Thursday, October 09, 2014

عنها....وعن الحب.....وعن حاجات تانية

ساعات كتير بتسمع حاجة من حد وماتعرفش ترد عليها
الاحساس ده بيضايق جداً
انا عن نفسي ممكن افضل افكر في الرد يوم اتنين تلاتة عشرة
ومنساش الموقف ده ابداً
هو كدة للأسف حنفضل طول عمرنا نفتكر حاجات جرحتنا وناس كنا بنحبهم ودلوقتي مبقناش عارفين نحطهم في اي مكان في قلوبنا
وبننسى
بننسى أي حاجة تانية في زحمة اليوم والدنيا كلها
................
عنها
عن البنت لما تحب بجد
وتضحي بأي حاجة قصاد ان حبيبها يرضى بس
مش رضا ليه عن خوف ولا عن قلة حيلة ولا عن فرض رأي منه
لأ
بجد عن احساس بس انك ممكن تعمل حاجة لحد معين عشان بس متحسش ولو للحظة انه ممكن يزعل
المعنى ده مش أي حد يفهمه
أو بمعنى أصح
اللي محسهوش
عمره ما يفهمه
....
أيوة صح
اللي بيحب بجد بيعمل كدة
ممكن يجيب الكون كله في كفة وحبيبه في الكفة التانية وكفة حبيبه هي اللي تربح
لو حد بيحب ومش بيعمل كدة....يبقى محبش ويبقى كل الناس عنده واحد
مش حد بعينه هو اللي مميز
هو اللي حس معاه كل نظرة وكل لحظة وكل لمسة ايد
وكل لحظة غيره كلها حب وكل لحظة زعل من خوف علي الحب لا يضيع
الحد ده زي ما بيعمل عشانك حاجات كتير اوي محدش يعرفها انت ممكن تديله عمرك وحياتك
...............
................................
طول عمري مقتنعة ان الصحوبية مش بالمكان الواحد اللي بيجمع الناس ولا بفيس بوك احنا عليه اصحاب ولا بتويتر ولا بحاجات كتير
انا مقتنعة ان الصحوبية ممكن تكون باحترام متبادل من بعيد لبعيد حتى لو مفيش تواصل بالمعنى الصح لكن تواصل بالقلوب
بكلمة أو سؤال حتى لو من السنة للسنة
مش مهم
المهم نحس اننا عايشين
ان لسه فيه ناس مكانتهم جوه قلوبنا مهما فرقتنا الدنيا عنهم
ومانحسش ابدأ ان المسافة دي بتكبر وبتوسع لحد ما يبقوا جوانا ولا حاجة غير ذكرى
حزينة نفتكر في يوم قد ايه كنا قريبين وبقينا بعيد
..............

اهداء ...اليها
اهو يا ستي عشان ماتزعليش
:)

2 comments:

reemaas said...

احسااااااااااااااااااااااس فظيع بالانشكاح

هو انا ممكن امسمر البوست ده عاوزة اعلقه فى المدونة عندى ^_^

بحبك جدا على فكرة

ملحوظة: مش هبطل اهددك ;)

نهر الحب said...

:)
عشان تعرفي غلاوتك بس