Friday, January 18, 2013

(جوانيات وصعبانيات ما قبل النوم......(6

أجدني غريبة بعض الشيء
أذهب لتكبير الخط هنا فأتوقف قليلاً وأتركه لا يُري بوضوح

البعض يعرف كيف هو الشعور أنك تخاف ان تقرأ ما تكتب....فقط تريد ان يسقط هكذا علي الورق....أو الكيبورد.....ولا يمنعه شيء

أنظر كذلك إلى زر الديليت من بعيد وأقرر ألا الجأ إليه...أهو تحدي مع نفسي ام ماذا.....أنني لن اخطيء.....وأنا
في هذه اللحظة أخطأت في أحد الحروف بالفعل
!!!!
دعوني من تلك الحيرة الدائمة والحروف وما بين الكلمات واللغة العربية الفصحى....إلى ما أريد ان أسكبه هنا على تلك الرقعة البيضاء التي تغري بكثير من الكتابة....اللا شيء حتماً

***************************

الشتاء وريحة المطر والبرد .....والدفا....الدفا الحقيقي لأول مرة
ما زلوا بيأكدوا لي أن انا..زي ما أنا ..... لكن.....مش عارفة .....حاسة اني شايفة حاجات كتير بشكل مختلف....هو انا كبرت فعلاُ ومبقتش زي ما كنت من حوالي سنة؟؟؟
.....يمكن
مبقاش حتي عندي القدرة على سماع أغاني كنت بحبها...يمكن كانت توحي بالحزن والخوف
مع اني ما زلت....بعطي  بخوف....و بحب بشوية شجن....لكني مش بستمتع دلوقتي بأم كلثوم وهي بتبدع في "بعيد عنك" أو "فكروني" و " ودارت الأيام".....ولما بقيت بحب بس اسمع "أنت عمري" وأمل حياتي"  سمعتهم مرة واحدة بس من فترة طويلة

وعامة بقي الاستمتاع بأي شيء حاجة صعبة جداً وملهاش وقت وكأن الوقت بقى شيء غريب بيمر اليوم ومنلحقش نعمل فيه كل حاجة والغريب لما يبقى مجمل الأيام علي بعضها بيمر ببطء غرييييييب
حد فاهم حاجة....؟؟
مش مهم ...مش قلتلكم لسه زي مانا ديماً متناقضة وملخبطة
..............

***************************


ساعات بحس اني عاملة زي اللي كان فيا بطارية بعمل بيها حاجات كتير والبطارية دي فجأة خلصت ومعرفتش أجيب بدالها..فقررت أستغني عن حاجات كتير كنت بعملها فمبقتش بقدر اعملها وبقي الناس اللي مرتبطين بالحاجات دي متهيألي هما أكتر ناس حاسين بالتغيير اللي انا مش قادرة افسره ده
.......

********************

نفسي أقعد كدة يومين تلاتة...يوم واحد حتى...اقعد معملش فيه أي حاجة خالص ولا حتى أفكر في حاجة
حاجة غريبة لما يبقى فيه فترة في حياتك نفسك تبقي مشغول فيها وتايه ولما تنشغل تبقى حتموت
وتبقى فاضي....البني آدم مش بيعجبه حاجة ابدأ بس هو يعني مافيش وسط؟؟؟
 كتير بفكر هو ليه احنا ممكن نملى حياتنا بحاجات كتير أوي ليها لازمة وملهاش لازمة ولما تيجي حاجة تستاهل بجد انها تملى الحياة دي مش بنلاقيلها مكان وبنحس ساعتها بالعجز وبالحزن وبيكون خلاص فات الاوان على الحياة اللي بجد نفسك
تعيشها
*************************
مش ممكن اكون من كتر الوحدة حبيتها وأخدت عليها لدرجة انها دلوقتي بتوحشني...أه والله بتوحشني ..يعني نفسي ابقى مع نفسي وبس شوية كدة اقفل الموبايل والفيس وانقطع عن البشرية
ده بيجي لما يبقى فيه اوقات مضطر فيها تبقى متواصل مع الناس ومعندكش القابلية دي أبداً

*************************

مش قادرة أفهم ناس كتير
نفسي كل واحد يبقى في حاله ومحدش له دعوة بحد
لا حد يحكم على حد انه سعيد كدة من بره لمجرد انه بيضحك ولا حد يبقى نفسه في الحاجة اللي مش عنده
وووبس
كتير صح؟



*************************

الكتابة حالة حزن ...يمكن شجن...ويمكن كلام وخلاص

لكن
السعادة صعب تتكتب وصعب تتوصف
زي ما نبقي خايفين نضيع لحظة من لحظات السعادة دي واحنا بنكتب
خايفين نضيع احساس اننا نكتبه واحنا سهل علينا نعيشه ونقوله ونعبر عنه 


*************************
وووووووووووووبس

5 comments:

ابراهيم رزق said...

هابتدى من حيث انتهيتى
فعلا السعادة احساس
مثلما الحزن احساس
لكن الفرق بين السعادة و الحزن
ان الحزن احساس بنحاول تكتمه جوانا
اما السعادة فاحساس بنحاول نخرجه برانا ونحزن قوى لو اللى حواينا محسوش بيه

وارجع واقول
لسه الطيور بتفن
والنحليات بتطن
والطفل ضحكه يرن
مع ان مش كل البشر
فرحانيييييييييييييييييين

تحياتى

Nadeen salama said...

مسا الورد


نهر الحب...

سأعترف ...انا افهم ...


عن ماذا تكتبين

عن اشياء تطفو على سطح الذاكرة

وكلما حاولنا انتشالها

عادت للغرق

عن اشياء نفتقدها

واخرى

مازالت حلم

عن الحياة تكتبين

بكل ما تحمله من تناقضات

تشبهنا


يا صديقتي

تابعي ...فأنا سأصغي دائماً

reemaas said...

انا ممكن اطول فى الرد واعمل كوبى لكل جزء واقولك بعده وانى زيك بالظبط بس اختصارا للرغى هقولك وانا كمااااااااااان كل حرف وخصوصا الوحدة اللى وحشاكى

حبات التوت said...

فى كلام كتير من اللى انتى كتبيبتة بحسة واحساسى دة بيتكرر كل مدة يعنى بيروح وبيجى


((نفسي أقعد كدة يومين تلاتة...يوم واحد حتى...اقعد معملش فيه أي حاجة خالص ولا حتى أفكر في حاجة))
ديما ببقى عوزة اعمل كدة وفى نفس الوقت زى ماقتلى انا اللى شغلت نفسى
فعلا تناقض وحيرة بس عااااااااااااااااااادى
تحياتى اليكى ياصديقتى فى نفس الاحاسيس

نهر الحب said...

كل الناس
شكرا لوجودكم
:))