Tuesday, September 20, 2011

شوفي الدنيا بعيوني

مركب صغير شوفته من بعيد على شط البحر....مترددتش كتير اننا ناخده
   زي ما 
بحلم - لوسط البحر -
مسكت ايديكي الصغيرين....حسيت قد إيه كانت صوابعك بردانة عشان كنتي خايفة
.....حاولت امسك ايديكي أكتر كنت عاوز أحسسك بالدفا والاطمئنان
مفاتش كتير إلا وايديكي دفيانين في حضن ايديا زي عصفورين بيستخبوا من المطر
....انتبهت... لقيتنا في وسط البحر....قد إيه استنيت اللحظة دي
....انا وانتي..وبس
معايا ريشة عشان أرسمك على صفحات البحر
حبدأ بخصلات شعرك عشان شبه موج البحر يطير هنا وهناك
حرسم عيونك....بالأزرق لون البحر.... بغرق فيهم
.....وقلبك..الأبيض لون السحاب
وروحك........اللبني الصافي زي السما
...ييجي علينا الغروب....تتحول السما لون خدودك وانتي مكسوفة
...........لكن
...ألمح في عيونك نظرة حزينة.....ودمعة رافضة تقول اللي جواكي
أعرف ان سرك مع البحر...أوشوشه...يفهمني.....تيجي موجة حنينة تطبطب عليكي وتعكس نور القمر على وشك
أسمعه يقولك.....سيبي الخوف والحزن لحظات وانتي سعيدة بين ايديا
....اسمعي كلامه وارجعي معايا
..
...شوفتي الدنيا معانا ازاي...فاهمانا ازاي
...شوفيها بعيوني وخدي قلبي امانة عندك عشان تصدقي
.............
....عارفة
المركب اللي ركبناها مركب ورق...أنا اللي عملتها بإيدي....بس مينفعش تغرق

عشان وأنا معاكي بحس أنك فراشة واخداني على جناحتها ومش لامسين الأرض

تفتكري ممكن يكون وزننا تقيل على مركب ورق؟؟؟
عارفك حتبتسمي وحتحسي قد أيه بحسد نفسي وانا بشوف ابتسامتك
عشان بشوفها شمس بتنور حياتي
....لكن
....بخاف....لما تغرب....وتبعد....وتختفي
....بخاف...تبقي زيها......تروحي لناس تانية تنوريلهم ومترجعليش

بس بنام كل يوم وكلي أمل أنك بكرة حتطلعي في شباك اوضتي وأفتح عيني عليكي
من غير خوف....ولا حزن



15 comments:

Miss LoZa said...

ياختاااااااااااااااى
حرااااااااااااام بجد بجد حرااااااااااام
بصى بقه انتى لو هتكتبى الكلام ده يبقى تشوفى حد اطبق عليه الى بتكتبيه ده
مش هينفع افضل احب على نفسى كده
انا بنهااااااااااار من الحاجات دى اصلا
بوست تححححححححححححفة
ححححححححححح

دعاء العطار said...

:) :)

بالظبط ده اللى حصللى بعد ماقريت البوست


" حاولت امسك ايديكي أكتر كنت عاوز أحسسك بالدفا والاطمئنان
مفاتش كتير إلا وايديكي دفيانين في حضن ايديا زي عصفورين بيستخبوا من المطر "

حلوه اوى تشبيهاتك ياسهاد

عيشتينى حاله حلوه اوووى بالبوست ده .. وبجد مش لاقيه كلام اقوله

شكراً

:) :)

reemaas said...

انا قلت قصاصه رائعه والله

حسستينى احساس حلو اوى اوى نفسى احس بيه بجد
مبسوطة اوى انى بدأتى قراياتى بيكى

Anonymous said...

مساء الغاردينيا
بجد نهر الحب عارفة اكتر حاجة بحبها لما بجي أقرألك هو إحساسك قد ايه دافي وحنين وجميل بجد بجد أكتر من رائعة "
؛؛
؛
لروحك عبق الغاردينيا
كانت هنا
reemaas

Anonymous said...

مساء الورد يا نهر الحب

كلمات رائعة جداً وأحساس عالي وجميل

ورغم كل الحب هذا إلا أنني شعرت بخوف

مختبئ بين السطور من زوال تلك الشمس

التي تقيهم صقيع الحياة ...

بكل أمانة نص رائع وجميل ...

بالنسبة لأسمي ومعناه فريبال هو

أسم قديم جداً للأسد .

دمتي مبدعة

تحياتي وإحترامي

ذو النون المصري said...

كل ام انتم بخير
تمنيت كثيرا ان يكون لي مكان لا يستطيع اي انسان ان يراه او يصل اليه

عبدالحميد خطاب said...

شكرا لمقالك وأتشرف بزيارتك لموقعى

http://mytadwen.blogspot.com/

دعاء العطار said...

فينك ياسهاد قلقتينى عليكى

ياريت تطمنينى عليكى

ويارب تكونى بخير :) :)

نهر الحب said...

miss loza
حقك عليا والله
:D
معلش ممكن انكد عليكي المرة الجاية احسن
:))

نهر الحب said...

الجميلة....أوووي
دعاء
:)
كنت عارفة انك حتعملي كدة
:)
انتي اللي شكرا

نهر الحب said...

ريماس
قصاصة
لا ده كتير اوي عليا
انا بكتب اللي حساها عشان كدة بيوصل
وبفرح انه بيوصل وبيوصل احساس حلو زي مانا عاوزة

نهر الحب said...

ريماس
2
:)
اكيد مش احلي منك ومن احساسك انتي
يا رب ديما سعيدة

نهر الحب said...

ريبال بيهس
الخوف شيء لابد منه طالما احنا في الدنيا طبيعة الانسان كدة للاسف بالذات لما يعيش لحظة حلوة اوي
:))

شكرا لزيارتك واهتمامك

نهر الحب said...

ذو النون المصري

حميد

شكرا للزيارة

نهر الحب said...

دعاء
انا جيت اهو
:))