Wednesday, January 04, 2012

شخبطة


اكتشفت ان صفحات أجندتي الصغيرة اتملت
..معظمها بقى مليان كلام
....شخبطة
....أحاسيس كتيرة
.. حبر بس على الورق
....ودلوقتي
 عايزة أقفل الأجندة
وأحطها على جمب
...خايفة تكون اتملت ع الفاضي
..خايفة أكون ضيعت بياض صفحاتها بسواد حبري
.....
..بس نفسي أدور على صفحة في أجندتي لسه فاضية
.. ممكن أقول فيها حاجة
عايزة أديها وأدي نفسي فرصة
ان لسه ليها في قلبي مكان
....
...بس مش لازم
...ممكن في آخر صفحة فيها أحط
نقطة
.
..مجرد نقطة
..بس مش حقول من اول السطر
عشان مش حبدأ تاني في أي حاجة
..............
في حاجات حواليا ببقى عاوزة اعمل كدة معاها فعلاً
أني بس أقفل الباب وأقول بيني وبين نفسي
.....خلاص
!!!...النهاية
..أصلي انا كمان مابحبش النهايات المفتوحة
..بحب النهاية تبقى نهاية بجد
!!...بس هو فيه حكايات ملهاش نهاية
بنستني القدر ينهيها زي ما مكتوب
..بس بيبقى بايدينا حاجات نعملها
...نحط حاجز
...نغمض عيوننا
...أو
...نحط قلبنا جوه صندوق
... ونسيبه في ركن بعيييد
...يستخبى جوانا
...من البرد
 ومحدش يشوفه او يوصل له
.....
عشان لو حد وصل له...حيبقى متأخر
متأخر أوووي



4/1/2012

22 comments:

P A S H A said...

وفي هذا السياق كنت كتبت زمان :
نقطة .
ومن أول الصبر
اللي مرر عمرنا
وما فيش بديل
ولا فيه مفر !
وعجبي

♥نبع الغرام♥♪≈ said...

هى حياتنا ايه غير ورقه وقلم وشوية شخبطه

وكل شىء وله نهايه الا الشخبطه مالهاش نهايه

شخبطتك جميله واتمنا تكون لها فايده تفيدى بها الغير وتكون ذكرى جميله حبيبتى

تحياتى لكى

ibnalsor said...

أجمل الاشياء هي تلك التي تظل مستمرة ومعلقة نهاياتها .. لا يهم المسميات كانت نقظة او كانت شخبطة او كانت أجندة .. الاضاءة هي الاستمرار

أع ـقل مـ ج ـنـونــة said...

نفسي اوي
احط قلبي جوة صندوق
والصندوق يكون جوة صندوق
لحد 100 صندوق مثلا !
واسيب نفسي بعيدة شوية !!
مممم
لكل شئ نهاية
ودا افضل بكتير من النهايات المعلقة

خاطرتك مريحة
رغم احساسي بالصراع اللي جواكي !
بس الكتابة بتريح اوي
والثقة في الله بتريح اكتر :)

تحياتي

نيللي علي said...

حتى لو أجندتك اتملت على اخرها ومفيش مكان تكتبى فيها ايه, بس بجد هتكون احلى دكرى فى حياتك ووقت ماترجعلها وشك هيضك والبسمه هتنور قلبك قبل شفايفك وتقولى يااااااااااااه كل ده كان نفسى فيه

وربنا يحقق كل اللى بتحلمى بيه

أنا - الريس said...

مش كل القصص زي بعضيها بعضها مينفعش إلا فيه نهاية وبعضها مينفعش إلا مفتوح إلا مش هيكون في يوم جديد.

تاني حاجة ممكن تخلي لنفسك أكتر من اجنده -توريه- الحياة مش بتقف على أجنده واحده، وإلا مكنتش هتلاقي كتاب أكتر من جزء


الكلام كله يحتمل أكتر من اتجاه

دعاء العطار said...

"
في حاجات حواليا ببقى عاوزة اعمل كدة معاها فعلاً
أني بس أقفل الباب وأقول بيني وبين نفسي
.....خلاص
!!!...النهاية "

البوست ده رغم نبرة الحون اللى فية

الا انه قال كلام كتير اوى انا دايما احسه

مش بحب النهايات المفتوحة زيك بحسها برضه شبة الرمادى

ومش بحب ابقى مش عارفه انا فين ولا رايحه فين

فعلا الاحسن فى الوقت ده اننا نغمش عنينا او ننهى الحكاية عشان الامل بيوجعنا اوى اكتر من الالم لانك بتبقى خلاص عارفه انك المفروض تتالمى فممكن تتعايشى لكن لو عيشتى بامل ماجاش هتتعذبى فى فترة انتظارك وهتتعذبى بعد ماينتهى وحتى لو جيه

.

.

فممكن يكون جيه متاخر اوووووى فبرضه مانحسش بية وكمان مانبقاش عايزينة يجى

جميل بوستك ياسهاد بجد :)

Bent Men ElZman Da !! said...

حتى ان الواحد يحط قلبه او عقله جوه صندوق
ده هيبقى هروب
وبردو هيكون نهايه مفتوحه
يعنى مش حل
يمكن يكون حل مؤقت عشان الواحد يعمل مش واخد باله
بس فى الاخر ومع الوقت هيبقى الحل ده مش مجزى خالص
وهنرجع نبص على كل حاجه من اول وجديد بعيون مفتوحه اكتر

الكلام الشخبطه دى حتى مع مرور الوقت بيبقى افضل حاجه طلعت من جوانا

reemaas said...

الموضوع كبير

اولا استحالة بياض الصفحات يكون راح على الفاضى لان كل حرف من سواد الحبر عبر عن فكرة او احساس كان وقته صادق وموجود

النهايات المفتوحة صعبة بس لازم نتحملها لان فى حاجات ماينفعش تتنهى الا كده لا نتعلم نتقبل الواقع

انصحك انك تجيبى اجندة جديدة:)

هبة فاروق said...

حقولك زى نور ما قالت اشترى اجنده جديده وافتحى صفحه جديده وعلى روقان كده ومن اول السطر
معانى البوست رائعه وحلو الشخبطه وحلو الكلام وحلوه قوى مسكه القلم
تحياتى بوست روووعه

Unknown said...

بوست جميل
واتمني ان النهايه تبقي سعيده

نهر الحب said...

pasha
الصبر مش ممر عمررنا
الصبر احلي حاجة بتصبرنا
:))

نهر الحب said...

نبع الغرام
انوووسة
ماهي ممكن تبقي ذكريات حلوة
وممكن تبقي ذكريات بتوجع
:))
فرحانة برجوعك ونشاطك

نهر الحب said...

ابن السور
لا مش معاك
مش بحب حاجة تبقي مفتوحةوانا تايهة
ومينفعش حاجة تستمر وهي ملهاش معني

نهر الحب said...

اعقل مجنونة
وانا كمان نفسي في كدة اوووي اوووي
بس ده مش حل اوي
او احنا مش حنعرف نعمل كدة
الكتابة بتريح
وبتتعب في نفس ذات الوقت

نهر الحب said...

نيللي
عندك حق بس ده لو كان حلم من احلامنا العادية
بس ساعات بتحسي ان مشاعرك في الكتابة طلعت كلها في وهم انتي بس اللي بتكتبيه

نهر الحب said...

MR.PRESIDENT
مممم
وجهة نظر برضه
بس فيه اجندات بتبقي قريبة من قلبك وبتبقي عايز منها حاجات كتير معينة ومش مهم الباقي

نهر الحب said...

دعاء
انا عارفة ومتاكدة انك اكتر حد كان حيفهم اللي مكتوب ويحس بيه يمكن عشان انتي شبههي اوي اوي

انا حسيب التعليق كله وامسك في الجملة دي

عشان الامل بيوجعنا اوى اكتر من الالم
عارفة وجعتني اكتر ما معناها واجعني اصلا

نهر الحب said...

بنت من الزمن ده
عندك حق
ساعات بس بنبقي عايزين نخبي قلبنا شوية م البرد
وبنرجعه تاني لما نفوق

نهر الحب said...

ريماس
اه الموضوع كبير اوي
اوي
لا ساعات كتاباتي بتصعب عليا بحس كأن احساسي وقع ع الارض
فاهماني
!!

نهر الحب said...

هبة فاروق
صعبانة عليا اوي الاجندة القديمة وكمية الاحاسيس اللي فيها
بس انا حشيلها علي جمب
:))
منوراني يا هوبة

نهر الحب said...

محمد امير
شكرا
مش مهم النهاية حزين او سعيدة المهم يبقي فيه نهاية