Thursday, May 31, 2012

يا بلد معاندة نفسها...يا كل حاجة وعكسها


بقالي كتير ساكتة...نفسي اتكلم...نفسي أكتب...نفسي اعمل حاجات كتير...ومش قادرة

احساس مؤلم أوي وغريب أنك "عاجز" بكل ما تحمله الكلمة من معنى
عاجز حتى عن الكلام....عاجر عن الأمل...أيوة والله الأمل...كل حاجة حوالينا مخلياني في الحالة دي...عايزة أسكت..واهرب...قفلت كل حاجة بتربطني بالناس عشان ابعد عنهم وعن كلامهم

حاسة ان البلد بتضيع واحنا مش قادرين نعمل حاجة...المشكلة اللي اكتشفتها من فترة ومكنتش عاوزة أصدق نفسي هي ان المشكلة في الناس نفسهم...لو الناس يتغيروا يبقى ساعتها بس فيه امل...."إن الله لا يغير ما بقوم حتى يغيروا ما بأنفسهم".....هو احنا وحشين اوي كدة؟؟؟ معرفش....ربنا بيعاقبنا...؟؟؟.يمكن.....فيه خير جاي واحنا مش قادرين نشوفه عشان نظرتنا محدودة اوي...يا ريت....بس مش قلت قبل كدة انا عن نفسي أي أمل
انتهي من جوايا
أنا عمري ما كنت كدة...وغير احوال البلد ...أحوالي علي المستوي الشخصي مدياني نفس الاحساس
انا بقيت ببكي من أقل حاجة...قبل ما نتيجة الانتخابات تظهر بيوم تقريباً بس ساعتها كانت الي حد ما معروفة...دخلت انام بدري جداً مكنتش قادرة اتكلم أي كلمة...انهرت من البكاء...عارف لما تحس ان احلامك كلها بتتهد...النور اللي جواك بينطفي...تحس كأنك ماشي في نفق ضلمة ضلمة اوي...معندكش ولا لحظة امل
انك حتلاقي النور...ومش مصدق أي حد بيقولك انك ممكن...ممكن...تلاقي نور في آخره
حاسس كمان انا كل اللي حواليك مهموم زيك..شوية بحال البلد وشوية بحاله..مش لاقي حد تشكيله اللي جواك
........ ويفهمك...محتاج حد يحضنك اووووي...يطبطب عليك..يقولك اطمن انا جمبك..والحد ده مبتلاقيهوش
اليوم ده بطوله فضلت ترن في وداني جملة واحدة "يا بلد معاندة نفسها يا كل حاجة وعكسها ازاي وانا صبري انتهي..." ومقدرتش أكمل...قلت لا خلاص..خلاص......مبقتش شايفة فيكي أي أمل

بفكر كتير اني اسيب البلد..مع ان دي آخر حاجة كنت اتصور اني افكر فيها...عمري ما حسيت اني مش طايقة أعيش في البلد دي بالشكل ده....عمرى ما تخيلت اني في لحظة ممكن أنا كمان أبقى زي أي حد...أتخلى عن كل حاجة حلمت بيها مرة واحدة وفي لحظة يأس..أتخلى عن بعض مبادئي...وأتخلي عني..عن نفسي...وأهرب في
بلد تاني...أو أهرب هنا من بلدي....وانا جواها...أبقى عايشة فيها غريبة..متغربة..وتايهة
يمكن نظرتي متشائمة أوي ...بس مش قادرة اغيرها.....بجد انا كتير كنت بقول فيه امل..ولآخر مرة في الانتخابات قلت جايز بكرة أحلى..جايز وجايز..وجايز...وبرضه احلام
هو العيب في مين بس بالظبط..والله العظيم ما بقيت عارفة...ولا بقيت فاهمة أي حاجة
تاني حقولها....جايز ربنا بيعاقبنا..وجايز فيه خير واحنا مش شايفين....جايز
...............
.........
.........قراري النهائيقررت أنزل الانتخابات وابطل صوتي....عشان خايفة يزوروه.....راضية عن نفسي وعن قراري ومش حصدق أي حد يقولي ان ربنا حيعاقبني عشان مخترتش
لأ.... انا لما اقابل ربنا حقوله يااارب ..انا مصدقتش حد فيهم .....وانا سبت الاختيار للناس اللي اختاروا الاتنين دول ومقتنعين بيهم وشايفين انهم صح..سايباهم هما يختاروا ويتحملوا نتيجة اختيارهم......وانا حفضل ساكتة وانا عملت اللي عليا وحاولت معاكي يا بلد
وربنا وحده اللي يعلم مين صادق ومين كذاب وحيثبت لنا ده في يوم من الأيام

4 comments:

Nour said...

سهاد بجد انتي قلتي كلام كتير اوي اوي اوي نفسي اقوله
انا برضه خلاص مبقتش شايفة امل ولحد قبل اعلان النتيجة بكام ساعة بقول خلينا ندعي ونتفائل بس بجد خلاص وقلت هقاطع وكله هاجمي بس انا فعلا مش عايزة حد منهم ومش عايزة كمان ادخل في حاجة وانا عارفة ان اخرها تزوير
مبقاش هاممني حاجة ولا بفكر في حاجة الا في الارواح اللي انا متاكدة انها هتروح تاني والله اعلم ممكن احنا نكون منهم المرة دي
كل يوم اكتشف اننا كنا عايشين في كدبة اكتر من اليوم اللي قبله وكل يوم اكتشف ان العيب والغلط فينا اكتر من اللي قبله
وبالنسبة للمستوى الشخصي ربنا معاكي ومعايا :(

reemaas said...

مع انى مش ناويه ادخل اى تدوينة سياسية لاسباب نفسية وصحيه بس دخلت هنا لانك بدأتيها بالاغنيه اللى عماله ارددها بقالى كام يوم وقلبى مش مطاوعنى انطق الكوبليه بتاع انسينى انا صبرى انتهى :(

هو اكونت الفيس بتاعك ماله؟

حنين محمد said...

صباح الغاردينيا سوسو
أنا حاسة بيكي وب كل مصري ومصرية هنا والوجع الي حاسين فيه لما الثورة ضاعت كدا والحرية صارت حلم بعيد بجد صعب الإحساس دا والأغنية لريهام والله بكتني ياسوسو بس عشان بحبك غصب عني حقولك معليش خلي عندك أمل في بكرة رب العالمين يمهل ولايهمل ومش عارفة بكرة مخبي لمصر ايه ؟؟
" اللهم إنا أستودعناك مصر وآمنها وآمانها فـ أحفظها بحفظك أنت خير الحافظين "
؛؛
؛
لروحك عبق الغاردينيا
كانت هنا
reemaas

Afnan m7md said...

يااااااااااااااااااااااارب احمى مصرنا من اعدائك اعداء ثورتنا العظيمة التى مات فيها أرجل شبابنا واكرم بناتنا وتهانت ومات فيها أشرف رجال الدين ...
كل ذلك ونحن فى ثبات عميق ...
ياااااااااارب اجعلنا نفيق ونستعيد ثورتنا العظيمة ...
واختار الاصلح لنا ...........