Monday, January 23, 2012

عن العشق...والهوى



كل المشاكل اللي قابلتها ليها علاقة بالحب
يا اما حد مش عارف يحب اللي بيحبه
يا اما مش عارف يخلي اللي بيحبه يحبه
يا اما مش عارف يحب اللي حواليه
يا اما مش عارف يحبب اللي حواليه فيه
يا اما بيحب نفسه بزيادة
يا اما مش عارف يحب نفسه خالص
ديماً ليها علاقة بالحب
"فيلم حُب البنات"

*******************

لما تنام...وتحلم..مش بتبقى عارف ساعتها إنك بتحلم وبتبقي مبسوط أوي بالحلم..أو حتى مش مبسوط...بس بتبقى مش عارف إزاي حيتنهي...ومش بينتهي غير لما تصحى من النوم....فجأة
ساعتها بس حتعرف وتتأكد..إنه كان حلم

وزي ما حلمت بيه غصب عنك ومن غير ما تقصد
قمت منه برضه غصب عنك

........

*******************



....أحياناً الألم بيكون أكبر من إننا نتحمله

بتحس كأن فيه غيامة على قلبك مخلياك مش قادر تحس بأي حاجة
بالفرح...بالحزن...بالخوف...بالحب...بالكُره
...أي إحساس
كأن مشاعرك هاجرت بعيييد وسابت قلبك وحيد وبردان ومش عارف يعمل إيه
!!!!!

*******************

رغم إن فيه معاني كتيرة للوحدة إلا إن مشكلتنا الحقيقية لو نبقى حاسين إن حد معين...واحد بس...هو اللي ممكن يضيع إحساس الوحدة ده
....لما يبقى جمبك...ويسأل عنك
ولو الحد ده بس هو اللي مش موجود حتفضل حاسس إنك وحيد
..................
......لكن مش ديماً احساسنا ده بيكون صح
للأسف
.........

*******************

أحياناً..بنحط قدامنا اختيارين...نندم على حاجة عملناها..واللا نندم عشان معملناش حاجة كنا عاوزين نعملها
!!!....
نفس المعني...ممكن تقامر بلحظة سعادة تعيشها دلوقتي مع إن ثمنها  ممكن يبقى لحظات ألم
!!...أو...تخليك عايش حياة عادية من غير سعادة وكمان من غير ألم
للأسف ناس كتير بتفضل الحالة الأولى...حتى لو فعلاً ثمن السعادة دي عُمر من الألم
ممكن يكون ده غلط...لكن المشكلة هنا في قلوب مش بتقدر غير إنها تعمل اللي بتحس بيه....ووجعها وألمها بتتحمله وبتحاول تخففه بالكام لحظة السعادة اللي عاشتها
............
*******************

ممكن
كلمة...تكسرك
وكلمة...تقويك
وكلمة...توجعك
وكلمة...تفرحك
وكلمة...تطيرك في السما
وكلمة...توقعك ع الأرض
وكلمة...تدفيك
وكلمة...تموتك
وكلمة...تحييك
وممكن يحصل لك كل ده..من غير ولا كلمة
عشان ساعات السكوت بيكون ليه معاني كتيرة أوووي ...لو عرفت تفسره
!!!.....لو

*******************

ديماً بيبقى نفسك تعرف هما إزاي الناس شايفينك
أو -أشخاص معينة - مش كل الناس
نفسك تعرف بيفكروا فيك إمتى؟؟
إزاي؟؟؟
لما بيشوفوا إيه؟؟
لما بيسمعوا إيه؟؟
أنا عن نفسي بفرح جدااااً لما حد بيقوللي افتكرتك
...لما شوفت البحر
...القمر
...الورد
عشان بتحبيهم
لما شوفت فيلم لفاتن حمامة
لما سمعت فضل شاكر أو وائل جسار
افتكرتك والدنيا بتمطر وقلت زمانها مبسوطة
افتكرتك بكلمة حلوة لمست قلبي زي كلماتك ما بتلمسني
...حلو أوي إنك تحس إنك على بال حد

لما بنحب حد أوووي بيبقى على بالنا لدرجة إننا بنفتكره في كل وقت وبكل حاجة حتى لو صغيرة

المفروض نقول ديماً للي بنحبهم قد إيه احنا فاكرينهم كل وقت
...بس ده مش ديماً بنقدر نعمله
....وساعات كتير بنبقى شايفين حد وحاسين حاجات كتير والحد ده مش عارف
....بس فيه حاجات مينفعهش تتقال
....عشان المفروض إنها بتتحس

*******************

القلب اللي بيجرحنا فيه حاجة اكيد جارحاه"
 "وجراحنا بتفكرنا بالقلب اللي جرحناه

بحس إن على قد ما بنجرح...بنتجرح...بس اللي مش بناخد بالنا منه أبداً...إن ساعات اللي بيجرحنا مش بيكون قصده يجرحنا
لسبب بسيط جداً...هو بس مش بيبقى عارف إننا حنتجرح
عشان مش بيكون عارف أصلاً إننا............بنحبه
لكن اللي يحب مش حيجرح..أبداً..وحتلاقيه بيفضّل ديماً إنه يسكت وميحاولش يقرب لو قُربه ده فيه أي ألم
مشكلتنا اننا مش بنكون شايفين الطرف التاني من الحكاية ومش بنعرف قد إيه ممكن يكون بيتألم ومجروح...وممكن كلمة مننا عنه تزود جرحه....عشان كدة السكوت بيكون أفضل

*******************

كتير بنسأل نفسنا سؤال
!!!....هو الغياب بيخلينا نشتاق أكتر
!!!...واللا نقسى اكتر
!!!...بيخلينا نبعد ومانفكرش
!!!....واللا نفكر وننتظر كل لحظة
...صعب إنك تحس إن حد واحشك أوي
"لكن ما تقدرش تقوله..."وحشتني
....................
...والأصعب
...إنك في الأول بيبقى عندك يقين انه حيجي يوم يقولهالك
!!!.....وانت مش عارف أصلاً هو بيفكر فيك واللا لأ
والأصعب كمان إن في لحظة بيتحول يقينك...لمجرد احساس...والاحساس..لأمنية...والأمنية...لحلم بعييد
 وفيه فرق كبير أوووي بين اليقين والاحساس والأمنية
........... والحلم

...............................
وووووووووبس

J


21/1/2012

21 comments:

دعاء العطار said...

الجمله دى من فيلم حب البنات بحبها اوى ... عشان بحسها حقيقيه اوى ده غير انى بحب الفيلم كله اصلا :)

......

رغم ان كلامك عن احلام المفروض تفرح .. بس احساس بالوجع وصلنى ... ف احلام مش بيكون بايدينا نبتديها او ننهيها .. الاحلام دى لما نلاقيها ابتدت غصب عننا فعيشناها وعجبتنا اوى وفجاه نلاقيها انتهت .... بنحس بالعجز والالم :(

........

" كأن مشاعرك هاجرت بعيييد وسابت قلبك وحيد "

انتى عارفه ... الاحساس بالالم اهون بمرااااااااحل من الاحساس باللامبالاه

لان الالم معناه انك انسان بتحس

لكن اللامبالاه معناها ان مشاعرك اتجمدت :(

.........

" ولو الحد ده بس هو اللي مش موجود حتفضل حاسس إنك وحيد "

دايما بيتقال " لا تضع البيض كله ف سله واحده "

الاصعب لما تحطى مشاعرك كلها وحياتك واحلامك ف سله واحده .. وتوقفى سعادتك بكلمة او ابتسامه او موقف او صوت حتى حد بتحبيه ... ساعتها لو حصل حاجه مش بس قلبك هيتوجع .. لا هتحسى بالضيااااع

.........

" حياناً..بنحط قدامنا اختيارين...نندم على حاجة عملناها..واللا نندم عشان معملناش حاجة كنا عاوزين نعملها "

الخوف من الندم .. هيخلينا مانعملش اى حاجه ... السعاده قليل لما بنحسها .. ومش هنحسها طول مااحنا خايفين من الجرح .. الحياه بتحتاج مننا مغامره حتى لو تمنها لالم

............

ساعات السكوت بيوجع اوووووى اكتر من الكلام ... واكتر حاجه بتوجع فيه انك مش هتقدر تعاتب حد ع كلام ماقالوش :(

.........

" عشان المفروض إنها بتتحس"

ده المفروض .. بس ع فكره مش كل مفروض بيحصل للاسف :(

.........

" عشان مش بيكون عارف أصلاً إننا............بنحبه"

وهو ده من اصعب الاحاسيس ان يكون جواكى بركان مشاعر ومش قادره تعبرى عنه بولا كلمه

...........

" هو الغياب بيخلينا نشتاق أكتر
!!!...واللا نقسى اكتر"

ساعات بيخلينا نشتاق اكتر لفتره وبعد كده بنتعود فبنقسى :(

........

عارفه انى طولت ف الكومنت بس بصراحه ده لانه يستاهل

ابدعتى ياسوسو :)

Nour said...

عايزة اختار جملة واحدة اقولك انها عجباني واعلق عليها ومش عارفة عشان كده هنقل البوست كله هنا :D

حاجات كتير بجد صح اوي ... كلام رائع كالعادة

reemaas said...

اول جملة انا بحبها جداااااااااااااااا

كمان مشهد عن العشق والهوى صح ديما جراحنا بتخلينا نجرح

عجبتنى الصورة اوى يا سهاد هيفضلوا يجروا ورا بعض ديما كده

حنين محمد said...

صباح الغاردينيا سوسو
وحشتيني اووي ووحشتني كلماتك عارفه ليه لانك بجد صريحة وقلبك ابيض وعفويه اوي والاجمل رومانسيه ورقيقة عارفة اني قرأت البوست مرتين وانا بسمع شيرين قد ايه الحب والهوى حكاية بتتعبنا ونحبها عارفة ياسوسو حكاية اننا بنحس بالوحدة لو حد واحد بس بعد او غاب دا فعلا صحيح اقولك كلمة في سرك لو ريبال بعد عني ساعة بس بحس نفسي وحيدة عارفة ليه لانه الدنيا والحياة لانه روح ريماس وأنفاسي دا الحب ياسوسو أجمل إحساس بنعيشه اممم انا شكلي كدا حرغي وصدعك بجد وحشتيني ووحشني احساسك وبشكرك والله على سؤالك عني ياغالية بجد ببتسم فرحان بقلبك الجميل لاني عارفة انه ليا مكان صغنن جواه :) بحبك اووووووووووووووووووووووي "
؛؛
؛
لروحك عبق الغاردينيا
كانت هنا
reemaas

نهر الحب said...

دعاء
مش عارفة ارد اقولك ايه بس انا متأكدة انك حاسة كل كلمة مكتوبة
:))

نور
:)
منوراني طبعا

ريماس
:)
اه القلب والعقل عمرهم ما بيتفقوا علي فكرة

ريماس
حبيبتي
رائحة الغاردينيا عادي لمدونتي اخيرا
وحشتيني جدااا جداا ووحشني كلامك وطلتك عليا
بجد فرحت اوي لما لقيت تعليقك
صحيح العشق والهوي دي حكاية معقدة ودواير جواها دواير ومش بنعرف نخرج منها
ربنا يخليلك ريبال ويسعد قلبكوا ويجمعكم ببعض يا رب

قولي كل اللي انتي عاوزاه عوضي غيابك عني
وطبعا مالكيش مكان صغنن في قلبي...
ليكي مكان كبيييييير اوي
:))

rona ali said...

انا بقالي كتير مجتش هنا
القطر بتاعى متاخر كالعاده

المهم جمله حب البنات بحبها اوى اصلا دور اشرف كان دور رهيب في الفيلم

عجبنى البوست كله طالع من المعاميق كالعاده وانا بحب اللي بيطلعوا اى من معامقهم كدة

تحياتى ليكى يا ساسو

Miss LoZa said...

أنا مفتقداكى أوى
والبوست طويل بس ممتع أوى أوى :)

نهر الحب said...

رونا
تسلمي يا قمر
ميهمكيش الغياب
:)
المهم انك تيجي

miss loza
انا كمان مفتقدة نفسي
:)
منوراني

حنين محمد said...

صباح الغاردينيا سوسو
انا جيت ابص عليكي ماتعودتش تتأخري علينا ببوست جميل عن الحب يارب تكوني بخير ..وحشتيني :) "
؛؛
؛
لروحك عبق الغاردينيا
كانت هنا
reemaas

نهر الحب said...

ريماس
خايفة اقولك السبب في الغياب تزعلي مني
أو
عليا
بس
انا مش بكتب
ومش عايزة اكتب
ومش قادرة اكتب
وغيرت شكل المدونة بس عشان تبقي ذكرى مني بالشكل اللي فعلا كنت بتمناه من زمان اوي ولما عملته لقيتني المفروض مكتبش
:((
دي حكااااية طويلة
بس تقدري تقولي اني فقدت الاحساس اللي كنت بكتب بيه ضاع مني وسط زحمة حاجات كتير
وضاع بسبب حاجات كتير
زي ما بقول ديما
نفسي يطلع ده كلام عبيط زي ما بقول ديما وحرجع في كلامي وحكتب وحنشر
ووووو
بس مش عارفة بجد
المرة دي غير كل مرة
انا حتى فعلا مكتبتش ورافضة النشر
بالعكس انا فعلا اخر حاجة كتبتها هي المنشورة دي

اعزريني

حنين محمد said...

صباحك حب سوسو
بصراحة مش هقولك أني صدقت ابتسامتك الي ابتسمتيها عشاني عشان المفروض طالما انا بحبك احس بيكي وانا حاسه اووي من غير ماتتكلمي بس انتي قلتي في مدونتي انتي ياريماس تقريباً الوحدة الي بتثبتي انه الحلم ممكن يتحقق وان الحب موجود ومش مستحيل بس الي انتي مش بتعرفيه ياسوسو انه ريمو حبيبتك الي بتبتسم وعايشة الدنيا بالحلم ياما بتبتسم وهي بتبكي وياما بتضحك وهي مجروحة بس مش راضية تسيب حلمها ولا قادرة تعيش من غير حب ولسى بتحلم وتحلم وتحلم وعاوزاكي كدا ياسوسو تحلمي وماتتخليش عن حلمك ولا عن حبك مهما كانت الحياة قاسية ومهما حصل فراق لو في حب حقيقي خديه لحضنك ورجعيه اليكي لانه جزء منك لانه انتي وانتي هو ..
سوسو ..بالنسبة للمدونة انا بشوفها حلوة كدا يمكن عشان انا بحب اللون الغامق في المدونات عشان الصور بتبقى جميلة اكتر بس لو انتي حاطه الاسود عشان بقيتي حاسة بكدا حزعل وهقولك غيري لونها ..
سوسو حبيبتي ..عاوزة اشوف ابتسامتك بجد وترجعي تكتبي عشان انتي لازم تكتبي الكتابة متنفس روح ماتخنقيش حاجات جميلة جواكي مهما كان جربي تكتبي اي حاجة ماتفكريش امسكي القلم وحاولي وصدقيني حيكون جميل اووي لانه من قلبك عشان خاطر ريماس الي بتحبك عاوزة اشوف البوست الجاي بروح سهاد الي بحبها بنهر الحب الي حيفضل يجري رغم الظروف "
؛؛
؛
انا جنبك وحفضل جنبك عشان والله بحبك من قلبي وعاوزة اشوفك سعيدة "
؛؛
؛
لروحك عبق الغاردينيا
كانت هنا
reemaas

نهر الحب said...

ريماس الجميلة
اللون الاسود صدقيني مش حزن
ولا جوايا
انا بس بحب الابيض واسود والافلام القديمة بتاعة زمان زي نهر الحب والباب المفتوح وكدة وكنت حابة اوي اللي يدخل المجونة يحس انه في عالم زمان القديم الابيض واسود عشان انا نفسي ارجع للزمن ده

Anonymous said...

عندك حل للنسيان عايز انسى حب

نهر الحب said...

روعة النسيان
الحب....بجد
مايتنسيش
نصنع ما يسمي بالتناسي عشان نقدر نكمل
:)

P A S H A said...

الله أكبر عليكي يا أستاذة
:)
أنا قريت التدوينة دي أكتر من مرة ، وكل مرة بجد مش بالاقي تعليق أكتبه أو أعبر بيه عن مدى السعادة التي شعرت بها وأنا أقرأ كلماتك البديعة

شوفي .. لو لم تكتبي سوى هذه التدوينة لكفتك

:)

خالص تحياتي وعميق تقديري واحترامي

نهر الحب said...

pasha
احتمال اني مكتبش غير التدوينة دي
:)
!!!!!!!!

هبة فاروق said...

التدوينه كلها رائعه
والكلمات صادقه ونابعه من احساس ومشاعر صادقه
اجدتى فى وصف المشاعر والوحده والفراق ووصلت للقلب سريعا
المدونه بالتاكيد شكلها كده احلى ونورت بصوره فاتن وعمر الشريف
رائعه
كل شىء رائع هنا
تحياتى

حياتي said...

يمكن تكون دب اول مره اعلق هنا او ازور مدونتك .... لكن بكتاباتك حسستيني اني اعيش معكي كل كلمه من زماااااااااان

كلام جميل مينفعش اعلق عليه لاني مش هلاقي تعليق يليق بالاكم الرائع ده

تقبلي مروري

نهر الحب said...

حياتي
:))
شكرا اوي بجد

Romancia said...

تحفه اوى بجد كلامك واحساس عالى بقالى كتير مقرتش حاجة لمستنى كدة

نهر الحب said...

رومانسية تسلمي
:)
تعالي دييييييييما