Thursday, July 21, 2011

بين اللحظات.........حياة


ممكن في لحظة.....تغمض عينيك...لحظة واحدة بس....تتمني فيها حاجة صغيرة....وبعدين......تفتّح....تلاقي اللي نفسك فيه اتحقق.....

وممكن تفتح عينيك....متلاقيش حاجة اتغيرت....تقعد وحيد.....وتخاف تحلم تاني......

.
.
.
.

بحس ان كل حاجة في حياتنا بتفرق فيها اللحظة ممكن في ثانية نفرح......وفي ثانية نزعل....نبقى منتظرين حاجة....وتتأخر لحظة.....طعم الفرحة ساعتها حيتغير....يا اما حيبقى حلو اوي عشان استنينا كتير...يا اما حيكون من غير طعم عشان من كتر ما استنينا ضاع الاحساس وكانه وقع على الأرض محدش حس بيه
.
.
.
.

أنا من الناس اللي بتركز اوي في اللحظات دي...بركز كمان في تعبيرات الوشوش....في النظرات...الابتسامة...والضحكة....طريقة الكلام...



ساعات بكون نفسي أشوف حاجة معينة على وش أي حد بقابله....ببقي عاوزة آخد كل كلمة بتتقال أدور جواها بين كل حرف.....على معني تاني يمكن يكون مستخبي

كتير مبوصلش للي انا عايزاه بالظبط....وبحس ان اللي قدامي عبارة عن تمثال له صوت بس....ملامحه مش بتتغير لا بالايجاب ولا بالسلب..كلماته كأن حد جاب الحروف حطها جمب بعضها غصب عنها فطلعت كلمات وخلاص
.
.
.
لما بيحصل ده بزعل وبيبقي نفسي اللحظات اللي بحس فيها ده تعدي....لكنها بتفضل وتاخد وقتها
.
.
.

وساعات....بحلم....وأحب الحلم اللي أنا عايشاه ......الحلم كمان بتكون مدته لحظة.....بس واحنا عايشين جواه بنحس انه حكاية طويلة وفيلم نهايته مفتوحة...ومش بنتاكد انه مجرد لحظة حلوة غير لما بيعدي ونصحي من النوم....نحاول نفتكر تفاصيله ونحكيه عشان نحس بيه...بس في الآخر برضه بيكون حلم
.
.
.
.

الأحلام على قد حلاوتها بتبقي مجرد حاجة بنرسمها في عقلنا الباطن.....حاجة نفسنا تحصل....نعيشها.....بس الأحلام مش بتتحقق إلا قليل أوي....واحنا ساعات بنتوه جوه الحلم لدرجة بنكون مصدقينه ومصدقين انه واقع
.
.
.
.
.

ولما الحلم يبقي حقيقة قدامنا نطلع للسما في لحظة.....واللحظة دي بتخلص بسرعة كانها غمضة عين سرقناها من الزمن...ونلاقينا على الأرض يا أما نزلنا عادي....يا اما وقعنا وقعة جامدة دوختنا
.
.
.
.


فيه حاجات كتير بتخليني أعيش في الأحلام .....زي..."فيروز"ا

صوت فيروز بيخليني في عالم تاني خالص....ببقي مش سامعة اي حاجة حواليا وأنا بسمعها...وأنا بغنيها بتوه معاها



أسمعها في "سألتك حبيبي".....بتقول.....ا

"موعدنا بكرة و شو تأخر بكرة...قولك مش جاي حبيبي.....عم شوفك بالساعة.... بتكات الساعة ....من المدى جاي حبيبي"ا
.
.
.
نفس الاحساس....قد إيه ممكن نحس ان بكرة بعيد واحنا مستنينه....

لحظات الانتظار بتشغلني....بتخليني حزينة وخايفة......



انك تنتظر حد في كل تكة من تكات الساعة......عايز الساعة تعدي...ويمكن ساعتها حتعاندك كانها مش بتمشي لمجرد بس انك مستني
.
.
.
.

المشكلة ان ساعة الانتظار بيكون معاها خوف ان بعد الانتظار ده تحصل حاجة غير متوقعة تخليك تقع على الأرض

.

.

.

عشان كدة لما بنتظر حاجة....بخاف...بحس ان الدنيا مكن تبعتلي رسايل وانا رايحة مكان اني مش لازم أستعجل....ألاقي المشروع اللي انا راكباه مثلاً بيفرمل فجأة...كأنه بيقوللي .........فرملي

أقف لحظة مع نفسي وأقول...صح... لازم ديماً أفرمل.....دقات قلبي تزيد وكأني سمعاها.....أبقي عاوزة أقول لقلبي......أرجوك فرمل.....ومش ديما بيسمع كلامي



أحاول امسك الموبيل عشان أسمع فيروز تاني جايز أهدى واتوه معاها....ألاقيها بتقوللي ....

يا دنيي شتي ياسمين...عاللي اتلاقوا ومش عارفين.....من مين خايفييييييييين



أبتسم شوية.....وأقول...من مين خايفين......

ديماً لما بيجيلي احساس الخوف بلوم نفسي وأقول ان الانسان لازم يعيش اللحظة الحلوة......"الحلم" وميضيعهوش في الخوف

لازم يعيش اللحظة عشان هي لحظة مش حتتغير ومش حترجع....
ومش معقول نضيع معظم لحظات حياتنا في خوف يمكن يكون ملهوش سبب



الحلم...لازم يفضل حلم.....ولازم يجي يوم نصحي منه ونفتكره عشان يخلينا نبتسم واحنا لوحدنا مش عارفين نحلم
.
.
.
.

بفضل في حيرتي دي كتير...ويمكن لولا الحيرة دي مكنش زماني بكتب....
ولا بطلع اللي جوايا



هو ساعات الواحد بيبقي نفسه يطلع اللي جواه بس لحد مناسب...مش لأي حد...

وانا ديماً بحس أن مفيش حد مناسب يفهمني غير الورقة والقلم.......

واللحظات اللي بتفرق معايا بجد هي اللي بكتب فيها
.........

ووبس


20/7/2011



6 comments:

Tamer Moghazy said...

"يا اما حيكون من غير طعم عشان من كتر ما استنينا ضاع الاحساس وكانه وقع على الأرض محدش حس بيه"

صدقيني لو قلت لك اني حسيت الجملة دي من قبل ما اقراها وعرفت انها جاية في وسط الكلام..!!

"عم شوفك بالساعة.... بتكات الساعة ....من المدى جاي حبيبي"

عارفة في انتظارك فكرتيني باغنية اصالة..
"مجروح صوت الساعات
جارح صوت السكات
يسرق عمري الي جاي
يسرق عمري الي فات
تعدي الدقه والتانية
تضيع ثانيه ورا ثانيه
وتذبل وردتي في ايدي
كأني لوحدي في الدنيا"


"يا دنيي شتي ياسمين...عاللي اتلاقوا ومش عارفين"
باحب الجملة دي فوق ما تتخيلي..!!


.........
...............
..
.........
.......
............ آسف اني اتاخرت (';')

Tamer Moghazy said...

حلوة الاغنية قوووي..
على فكرة :)

نهر الحب said...
This comment has been removed by the author.
حبات التوت said...

تصدقى وانا بقرى البوست دة وفى المقطع بتاع موعدنا بكرة و شو تأخر بكرة...قولك مش جاي حبيبي.....عم شوفك بالساعة.... بتكات الساعة ....من المدى جاي حبيبي"ا

سمعتة من مدونتك وقريتة فى نفس الوقت كان احساس حلو اوى مع اننا فى رمضان والمفروض مش نسمع اغانى بس اول ماسمعت فيروز قلت الله روحى يانهر الحب ربنا يفتحها فى وشك روحى يارب الدنيا تشتى عليكى ياسمين :)

اكتر جملة بعشها فى الاغنية دى يا دنيي شتي ياسمين...عاللي اتلاقوا ومش عارفين.....من مين خايفييييييييين

اااااااااااااااااااااه اااااااااااااااه على الاحساس كل كلمة كتبتهيا فى البوست دة لمستنى

(ساعات بكون نفسي أشوف حاجة معينة على وش أي حد بقابله....ببقي عاوزة آخد كل كلمة بتتقال أدور جواها بين كل حرف.....على معني تاني يمكن يكون مستخبي) انا برضة بركز لحظات فى تعبيرات الوشوش بحاول افككها بدور فى حروف كلماتهم عن معانى يبقوا عاوزين يقولها ومش عارفين


(وساعات....بحلم....وأحب الحلم اللي أنا عايشاه ......الحلم كمان بتكون مدته لحظة.) مدتة صحيح بتبقى لحظة لكن بياثر فينا ونعد نفتكر ونصبر نفسنا بية احيانا او نفتكرة عشان نبتسم او نكمل بية يومنا

(.بس الأحلام مش بتتحقق إلا قليل أوي....واحنا ساعات بنتوه جوه الحلم لدرجة بنكون مصدقينه ومصدقين انه واقع)) طب لية احلامنا مش بتتحقق ادة انا بطلت احلم لانى تعبت بقيت احس انى بتعب من الاحلام


ديماً لما بيجيلي احساس الخوف بلوم نفسي وأقول ان الانسان لازم يعيش اللحظة الحلوة......"الحلم" وميضيعهوش في الخوف

ماتخافيش :)

لو اقعدت امسك كل جملة عجبتنى همسك البوست كلة بوست كلة لحظات من الاحاسيس :)
صباحك ياسمين

حبات التوت said...

شكرا مرة تانية هتخلينى اكمل يومى باابتسامة حلوة :)

نهر الحب said...

ويلا
:)))
امين يا رب
يا ريت تشتي ياسمين يااااريت

بصراحة كوانا بحط الاغنية كان نفسي اللي بيقرا البوست يسمع الجملة في نفس ذات الوقت عشان يحسها اوي
وجات فيكي بقي
:D


انا كمان ساعات بخاف من الحلم وساعات بمسك فيه بس متهيألي نحلم احلي ومش مهم النتيجة
:)))
صباحك بنفسج