Friday, February 08, 2013

أحلامي الصغيرة

من زمان وانا احلامي هيه هيه
صغيرة وبسيطة
مش زي أي بنت

.............................

كنت بحلم بشخص يكون معايا و أحبه
يمسك إيدي وقت ما احتاجه ويطمني وقت ما أبص في عينيه
محلمتش أبدأ بشكله وتفاصيله وملامحه

.................

حلمت إني أحبه ويحبني ووبس
ولما حلمت أني أتجوز وأعيش معاه في بيت
اتمنيت بيت نكون فيه مع بعض بنتشارك احلامنا وفرحنا وهمومنا
لكن عمري ما حلمت بشكل بيتنا ولا الركن ده حيكون فيه ايه والأوضة دي أحط فيها إيه

...............

حلمت ألبس فستان أبيض وأصحابي يبقوا حواليا
ومحلمتش بشكل الفستان ولا شياكته وهيأته

..............

حلمت وحلمت وحلمت
أحلام كتير صغيرة يمكن عشان تتحقق
خفت احلم احلام كبيرة أوووي وماتتحققش

هي دي أحلامي ببساطة وعلى قد ما انا شايفاها قليلة طول الوقت
على قد ما حسيت في وقت من الأوقات انها مش قليلة ولا حاجة
وانها كبيرة.....عليا أنا
أو يمكن ما استاهلهاش
ويمكن
ويمكن
ويمكن
............................
....................

19 comments:

ابراهيم رزق said...

احلامك بسيطة و جميلة

يارب يحقق حلمك

اه انتى اللى حلمتى
عشان لما تخلفى بعدين و العيال يضايقوكى
متقوليش كنت فين يا لا لماقلت اه
هههههههههههههه

تحياتى

أسماء فتحي said...

أحـــلامك كلها مشروعه وأعتقد انها سهلة تحقيقها

يعنى يمكن علشان لسه مش اتحققت شيفاها صعبه بس هي هتتحقق كلها مرة واحده في وقت مش هتكونى متوقعاه

عموما ربنا يحققلك كل احلامك

تحيــــــــاتي

Asmaa Fathy

reemaas said...

لا حبيبتى هى من كتر ماهى بسيطة خايفين عليها ماتتحققش فهنعمل ايه بعد كده

ربنا يحققهالك يارب

Nour said...

احلام الفراشات دايما بسيطة ... ربنا يسعدك ويحققلك احلامك
بحبك بقى :))

حبات التوت said...

عارفة انا بقيت اخاف احلم عشان لما لو حلمت وحلمى مش اتحقق هتوجع اوى وهدايق وانجرح اكتر

بس احلامك بسيطة ومش كبيرة عليكى فى احلام لازم نحلم بيها ...فى احلام لو مش حلمنا بيها حياتنا مش بيبقى ليها طعم زى احلامك الجميلة دى

احلامك مش كبيرة عليكى ابدا بس طبيعى تحسى بصعوبتها استعينى بالدعاء والاستغفار والله بيهم هتتحقق احلامك مهما طالت

~ISLAM~ said...

احلمى اكتر متستكريش ابدا الحلم عليكى

الحلم اوسع من الواقع بكتير اوى

حرام يكون ادامك البراح وانت موقفة نفسك عند حدود الواقع

احلمى متخافيش حتى لو متحققش منها حاجة كفاية انك اتبسطتى باحلامك

نيللي علي said...

الأحلام جمالها في بساطتها وحياتها في حبك ليها مهما كانت شكله، المهم في الأحلام إنك تحبيها؛)

نيللي علي said...

الأحلام جمالها في بساطتها وحياتها في حبك ليها مهما كانت شكله، المهم في الأحلام إنك تحبيها؛)

Do3aa El_attar said...

" ده ساعات بيبقى السهل صعب لما نتمناه"

بس ده مش معناه إننا مش نحلم .. لأن الحلم أمل ولو مش عشناها بأمل مش هتبقى حياة

وحشتيني :)

P A S H A said...

ربنا يحقق لك كل أحلامك وييسر لك اللي فيه الخير ليكي
:))
دمتي بخير وسعادة

نهر الحب said...

استاذ ابراهيم
ههههههههه
اه فيه دليل اهو
:D

نهر الحب said...

اسماء
:)
امين يا رب
ربنا يخليكي

نهر الحب said...

ريمو
صحيح
انتي عارفة الاحساس ده
وعارفة قد ايه مؤلم انك تحسي ان احلامك صغيرة والناس مستكترينها عليكي

نهر الحب said...

نور
الفراشات
الله يكرمك
:D
وانتي كمان يا رب تحققي كل اللي تتمنيه

نهر الحب said...

حبات التوت
ويلا
:)
كلامك جميل وعندك حق
:)

نهر الحب said...

اسلام
مش ديما كدة ممكن احلام من كتر ما اتعلقنا بيها اوي ومتحققتش نتصدم صدمة كبيرة اوي في الواقع

نهر الحب said...

نيللي
المهم في الاحلام انك تحبيها
:)
طبعا بحبها

نهر الحب said...

دودو
وانتي كمان
بلاش الجزء ده من الاغنية عشان بيوجعني اوي
عشان حقيقي

نهر الحب said...

باشا
:)
امين يا رب
ربنا يخليك