعلاً انه مكنش لينا أي ذنب اننا نستلم في شهر 8 مش في شهر 4 لأن المواعيد دي هي اللي بتبدأ تعلن عنها الوزارة وعلى أساسه انا المفروض اتذنب سنة كمان عشان اعرف اقدم
المهم اننا ميأسناش وقلنا نحاول نقدم باعتبار انه فيه ناس كانت ظروفهم نفس ظروفنا وقبلوا...... ازاي متسألوش!!!!
بدأنا نحضر الورق المطلوب وزي فيلم "عسل أسود" كدة و رشا واللا بما يرضي الله طبعاً كان لازم نقدم بما يرضي الله عشان ربنا يكرمنا
وبداية من شهادتين تخرج من الكلية على شوية أوراق كمان ودول مكنوش صعبين
الصعب كان في مكان ما يدعي "مديرية الشئون الصحية" ومكان تاني اسمه "منطقة الجمرك الطبية" المكانين دول مرتبط بيهم أي ورق وأي حاجة في شغلنا
سحبنا اوراق من المديرية عشان نملاها ونمضيها من المستشفي....كان فيه حاجة اسمها تقرير سري بيطلع لنا كل سنة وبرضه نفس المشكلة مكناش تمينا السنتين وبالتالي طلع لينا تقرير واحد والتاني لسه متعملش
فضلنا نلف في المستشفى ويهديكوا يرضيكوا تطلعوا التقرير والموظفين ابدأ ماينفعش..
أتاري ماينفعش دي تتحل بحاجة بسيطة جداً وهي ان نائب المدير دي دكتورة لذيذة وكلنا نعرفها كلمناها وراحت للشخص اللي مش راضي يطلع التقرير ده وهو المحقق بتاع الشئون القانونية وبكل بساطة راحت جمبه كدة وقالت له ايه يا مصطفى ما تطلع التقرير يا مصطفي ومشي الشغل بتاع الدكاترة...
راح الراجل بكل بساطة راح يعمل التقارير....تقريباً دي كانت كلمة السر في الموضوع وقالت لنا انه الموضوع يخلص بشريط مضاد حيوي " واه مأستاه"
L
هو ماخدش الشريط بس هو طول عمره بياخد وهو حن علينا بالكلمتين الحلوين اللي قالتهمله الدكتورة
المهم بعد لف طول اليوم ده خلصنا الورق وروحنا قدمناه في المديرية قالوا لنا لأ روحوا المنطقة روحنا المنطقة وهناك البني آدمة اللي المفروض تمضي علي الورق بعد كذا امضاء مكنتش موجودة.....وهنا قالوا فوتوا علينا بكرة
ولما روحنا تاني يوم اكتشفنا ان اللي مكنتش موجودة دي كان ممكن التانية اللي موجودة تمضي مكانها لكن عشان هي مش بتحبها مارضتش تمضي
^_^ يبقي انت أكيد أكيد في مصر
مضينا الورق وخلاص قدمناه والحمد لله....
نتيجة التقديم دي تظهر في خلال شهرين تقريباً وفعلا في شهر 6 تقريباً ظهرت النتيجة والدفعات اللي اقدم مننا اتقبلوا واحنا ورقنا رجع......:(
احبااااط....بجد عمر ما جالي احباط قد اللحظة دي....وهنا كان لازم استني اتم السنتين بتوعي اللي كان ناقص عليهم شهرين واحاول معاهم تاني
فعلاً استنيت لشهر 8 وتميت السنتين وسألت في المديرية قالولي مينفعش لازم في شهر 4 بس ولو كدة سافري مصر "القاهرة يعني" جيبي الموافقة من هناك .....
وقررت أسافر القاهرة مع واحدة صحبتي نجيب الموافقة من وزارة الصحة نفسها
وعشان نسافر كان لازم نعمل شوية ورق الأول عشان محدش يرجعنا لو ناقص ورقة
كانوا حوالي 3 ورقات كل ورقة اخدت قدام كل موظفة 3 ساعات والله مش ببالغ منهم خناقة في المستشفي لأن الموظفة كسلانة تطلع للمدير ومش راضية تديني الورقة امضيها بنفسي إلا بعد ما كلمت المدير في التليفون وقلتله
وموظفة تانية في المديرية بتكتب الورقة على الآلة الكاتبة وحرف الواو معلق وقعدت تكتب فيها ساعتين بعد ما كانت قايلالنا تعالوا خدوها بعد اسبوع
وموظفة تالتة هي كويسة بس من كتر الشغل عليها وقفت قدامها 3 ساعات كمان عشان تطلعلي من عندهم تاريخ استلامي العمل .....يبقى انت أكيد أكيد في مصر
وسافرنا مصر وجينا نقدم الورق قالت الموظفة تاني لأ ولازم التقديم في شهر 4 بس..يخرب بيت كدة..... وكان فيه أخر حل وآخر أمل اننا نقدم في نفس المبنى في دور فوقيهم بس التقديم ده بيكون مش تبع الوزارة يعني مايدوناش اجازة عشان نروح الكلية ولا اجازة لما نيجي نمتحن وعلي كدة نبقى نتصرف بقي بأي طريقة عشان نروح الكلية
وعملنا كدة فعلاً ومكنتش مصدقة انهم وافقوا خلاص وعشان يطبعوا الورقة اللي فيها اسامينا اخدنا كمان 3 ساعات عشان البرينتر كانت بتعطل والموظف اللي عنده البرينتر شغالة كويس مجاش ومش راضيين حد يشتغل علي الكمبيوتر اللي علي مكتبه على أساس انه كمبيوتر ورثه عن اجداده وفيه اسرار الدولة
وفي الاخر بقى اخدنا الورقة ورجعنا اسكندرية...
ساعتها كنت مستغربة نفسي اووي لأني عمري ما عافرت عشان حاجة اوووي كدة يمكن عشان كنت مصرة عليها وعايزاه اوي ويمكن انا من الناس اللي كل ما الدنيا وقفت قصادي عشان حاجة تعبت أكتر عشان اوصلها وعاندت كمان....
لسه لسه..انتوا فاكرين كدة خلاص لأ والله..لسه
كان ناقص التقديم للكلية وده لوحده ممكن يوافقوا علينا او لأ بعد كل ده ممكن يرفضوا...أه طبعاً..حقهم...
قدمنا ورقنا في الكلية وقالوا انه فيه انترفيو اليوم الفلاني وروحنا الانترفيو والدكاترة سألونا ليه بتقدموا في الدبلومة وحتعملوا بيها ايه واللي اكتشفناه انهم مش عارفين اي حاجة عن الواقع اللي احنا عايشينه ولا شغلنا ولا وزارة الصحة عاملة ازاي...
خلصنا معاهم وقالوا ندفع 100 جنيه عشان نمتحن امتحان صغيور كدة قال ايه عشان يختاروا مننا مين حيقبل ومين لأ
وروحنا امتحنا امتحان منيل بنيلا في المنهج بتاع الكلية اللي طبعا مش فاكرين معظمه لأننا مبقيناش نتعامل مع كل ده في شغلنا العادي
المهم...ظهرت النتيجة وقبلنا الحمد لله
وهنا بجد بقى مكنتش مصدقة نفسي واني بعد الكفاح ده قبلت وأخيراً حروح الدبلومة...

بجد بلدنا دي غريبة جدا مش عايزة حد يتعلم ولا حد يبقى كويس وكله ماشي بالواسطة والكوسة وقلة الأدب...اللي بيشتغل بتطلع عينه واللي مش بيشتغل بيفضل مبطلج طول عمره...
ياللا بقي...
ادينا قبلنا وشغالين مذاكرة اهو يا رب تكون بفايدة بس



16 comments:

Nour said...

وكله هيخلص في 5 دقايق

يانهار بجد على المأساة انا ماستحملش ربع ده وفاكس دبلومة وتعليم اصلا :D

ده انا لما بروح شئون الطلبة اخلص ورق ويدوني وصل ادفعه في الخزنة ساعات كنت بدفعه تاني يوم من الكسل :$

المهم ربنا يجعله بفايدة ويكرمكوا يارب وتخلصوا على خير :))

حلوة الاغنية كده ;)

ابراهيم رزق said...

ههههههههههههههههههه
ايوة كدة انزلى من نهر الحب
اركنى على الترعة شوية

كل ده عشان الدبلومة طب فى الماجستير هتعملى ايه
انت غلطانة بعد كدة حضرى الشاى بالياسمين فى شنطتك

تحياتى

EMA EMA said...

هههههههههه و الله يا نهورة فكرتيني بالأيام اللى زى الفل و لحد دلوقتى كل ماجى أخلص اي مصلحة لها علاقة بالحكومة و الموظفين و الكلية لازم اتمرمط كدة و ماتفهميش ليه و كأن دا بقى الطبيعي و العادي ربنا يايهديهم يا ياخدهم بقى بجد الواحد بيتذل على ما مصلحته بتنقضي ..

سيبك انتى بس اهم حاجة انك قبلتي فى الآخر أكيد لا طعم تاني بعد البهدلة دى ههههههههههه الف مبروك يا قمر و ربنا يوفقك ..

د. إيمان يوسف said...

أولا : مبروك أنك اتقبلتِ في الدبلومة وربنا هيوفقك بإذن الله
وثانياً: حقيقي ما ضاع حق وراءه مطالب .... وأكيد ربنا لا يضيع أجر من أحسن عمله
وثالثاً : أنا أحدى من عانوا من عقد الروتين والمصاعب التي تواجه البحث العلمي في مصر ولا زلت أعاني ... ولكن أبداً لا يضيع الله مجهودنا

وأخيراً كوني قوية وواصلي
وكل عام وأنتِ بخير :)

momken said...

.....

صحيح محدش بياكلها بالساهل

مصر ممكن يضيع منها كل شىء الا الروتين
وانا متاكد ليه سنتين اقدميه تحديداً ومافيش مخلوق هيرد على الموضوع

كل سنه وانتى طيبه


تحياتى

....

Ahmed Elgammal said...

مالها الصين يعنى ؟؟؟
الصين اصلا حلوه :))

حبات التوت said...

دى بلد عايزة الحرق والله العظيم
نعمل اية لازم نستحملها ماهى بلدنا بس انا بجد قرفت منها
ربنا معاكى ومع كل العب المصرى الغلبان
ويلا

نهر الحب said...

نور
وما نيل المطالب بالتمني ولكن تؤخذ الدنيا غلابا
:)
الاغنية غيرتها عشانك اهو

نهر الحب said...

استاذ ابراهيم
هههههههههههههه
اه والله رشا بتعمل عمايل برضه
بس بما يرضي الله له طعم
:)

نهر الحب said...

ema
:))
اه والله ليها طعم التعب
:)
وهي كلها تعب

نهر الحب said...

د.ايمان
ربنا يخليكي وشكرا لزيارتك وانتظرني قريبا ان شاء الله

نهر الحب said...

ممكن
:))
كل سنة وانت بخير
الروتيييييييييين اه من الروتين

نهر الحب said...

احمد الجمل
:)
ايون مانا ياباني اصلا بس بريح عيني شوية
:D

نهر الحب said...

حبات التوت
ويلا
وحشاني اووي
:)
اه طبعا البلد دي مبقاش عندي امل فيها خلاص

re7ab.sale7 said...

لالالا العيب فيك انت
حد قالك اتعلمي
يا بنتي انا دوخت السبع دوخات والتعلب فات فات وف ديلة سبعتاشر مليون لفة
عايزة اعمل دراسات عليا عشان نفسي اعمل حاجة اقول لبتوع الاعلام انكم غلط
بابا قالي انسي انك تروحي القاهرة
قلت اسكندرية عشان اقرب اخويا قالي لاء لاء لاء
قلت خلاص خليها كفر الشيخ
وع اللي حصلي
كل جامعة ليها نظام مختلف اقصد متخلف
والله العظيم انا عارفة انت تعبتي اد اية بس ليكي انك تتحيلي انك تستأذني من شغلك وتروحيلهم برغم انهم بيقفلوا الساعة اتنين وانت رايحة اتناشر يقولولك الخزنة قفلت يا عم الساعة اتناشر يقولولك بتقفل اتناشر يا عم حرام عليك احنا جاين من سفر انسي يا عمرو
طيب والنبي ربنا يخليلك ولادك ده انت راجل ملتحي .....وانت ست منتقبة ربنا يهديكي ....لاء لاء لاء
طيب علي فكرة انا موظفة وبرضه بقدر الناس ...لاء لاءلاء
طيب يا ستي ربنا ينتقم منك
ترد بكل بساطة ومالو
تاني يوم نفس النظام
تالت يوم روحتبدري
مرديوش يدوني الباقي
مفيش فكة يا انسة
اللي بعده
اية ده يا عم ناقص نص جنية هاته ويرمي الفلوس ف وشة
فاهمة
بجد منظوعة عايزة النسف
ربنا يرحمنا

نهر الحب said...

هههههههههههههههه
رحاب حصلت معايا بقي حكاية الخزنة وانا بعمل شهادة التفرغ عشان اخد اجازة اخدتها كعب داير لحد ما اتعذبت
:)

لنا الله