Wednesday, July 13, 2011

ممكن تحبيني؟؟!!!1

ساعات بشوف بنت صغيرة بتضحك...أفتكر ملامحك البريئة..
أسألها............بتحبيني....؟؟



وشها يحمر وتجري...ألحقها وآخدها في حضني...تفتح إيديها للدنيا وتقول....
بحبك آآآآآآآآآآد كدة









هو أنتي ممكن تقوليهالي بالشكل ده؟؟



عارفة لو قلتيها....
 حتملي قلبي ورود عطرها يفوّق روحي اللي كانت تايهة من غيرك





لو تحبيني....ححب نفسي عشان بتشوفها عينيكي



حقول للسما...ياااااااه .....
هو انتي قريبة كدة.... واللا انا اللي بقيت طاير حوالين قمرك؟؟!!ا



وحطلع للنجوم أوشوشها عشان تدور عليكي وتونسك في ليلك



حسأل البحر....هي بتحب اللون اللبني عشان لونك واللا عشاني؟؟؟



حيضحك ومش حيرضي يجاوبني غير لما يستأذن قلبك
.
.
.
.
.
نفسي تحبيني
.
.
.
.
تحبي كل الأماكن اللي بتجمعنا..وتبصي عليها وانتي ماشية لوحدك...
تترسم ابتسامة على وشك وتفتكري كل كلمة قلتها...
حوحشك.....فتشوفيني صدفة من غير ما تحسي...
تبتسمي أكتر....وتتأكدي إني كنت بفكر فيكي زي ما كتي بتفكري فيا

وتتمني تفتكريني كل لحظة عشان مفارقكيش
.
.
.
.
عايزك تسمعي حليم بيغني....و تدندني معاه – و معايا –
 في لقاك الدنيا تجيني معاك ورضاها يبقي رضاك وساعتها يهون في هواك طول حرماني....

ساعتها بس حعرف إن اللي جوايا وصلك وبقيتي زيي
.
.
.
.
وانتي حبيبتي بشوف الدنيا حواليا فاضية إلا مني ومنك....
أسمع همسك وسط زحمة وألمس إيدك وما بيننا مسافات


بكون مطمن اوي وانا حاسك في نفس المكان اللي انا فيه
.
.
.
.
وأنا حبيبك بكون حد تاني...ليكي أنتي وبس...عايش بين كيانك...
وبتمنى كل يوم تحبيني و أدوب فيكي أكتر



ساعتها حتطلبي إني أحبك أكتر وأكتر





5 comments:

Timo.. said...

"ممكن تحبيني"
كفاية قوي العنوان ده..
ممكن يحول حياة اي انسان بيسمع السؤال ده لجنة..

عارفة..رغم اني مش في مود حلو بقالي كام يوم..
الا انك خلتيني ابتسم ابتسامة عاملة كده (';')

نهر الحب said...

عارف
رغم ان انا اللي كاتباها الا اني احيانا بستغرب العنوان

هو فيه حد يطلب من حد يحبه
هي صحيح الطلب ده حلو ولو حد قاله لحد حيطيره في السما
بس الحب مش بيطلب
.
.
الحب مش امنية يا حسن
:))

سعيدة انك ابتسمت
حزينة ان مودك مش حلو
انا كمان مودي مش حلو خالص
مينفعش تخليني ابتسم بتدونية حلوة تكتبها؟؟

Timo.. said...

قريب...
:)

فتاه في زمن غريب said...

جميلة بكل ما تحمله من معاني قد اي اسلوبك راااااااااااائع و جميل و الظاهر ان كل اللي بيقروها بيبقو ف مود مش حلو :)) تقبلي مني مروري و تعليقي

نهر الحب said...

فتاة في زمن غريب
يا رب يبقي مودك اتحسن بعد ما قرتيها ده بيفرحني اوي
:))
تنوريني طبعا ديماااااا