Wednesday, June 27, 2012

بلياتشو

حاسة اننا كلنا بقينا عاملين زي البلياشتو
بنضحك ونهزر من بره بس ومن جوانا مافيش ولا نقطة فرح

مش عايزين نفرح؟

أكيد لأ...
بس مش قادرين نفرح...حاسة كأن الابتسامة بتعدي كدة على وشنا بس عشان نجامل بيها حد بيشوفنا ومش لازم يحس اننا جوانا حزين
كأن الابتسامة شبح بيعدي علينا وبيدبل قبل حتي ما يكمل......

المشكلة لما تبقي شايف الحزن ده كمان جوة عيون الناس اللي حواليك وبتحبهم ولا انت عارف تطبطب عليهم ولا على نفسك...
احساس صعب ان كل احاسيسنا مزيفة ووشوشنا متلونة..مش كذب ولا نفاق لكنها غصب عننا عشان نظهر اننا اقوياء وبنعافر وبنقاوم وقادرين نعيش كدة

بقينا زي كل بلياتشو عنده حكاية مخبيها جواه وبيداريها بالألوان الكتيرة اللي على  وشه والحركات اللي بيعملها قدام الناس عشان بس يضحكوا...


مش عدم رضا ولا قلة ايمان لكن والله كتير بيكون الحزن حاجة من جوانا أووي أوووي ولما بتزيد مافيش أي حاجة تقدر تغلبها....



ساعات بحس اننا عواجيز أووي ....
الظروف اللي حوالينا مخليانا كدة أو احنا فعلاً كبرنا ومش حاسين أو مش مصدقين

حتى لما بتيجي أي حاجة تخليك تفرح للحظة...وقت ما تيجي تبتسم وتتفاءل..ترجع وتخاف لحسن الحاجة دي تروح منك أو تطلع وهم متغطي كمان بوش أنت مش شايفه.....
......
بعد وقت أكيد الحاجة اللي مخليانا حاسين الحزن بتروح وبننساها....عشان هي دي الدنيا
بس يا ريت....ياااريت....منوصلش لمرحلة يحبنا فيها الحزن وميجيش الوقت اللي يسيبنا فيه حتى لو شوية.....


مشاركة في حدث
التدوين اليومي

10 comments:

maioya said...

هوا فعلا بقت حاجه عاديه اوي
ان كل وشوشنا مرسومه بالحزن
ده حتي الانسان لو ملقاش حاجه
تحبطه بيزعل بردو
بس انا مقتنعه انها عدم رضا
عشان لو كلنا عايشين راضيين
هتلاقينا كل وشوشنا بتضحك
وقلوبنا بردو بتضحك :))

رؤى عليوة said...

عبرتى عن معظمنا

للاسف بقت الدنيا اغرب كتير مما كنا نتوقع واحنا صغيرين


ولكن صبراااااا


دمت بخير

حنين محمد said...

مساء الغاردينيا سوسو
يالله ماتفعلة أغنية ساعات بي ماعرفش ليه بتوجعني اوي احنا بجد ياسوسو بنضحك وجوانا بيبكي وبنبتسم وجوانا بيتألم ساعات مش لأننا مش لاقيين الحب انما عشان نحافظ على الحب بندعي أننا راضيين بكل حاجة مهما كانت بتوجع بس مانخسرش الي نحبه عارفة انا لما بسمع ساعات مش بعرف أكتب غير حزين :("
؛؛
؛
لروحك عبق الغاردينيا
كانت هنا
reemaas

reemaas said...

اه انا حاسة كده ومش عارفه اخرج من ده لدرجة انى حاسة انى انا كده من الاول وكنت بضحك على نفسى

Bent Men ElZman Da !! said...

من كتر اعتيادنا على وجود الحزن فى حياتنا
بقينا للاسف احنا اللى بندور عليه
ولما بنفرح بنقول خير ربنا يستر !!
عشان قلبنا اصلا ماتعودش على الفرحه دى
فـ بيخاف يفرح لانه متاكد ان الفرحه هتقلب حزن
المشكله فينا قبل ما تكون فى اى حاجه حوالينا على فكره

نهر الحب said...

ميوية
لا والله صدقيني مش عدم رضا بس زي ما قلت الحزن بيعشش في قلوبنا

نهر الحب said...

رؤي عليوة
صبرا صبرا وليس لنا الا الصبر لعلنا نبلغ سعادة الجنة ان شاء الله

نهر الحب said...

ريماس
لا بليز انتي بالذات متحزنيش ابدا عشان انا بفرح بساعدتك ولما بحسك سعيدة
:)

ممكن اشيل الاغنية عشانك لو مزعلاكي
:(

نهر الحب said...

ريماس والحل طيب نعمل ايه احنا مش نافعين والله
:DD

نهر الحب said...

بنت من الزمن ده
اه كتير بتكون المشكلة فينا بس كتير بتكون غصب عننا
واهي دنيا لازم تبقي كدة