Monday, August 01, 2011

ريحة رمضان

انا عاوزة أقول حاجة صغيرة أوي عن رمضان.........
حاجة بحسها كل سنة بس مكنتش بفهم معناها.....بس السنة دي أول مرة يوصلني المعني بكل بساطة
.....
....
...
..
.
لما بمشي في الشارع - أي شارع- في رمضان....خصوصاً قبل المغرب بشوية صغيرين بحس احساس غريب في الجو....
الهوا بيكون زايد أوي وبتكون ريحته مميزة أوي....
كنت ديماً أسأل نفسي هو إيه السبب وإيه الريحة دي....
وفجأة....اكتشفت ان الهوا الجميل ده ممكن يكون الملايكة....
الملايكة بتكون طايرة حوالينا تحرسنا....
وتطبطب علينا...
وتقولنا ان ربنا حنين...حنين أوي....
بيبين حنيته دي حتي في نسمة الهوا عشان نطمن....
الملايكة بتقول حاجات كتير أوي..... للي يحاول يحسها.....
وبحس أن جناحتها محاوطانا من كل ناحية عشان منخافش
.......
عشان كدة بحس اني انا كمان مختلفة في رمضان...
بعمل نفس كل حاجة ونفس شغلي ونفس تعبي....
بس بحس اني مش أنا...
بحس اني هادية ....وقلبي مطمن.....
وروحي نقية شبه اللبن اللي بحب أشربه بالتمر على الفطار....
ببقي مش عايزة اتكلم كتير عشان مقولش كلام ملهوش معني....
وببقي مش عايزة أنام كتير عشان رمضان لحظاته حلوة وبتعدي بسرعة.....
طول ما انا ماشية في أي مكان كأني مش حاسة بأي حد ماشي جمبي...
كأن الدنيا فاضية....
بمشي فاتحة حضني للهوا.....
 وآخد منه نفس عميق أوي.....
 وأغمض عيني.....
وأحاول أسمع الملايكة....
وابتسم.....
:))))
وأدعي ربنا وأتمنى يكون راضي عني


1/8/2011

10 comments:

wella said...

كل سنة والنتى طيبة الاول ويارب ينعاد عليكى بالخير يارب

تصدقى اول مرة احس او اخد بالى من المعنى اللى انتى قولتيه صحيح رمضان بتحسى اوقات كتير ان نسمة الهوا غريبة مختلفة فيها حنية ياااااااااااااااارب ارحمنا برحمتك يارب

تانى حاجة مدونتك دى فيها شوية بوستات انا حستها حسيت كلماتها لمست قلبى بجد انا قعدت اقرى كذا بوست عجلونى اوى ولية لما امخمخ فيها واعد اقرى واقلب فيها بجد استمعت وانا بقرى فيها
تحياتى اليكى يانهر الحب

wella said...

هرجع اقرء باقى البوستات

نهر الحب said...

ويلا
وانتي طيبة وبخير

فرحانة اوي ان المدونة عجبتك وقلبتي فيها
واحلي حاجة بتفرحني بجد لما كلمة تلمس حد بحس ان هو ده اللي انا عايزاه اقول حاجة حد حسها ومقدرش يقولها

الاحساس برمضان وبنسمة الهوا وبحاجات كتير لازم نركز فيها شوية عشان بجد اللي بيركز بيلاقي حاجات حلوة في الدنيا تخلينا نشوفها ارق واحلي

بجد نورتيني
وانا فرحانة اني عرفت مدونتك

Timo.. said...

نفس الريحة الحلوة النقية ممكن تحسيها بعد صلاة الفجر في رمضان
تفتحي صدرك وتحضني الهواء وكانه جاي من الجنه.

كل سنة وانت بكل الخير والسعادة :)

انا كويس بس حاسس ان روحي مرهقة شوية آآآآد كده :)
هارتاح شوية وارجع اظهر تاني :)

نهر الحب said...

تامر
:))
وانت بألف خير وصحة وسعادة
يااارب يرزقك الجنة

الف سلامة عليك ربنا يقويك يااارب

شكرا انك جيت تزورني

blue-wave said...

اول مرة الاقى حد حس معايا نفس الإحساس دا
كل رمضان وانتى بالف خير

vanilla scent said...

ترجمتي احساس بحسه وشكل كتير كمان حاسه

كمان الاذان لما بتسميعه بيكون له طعم تاني تون تاني خالص


بتحسي انه بيكلمك بجد

كل سنة وانتى طيبة ياقمر

نهر الحب said...

blue wave
وانت طيب وبخير يا ريت الاحساس يحسوه كل الناس يا ريت

vanilla scent
اسمك حلو اوي
وانتي طيبة وبالف خير كل حاجة في رمضان حلوة يا ريت رمضان يفضل علي طول بس زي اي حاجة حلوة بيخلص بسرعة

engy said...

كل رمضان وانتى طيبه
بجد رجعتينى لرمضان الجميل الممتع
وجوه الروحانى النضيف اوى
علشان كده رمضان كريم

نهر الحب said...

انجي
الله اكرم
فرحانة انك حسيتي احساس حلو
رمضان كريم
نورتيني