Wednesday, December 12, 2012

تلاكيك


حياتنا بقت كلها تلاكيك

بقينا بنتلكك عشان نفرح........نجري ونمسك في أي حاجة تفرحنا عشان نلحق ومتسيبناش
وتهرب....
....................

بندور علي لحظة نضحك فيها من قلبنا وسط مليون لحظة حزن مبنقدرش نمنع فيها بكانا........


....................
نتلكك عشان نجمع بعضنا في خروجة واللا مناسبة...من غير مناسبة..عشان بس نحس اننا لسه عايشين وبنعرف نخلق حياة وسط دنيا بتموت حوالينا....

....................
نتلكك ونفتح الراديو ندور علي أي حاجة ولو لقينا فيروز نعلي الراديو علي آخره عشان منسمعش

الدنيا حوالينا ونتدفي بصوتها يمكن تنسينا العالم...

....................

نستني يوم العيد عشان نجيب التليفون وننفض التراب عن ارقام ناس بقالنا زمن مسألناش عليهم....ومش عارفين ليه هما كمان مبيسألوش علينا.....

....................

والحنين يبقى مالينا لحد ما يغرقنا لناس مش المفروض نفكر فيهم ونتلكك عشان نشوفهم وبساطة نحلم بيهم.....كل يوم ...نعرف اننا لسه من جوانا قادرين نحب ناس حتى وهما ميستاهلوش ......

....................
بقينا بنتلكك للحب نفسه...ندور بعدسة مكبرة علي الحب في كل مكان عشان نحب ونشتاق ونستني
لحظة تجمعنا باللي بنحبه بعد الغياب

.....
....................
ونتلكك علي الغيرة ....ونغير.....ونسكت عشان قلوبنا هي اللي تتكلم ونتخاصم عشان نرجع ونتعاتب ونسمع كلمة حب بتتوه وسط زحمة الدنيا

....................
نتلكك بحب الشتا والبرد.....عشان بس بنشتاق للحظة دفا في ايدينا نحسها بعد البرد ده....لحظة الدفا اللي بتطمنا وتعيشنا يمكن سنة كاملة لحد ما ييجي شتا وبرد تاني

....................
نتلكك بلحظة حزن نبكي فيها نشوف مين أول حضن حيسبق ويحضننا ويحمينا ويطبطب علينا ويمسح دموعنا عشان بس نتأكد اننا مش لوحدنا........

....................
ونتلكك عشان نبقى لوحدنا ونبعد ونبعد ونبعد...عن كل الناس عشان نشوف حنوحشهم قد إيه

 
ونستني لحظة سؤال وشوق ولهفة وأجمل لقا بعد البعاد....
وليه مينفعش يحصل كل ده من غير ما نكون بنتلكك؟؟؟؟؟


********************************

على الهامش
النهاردة
12/12/2012

كلنا اتمنينا التاريخ ده يحصل فيه حاجة مميزة واستنيناه أوووي اوووي

بس انا شايفة ان اللي يبحصل في اليوم هو اللي بيميز التاريخ مش العكس

يا رب كل أيامنا تكون حلوة
.....
انا عن نفسي حستني 2013

:)

14 comments:

EMA said...

نهر الحب جميلة اوى رقيقة اوى كالعادة ..وجعت اوى كلماتك

يا رب يسعدك دايما و يا رب تكون كل أيامنا حلوة و مميزة دايما حتى لو تواريخها مش مميزة ..

Bent Men ElZman Da !! said...

احنا بنتلكك عشان نخلى حياتنا ليها طعم مسكر بأى شكر من الاشكال
بس لازم المر يتلككلنا ويقعد معانا شوية
فـ احنا نروح متلككين ونعمل مش واخدين بالنا منة أصلا :))

حبيت جدا أخر جُملة اليوم هو اللى بيميز التاريخ مش العكس :)

حنين محمد said...

مساء الغاردينياسوسو
احنا بنتلكك صحيح لانه الفرحة مابقتش موجودة زي الاول بنتلكك عشان عاوزين نحس بيها ونفرح ..
ويارب السنة الجاية كلها فرح وسعادة "
؛؛
؛
لروحك عبق الغاردينيا
كانت هنا
reemaas

Nour said...

وكالعادة كتاباتك جزء من احساسي او بعني اصح احساسنا كلنا

عايزة اقولك ان من غير كل التلاكيك دي هنموت ..فخلينا عايشين بيها احسن :))

وحشني المكان ده اوي ووحشتني اغانيكي كمان والأكتر من ده وده صوتك :*

Rozy said...

اه والله يابنتى تلاكيك ^^

وحشانى كتير ف جيت اسلم عليكى
واقولك كل سنة وانتى طيبة وبألف خير وصحة وسعادة ياحبيبتى
<3
وان شالله سنة سعيدة عليكى وتحققى فيها كل اللى بتتمنيه

روووزى

Unknown said...

وانا بتلكك عشان اعلق عندك اصلك وحشتيني <3

Tamer Moghazy said...

انا اتعلمت حاجة النهاردة منك..
وهي انه اللي بيحصل في اليوم هو اللي بيميزه ويخلينا نفتكر تاريخه... مش العكس

كل سنة وانت ديما بكل الحاجات الحلوة اللي في الدنيا :)

نهر الحب said...

ema
:)
ربنا يخليكي
وانتي كمان

نهر الحب said...

بنت من الزمن ده
هههههههه
اه مش بقولك كلنا بنتلكك طول الوقت
:))

نهر الحب said...

ريماس
يا رب كل ايامك حلوة زيك
ومن غير تلاكيك
:)
وحشتيني

نهر الحب said...

نوووور
:)))))))
مش عارفة اقولك ايه
صحيح من غير التلاكيك دي نموت
:)

صوتي ممكن اسجلهولك علي شرايط
:D

نهر الحب said...

rozy
وانتي طيبة وبخير ديماا
:)

نهر الحب said...

نسرين
اتلككي ديما بقي
:)

نهر الحب said...

تيمو
وانت طيب وبخير
:))