!!!!....يوم عادي.....ولكن

النهاردة ...بالذات....حبيت إني أكتب.... مش عن حاجة معينة....عن حاجات كتير حصلت في يوم واحد
..يمكن ركزت فيها عشان عايزة أركز
...يمكن عشان أول يوم في سنة جديدة
يمكن عشان بس يتسجل هنا تاريخ
1/1/2012
...اني كتبت فيه حاجة
....واني بدأت السنة بتفاؤل مش بحزن
ويمكن عشان نفسي أفرح ولو بحاجات صغيرة أوي
......
الغريب اني كنت عارفة اني مش حقدر أبداً أسهر للساعة 12
 وافتكر ان آخر رأس سنة حضرت فيها الساعة 12
 كان وانا في رابعة كلية لما كنت بسهر شوية عشان أذاكر للامتحانات
غير كدة ولا أعرف شكل الساعة وهي 12
 دي إيه أبداً حتى لو صاحية وانا ع السرير بتبقى الدنيا ضلمة ومش ببقي سامعة غير تكات الساعة
أيام ما كنت بذاكر كنت بحب أوي كل يوم لما الساعة تيجي
 11:59
كنت أفضل باصة للساعة عشان أشوفها وكل حاجة فيها بتتغير الثواني والدقايق والساعات واليوم..كل ده في لحظة واحدة
معرفش ليه كنت بحب الاحساس ده واحساس انه يوم جديد بدأ
....
امبارح سهرت للساعة 12 من غير قصد ...
معلش الساعة 12 دي عندي هو السهر :)
المشكلة اني كنت بتفرج علي فيلم
Avatar
وكنت معتقدة انه حيخلص بدري لكنه طول لحد 12 فعلاُ وقاومت النوم لأنه بجد كان عاجبني جداااااً
وجات 12
كان نفسي أبعت رسايل لناس كتير
 بس مابعتش غير لواحدة صحبتي بحبها أوي
ختمت السنة زي ما قلت بركعتين دعيت فيهم لكل اللي بحبهم
...والصبح برضه
أول حاجة شوفتها كانت رسالة رد صحبتي خلتني ابتسمت
وفتحت النت ع الموبيل ولقيت رسالتين كمان علي الفيس بوك
منهم رسالة بتطمني على ريماس انها بقت احسن شوية والحمد لله
......
.....

كل ده والساعة كانت 7 صباحاً
رحت المستشفي  وانا نفسي مفتوحة للدنيا
الدنيا كانت برد أوي...ولقيت قطة صديقتنا مسمينها "كراميلا" قعدت تعاكسني وكانت عايزة تدلّع شوية...قلت وماله...سنة جديدة برضه....وقعدت اطبطب عليها كدة وكانت مبسوطة...:))وخلتني انا كمان مبسوطة
 فتحت الراديو شوية صغيرين كان نفسي افضل فاتحاه بس انشغلت بعد كدة ونسيت
ع الساعة 10 لقيت الدنيا بتمطر مطر خفيف أوي والشمس طالعة....بصيت للسما وفرحت...أووووي
قبل ما نروح بشوية عرفت خبر خلى عنيا دمعت...ان صحبتي من أيام المدرسة قامت بالسلامة الحمد لله وجابت
"عمر"
مع اننا كنا مسميينه محسن .....بس ما علينا
:DDD
.....
الدنيا شتت تاني قبل ما انزل واكمل باقي اليوم في الصيدلية....وأنا لوحدي
.... وجوايا احساس غريب
حصلت حاجات حلوة ومميزة النهاردة
.... وانا مش حبطل أفكر
واحتار...كالعادة
يا ترى بكرة مخبي لنا إيه؟؟؟؟
...يا رب
....
.....
..أنا سقعانة أوي

1/1/2012