Tuesday, September 13, 2011

أجمل فراق

علاقة


ممكن تكون علاقة اتنين ببعض زي علاقة موجة بحر بصخرة
الموجة بتخبط في الصخرة كل لحظة...الخبطة بتوجعها وتعلم فيها وتسيب فيها جروح تدوبها.....
لكن الموجة مش بتكون حاسة ده أبداً ومفكرة ان الصخرة مجرد حجر مش حاسس بيها
ومع كل ده الصخرة أكتر حد بيحب الموجة حتى لو بتجرح فيها كل يوم...واكتر حد بيستحملها وقريب منها
......................................................


"جرح"


اللي يحب ميجرحش أبداً...ولو جرح..مش حتفرق بينه وبين اللي بيكره
في الآخر حيبقي جرح وعلّم وخلاص مش مهم مين اللي اتسبب فيه واتسبب فيه ازاي...المهم الأثر اللي سابه جوه القلب....

...............................................

"وردة"


الحب عامل زي الوردة....
في الأول صغيرة وشكلها حلو ونفسنا تكبر....
نفضل نهتم بيها ونسقيها كل يوم...وشكلها يبقي أحلى يوم بعد يوم...
لكن....للأسف...فيه ناس كتير بعد كدة بينسوها وينسوا حتى يسقوها...وتدبل..أو تموت.....
وساعتها عمرنا ما حنعرف نرجعها زي الأول

.............................................


"احساس"

اكتر احساس بكرهه في حياتي إني ابقي واحدة زي أي واحدة...
بحب أكون مميزة عند اللي أعرفهم ومميزين عندي...مش مجرد واحدة في حياتهم...
ولما بحس الإحساس ده بفضّل اني ابعد خااااااااالص عن كل الدنيا وأقفل على نفسي
I want to be the one not any one

.......................................

"خوف"


بقيت بخاف أصدق احساسي
وبقيت أخاف أحس من البداية.....

.........................................

"رمادي"


مش بحب اللون الرمادي.....في الحياة
بحس كأنه زي حد بياخد حد من شط البحر يوديه نص البحر....
لا هو وصل للبر التاني ولا هو عارف يرجع.........

.............................................

"أجمل فراق"



الحب اللي بجد......ميتنسيش ومينتهيش.....
ويفضل الحبيب مهما بعد وبعد الفراق له مكان بعيد جوه القلب مقفول عليه بمليون مفتاح بس عشان نحافظ عليه ونفضل فاكرينه ونقول كنا بنحب..بس...هي حياة

يمكن ساعتها ينتمني القدر يجمعنا تاني باللي بنحبه ويعرف اننا لما كنا فاكرينه كل لحظة كان عشان حبه حاجة كبيرة أوي ولو القدر مجمعناش حيفضل الحب زي الندى يروي روحنا وقت ما نكون حاسين بالوحدة
الفراق ممكن يكون أجمل فراق...مع وائل جسار بس
:))
خليني ذكرى
11/9/2011

18 comments:

ريــــمــــاس said...

خليني ذكرى جميلة عند واوعى تنسى زمان "
؛؛؛
؛
مساء الغاردينيا نهر الحب
يالله ماأروع المساء بين حروف الحب هنا كل محطة قرأتها كانت حكاية حب ستبقى في ذاكرتنا ماأروع سطور نثرها قلبك وقلمك "
؛؛
؛
لروحك عبق الغاردينيا
كانت هنا
reemaas

ريبال بيهس said...

مساء الورد نهر الحب

كانت لوحات جميلة كل واحدة منها حوت

قصة أو صورة متحركة عن الحب فمن يحب

لا يجرح وليس بالضرورة أن يأتي الفراق

دائماً موجع ويتسبب بجرح الأثنين و

معاني أخرى جميلة سطرها قلمك هنا ..

مبدعة

تحياتي وإحترامي

The illusionist said...

بس دلوقتى لو الحب زى الورده يبقى نهايته كده كده يموت

الورده مهما ان كانت جميله وبنهتم بيها بتدبل وتموت

وبتتساقط برضو


طب التميز ده يبقى ازاى عند الناس كلهم

اكيد عند ناس اه والباقى لا

مش كعند كله هتبقى مميزه اظن ده يعنى


والرمادى مش حلو خالص فعلا

بس هو الرمادى ده هو الفضى ؟

مش عارف

ايه رأيك
؟

The illusionist said...

بس دلوقتى لو الحب زى الورده يبقى نهايته كده كده يموت

الورده مهما ان كانت جميله وبنهتم بيها بتدبل وتموت

وبتتساقط برضو


طب التميز ده يبقى ازاى عند الناس كلهم

اكيد عند ناس اه والباقى لا

مش كعند كله هتبقى مميزه اظن ده يعنى


والرمادى مش حلو خالص فعلا

بس هو الرمادى ده هو الفضى ؟

مش عارف

ايه رأيك
؟

Miss LoZa said...

بجد انا اقل مونت اكتبه انى فعلا استمتعت
قصاد الكلام الى زى ده انا لا املك الا السكوت :)

reemaas said...

روعه بجد كل بوست اجمل من اللى بعده
بس عجبنتى اوى فكرة انى مميزة لانى بحب ده
اغنيه اجمل فراق تجنن

Timo.. said...

موضوع الموجة والصخرة ده عامل زي واحد حاسس بوجع عشان اتخبط في الحيطة.. رغم ان هو اللي خبط نفسه فيها..!!

"وانت حد سألك عني قوله..
كنا أوفى اتنين"

بحبها قوووووي..
.....قووووي..!!

"اللي يحب ميجرحش أبداً...ولو جرح..مش حتفرق بينه وبين اللي بيكره"
مع الاسف.. مش ديما الحياة بتبقى واضحة قوي كده..
وساعات بتكون رمادي..
بس الرمادي درجات..
فيه منه الاقرب للاسود..
ومنه الاقرب للابيض..
وفي الحالتين.. مع اختلافي في الرأي معاكِ..
بس... انا.. باحب.. الرمادي..!!

و.......
"القلب اللي بيجرحنا..
فيه حاجة اكيد جرحاه..
بجراحنا بتفكرنا..
بالقلب اللي جرحناه"

نهر الحب said...

ريماس
:)
شكرا علي كلامك الحو
وشكرا انك حسيتي كل كلمة
:)))

نهر الحب said...

ريبال بيهس
وجودك عندي شرف ليا بجد
:))

نهر الحب said...

the illusionist
عندك حق بس عندي وجهة نظر تانية
ممكن الودرة تموت شكلا قدام الناس يعني تدبل وورقها يقع زي بالظبط ما حد يموت قدام الناس
لكن

الوردة ممكن حد ياخدها ويحطها في كتاب جوه قلبه ويفضل محتفظ بيها وقيمتها نفسها عنده

ولو حد مات تفضل روحه برضه جواها وحواليه في كل مكان
.....

التميز لناس معينة صح مش كل الناس
عندك حق برضه
:))

نورتني اوي

نهر الحب said...

miss loza
صدقيني ببقي حاسة باللي عاوزة تقوليه عشان انا بقرأ حاجات كتير برضه وبسكت

وجودك ينورني اوي
:)

نهر الحب said...

ريماس
فكرة انك تبقي مميزة
المفروض تحصل,,.....ويكون مؤلم اوي لو متحصلش وتبقي ديما رقم 2 او 3 او بعد كدة كمان
:)

الاغنية
الشعب كله بيحبها
:)

نهر الحب said...

تامر
مش ممكن يكون مش بيشوف الحيطة أصلاً عشان كدة بيخبط.......ولما بيشوفها بيكون فات الأوان
..
...
كل الناس بتحب الرمادي...إلا أنا...مش مشكلة...حفضل شايفة الدنيا أبيض وأسود
...

دعاء العطار said...

علاقة موجة البحر بالصخره

ياااه ع دى علاقة

" ومفكرة ان الصخرة مجرد حجر مش حاسس بيها "

ممكن يجى يوم وتعرف ان الصخره بتحس وبتتألم .. لكن للأسف ممكن يكون فات الاوان والصخره خلاص زهقت

..............

" اللى يحب ميجرحش أبداً " ... اللى يحب " مايتعمدش " انه يجرح أبداً

ساعات بنجرح ناس بنحبهم غصب عننا ومن غير مانحس ... بس لو تعمدنا جرحهم ... يبقى أكيد ده مش حب

.........

وردة

دايماً أنا كمان بشبه الحب بالوردة .. لو مش اهتمينا باللى بنحبهم .. هيدبل الحب فى قلوبهم زى الوردة بالظبط

............

احساس

وأنا كمان بحب أكون مميزه فى أى حاجه بعملها ... مش بس عند البشر ... كل حاجه بحب اعملها بروح

لكن مش بيفرق معايا اوى من البشر غير اللى يهمونى بس

وعارفه .. كتييييييير بنأثر فى ناس مش واخدين بالنا منهم ... وناس نبقى نفسنا ناثر فيهم ولا يحسوا بينا

ساعتها بقى بننسحب فى هدوووووء عشان مانتجرحش

............

خوف

زمان .. كان احساسى بيصدق جداااااااً ... دلوقتى مابقيتش أفكر أصلاً هو ايه احساسى

.........

رمادى

عمنا صلاح جاهين قال اييييييييه

قال ...

"ولو اتضنيت وفنيت وعمرى انفرط

مش عاوز ألجأ للحلول الوسط "

بكره انى أكون معلقه ... مع انى دايماً مش بحسم مواضيعى

ساعات بيكون الاسود احلى من الرمادى بكتييييييير

............

أجمل فراق

" مش كل حلم نشوفه سهل هنبقى حققناه.. ده ساعات بيبقى السهل صعب لما نتمناه .. والدنيا عمر ماحد جالها وعاشها من غير آه "

الله بجد.. عيشتينى حاله راااااائعه

شكراً ع البوست ده ياسهاد

وع فكرة ... المفروض كنت أكون أول كومنت بس يالا أنا وريمو واحد :) :)

The illusionist said...

اقنعتينى

نهر الحب said...

دعاء
انتي الأولى بتعليقك لأنك أكتر حد بيعلق عندي وبحس انه فاهمني وفاهم انا كاتبة ايه
مش بس عشان بتأيدي وجهة نظري
لأ ...عشان بتفهمي احساسي اوي

اللي يحب...ميتعمدش الجرح...انتي كدة جبتيها صح اوي
:))

اللي بنتمني نأثر فيهم ومش بنلاقي نتيجة بيخلونا ننسحب في هدوووووء
مممم
للأسف...وبيكون صعب أوي تنسحبي عن حاجة نفسك تقربي منها

أجمل فراق
بتوجعني...أووووي
تعرفي مع اني معشتش الحالة اللي في الاغنية الا اني مقتنعة بيها جداااا
...
أوقات بنتجرح ونجرح واحنا مش حاسين...وان حد فينا حب يفرح فرحه يبقي حزين...

دي أنا
:))

وجودك انتي عارفة بيفرق معايا ازاي
اوعي تغيبي
:)

نهر الحب said...

The illusionist
:)))
ده شيء كويس اوي
اني اقنعتك

انا كمان صلحت الجزء اللي في البوست بخصوص اني اكون مميزة عند كل الناس
واقتنعت برأيك
انهم ناس معينين
:))

شكرا لوجودك مرة تانية

بنت قلبى said...

بوست منتنع بلوحات غريبه
بس كلها مشتركه تحت مسمى كلمه واحده بس
حب

فى التميز من عبرات دتئما