Saturday, March 10, 2012

قلبي ما زال طفلاً


زمان وانا صغيرة كنت بشوف ماما شايلة شنط كتير اوي وتقيلة اوووي
كنت بستغرب هي إزاي شايلة كل ده حتى لو هي كبيرة
وكنت بقول إني لما أبقى قدها في يوم من الأيام...أكيد عمري ما حقدر أشيل زيها
ولما كبرت....
بقيت بشيل...وبشيل...وبشيل...
اكتر مما كنت أتصور...
واتعلمت ان اللي بنشوف اننا منقدرش نعمله في يوم
حييجي وقت نلاقينا بنعمله وانه شيء عادي مش مستحيل

**************
....وانا صغيرة كنت بحب أجري أوي وانا رايحة أي مكان
لحد في يوم تعبت جداً والدكاترة "زي الأفلام" منعوني من أي مجهود
......ومن يومها بقيت أخاف أوي اني اجري والعب زي باقي الأطفال اللي في سني
......دلوقتي
بقيت بجرى برضه بس في الدنيا بجري في شغلي وهنا وهناك وبعمل حاجات كتير وبحب اتحرك واروح وآجي وديماً بيسألوني انتي بتتعبي نفسك ليه كدة
..وديماً بقول اني بحب أوي أبقى كدة..
بحب ابقى مشغولة....حتى عن نفسي

******************

 كمان كنت بعشق الراديو....وكانت اوقات فراغي بجيب فيها الراديو واقعد علي كرسي جمبه وافضل اسمعه...ولو مش الراديو بسمع شريط كاسيت والغريب اني في سن صغير اوي كنت بسمع نجاة وكنت حافظة أغنية "أيظن" وكنت بحبها أوي وكمان أغنية عبد الحليم "رسالة من تحت الماء"
 دلوقتي متغيرتش أبداً لسه بعشق الراديو...ولسه بحب أسمع الاغنيتين دول واغاني كتير قديمة
الحاجة المختلفة هي
 "فيروز"
 وانا صغيرة كنت اقول هما ازاي بيسمعوها كدة يعني
...
دلوقتي فيروز بالنسبة لي حالة استثنائية وفريدة جداً من الغناء وبقت الحاجة الوحيدة اللي لما بسمعها بتتوهني عن كل الدنيا
تبكيني مع "حبيتك بالصيف" و "قديش كان فيه ناس"
تخليني أبتسم أوووي مع
 " كيفك انت"
 و "سألتك حبيبي"
 و"شايف البحر"
مرتبطة معايا بالشتا والمطرة والبرد....والوحدة
.....
عرفت دلوقتي ان نظرتي لحاجات كتير ممكن تتغير مع الوقت
وان قلبي مهما كبرت ...
حيفضل طفل صغير
...............................
......................

يا سنيني اللي راحت ارجعيلي
ارجعيلي شي مرة ارجعيلي
وانسيني ع باب الطفولة
تا اركد بشمس الطرقات
.......
يا سنيني اللي راحت ارجعيلي
 ارجعيلي شي مرة ارجعيلي
ورديلي ضحكاتي اللي راحوا
اللي بعدا بزوايا الساحات


11 comments:

Nour said...

مع نجاة وفيروز وكمان عبد الحليم كان لازم ابقى اول تعليق :D
اعتقد فيروز حالة خاصة عند كل الناس وعلى فكرة الأغنية اللي كاتباها في الاخر دي من اجمل اغانيها عندي اما اللي كنت بقول عليها زيك كده الناس بتسمعها ازاي ومازلت بقول كده فهي ام كلثوم :D

ويارب يارب قلبك يفضل طفل صغير كده على طول :))

ريـــمـــاس said...

صباح الغاردينا ياسوسو
اجمل حاجة لو نفضل بنفس قلوبنا واحنا صغيرين نفس الفرحه ونفس الاماني ونفس الاحساس انتي كبرتي ياسوسو بس جواكي لسى طفلة ولازم تحافظي عليها بالنسبة لفيروز هي فعلاً حاجة مختلفة وحتى سماع أغانيها بيبقى له طقوس خاصة بتفكرني بابا الله يرحمه كنا لازم نسمعها الصباح بجد ماعرفش ليه ارتبطت معايا بالصبح ..
سوسو دايماً عاوزاكي بقلب طفلة عارفه ليه لان دايماً قلب نقي وجميل ومش بيعرف الحزن ويارب اشوف ابتسامتك الي بحبها :)"
؛؛
؛
لروحك عبق الغاردينيا
كانت هنا
reemaas

ابن السور said...

هذه البنت رائعة قلمها مختلف ونكهته مختلفة ..
حين تقرأ لها تحس انك تقرأ شيء عادي ..
فهي تتحدث اكثر مما تكتب
لكن حديثها له لون وبه طعم وبه حس
انه خليط بين حكمة وبين سخرية وبين نظرات .. هي تشدك من أول حرف وتدفعك بأن تقرأ لها وأنت تبتسم .. تابعوها فهي صوت ينبع من داخلنا
فكلنا نعيش ماكتبته ومانشرته وما أبدعت فيه

هبة فاروق said...

كلام من القلب
رائع هذا البوست يا سوسو

reemaas said...

زمااااااان وانا صغير كنت بحلم ابقى كبير تعب القلب واتحير من الدنيا ومن المشاوير

ولما كبرت قلت ياريت ماكنت حلمت ولا اتمنين وكنت فضلت صغير زى زمان

ماعرفش ليه كلمات الاغنية بتزن فى دماغى وانا بقرا البوست
وحشانى

نهر الحب said...

نور
:)
طيب ايه لسه مسمعتيش ام كلثوم
لو لسه
انصحك بيها الساعة 3 الظهر في عز زحمة المواصلات وهي في الراديو وانتي بتنعزلي بيها عن العالم
:))

نهر الحب said...

يا ريتنا نرجع اطفال يااريت
بس الاحزان عجزت قلوبنا يا ريمو
:((
سيبك انتي انا عيلة جدااا اصلا دانا باكل مصاصة علي فكرة لسه
:)))

نهر الحب said...

ابن السور
بجد ربنا يخليك علي كلامك الحلو اوي ده
ده كتير عليا
:))

نهر الحب said...

هبة
منوراني ديييييييييما

نهر الحب said...

ريماس
نور انا كمان كنت بسمعها اوي وانا بكتب وكنت عاوزة اسمي البوست كدة بس حبيته اكتر مع فيروز
:)

Romancia said...

كلماتك حقيقه اوى بجد لمسانى