Friday, January 15, 2010

فصبرٌ جميل


حزين....فيه مليون حاجة مضايقاك ومزعلاك حاسس ان فيه جبل هموم جواك ومش قادر تزيحه .....ومش قادر تتنفس ومفيش انسان يقدر يساعدك .....ابكي ......اصرخ



مش غلط... مش عيب .....مش حرام



انت كدة مش راضي.....لأ ....ارجوكم ما تظلمونيش



انا راضي قوي وعارف ان كل حاجة بإيد ربنا وكله خير ما دام من عند الله



لكن مش قادر ما ازعلش ....ما ابكيش ....حتخنق



يبقي اكيد مش راضي....مفيش حد بيكون راضي وحزين



الانسان الراضي بيكون سعيد ومبتسم طول الوقت



لأ.....غلط ...غلط



انا راضي لكن حزين....حاثبت لكم بشيء بسيط



اقروا الايات دي من سورة يوسف "قال بل سولت لكم أنفسكم أمراً فصبرٌ جميل عسي الله أن يأتيني بهم جميعاً إنه هو العليم الحكيم" سيدنا يعقوب فقد اتنين من اولاده



مفيش احسن من كده صبر و ايمان ورضا وتوكل علي الله



طيب كملوا الايات كده "وتولي عنهم وقال يا أسفى علي يوسف وابيضت عيناه من الحزن فهو كظيم" ....ها



قلنا انه راضي صح....و بعدين....ابيضت عيناه من الحزن



انتوا متخيلين يعني ايه حد من كتر حزنه وبكاءه يفقد بصره



متخيلين قد ايه زعلان وقلبه بيتقطع علي اولاده



طيب...كملوا الايات "قالوا تالله تفتؤ تذكر يوسف حتي تكون حرضاً أو تكون من الهالكين قال انما اشكوا بثي وحزني الي الله واعلم من الله ما لا تعلمون " يعني كان راضي وصابر لكن حزين ....وعارف ان ربنا ليه حكمه في اللي حاصل



يبقي من حقك تزعل وتبكي وتشكي لربنا ومن جواك تكون متأكد ان كل شيء من عند الله هو الخير ليك حتي لو وقعت في مشكلة اكيد عشان تتعلم حاجة



ويمكن ربنا عايزك تقربله اكتر نفسه يسمع صوتك ...تشكيله...ترفعله ايدك وتقول يا رب



مش يمكن تكون بعدت قوي قوي ونفسه انك تقرب ...انك ترجع.....عشان بيحبك



اذكر مواقف كتير في حياة الرسول عليه الصلاة والسلام زي عام الحزن الي ماتت فيه السيدة حديجة وابو طالب



اتسمي عام الحزن.. ونزلت سورة الضحي تطبطب علي الرسول عليه الصلاة والسلام يعني كان حزين قد ايه؟؟؟



فيه مواقف كتير وايات في القران الكريم اكتر



بس كان نفسي اثبت ان مفيش تعارض بين ان الانسان يكون راضي وحزين



اتمني يكون المعني وصل



7 comments:

♥نبع الغرام♥♪≈ said...

السلام عليكم

ازيك يا حبيبتى اخبارك ايه يارب تكونى بخير يارب ويطمنى عليكى وحشتينى اوووى

♥نبع الغرام♥♪≈ said...

ماشاء الله عليكى وإستعانك بأيات من القرأن الكريم بارك الله فيكى حبيبتى

فعلآ الصبر جميل ولاذم كلنا نصبر زى ما صبر الرسل قبلنا
الحمد لله على كل حال دوام الحال من المحال
بحيك على موضوعك الجميل
دمتى حبيبتى واختى بجد اللى بحبها وبحترمها
ابقى طمنينى عليكى ياقمرى
لكى سلامى وقبلاتى
موووووووووووووووه
ايناس

bentelghrob said...

فعلا وصبر جميل وهو دى الحل بس الناس من توالى الاحداث الصعبة مبقتش قادرة تتحمل عرضك للايات كان مبدع وجميل تسلم ايدك ويارب ربنا يغير الاحوال.وان شاء الله بعد العسر يسر
تحياتى.

زهور الامل said...

رضيت بالله تعالى رباً

وبالاسلام دينا
وبسيدنا محمد صلى الله عليه وسلم نبياً ورسولاً

جزاكي الله كل خير

وفعلا انتي عندك حق الصبر ملوش علاقة بالحزن

احنا اه راضيين وصبريين بس منقدرش نمنع نفسنا من الحزن لانه مش بايدينا

ربنا يرضينا ويصبرنا

تحياتي

العين الجارية said...

مش يمكن تكون بعدت قوي قوي ونفسه انك تقرب ...انك ترجع.....عشان بيحبك
.
.
بجد ربنا يكرمك
على قد ما جيتى ع الجرح على قد ما ريحتينى

كفاية اصلا عنوان التدوينة
(فصبر جميل)
ربنا أفرغ علينا صبرا وثبت أقدامنا يا رب

نهر الحب said...

ابتسامة ملاك
حبيبتي
مش عارفة اقولك ايه علي كلامك الجميل الرقيق ومتعرفيش بجد بيسعدني قد ايه
ربنا يخليكي ليا ويدم اخوتنا يا رب


بنت الغروب
ان شاء الله الفرج قريب
الحمد لله
سعيدة ان شرحي المتواضع عجبك
:)

زهور الامل
اكيد عشان فيه ناس بتظلم وهما مش فاهمين اللي جوا الانسان واللي حاسس بيه

العين الجارية
مممم
صيدلة
انا اعرفك من مكان تاني بس مش عارفة مين تحديداً لكن اكيد تعرفي ناس يعرفوني
ما علينا
ربنا معاكي ويصبرك ع الامتحانات

Anonymous said...

بصدق .. رائعة كلماتك وخواطرك

أتمنى لك ِ التوفيق

أخوك ِ / عمر