أنا زي مانا واللا اتقسمت اتنين؟؟؟؟

المراية من الحاجات اللي مش باخد بالي منها معظم الوقت

النظر فيها بالنسبة لي مجرد ثواني..
نظرة عامة على نفسي من بره..وخلاص
.................

كتير بحس اني بخاف أبص في المراية كأني لو بصيت ليها حتكلمني وحتعاتبني....
على إيه...
معرفش...!!!
.............

بخاف أبص في عيوني...
ببقى عارفة قد إيه حشوفها حزينة...
حتى لو من غير سبب معروف...
حتصعب عليا أوي البنت اللي في المراية دي

بحس كأني معرفهاش...
بمعنى أصح...بنكر معرفتها ديماً
.............

هي شايفة اللي كل الناس بيعملوه في شكلهم عشان يبانوا أحلى حاجة ملهاش لازمة

عشان هي شايفة الناس من جوه...
مش من بره

وعشان شايفة إن الأصل هو شكلنا العادي مش صورتنا اللي بنحاول نرسمها بالألوان قدام الناس

أصلها طول عمرها بتحب الأبيض وأسود

قديمة أوي....
كل الناس شافينها كدة..
احساسها قديم..
كلامها قديم..
هي جات في زمن غلط أصلاً

كأن حد جابها من زمانها وحبسها جوه مراية في زماننا ده ومرضاش يطلعها..
ففضلت..جوه..بصورتها الحزينة ديماً..مش عارفة تهرب ولا تتحرك
..................................
...........

بتلومني كتير..

انتي ليه بتهربي مني؟؟؟

وأقولها سامحيني....

أصلي أنتي محبوسة جوه...
لكن...
أنا براكي ومحبوسة برضه...!!

أنتي مقتنعة بإحساسك وزمنك اللي جيتي منه...
لكن......
أنا....

كتير باجي على احساسي وأفكر بعقلي

عشان عارفة أنه هو الصح...
.........

بشوفك جوه دموعك نازلة....

ببصلك وأرسم ابتسامة علي وشي
 وضحكة تبين لكل الناس إني مبسوطة
...............

احنا شبه بعض أوي علي فكرة

انتي صحيح ديماً لوحدك ....

لكن أنا حواليا كل الناس
"من بره"
..........

بنحب بعض كمان لكن كل حاجة بتفرقنا 

الازاز اللي بيننا أكبر حاجز نفسك تكسريه وتطلعي تدخلي جوايا

وأنا....

أنا خايفة ينكسر وتنكسر صورتي
وأجي في لحظة
أتقسم اتنين
ومعرفش أنا مين

18/1/2012

(جوانيات وصعبانيات ما قبل النوم......(2

...العيدية مش بس فلوس
...العيدية كلمة حلوة من حد بتحبه
هي تليفون يجيلك من حد بس عشان يسبق ويقولك كل سنة وانت طيب قبل ما انت تسبقه
......والعيد انك تفرح بعد تعب رمضان

مع انك زعلان اوووي أن رمضان خلص وحيوحشك أوووي

>>>>>>>>>>>>>>>>>>>

اكتشفت في نفسي حاجة جديدة
انا كل عيد بمسك الموبيل وبشوف اسم اسم ...فيه ناس بكلمهم وفيه ناس ببعتلهم رسايل
بعمل الحكاية دي عشان بحب أسبق الناس اللي بحبهم عشان ابقى فاكراهم
.....بس
اكتشفت اني ممكن اكون بعمل كدة عشان من جوايا بكون خايفة الناس دول ميفتكرونيش فمبحبش أحط نفسي في حيرة انهم ممكن ميفكروش فيا فبسبق أنا
بس ده مايمنعش اني بفرح زي الأطفال بالناس اللي بيعيدوا عليا
:)

>>>>>>>>>>>>>>>>>>>

مبحبش أبداً حد يوعدني بحاجة ومايوفيش بيها....أصلي لو حد طلب مني حاجة وانا مش عارفة حقدر اعملها واللا لأ ممكن أقول اني مش عارفة ...لكن مقولش آه حعملها واللي قدامي يبقى متأكد من ده وبعدين أخزله

>>>>>>>>>>>>>>>>>>>

فيه ناس بيوصلوك لمرحلة مبترجعش فيها زي ما كنت
بتكره نفسك أوي لما تتحول لشخصية مش أنت
وبتكره أكتر اللي كانوا السبب في ده
لازم نتعلم بقى ان ميبقاش الناس اللي حوالينا هما الهم اللي شاغلنا طول الوقت
ونتعلم يبقى تفكيرنا لوحدنا وفرحتنا لوحدنا وحزننا لوحدنا

>>>>>>>>>>>>>>>>>>>

حاسة إني اتغيرت كتير
يمكن زي ما بيقولوا كتر البكا يعلم الأسى
وكمان كتر القسوة يعلم  القسوة لأن محدش بيحب ييجي على نفسه طول الوقت

>>>>>>>>>>>>>>>>>>>

المدونة والناس اللي عرفتهم منها هما اكتر ناس بحبهم وبفكر فيهم وبهتم بحضورهم وغيابهم
احساس غريب لما يبقي ده مع ناس شوفتهم مرات قليلة او مرة واحدة او ماشوفتهمش خالص
والناس اللي جمبي وحواليا والمفروض اني بقيت معاهم عشرة  مش بيخلوني احس ليهم نفس احساس الاهتمام ده
نفسي اعرف هما السبب واللا انا السبب

>>>>>>>>>>>>>>>>>>>

كتير بنبقى عاوزين نعرف احنا صح واللا غلط في كل تصرفاتنا وفي الأغلب مش بنعرف لأن ساعات الصح والغلط بيكونوا حاجة نسبية او بتتشاف من وجهة نظر كل واحد والقيم والحاجات اللي اتربى عليها

التفكير في كل حاجة ده بيخليني بجد مش عارفة انام وبيجيلي احساس نفسي أطفي دماغي وأشيل الفيشة فعلاً
بس مبعرفش مفكرش دي طبيعة فيا بجد من الحاجات اللي مش عارفة اغيرها
لولاها بقى مكنتش كتبت الصعبانيات دي
:DDD

(جوانيات وصعبانيات ما قبل النوم......(1

 


ساعات بيكون قدامنا اختيارات كتير  وبنحس ان دي مشكلة
بس هي المشكلة مش في الاختيارات دي....المشكلة لما تبقى عايز تختار حاجة...ولازم تختار حاجة تانية
يعني بمعني تاني..تعمل عكس اللي انت حابه وعايزه..ببساطة لأن اللي انت عايزة ده هو مش عايزك
...حاجة محيرة
جداااً صدقوني
.......
اختيار انك تبقى لوحدك من الاختيارات دي
اكيد مافيش حد بيحب يحس ولو للحظة انه لوحده....لكن
ساعات بنختار الوحدة بإدينا لما نحس ان اللي حوالينا بيخلونا نحس الاحساس ده طووول الوقت
وده بيكون أصعب لما ناس حواليك..المفروض انك بتحبهم وبيحبوك يحسسوك الاحساس ده
ولما بتختار انك تبعد وتبقى لوحدك بيبقي عشان تحس مجرد احساس...انك مبقتش انت اللي مستسلم طول الوقت ومحتاج حد جمبه عايز تحس انك تقدر تعيش لوحدك....حتى برضه لو لوقت قليل
عايز كمان تحس انك تقدر تسيب الناس وتبعد....مش زي كل مرة الناس هما اللي بيسيبوك...بارادتهم او غصب عنهم
...
الاحاسيس دي كلها بتكون صعبة على حد مبيعرفش يعيش لوحده...ومبيعرفش ازاي يسيب
بيفضل ماسك اوي في اللي بيحبهم مهما يعملوا فيه...ساعات ده بيكون كويس لو هما كمان ماسكين فيه
لكن لما يحس أنه عمال  يوقع مشاعره على الأرض لناس مش حاسينها يبقى اكيد فيه حاجة غلط
وممكن كمان متكونش مشكلة الناس
هي بتكون مشكلته هو....انه عايز حاجة بسيطة جداااً
ان أي حد يعامله زي ما هو بيعامله..مش حاجة صعبة على فكرة
بس الفكرة انك لما توصل متأخر اوووي أوووي وتعرف..وتتأكد...أن مافيش حد حيحطك في مكانة كبيرة زي ما انت متصور
ولو حصل ده لوقت قصير ...بعدين حتعرف ان كل واحد عمره ما حيفكر غير في مصلحته هو بس أو على أقل تقدير هو نفسه أول حاجة عنده...إزاي في لحظة اتمنيت وتوقعت ان ممكن حد يفكر فيك ويعمل حسابك اكتر من نفسه؟؟؟
ممكن يكون غباء منك....أو عبط....وممكن طيبة
مش مهم المسمى...بس ساعتها بتوصل لمرحلة بتبقى مش عارف نفسك انت كدة صح واللي حواليك مش حاسينك ومش فاهمينك واللا العكس
بيوصل بيك الحال ساعتها يا إما تقرر تتغير...والتغيير ده بيكون كويس لكل اللي حواليك لكن سيء ليك انت لوحدك
حتبقى بتعمل كل حاجة وانت مش مقتنع بيها ولا بنفسك...بتبقى واحد تاني....مش عايز تعمل حساب حد إلا نفسك
حتفضل تحسب كل تصرف بتعمله وكل حاجة تقدر تديها ترجع في كلامك وتقول بلاش
تتعلم إزاي تقول لأ بجد...مش حعمل كذا سواء أقدر اعمله أو مقدرش
لما اللي حواليك شايفينك حاجة ديماً مضمونة وطول الوقت موجود وعمرك ما حتمشي وعمرك ما حتسيب
لما تيجي تسيب الحبل اللي طول عمرك ماسكه من ناحيتك بس.....ساعتها بس ممكن يبدأوا يفكروا أنت مشيت ليه
ده لو لسه أصلاً فارق معاهم...بس هما ميعرفوش إن اللي بيفرق مع حد بيفرق وهو موجود جمبه
مش لما يسيب ويمشي ويختفي...ووقتها بيبقى الغلط واللوم عليه
ويبقى هو اللي مشى وهو اللي ساب وهو اللي باع
.......
وممكن ماتتغيرش....تفضل زي ما انت بالظبط....ومش مهم اللي حواليك عاملين إزاي المهم انك تعمل اللي عايز تعمله
تتصرف زي ما بتحس ومن غير ما تحسبها بالورقة والقلم
بس ساعتها حتوصل برضه لنفس المرحلة اللي مش حتقدر فيها تعمل اللي ديماً بتعمله
بس ممكن تنسحب في صمت تااام....تمشي برضه ومحدش يحس بيك ومن غير ما تلوم ولا تعاتب
يمكن تحقق المقولة دي
"ما اعظم ان تكون غائباً حاضر على ان تكون حاضراً غائب"
يمكن في رحيلك ده الناس يفضلوا فاكرينك ويفضل عملك باقيلك يفكرهم طول الوقت بيك
ويمكن يحسوا قد إيه وجودك كان بيعمل فرق حتى لو فرق بسيط
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

الكلام ده صعبانياتي وجوانياتي اللي قبل النوم.....هي مش قبل النوم اوي هي الأفكار دي يا اما بتجيلي قبل النوم فامش بتخليني أنام خالص أو مش ببقى عارفة انام فبتجيلي الافكار دي
المهم يعني إني في الآخر مش بعرف انام
فقلت اكتبها بقى هنا يمكن ماتجيش على بالي تاني وانام عشان محتاجة انام جدااااً
وشكلى كدة حعملها سلسلة لأي حاجة بتجيلي قبل النوم

رمضان كريم

كل سنة وانتوا طيبين
النهاردة اول ليالي رمضان
وآخر يوم في حملة التدوين
اتبسطت جداً منها مع اني منشرتش ال 30 يوم
لكن شاركت باللي مقتنعة بيه واللي قدرت عليه
.......
رمضان كلامي عنه مايخلصش أبداً
مممم
ربنا عالم باللي في قلبي لكل حد
أتمني يستجيب لي دعواتي
.........
بحب أوي الدعوة دي
"اللهم لا تعلق قلوبنا بما ليس لنا واجعل لنا فيما نحب نصيب"
"اللهم يا مصرف القلوب صرف قلوبنا على طاعتك"
آمين يا رب
.........رمضان كريم عليكم جميعاً
..........

"على فكرة انا محدش جابلي فانوس وزعلانة أوووي"
:D
كالعادة يعني

"على فكرة انا محدش جابلي فانوس وزعلانة أوووي"
:D
كالعادة يعني

يوم .......جمييييييييل...أوووي

ساعات 

فيه حاجات بتحصل كدة إذ فجاتن من غير ميعاد ولا ترتيب منك في عز ما تكون زعلاااااااااااااااان أووووي من كل حاجة حواليك لدرجة الوصول للانهيار التااااام
وقبل ما تقع بلحظة....ييجوا ناس متهيألك أنهم بعيييد أوووي وصعب في لحظة يقربوا منك
تلاقيهم جمبك اوووي
يطبطبوا عليك حتي وهما مش حاسين
يخلوك ببساطة ....تفرح...وتبتسم
وووبس
..............
انا تقريباً حصلي كدة بالظبط
مش لازم احكي عن الانهيار بس هو فعلاً وصلت لمرحلة ان كفاية كدة بقى لا انا عارفة أتكلم ولا عارفة أسكت
يمكن ساعتها قررت الهروب...ويمكن مايكونش هروب بالمعني الصحيح للهروب
لكن فيه حاجات حوالينا ملهاش حل غير انك تسيبها وتمشي وانت عارف ان اللي انت رايحله مش حترتاح فيه بس علي ااقل تبقي حاولت تغير اللي انت فيه ومحستش انك واقف في نفس النقطة وخايف تتحرك منها
........
كتير كنت بتمني أروح القاهرة أعمل أي حاجة هو كان حلم مجرد حلم كتبت حتى عنه قبل كدة
وفي عز مرحلة الانهيار بقي دي كانت الخطوة اللي حتساعدني أغير اللي انا فيه لازم فيها اسافر القاهرة
وفعلاً سافرت بدون أي ترتيب غير قبلها بيوم
وكأن ربنا بيحط قصادنا ناس يعوضونا وقوعنا وزعلنا ويخلونا نضحك من قلبنا ولو لحظات سريعة وسط زحمة المواصلات والحر والدوشة والتوهان
عايزة أعمل كدة
:)))))))))
كتير أووي أوووي
نور خطاب

اللي كانت معايا من بداية الطريق مش حعرف أوصفها بكلمات أوي
لكن قد إيه بجد نقية وطيبة وشبههي في حاجات كتير كانت هي حساها من قبل ما نشوف بعض
غلبتها معايا لأقصى درجة لأني فعلاً كنت عاملة زي السياح اللي مش عارفين أي حاجة بس هي كانت مستحملاني أوووي اوووي
الظروف خلتني ملحقش آخد منها اهداء غير كلمتين
"انتي عارفة"
:)))
كان نفسي أعرف البقية....بس يمكن الذكرى مش بالكلمات اللي مكتوبة ولا حتى الصور
الذكرى الحلوة اللي بناخدها من الناس بناخدها في قلوبنا اللي بتحس قد إيه اللي قدامها ده بيحبها من غير أي مقابل

.........
نور
شكراً على وقتك وتعبك
شكراً علي كل حاجة
........
شوفت موها كمان سريعاً سريعاً ومشبعتش منها بس ان شاء الله نشوف بعض تاني
...........
وصديقي العزيييييييييييييز جداً
ابراهيم
 اللي برضه تعب معايا أوي لحد ما وصلت
وكالعادة منسيش يجيبلي
"جالاكسي"
:)))
وكام كتاب زي ما هو متعود
........
مبسوطة أوي بجد انه من اجمل أيام حياتي رغم التعب اللي تعبته
والحمد لله اللي بيعوضنا باللي يفرحنا ديماً
:))
وووووووووووووبس

سكوووووت

ساعات بيكون الكلام مش قادر يعبر أبداً عن اللي جواك فتسكت

السكوت يمكن يعبر عنك أكتر
 يفضل كلامك جواك بس وممكن تقوله لأي حد بس الحد ده برضه بيبقى جواك

...............

......مممم

........مش فاهمين

اصلي هي حاجة معقدة كدة....زي ما تكون بتكلم نفسك...بس وأنت ساكت

صدقوني ...يمكن أكون مجنونة....بس دي الحقيقة انا بيحصل لي كدة

بفضل ساكتة كتييييييييييير اوووي اوووي مش قادرة ولا عارفة اتكلم مع حد فبحتفظ بالكلام وأفضفض مع حد موجود بس في خيالي انا بس
 حد بيسمعني وساعات كمان بسمعه بيرد عليا...احساس زي وانا ماشية علي البحر....مش ببقي حاسة
بأي حاجة حواليا غير أن قلبي بيتكلم

مش ببقى مبسوطة بعدها لأني ببقى عارفة ان دي تهيؤات واني لوحدي ومافيش أصلاً حد جمبي أكلمه في الحقيقة.........ولو فيه.....إيه فايدة انك تتكلم مع حد عمره ما حيفهمك ويحس بيك

كتير بنتكلم ونقرب من ناس وفجأة منلاقيش الناس دول جمبنا...لأي سبب...مبقوش زي زمان...أو احنا اللي اتغيرنا يمكن....فارقونا..او احنا فارقناهم.......مش مهم....فيه حاجات كتيرة بقت مش مهمة بس للأسف على ما نفهم بيكون عدى كتيييييييير أووووي واحنا بنتعلق بسراب معاه وفي آخره بنقع....لازم نقع

..........
................

وكتير قلوبنا بتتملي كلام ولما بتتملى بتحس كأنك كنت عمال تجري بقالك مليووون سنة ومن كتر الجرى نفسك راح

انا كتير بحس ان نفسي راح خلاص.....وكل ما بيروح....برجع وبعاند وبقوم أجرى تاني
وتالت.....يمكن لحد ما اموت حفضل أجري من غير ما أقف

بس نفسي وانا بجري مابصش ورايا ولا حواليا.......اجري وخلاص لا اسابق حد ولا حد يسابقني ولا حد يكعبلني.....نفسي يسيبوني في حالي ولو قلبي اتملي ومقدرتش اخد نفسي حموت...حموت لوحدي وانا واقفة في مكاني وخلاص....مش عاوزة حد وهو معدي ينتبه ليا ولا يشفق عليا ولا حتى يبقي يعرفني....يمكن دي قسوة.....لكن صدقوني مافيش أي أهمية لناس حواليك شكلاً....لكن سايبين جواك فراااااااااغ كبييييييييير اووووي



البوست مشاركة في حدث
التدوين اليومي

شايف البحر شو كبيييير

شايف البحر شو كبييير
...كبر البحر
بحبك
.....
شايف السما شو بعييييييييييدة
...بعد السما
بحبك
.........
البحر هو أكتر حاجة مشتركة بيني وبينك
علي قد حبي وحبك ليه
بحس حبنا بوسعه
يعني ملهوش نهاية
....
مهما نكون بعيد عن بعض
وانا شايفه البحر قدامي ببقي عارفة أنك شايفه وبتسأله عني
كفاية اني أحس ان طيف عيونك ظاهرلي بين الموج
وأن صوت البحر بيوصل لي شوقك وانت بتقوللي
وحشتيني
.........
متأكدة اني لو حطيت كل رسايلي ليك في ازازة واديتها للبحر حيوصلهالك
انت بس ومش حتتوه منه أبداً
علشان هو عارفك....من كتر ما بكلمه عنك
وعشان كمان هو عارف قد ايه انت شبهه
في هدوءه...وجنونه
في حنانه....وقسوته
في سكوته
في غموضه
...
...أوعدني
لما تشوف البحر تسأله عني
وهو حيقولك كل حاجة
..
.....احضنه
 حتحس قد ايه محتاجالك تضمني
....المسه
حتحس بسلام ايدي
.......
.............
ولما الشمس تغرب وتغرق في حضن البحر
اعرف ساعتها انك غايب عن كل الدنيا
لكن شمسك بتشرق جوه قلبي

أقر وأعترف...أنا نكدية

أقر وأعترف....أن أن أن تشششششششش......أيوة أيوة انا حعترف أهو....اقولكم بس الأول  جاتلي منين حكاية أقر وأعترف دي
  بما اني بقيت متابعة الراديو بإدمان فظييييييع فكنت من كام يوم كدة بسمع برنامج اسمه اقر و اعترف اي حد ممكن يبعت ويعترف بأي حاجة...انا بقى معترفتش عندهم..انا قلت اعترف هنا انتوا مننا وعلينا
....طيب
أقر واعترف ان انا......نكدية
ممم.....نكدية من النكد يعني  اه والله انا نكدية
هما بقى بيقولوا....مين اللي بيقولوا مش عارفة بس المرة دي بقى انا أؤيدهم جداً..بيقولوا ايه ؟؟....بيقولوا ان الستات يموتوا في النكد يحبوا النكد زي عينيهم واكتشفت ان دي حقيقة علمية فعلااااااااً
بس انا  ليه نكدية....هو مش بحب النكد اوي يعني والله هو جايز هو بيعزني حبتين تلاتة كدة
هو بداية من اسمي اصلاً ممكن تكتئبوا....سهاد يعني أرق يعني حد قلقان ومش عارف ينام...فيه ناس كتير أول ما أقولهم اسمي يقولوا "يا عيني" اللي هو اشفاق على حالي...بس فعلاً بحسه اسم حزين رغم اني بحب اسمي عشان مختلف..ما علينا

ايه تاني ايه تاني....العهدة اللي مسكاها في شغلي هي عهدة النفسية...خير اللهم اجعله خير يعني صباح الاكتئاب والسكيزوفرينيا على الانهيار العصبي....ومن العهدة دي اللي حواليا يقعدوا يقولولي حرام عليكي من العهدة بتاعتك دي ومن كتر ما بتشوفي فيلم آسف على الازعاج حتتجنني...وانا عادي عادي....اكتئاب ..نكد...أهلاً اهلاً وسهلاً دانا ممكن
اجيلهم شاي والله

إيه كمان
حتى المدونة اسمها نهر الحب اللي هو عمر الشريف بيموت في الآخر وكمان فاتن
حمامة وناقص يموت المخرج والمنتج كمان
عامة كل الأفلام اللي بحبها كئيبة ولازم حد يموت في الآخر ومرة قلت طيب لو عارفين انه حد حيموت في آخر الفيلم يكتبوا بس في أوله كدة عشان ماشوفهوش وماحبهوش برضه مافيش فايدة

النغمة اللي حاطاها علي الموبيل " حتعمل ايه لو نمت يوم وصحيت ولقيت أقرب ماليك في الدنيا مش حواليك" ولما صحابي ألحوا اني اغيرها غيرتها  وبقت" عارفة سواد العسل اهو ده اللي حالك ليه وصل" أعمل ايه طيب بحبهم بقى
:DD


اهو الاكتئاب بيحبني واللا لأ؟؟؟؟
انا عن نفسي مش حغلط فيه ولا حتكلم انا اعترفت ان انا نكدية وطول الوقت بقيت كدة
 بس بجد بجد بجد النكد غيرني كتييير كتييير..انا بقيت بسكت  بسكت ونكدي بستحمله وبيستحملني مع نفسنا وما شاء الله عليا ضحكتي اعلي ضحكة  بشهادة الجميع يعني مش حرماكوا من حاجة..نكد تلاقي ضحك تلاقي يعني سكيزوفرينيا عالية جداً واعترافات وآخر حلاوة

كفاية عليكوا بقى لحسن تتعدوا عشان مقولكوش النكد ده مُعدي جداًًً انا حذرتكوا وماليييييييش دعوة
:DDD




ده مشاركة في  حدث
التدوين اليومي

أنتي...أملي

عارفة
بحب أشوفك بتبكي
..
صدقيني مش بحب أبداً أشوفك حزينة
....لكن
بحب أشوفك بتبكي عشان أنا الوحيد اللي بتبكي قدامي
..بتكوني ضعيفة
بحسك بين إيديا
زي طفلة صغيرة خايفة من الدنيا كلها إلا مني
محدش يقدر يحس بيكي ولا يفهمك غيري
...محدش يعرف يمسح دموعك إلا أنا
...بتبقي محتاجالي أكتر من أي وقت
ببقى عايزك تسمعي دقات قلبي وهي بتطبطب عليكي
ببقي نفسي اضمك وماسيبكيش أبداً
بحس قلبي ماليه حنان وسع البحر كله
وخايف ما يكفكيش
.....
عارفة
بخاف أوي لو تبكي بسببي
و بتمنى ساعتها كل دمعة تنزل تجرح قلبي وما تنزلش على خدك
ولو بإيدي ارجع الزمن عشان متزعليش  كنت أرجعه
.......
...........

بحب كمان أشوف ضحكتك
عشان عيونك مبتلمعش وانتي بتضحكي غير ليا انا وبس
عشان صوتك وانتي بتضحكي بيحييني
....
بحبك عشان أنتي....أنتي
....لما بتبكي
...ولما بتضحكي
...بحبك بعقلك
...بجنونك
بكل حاجة فيكي يتخليني أعيش
...عشان أنتي
....أملي
وبتديني أمل طول مانا عايش


البوست مشاركة في حدث
التدوين اليومي

عني...وعن مدونتي :)

التدوينة دي مشاركة في حدث
التدوين اليومي
وهو بوست موحد فيه أسئلة نجاوب عليها
انا عاجباني الفكرة جداااااً
نبدأ باسم الله
:)

السؤال الأول
عرف نفسك
لو الاسم يبقي سُهاد
لو تعريف ممكن اقول اغنية اليسا عشان عاجباني وحاساها شبهي
:))
انا واحدة عادية رايحة مع الدنيا وجاية بني آدمة ليا وعليا أنا مش مثالية..بأقل كلمة انا بتضايق  لكني برجع في دقايق واتراضى بسرعة
أنا أصلي من جوايا طفلة وساعات كتيرة بكون عاقلة وساعات مندفعة
******************

السؤال الثاني
ما اكثر ما يميز شخصيتك
مش عارفة اجاوب على السؤال ده بس انا أكتر حاجة بحبها في نفسي هي الكتابة ولولا الكتابة مكنش زماني قادرة أعيش
******************
السؤال الثالث
ما هي أهم نقطة تحول في حياتك
اكيد برضه لما بدأت أكتب اتغيرت كتيييييير وبدأت أتكلم وأحكي كل اللي مكنتش بقدر أعمله قبل كدة ولما بدأت أشتغل
******************

السؤال الرابع
كيف دخلت عالم التدوين
كنت في أولي كلية وطبعاً كلية الصيدلة صعبة ومكنتش باخد نفسي خالص في أي حاجة حضرت ندوة فيها شعر وحاجات أدبية وكانت حلوة جداااً وعرفت منها عالم المدونات وقلت ساعتها ليه معملش مدونة وأكتب وأقول اللي جوايا
وفعلاً عملت المدونة
:))
******************

السؤال الخامس
ما هو اسم مدونتك وكيف اخترته
اسم مدونتي نهر الحب
اخترته لأن الفيلم ده اكتر فيلم بحبه في حياتي بعيداً عن قصة الخيانة اللي فيه لكن بحب المشاعر اللي ملياه وكل كلمة فيه وبحب فاتن حمامة جداً وكان نفسي اعمل حاجة شبه العالم ده عالم الأبيض وأسود بتاع زمان لأني شايفاه أحلي وقت وأرقى حب وأنقى مشاعر
ونفسي أعيش في الزمن الأبيض وأسود ده
******************

السؤال السادس
صف مدونتك
مدونتي عبارة عن كلمات...انا ديماً بقول اللي بكتبه مجرد كلمات جوايا وجوه ناس كتير كلمات عن الحب والحزن والحرية
ساعات عن الأمل وساعات عن اليأس فيها كل مشاعر ممكن أي حد يمر بيها وميقدرش يعبر عنها ويمكن ربنا ادانا القدرة على التعبير دي عشان نعبر عن مشاعر بعض وعن ناس فعلاً مبتقدرش تقول اللي جواها
.....
مدونتي هي حياتي
..........
******************

السؤال السابع
من هم اكثر ثلاث شخصيات أثروا بك من داخل عالم التدوين ومن خارجه
حبدأ بخارج عالم التدوين
 ومن المشاهير...الكاتبة أحلام مستغانمي
قد إيه بجد تقدر توصف أدق المشاعر  وقد إيه حاسة اني اتأثرت بيها جداااً في كل اللي بكتبه

تاني حد هي دكتورة صيدلانية اسمها دكتورة سلوي كنت بتدرب معاها من تاني سنة كلية  واتعلمت منها كتيييير في الحياة وفي الشغل وليها فضل كبير عليا بعد ربنا طبعاً
حكتفي بدول

داخل التدوين
 اول حد ابراهيم عادل
صاحب مدونة
انا وانا
ابراهيم صديقي من بداية التدوين لحد دلوقتي وبصراحة هو لازمله بوست لوحده بس أهم حاجة عملهالي ابراهيم انه خلاني أحب القراءة أوووي أوووي وكنت بغير منه لما الاقيه بيتكلم عن كتب هنا وهناك وبقيت لما اقرأ أي رواية اخد رأيه فيها
ابراهيم مبيدخلش مدونتي بقاله كتييير جداً وبيكتب قليل في مدونته بس مش مشكلة
:))

 تاني حد
ريماس
و ريماس
و دعاء
لازم يتقالوا مع بعض بصراحة يمكن لأني عرفتهم في نفس ذات الوقت
ريماس "نور" ودعاء شبههي جداااً في احساسي وكتاباتي بحب ادخل عندهم عشان أقرأ نفسي في كلماتهم

ريماس
"نافذة حلم"
الانسانة الرقيقة الرومانسية أووي اووي اللي الوحيدة اللي بتحسسني انه فيه أمل وان الحب أقوى من أي حاجة
بدخل عندها لما ببقى فاقدة الأمل في كل حاجة حواليا
بس بسكت كتير قدام كلماتها
:))

تالت حد
تامر مغازي
صاحب مدونة
آسف على الازعاج
مدونته مختلفة جداااً أول مرة دخلتها قعدت قريت كل التدوينات اللي فيها تقريباً
هو مش بيكتب كتير بس عشان كل كلمة بيكتبها بحس ليها قيمة ومعنى وده مش موجود عند أي حد
بحس اني بتعلم منها وفيها تدوينات وكلمات عميقة أوي
من اكتر المدونات اللي بدخلها أقرأ فيها حتى لو حافظة اللي مكتوب

******************

السؤال الثامن
ما هي طقوسك الخاصة عند الكتابة
هي مش طقوس ولا حاجة انا البوست عندي بيبدأ بكلمة تيجي على بالي في لحظة أي لحظة حتى لو نايمة بس المعظم بيكون قبل ما انام على طول تفضل الكلمات تيجي على بالي زي المطر بالظبط وانام وأصحي فاكرة الكلمات دي واول فرصة الاقيها بكتبها وبنشرها على طول بس انا مش من النوع اللي بيمسك ورقة وقلم ويقول ها عايزة اكتب بقي دي بتحصل في حالات قليلة أووي اووي وانا متضايقة وحاسة جوايا كلام ومش عارفاه إيه هو ده بيكون في التدوينات اللي عبارة عن فضفضة زي دي كدة
******************

السؤال التاسع
ما هو اسلوبك المفضل في التدوين
هو مش فاهمة السؤال اوي بس حعتبر اجابته في السؤال اللي فات
:DDD
******************
السؤال العاشر
ما اهم ما يميز تدويناتك
برضه مش عارفة بس زي ما قلت قبل كدة انا اكتر حاجة بحبها وبتفرحني بجد لما اكتب حاجة تلمس حد حتي لو بكلمة أو سطر ويقولي انتي عبرتي عن اللي جوايا
بس
:)
******************

السؤال الحادي عشر
انا تعبت بقي
:DD
ماهو تقييمك لعالم التدوين في الفترة الأخيرة
بما اني مدونة من زمن مش قليل اللي هو 6 سنين ده متهيألي دلوقتي احسن كتير من زمان أنا افتكر اول ما بدأت كانت لسه فكرة المدونات منتشرتش وكانوا بيهاجموها في الجرايد بس دلوقتي العالم بقى مفتوح جداااً احسن من الأول
******************

السؤال الثاني عشر
ما هي اقرب تدويناتك إلى نفسك
هو أي حاجة بكتبها بحبها بحس انها بنتي مش عارفة ليه بس انا فاكرة اليومين دول تدوينة كنت كاتباها السنة اللي فاتت في نفس التوقيت ده تقريباً بس بحبها جداً وقريبة من قلبي اوووي اوووي اسمها
بين اللحظات....حياة
******************

السؤال الثالث عشر
استعرض اهم المواقف الطريفة الي صادفتك مع التدوين
مش فاكرة حاجة طريفة بس حصلتلي صدفة جميلة جمعتني بأحد المدونين
بس دي حكاية طويلة مش ححكيها
:DDD
******************

السؤال الرابع عشر
هل احدث التدوين تأثيراً عليك؟ وكيف؟
اكيد انا حاسة اني بقيت على الأقل بقول اللي جوايا ومش بخاف منه
مش بخاف أعبر عن مشاعر الحب وكنت بخاف اوي زمان أني لو كتبت كلام عن الحب الناس تفهمني غلط
النسبة الغالبة هنا ان الناس بتحس اللي انت كاتبه وخلاص لأن مش ديماً اللي بتكتبه بيكون بيوصفك قد ما بيكون بيوصف حاجة حسيتها انت بنفسك او في حد حواليك
******************

السؤال الخامس عشر
اختر اي مدون ووجه له سؤال
مممم
مين مين  مين؟؟
مش عارف
انا ممكن أسألكوا كلكم انتوا بتحبوا تيجوا هنا واللا لأ؟؟
:)))

..........

انا بحب ناس كتير وكل المدونين واللي بييجوا يزوروني ومعرفتش اقول عنهم كلهم
يا ريت تسامحوني ومحدش يزعل مني

بلياتشو

حاسة اننا كلنا بقينا عاملين زي البلياشتو
بنضحك ونهزر من بره بس ومن جوانا مافيش ولا نقطة فرح

مش عايزين نفرح؟

أكيد لأ...

بس مش قادرين نفرح...حاسة كأن الابتسامة بتعدي كدة على وشنا بس عشان نجامل بيها حد بيشوفنا ومش لازم يحس اننا جوانا حزين

كأن الابتسامة شبح بيعدي علينا وبيدبل قبل حتي ما يكمل......

المشكلة لما تبقي شايف الحزن ده كمان جوة عيون الناس اللي حواليك وبتحبهم ولا انت عارف تطبطب عليهم ولا على نفسك...

احساس صعب ان كل احاسيسنا مزيفة ووشوشنا متلونة..مش كذب ولا نفاق لكنها غصب عننا عشان نظهر اننا اقوياء وبنعافر وبنقاوم وقادرين نعيش كدة

بقينا زي كل بلياتشو عنده حكاية مخبيها جواه وبيداريها بالألوان الكتيرة اللي على  وشه والحركات اللي بيعملها قدام الناس عشان بس يضحكوا...

مش عدم رضا ولا قلة ايمان لكن والله كتير بيكون الحزن حاجة من جوانا أووي أوووي ولما بتزيد مافيش أي حاجة تقدر تغلبها....

ساعات بحس اننا عواجيز أووي ....

الظروف اللي حوالينا مخليانا كدة أو احنا فعلاً كبرنا ومش حاسين أو مش مصدقين

حتى لما بتيجي أي حاجة تخليك تفرح للحظة...وقت ما تيجي تبتسم وتتفاءل..ترجع وتخاف لحسن الحاجة دي تروح منك أو تطلع وهم متغطي كمان بوش أنت مش شايفه.....

......

بعد وقت أكيد الحاجة اللي مخليانا حاسين الحزن بتروح وبننساها....عشان هي دي الدنيا

بس يا ريت....ياااريت....منوصلش لمرحلة يحبنا فيها الحزن وميجيش الوقت اللي يسيبنا فيه حتى لو شوية.....

مشاركة في حدث
التدوين اليومي

انت فين يا حسيييييييييين؟؟؟؟

تقريباً كدة انا عمري ما كتبت هنا في المدونة حاجة تضحك
ديماً كآبة كآبة لحد يعني ما الاكتئاب زهق مني...ولو مش كآبة سهوكة كدة ورومانسية و بتاع  وحاجات متأكلش عيش
وبصراحة لما بقرأ الرومانسية بتاعة ابراهيم رزق  بحس انها احلى....ديماً بتفكرني بجملة "بلوبيف بلوبيف" بتاعة اللمبي
...
المهم
يوم الجمعة خير اللهم اجعله خير كدة لقيت قدامي فيلم الباب المفتوح بتاع "صالح سليم" وفاتن حمامة.....سيبكوا بقى من فاتن حمامة....كل العالم بقى كوم وصالح سليم ده كوم تاني....الراجل ده انا اشوفه من هنا والاقيني كدة عينيا دمعت وحالتي بقت صعبة الفيلم بقي ميبقاش محتاج عياط ولا حاجة انا بعيط عشان بتحسر على حالنا...
ان مافيش مرة كدة من ذات المرات الواحد لمح حد شبه صالح سليم كدة معدي حتي في شارع ....طيب نصه...ربعه...اي حاجة من ريحته طيب....أبداً....
هما ليه الرجالة زمان كانوا رجالة كدة ليهم هيئة مافيش زيها...

المهم بقي قعدت انا أشوف صالح سليم...وكان اسمه حسين....شوفته من هنا وقعدت اقول .....يا حسيييييييييييين..........يا حسيييييييييين ماليش دعوة انا عايزة حسيييييييييييين..هاتولي حسين.......وقلت لنفسي "مش لما تبقى فاتن حمامة الأول"...مبدأ برضه...
أهيء أهيء...ماااااااافيش فايدة

وبعدين فاتن حمامة هانم دي الراجل طول الفيلم يتحايل عليها ويقولها حتحبيني حتصحي يوم تلاقي نفسك بتحبيني...وهي...مافيش عند اللي جابوها دم الصراحة...طول الفيلم مبوزة في وش الراجل...اللي هو يعني نفسي بس اقوله انت تقف كدة ومتقولش ولا كلمة...ووبس يعني........

طيب ايه بقي...يعني حسين ده مش ناوي يظهر يعني...
والوقعة السودة بقي ان عمر الشريف كماااااااااان يبقى اسمه حسيييييييييين في " اشاعة حب" يا دي النيلا....لأ بقي ده استقصاد...ومحدش يقوللي مين عمر الشريف ده....عمر الشريف يعني " في بيتنا رجل" ...يعني نهر الحب...يعني أحلى واحد يلبس بدلة ميري فيكي يا مصر
:DDD
........
اهو انا بشوف الناس دول عشان تتفقع مرارتي ووبس واقعد اعيط علي حالنا يا عيني....لا تقولي كريم بقي ولا مهند ولا بتاع...
اهو صناعة مصرية اهو...يعني هو فيه أمل السلالة تتحسن يعني؟؟؟
طيب نشوف الهندسة الوراثية وال DNA  والا نعمل ايه بس.....
والله بجد انا مش بتكلم عن الوسامة قد ما بتكلم عن الرجولة......
مممممممممممم
يووووووه بقى ماهو نور الشريف كان آخر الرجال المحترمييييييييييييييين
عشان كدة خلصوا...
:DDDD
معلش بقى
يظهر فعلاً مافييييييييييش فايدة







البوست مشاركة لحدثالتدوين اليومي

نفسي أطير

نفسي أطير
نفس الاحساس ده بالظبط
نفسي أفرد دراعاتي في الهوا
 والهوا ييجي على وشي و يدخل بين خصلات شعري
وبين انفاسي
 يدخل جوايا هوا نضييييييف أوي
يخليني أغمض عيني
وينسيني كل حاجة
.......

نفسي أركب مرجيحة تطلعني لفووووق
لحد السما
وأفضل هناك...فوق
مع الملايكة
أصلي بحب السما أوي يمكن عشان صافية ونقية
وقت ما بتزعل
بتبكي
نفسي أبكي معاها مرة وانا فوق السحاب
..........

ديماً بيفصلنا عن السما....وعن الهوا
ازاز
بنفضل وافقين وراه نتفرج بس علي الدنيا
خايفين
ويفضل الطيران مجرد حلم
بيخطر بس علي بالنا
لحد ما ييجي يوم نفتح الشباك
نكسر الازاز اللي حوالينا
ونطييييييييييييير
.................
.......
مشاركة في حدث التدوين اليومي

حينما تعانقك كلماتي...2

....إلى صغيرتي

..أكتب رسالتي تلك ولا أعرف هل ستقرأينها أم لا

وإذا قرأتيها هل ستعرفين أنها رداً على كل رسائلك السابقة التي لم ترسليها فلم يأتيك لها رد

.........

....أعلم انك في حيرة من أمرك الآن
..اهدأي صغيرتي فلم أقصد ذلك
........
أتدرين كم عانقتني كلماتك الأخيرة؟؟

...كم لامست أوتار قلبي

...لست بشاعر ولا بكاتب كي أكتب مثلك
فكيف أكتب وانا تائه بين سطور تحاصرني وورق أبيض يرفض الاستماع إلىّ
..........
...ولكن

....كنت أريد أن أقول لكِ أنني أيضاً كنت أذهب إلى هناك....حيث كنا
ربما بعدما ترحلين بثواني
كان عطرك ينبئني بوجودك ورحيلك
وكان ظل عينيك يبقى ثابتاً على المقاعد فأتيقن أنك كنتِ هناك
فأجلس صامتاً بين أنفاسك الباقية
........

...مر عامين ولم أنسى
...ولم تنسي يوماً ما كان
...وما كان يمكن ان يكون
أعرف أنني أضيع كل شيء تحت مسمى .....الإنتظار
....وأنني لست متأكداً
 .....وأنني...وأنني
وأعرف أيضاَ انكِ اخترتِ الرحيل بعد كل شيء...ولا ألومك
ولكني كنت أعرف...أنك ستعودين إليّ يوماً ما
وأعرف أنني لا امتلك جرأة محاولة العودة
....
وها أنا أسمع خطواتك من بعيد يعلو صوتها علي صوت دقات قلبي

فيتوقف الزمن حولي
لأجدك أمامي
بكل ملامحك التي لم أنسها يوماً
بكل إحساس غلبني وغلبك أننا لم نفترق
.......
...........

 الآن أريد أن أعترف بكل حروف اللغة التي وُجدت فقط لتصفك
أنني أحببتك....يوم ولدت
...يوم رأيتك
وأنني اليوم ولدت من جديد
...أمام عينيكِ
.....

البوست مشاركة في حدث
التدوين اليومي

حينما تعانقك كلماتي

تطاردني الكلمات هنا وهناك لأكتب
...ولكن
انا في الحقيقة اهرب من الكتابة...ومنك
أتعلم
تقول "أحلام مستغانمي" اننا عندما نكتب نتخلص من الأشخاص الذين نكتبهم
ولكن رغم عشقي لها ولكلماتها ....لا أصدقها هذه المرة
فأنا أكتبك لأستحضرك بين كلماتي
تتشكل حروفي صانعة وجهك على الورق...فأراك
ليعلو صوت قلمي عنك..فأسمعك تحدثني
ربما أصبت بمس من الجنون بك
لا يهم إذاً
فإذا كانت كل محاولاتي لنسيانك هي جنون حقيقي يؤدي بي في النهاية إلى التفكير بك أكثر وأكثر
فليكن الجنون ملجأي
..........
أكتب لأنتزع الكلمات من قلبي الذي لا يحتمل الكثير
فربما تلك الكلمات تأخذ بعضاً من شوقي تلقيه على الورق فلا يعود إليّ
لا أحد يعرف عندما يفوق الاشتياق قدرتك على المقاومة
لا تستطيع رؤية من تشتاقه..ولا سماع صوته...ولا أي شيء
تشعر بألم شديد يهد قواك لتنام حيث لا يوجد حل غير رؤيته هناك في منامك
وربما من بعيد
 ويظل يتاكد لك كل يوم أنك عندما تحلم بمن تشتاق فإنه حتماً يفكر بك ويشتاقك ربما أكثر منك
فيبقى هروبك الوحيد في المنام كل ليلة
لعله يكون اللقاء الذي لا تلومك عليه العين
..............

تحيطني كلماتي مرات كثيرة فتهرب بي قدمي دون أن أدري إلى حيث كنا نلتقي
....ألامس الأماكن وأتنفس نسمات الهواء لعلي أجد عطرك
فلا أجد شيء أتعلق به إلا الذكريات المنقوشة علي جدران قلبي
 فأجمعها بين كفيّ واخفيها حتى لا يراها أحد
..........
.............

لحظات الاحتياج تلك تغرقني في عالمك الوهمي الذي صنعته كحبات غزل البنات التي ارتبطت بأحلام الفتيات الصغار
فترغمني على العودة طفلة صغيرة يجتاحها موج لا تقاومه
فيغرقها........فيك
.......

أعلم أننا نحتاج أحدهم في أكبر لحظات الضعف والحزن
نجري وراء عناق يحتوينا ويحتوي ألمنا
نشعر حينها بضآلتنا وبطفولتنا وضعفنا
وإن لم نجد تلك اليد التي ننتظرها نغرق بحق
......نعم
...ما زلت تلك الفتاة الصغيرة اللاهثة وراء حبات السكر الملونة
وما زلت ضعيفة أحلم بعناق ينسيني عالمي الصغير وينقلني إلى عالمك
....فلا اكبر إلا على يديك
...وحينها
سوف تعانقك كلماتي
............

البوست الأول للمشاركة في حدث
التدوين اليومي

يا بلد معاندة نفسها...يا كل حاجة وعكسها

بقالي كتير ساكتة...نفسي اتكلم...نفسي أكتب...نفسي اعمل حاجات كتير...ومش قادرة

احساس مؤلم أوي وغريب أنك "عاجز" بكل ما تحمله الكلمة من معنى

عاجز حتى عن الكلام....عاجر عن الأمل...أيوة والله الأمل...كل حاجة حوالينا مخلياني في الحالة دي...عايزة أسكت..واهرب...قفلت كل حاجة بتربطني بالناس عشان ابعد عنهم وعن كلامهم

حاسة ان البلد بتضيع واحنا مش قادرين نعمل حاجة...المشكلة اللي اكتشفتها من فترة ومكنتش عاوزة أصدق نفسي هي ان المشكلة في الناس نفسهم...لو الناس يتغيروا يبقى ساعتها بس فيه امل...."إن الله لا يغير ما بقوم حتى يغيروا ما بأنفسهم".....هو احنا وحشين اوي كدة؟؟؟ معرفش....ربنا بيعاقبنا...؟؟؟.يمكن.....فيه خير جاي واحنا مش قادرين نشوفه عشان نظرتنا محدودة اوي...يا ريت....بس مش قلت قبل كدة انا عن نفسي أي أمل
انتهي من جوايا

أنا عمري ما كنت كدة...وغير احوال البلد ...أحوالي علي المستوي الشخصي مدياني نفس الاحساس

انا بقيت ببكي من أقل حاجة...قبل ما نتيجة الانتخابات تظهر بيوم تقريباً بس ساعتها كانت الي حد ما معروفة...دخلت انام بدري جداً مكنتش قادرة اتكلم أي كلمة...انهرت من البكاء...عارف لما تحس ان احلامك كلها بتتهد...النور اللي جواك بينطفي...تحس كأنك ماشي في نفق ضلمة ضلمة اوي...معندكش ولا لحظة امل
انك حتلاقي النور...ومش مصدق أي حد بيقولك انك ممكن...ممكن...تلاقي نور في آخره

حاسس كمان انا كل اللي حواليك مهموم زيك..شوية بحال البلد وشوية بحاله..مش لاقي حد تشكيله اللي جواك
........ ويفهمك...محتاج حد يحضنك اووووي...يطبطب عليك..يقولك اطمن انا جمبك..والحد ده مبتلاقيهوش

اليوم ده بطوله فضلت ترن في وداني جملة واحدة "يا بلد معاندة نفسها يا كل حاجة وعكسها ازاي وانا صبري انتهي..." ومقدرتش أكمل...قلت لا خلاص..خلاص......مبقتش شايفة فيكي أي أمل

بفكر كتير اني اسيب البلد..مع ان دي آخر حاجة كنت اتصور اني افكر فيها...عمري ما حسيت اني مش طايقة أعيش في البلد دي بالشكل ده....عمرى ما تخيلت اني في لحظة ممكن أنا كمان أبقى زي أي حد...أتخلى عن كل حاجة حلمت بيها مرة واحدة وفي لحظة يأس..أتخلى عن بعض مبادئي...وأتخلي عني..عن نفسي...وأهرب في
بلد تاني...أو أهرب هنا من بلدي....وانا جواها...أبقى عايشة فيها غريبة..متغربة..وتايهة

يمكن نظرتي متشائمة أوي ...بس مش قادرة اغيرها.....بجد انا كتير كنت بقول فيه امل..ولآخر مرة في الانتخابات قلت جايز بكرة أحلى..جايز وجايز..وجايز...وبرضه احلام

هو العيب في مين بس بالظبط..والله العظيم ما بقيت عارفة...ولا بقيت فاهمة أي حاجة

تاني حقولها....جايز ربنا بيعاقبنا..وجايز فيه خير واحنا مش شايفين....جايز

...............

.........

.........قراري النهائيقررت أنزل الانتخابات وابطل صوتي....عشان خايفة يزوروه.....راضية عن نفسي وعن قراري ومش حصدق أي حد يقولي ان ربنا حيعاقبني عشان مخترتش

لأ.... انا لما اقابل ربنا حقوله يااارب ..انا مصدقتش حد فيهم .....وانا سبت الاختيار للناس اللي اختاروا الاتنين دول ومقتنعين بيهم وشايفين انهم صح..سايباهم هما يختاروا ويتحملوا نتيجة اختيارهم......وانا حفضل ساكتة وانا عملت اللي عليا وحاولت معاكي يا بلد
وربنا وحده اللي يعلم مين صادق ومين كذاب وحيثبت لنا ده في يوم من الأيام

بئر الألم

لا أعرف ماذا كانت تفعل بنفسها

لكني كنت أعرف أنها تظهر عكس ما بداخلها تماماً

كيف يمكن لها أن تخفي ذلك الألم

كنت أشعر أن داخلها طريق طويل يستقر الألم آخره فلا يصل إليه أحد ولا حتى هي

مع أني كنت أثق أن ذلك الألم يتسلل إليها ليلاً رغماً عنها
يذكرها بكل شيء...يبكيها ويخبرها كم هي ستخطيء بحق نفسها

يؤلمها لعلها تتراجع...تفكر...تتنازل عن بعض الكبرياء وتتحدث
.....ولكن لا فائدة

كان داخلها يصرخ بأعلى صوت
"لا"
فتضحك وتضحك....فيعلو صوت ضحكاتها المزيفة علي صوت قلبها

وعندما تخذلها دموعها وتحاول السقوط كانت تهرب بنظرتها إلى الأرض فلا يراهم أحد

تغيرت كثيراً..أصبحت شخصاً لا اعرفه
...تسقط ولا أستطيع انقاذها
أشعر وكأنها تموت موتاً بطيئاً وهي مستسلمة تماماً
أملي الوحيد أن يتركوها هم وحدها
أن يأخذها أحد من يديها من بئر الألم العميق الذي بداخلها وسقطت فيه
...يعيد روحها إليها
...ويحييها
.........



المشاركة الثالثة في حدث
وصف كلمة شعورية

عن الحب...والخوف

...أخافك
...نعم
أخاف ان أحبك
....أخاف أن أقترب أكثر
....فلا أبتعد
.....
..أبتعد
..فأشتاقك
أحاول ان أبعدك عني
..عن ذاكرتي
تطاردني في صفحات كتبي
..بين سطوري
أرى عينيك بين أحرف كلماتي
.....فأكتبك
أقطع الأوراق...تتجمع حولي محدثة ضجيجاً
...فلا أنساك
...............
..دعني
....فأنا خائفة
....أتمنى ان تحبني... وإن أحببتني أعطيك عمري
...حياتي
...قلبي
...كل كياني
.....ولن يكفيك
.................
هل تذكرني؟؟
تفكر بي وأنت وحدك...وحيد
أتذكر كيف كانت حكايتنا؟؟
...نعم لنا حكاية طويلة
..أريد أن احكيها للعالم كله
كيف التقينا...وكيف...وكيف
أذكر كل تفاصيلها الصغيرة والتافهة احياناً
.......
..أصمت انا
..لعلك تحدثني
...تصمت انت
..فتحدثني عيناك
تذوب كلماتي....وكلماتك...كثلج على قلبي
...فيمرض بك
..لا أريدك أن تذوب بعد أيام
أريدك ان تبقى
إذا كنت أنت...أنت
!!!
...........
أغار
نعم...أغار عليك
ولم أعرف هل أنا مجرد واحدة
أم أنا.....أنا
!!!!
............
اقلب في أوراقي...أراك ملأتها
كل ذلك وأنا أخاف ان اكتبك
!!!...وماذا لو أردت أن اكتبك بحق

البوست التاني للمشاركة في حدث
وصف كلمة شعورية

كتروا من اللقا.....لابد من الفراق

بنبقي متفرقين...ونتقابل...عشان نفترق تاني

اكيد حنفترق...بعد يوم ...اتنين....سنة...مش حتفرق
بس بيفضل لنا سؤال ليه اتقابلنا؟؟؟؟
سؤال ملهوش اجابة...غير حكمة القدر 

.......................

"كتروا من اللقا لابد من الفراق"

....الجملة دي قالتهالي واحدة صحبتي ولما قالتها وجعتني اوي....عينيا دمعت

.....اصلي عمرنا ما بنزعل علي فراق حد مش بنحبه
....ولو بنحب حد اكيد حنفارقه
.....او هو يفارقنا
......مش حتفرق كتير

!!!!!طيب منحبش عشان لما اي حد يفارقنا منزعلش

..... اكيد مينفعش

كتير القدر بيحكم علينا نقابل ناس فترة من الوقت ونحبهم اوي ونحس ان لقاهم كل يوم بيخلينا عايشين...بتتحول حياتنا فجأة لحياة ليها طعم...بنبقي عاوزين نمسك في اللحظات معاهم عشان متعديش....كل ثانية نغمض عيوننا عشان منصحاش من حلمنا معاهم
.....بس بنصحي
......عشان للأسف
..... لازم نصحي
.....................
......................

أصعب احساس لما تشوف حد وتكلمه ومتبقاش عارف ان ممكن دي تكون اخر مرة تشوفه فيها

.........لأي سبب
ممكن بعدين تندم علي لحظة ضيعتها وانت مش جمبه
وانت مش قادر تقوله انا بحبك....خليك جمبي..محتاج لك

ممكن تفضل كل يوم تستني تشوفه تاني...صدفة....والصدفة مش بتحصل...غير صدفة

والانتظار بيبقي عامل زي شمعة كل يوم بتدوب وأكيد في يوم بتنطفي وتخلص وبينطفي معاها قلبك
........................
...........................

لو تفارق حد بتحبه....ممكن يبقي معاك كل لحظة....تحس انك بتفكر فيه 24 ساعة في اليوم حتى وانت نايم.....بتكلمه وهو مش موجود...تحكيله افكارك..واحلامك...وكل اللي مضايقك

بيبقي فعلاً عايش معاك...جواك
....محدش بيقدر يفهم ده أوي
ممكن متبقاش بتحكي لحد عن الطيف ده اللي انت الوحيد اللي بتشوفه...واللي حواليك معتقدين انك ناسيه وانه خلاص مبقاش في حياتك
ميعرفوش انه بقي جواك اكتر من الأول
بس معاك انت وبس محدش شايفه ولا حاسس بيه غيرك
....................
........................

......الفراق ممكن يفصل أجساد عن بعض
....ممكن يكون ببعد المسافات
لكن القلب والاحساس وحتى العقل اللي بيه بنفكر كل لحظة
مينفعش نخليهم يفارقوا حد مش قادرين....أو مش عايزين يفارقوه

التدوينة دي مشاركة في حدث ميهو الجميلة
وصف كلمة شعورية

الموت فيكي.......حياة

الموت فيكي حياة

ولوعمري حيوصل لمنتهاه

حرجع وأعيشه من تاني

ده موتي فيكي بيعيشيني ميت لحظة

واللحظة بشوفها معاكي بألف حياة

.............

.............

في ضي عيونك بشوف نفسي أمير عاشق

وأعشق ضحكة تتتوهني أدوب غارق

أغرق جوه بحر عيونك ومارجعش 

وماسلمش....

 وأدوب في عينيكي من تاني

ويرجع قلبي في لحظة يموت فيكي

فاموت تاني..

وارجع أعيش بلمسة وحيدة من ايدك

بحلم حلمته وحلفت اني عمري ما حسيبك

..............

............

في الحلم لما بشوفك بحسك واقفة قدامي

ولما تكوني حقيقة كأنك بطلة في منامي

ولو بتشرق شمسك أستناكي في ساعة الفجر

و ييجي غروبك أخاف من ليلة هجر

وفي الليل أحفّظ للقمر اسمك

ينده عليكي وما ينسي في يوم همسك

ويهمس لك وحشتيني

يوصلها....من قلبي يخاف لاتنسيني

ولو تنسي اموت ...غير حبك ما يحييني

ولو مُت..موتي فيكي حياة

وحياتي ليكي بهديها...وأموت فيكي