Friday, March 23, 2012

تقريباً اتكعبلت


أنا عاوز أحكيلك حكاية...حكايتي لما اتكعبلت...أيوة والله اتكعبلت من غير ما آخد بالي ...بس تعرفي...ساعتها... كنت مبسوط أوووي أووي...يمكن عشان مكنتش مرتب أي حاجة...ويمكن عشان ساعات حاجات بتحصلنا زي ما كنا بنتمناها بالظبط لدرجة تنسينا كل تعب فات علينا..

من زمان...وانا عارف..ومتأكد..أنى حقابل البنت اللي بحلم بيها بطريقة مختلفة....عارفة حكايات القدر اللي بتجيب واحد فينا من اليمين وواحد من الشمال عشان يتلاقوا في نقطة مكتوب لهم يتلاقوا فيها....ده اللي كنت حاسس أنه حيحصلي...

ولما قابلتك...وعرفت بعدين ان لقانا كان صدفة....قدر جمعنا واحنا بعيد أوي عن بعض...اتأكدت ساعتها إنك فعلاً...مختلفة

..................



في يوم شتوي والدنيا زحمة والطريق واقف كالعادة...كنت في عربيتي ومشغل الراديو وبحاول أنسى الدنيا شوية.... دورت وشي بين العربيات اللي حواليا

ولمحتك..مميلة وشك ناحية الشباك...اتأملتك كتير..عينيكي حزينة...ووشك بريء

سلك سماعات الموبيل كان واضح وعرفت انك بتسمعي الراديو لما شوفت شفايفك بتتحرك كأنك بتغني...نفس الأغنية اللي بسمعها وشغالة في عربيتي...كانت أغنية جميلة...وانتي كنتي مركزة معاها أوي ...وفي عز شرودي اللي مكنش أكتر من لحظات...اتحركت العربيات...وتوهنا من بعض في الزحمة..

....

ملامحك كانت واضحة أوي ومش عارف أشيلها من بالي....وطول السكة وانا بفكر فيكي وسعيد انك بتسمعي معايا نفس الاغاني اللي بسمعها ..كأننا سوا..
سألت نفسي سؤال...هو ليه الدنيا جمعتنا ببعض لحظات....كأننا سرقناها من الزمن..كأنه حلم جميل!!!.... استمر ثواني وفي الآخر..طلع حلم
ملقتش اجابة كالعادة...لكن...كنت عارف..إن لقانا نصيب...لو مكتوب لنا حيحصل...زي ما بين كل الوشوش شوفت وشك أنتي بس...اكيد معادلات الكون كلها ممكن تتغير عشان نتقابل.....أكيد
يقيني كان أقوى حاجة جوايا بطريقة عمرها ما حصلت لي....
والقدر كان كريم معايا إلى أقصي حد...ويقيني كان صادق أوي عشان يتحقق..
روحت المكان متأخر بسبب الزحمة....كانت ندوات المفروض احضرها كل يوم لمدة شهر رشحوني ليها تبع الشغل بعد ما اعتذر زميلي بسبب تعبه المفاجيء..
وهناك....اتأكدت احاسيسي كلها لما لمحتك ...للمرة التانية...واقفة مع مجموعة من الناس
قربت بحذر...واتلاقت عيوننا...فضلنا ساكتين كتير...حبيت سكوتك..وحسيتك متوترة من كتر نظراتي ليكي
 اسمك...كمان بسمعه لأول مرة...كل حاجة فيكي كنت أول مرة أشوفها وأعيشها..وكأن كل حياتي اللي فاتت كانت فاضية...مفيهاش ناس...واتملت لما لقيتك
بعدها....كنا بنشوف بعض كل يوم...كنتي بتتكلمي عن كل حاجة...إلا عنك...كنتي بتحاولي تقريني من عيوني
والنهاردة آخر يوم المفروض نتقابل فيه...لكن مش عايزه يبقى آخر يوم...عشان كدة حكيتلك الحكاية دي
كلها
............
!!!.....عرفتي بقى إزاي اتكعبلت


 العنوان تقريباً اتكعبلت
استلفته من صديقي ابراهيم عادل
 كان عنده نص بحبه جداً له نفس الإسم
:))

27 comments:

ريبال بيهس said...

مساء الورد نهر الحب

وما أجمل هذه الصدف التي تجمعنا

بإشخاص لم نراهم من قبل ولكن عضلة

في الصدر تنبض بحب لهم فجأة مصداقاً

لقوله صلى الله عليه وسلم الأرواج جنود

مجندة ويبقون في الذاكرة وتجمعنا

بهم لحظات لايمكن نسيانها ابداً ...

تحياتي وإحترامي

هبة فاروق said...

مساء الحب يا نهر الحب
ما اجمل الحب حين يجمع بين قلبين
يعنى اعرف من كده اننا حنسمع خبر حلو قريب هههههههه
بوست رائع
فى ملحوظه صغيره الصور الجانبيه كبيره جدا مغطيه على الكلام مش عارفه المشكله دى عندى بس ولا ايه ياريت تصغرى حجمها علشان الكلام يكون واضح
تحياتى لنهر الحب

The illusionist said...

برضو حب
وبرضو مش هعرف اعلق
وبرضو هقولك ازيك

Nour said...

هي الصدف دي حلوة جدا وبقراها كتير .. بس مش عارفة ليه عمري ما اقتنعت انها ممكن تحصل :D:D

اسلوب رائع كالعادة :)

نهر الحب said...

ريبال بيهس
مساء الورد عليك
:))
اكيد اكيد ما احلي الصدف والقدر ولما احساسنا ويقينا يبقي قوي تجاه حاجة ميعنة وتحصل
:)
شكرا لوجودك هنا ديما وبليز سلملي علي ريماس علشان هي بتقول انها حتغيب
:(

نهر الحب said...

هبة
مش عارفة حكاية الصور انا عندي بتظهر كبيرة اول ما بفتح وبعدين بتتظبط عادي
ابقي اصبري عليها شوية وقوليلي
:)
نسمع خبر قريب..احم احم
عن ايه؟؟؟؟
:))
كل شيء جايز طالما فيه قدر وصدف حلوة بتجمعنا بناس مكناش نتوقع نشوفهم وفي لحظة الدنيا كلهاا بتتغير
:))

نهر الحب said...

The illusionist
:)))
وبرضه فرحت
وبرضه ابتسمت
وبرضه حقولك تعالي كل مرة
وازيك
:)

نهر الحب said...

نور
ممممم
وانا كمان
بس انا بتمناها تحصل بالشكل ده او باللي يشبهه
بتمني لقاء مش عادي
بجد حاجة تيجبني من اليمين للشمال
:))
ان شاء الله نتقابل قريب علي الميل

Romancia said...

الله بجد

reemaas said...

يا حلولى يا حلولى اى البوست الحلو ده

جميله اوى الحالة دى وروعه جدا الكعبلة دى يارب تتكعبلى قريب يا سوسو

P A S H A said...

أول فقرة
:)
That's me and Bent Pasha exactly :)

بوست رائع يا أستاذة .. برافو والله ، دمتي مبدعة

تحياتنا

Bent Men ElZman Da !! said...

دى بتبقى احلى كعبله :)
والكعبله الوحيده اللى الواحد بيفضل يفتكرها طول عمره اصلا
بحب الصدف دى اوى


تحفه اغنيه كيفك انت :)

Miss LoZa said...

:)

Miss LoZa said...

بقولك ايه أنا مش هاخد الفيس بوك أكونت بتاعك ولا رقمك ولا أى حاجة أعاكسك بيها كده ؟؟ :$ :$

ههههههههههههههههه

rona ali said...

قطيعه
انا بدخل عندك انتى وريبال وريماس احس ان الدنيا بقت بمبي بمبي بمبي ههههههههههههههههه

بس عن جد قصه جميله اوى يا سو
اتمنتها تكون بيجد وكنت فرحانه كدة انا اصلي هبله وعبيطه اوى وبصدق وبعيش ههههههههههههههه مع القصص مش في القصص لتفهمى غلط ولا حاجه نطيح هههههههه

EMA said...

جميلة اوووووى يل نهر الحب

حلوا جدا بجد

تسلم ايديكي و قلبك

تحياتي

نهر الحب said...

رومانسية
تسلمي حبيبي
:))

نهر الحب said...

ريماس
ده اثر التهييس من المواصلات والزحمة وانا راجعة من الشغل
ادعي بقي بصوت عالي اووووووي عاوزة اتكعبل انا اااااامين انا وانتي
:)))

نهر الحب said...

باشا
:))
الله
حلو ده
موجود في الحياة اهو والله كنت مفكراني بكتب اوهام
:D

نهر الحب said...

بنت من الزمن ده
بعشق الحاجات القدرية اوي دي
وبعشق كيفك انت
:)))

نهر الحب said...

ميس لوزا
:))
ها بقي ندمتي
:DDDDDDDDD

نهر الحب said...

رونا
ههههههههه
والله البمبي ده هنا تقريبا بس
ده فيه غوامق كتيييير وانا بموت في الغوامق
>:DDD

نهر الحب said...

ema
تسلمي يا قمرة
ويسلم احساسك بيها
:))

دعاء العطار said...

انا عيشت حاله حلوه اووووى .. لسه عايشاها الى الان

اممممممممم مش عارفه اعلق البوست حلو اوووووى

وحشنى كلامك ياساسو :)

Timo.. said...

خلتيني فاتح صفحتك.. وروحت على فيلم
The Lake House
عشان اتفرج على مشهد افتكرته لما قريت البوست بتاعك

فيه جملة حلوة في المشهد ده بتقول:
(ابتعدوا..لكي يلتقوا من جديد)

نهر الحب said...

دعاء
انا عارفة
..
بس حلو انها حلوة للدرجة دي
تعرفي ان البسوت ده مخليني انا في حالة حلوة لدلوقتي
:))

نهر الحب said...

Timo
اكييد الفيلم رائع ومتأثرة بيه اوي هو و
serendibity

حلوة الجملة دي كمان
:)