Monday, May 21, 2012

كتروا من اللقا.....لابد من الفراق


بنبقي متفرقين...ونتقابل...عشان نفترق تاني

اكيد حنفترق...بعد يوم ...اتنين....سنة...مش حتفرق
بس بيفضل لنا سؤال ليه اتقابلنا؟؟؟؟
سؤال ملهوش اجابة...غير حكمة القدر 

.......................

"كتروا من اللقا لابد من الفراق"

....الجملة دي قالتهالي واحدة صحبتي ولما قالتها وجعتني اوي....عينيا دمعت
.....اصلي عمرنا ما بنزعل علي فراق حد مش بنحبه
....ولو بنحب حد اكيد حنفارقه
.....او هو يفارقنا
......مش حتفرق كتير

!!!!!طيب منحبش عشان لما اي حد يفارقنا منزعلش
..... اكيد مينفعش

كتير القدر بيحكم علينا نقابل ناس فترة من الوقت ونحبهم اوي ونحس ان لقاهم كل يوم بيخلينا عايشين...بتتحول حياتنا فجأة لحياة ليها طعم...بنبقي عاوزين نمسك في اللحظات معاهم عشان متعديش....كل ثانية نغمض عيوننا عشان منصحاش من حلمنا معاهم
.....بس بنصحي
......عشان للأسف
..... لازم نصحي
.....................
......................

أصعب احساس لما تشوف حد وتكلمه ومتبقاش عارف ان ممكن دي تكون اخر مرة تشوفه فيها
.........لأي سبب
ممكن بعدين تندم علي لحظة ضيعتها وانت مش جمبه
وانت مش قادر تقوله انا بحبك....خليك جمبي..محتاج لك
ممكن تفضل كل يوم تستني تشوفه تاني...صدفة....والصدفة مش بتحصل...غير صدفة
والانتظار بيبقي عامل زي شمعة كل يوم بتدوب وأكيد في يوم بتنطفي وتخلص وبينطفي معاها قلبك
........................
...........................
لو تفارق حد بتحبه....ممكن يبقي معاك كل لحظة....تحس انك بتفكر فيه 24 ساعة في اليوم حتى وانت نايم.....بتكلمه وهو مش موجود...تحكيله افكارك..واحلامك...وكل اللي مضايقك
بيبقي فعلاً عايش معاك...جواك
....محدش بيقدر يفهم ده أوي
ممكن متبقاش بتحكي لحد عن الطيف ده اللي انت الوحيد اللي بتشوفه...واللي حواليك معتقدين انك ناسيه وانه خلاص مبقاش في حياتك
ميعرفوش انه بقي جواك اكتر من الأول
بس معاك انت وبس محدش شايفه ولا حاسس بيه غيرك
....................
........................

......الفراق ممكن يفصل أجساد عن بعض
....ممكن يكون ببعد المسافات
لكن القلب والاحساس وحتى العقل اللي بيه بنفكر كل لحظة
مينفعش نخليهم يفارقوا حد مش قادرين....أو مش عايزين يفارقوه

التدوينة دي مشاركة في حدث ميهو الجميلة
وصف كلمة شعورية

20 comments:

نهر الحب said...

انا مقصرة معاكوا جداااا ومقصرة في القراءة والكتابة والمتابعة والرد

مش انشغال بصراحة علي قد ما هو صمت غريب انا كمان ملاحظاه في معظم المدونات اللي بتابعها

يا ريت محدش يزعل مني
:)

احنا في مرحلة الصمت الانتخابي
وممكن كمان تبقي الصمت التدويني

واللي خلاني اكتب الايفنت بتاع مها
:))

ووبس
وحشتوني بقي علي فكرة

Miss LoZa said...

ليه كدااااااااااااااا

:|

كنت خايفة وأنا بعمل الأيفينت

خايفة من الحد الى هيكتب عن الفراق

ومش أى حد الى كتب .. ده أنتِ يا سوو

!

البوست أكثر من رائع

</3

دعاء العطار said...

" طيب منحبش عشان لما اي حد يفارقنا منزعلش "

تخيلى انا وصلت للمرحله دى .. انى بقيت اخاف احب حد او اتعلق بحد عارفه انه كده كده هنفترق

اى حد اتعذب من الفراق عاش معاكى كل كلمه من كلماتك دى ياسهاد للاسف :(

بس رغم ان البوست حزين الا ان وحشتنى كتاباتك :)

rona ali said...
This comment has been removed by the author.
rona ali said...

دى تدوينه عن انا والعذاب وهواك

سووو مش هقولك مبدعه والكلام دة انتى اكبر من كده واعتذراك مش مقبول لان انتى تعملى اللى عايزة براحتك وكلنا بنمر بنفس الازمه :)
برضوا
بصي المقطع دةواللى قابله اثروا فيا اوى


لو تفارق حد بتحبه....ممكن يبقي معاك كل لحظة....تحس انك بتفكر فيه 24 ساعة في اليوم حتى وانت نايم.....بتكلمه وهو مش موجود...تحكيله افكارك..واحلامك...وكل اللي مضايقك
بيبقي فعلاً عايش معاك...جواك
....محدش بيقدر يفهم ده أوي
ممكن متبقاش بتحكي لحد عن الطيف ده اللي انت الوحيد اللي بتشوفه...واللي حواليك معتقدين انك ناسيه وانه خلاص مبقاش في حياتك
ميعرفوش انه بقي جواك اكتر من الأول
بس معاك انت وبس محدش شايفه ولا حاسس بيه غيرك

دة صعب جدا والاصعب اللى حواليكى بيتعاملوا معاكى ازاى
اما عن مقطع ملحقتتيش تقوليلها بحبك او محتاج لك
انا حصلت معايا كتير اوى
وسكت سكت لان بيصبح الكلام تقيل اوى لحظتها وبتضطري تسيبي الشخصيه دى تشوف حياه تانيه غيرك مع اشخاص اخرين والموضوع بيبقي فظييييييع اوى ظروف علي حاله علي اشخاص علي حاجات كتير فوق بعض بتضطرك تفارقي وتتفارقي :))

ولكن يبقي الامل

حنين محمد said...

صباح الغاردينيا سوسو
للأسف لازم يحصل فراق عارفه فكرتيني بـ ماما لما يبقة خواتي المتزوجات حواليها واخواني الشباب وتبص هنا تنده لدا وتنادي على دي وبس يروح كل واحد فيهم بيته تقول " ياه ماحلى لمتهم بس لو اعرف حتضايق كدا ماكنتش جمعتهم مرة وحدة " يعني حست بيهم حواليها وحست باللقاء بس حست ان اللقاء دا جاب فراق بعده يمكن مش بنفس معنى كلامك بس كمان نفس الاحساس بالفراق واللقاء أما موضوعك ياسوسو مهما شخص غاب عنا بسبب الفراق بتفضل الذكريات وساعات بنتعلق في الغايبين أكتر وبجد لو كل واحد فينا قدر اللحظة الحلوة والساعات الجميلة في اللقاء بس مش بنعرف طعمها غير لما نتفارق "
؛؛
؛
وأوعي تغيبي كدا صمت الانتخابات دا حرمني من حبايبي :( "
؛؛
؛
لروحك عبق الغاردينيا
كانت هنا
reemaas

Tamer Moghazy said...

هو
انا
ينفع
اقول
اني
كنت
هنا
و...
وبس..؟؟

Bent Men ElZman Da !! said...

للاسف الفراق احدى ضروريات الحياه
زيه زى الا حاسيس تانيه بنعيشها ونحسها
زى ما بنجرب اللقاء
لازم نجرب الفراق ايا كانت اسبابه

بوست جميل اوى

Nour said...

مش عارفة اقول ايه بجد .. البوست حلو اوي اوي اوي
اي كلام عن الفراق بيأثر فيا اصلا .. ان شاء الله لما نتكلم المرو الجاية هبقى اقولك حاجة عن الموضوع ده عشان انا ليا وجهة نظر غريبة شوية فيه

Miss you awy 3la fekra :)

;كارولين فاروق said...

تدوينه جميله مليئه بالفلسفه والنصائح
واتمني ان الكل يعمل بها
ولا يضيع الوقت
جميله حبيبتي
تحياتي

Moahmed abdelmeguid said...

البوست جميل جدا بجد :)

البوست بيوجع علشان تقريبا بيلمس كل واحد .. كلنا مرينا بالموضوع ده .. كلنا قبلنا و فارقنا و فكرنا اننا مش عاوزين نتعلق بحد تانى علشان منسيبوش .. بس هنعمل ايه
C`est la vie :)

اقرى القصيدة دى فى نفس الموضوع تقريبا هتعجبك :)
http://www.kelmetnamag.com/article/25209/%D9%83%D8%A7%D9%86%D8%AA-%D9%87%D8%AA%D9%81%D8%B1%D9%82-%D9%81%D9%89-%D8%A7%D9%84%D9%88%D8%AF%D8%A7%D8%B9%D9%85%D8%B5%D8%B7%D9%81%D9%89-%D8%A5%D8%A8%D8%B1%D8%A7%D9%87%D9%8A%D9%85/#.T7tVX-uP9a8

نهر الحب said...

لوزا
الفراق...
مكتوب علينا مهما عملنا
:)

فرحانة انك خلتيني اكتب

نهر الحب said...

دعاء
مهما قلنا مش حنحب عشان منفارقش بنحب وبنفارق برضه
ممم
هي دي الدنيا
:)

نهر الحب said...

رونا
الأمل
عارفة علي قد ما الامل احلي شيء في الوجود علي قد ما احيانا بيكون مؤلم لما بيزيد في لحظة ويقل كل يوم
0___0

نهر الحب said...

حبيبتي ريماس
:)
الذكريات
آآآآه من الذكريات
مؤلمة كتير
ممكن نعيش عليها
ومنفتكرش من حد غير كل حاجة حلوة
:)

انا موجودة اهو

نهر الحب said...

تيمو
.......
أكيد ينفع
تعالي ديماً
عشان اعرف انك متابعني
:))

نهر الحب said...

بنت من الزمن دي
الحياة كدة بس ساعات مش بناخد بالنا او مش بنعمل حسابنا علي اللي ممكن يحصل
:((

نهر الحب said...

نور
اكيد ان شاء الله

miss u tooo 3la fkra

نهر الحب said...

كارولين
شكرا ليكي اوي
عاوزة ازروك قريب ان شاء الله

نهر الحب said...

محمد عبد المجيد
قريت القصيدة هناك علي الفيس حلوة اوي
:)

صح هي دي الدنيا والحياة
نورتني بجد