ليل....برد....مطر.....و...وحدة

....الليل...اكتر وقت بحبه
...يمكن اكون بستناه من أول اليوم
 ...فيه هدوء وسكينة
وحدة...حقيقية....أووي
...ضلمة بستخبى فيها من الناس
وكتير بستخبى من ....نفسي
....متستغربوش إني بحبه وهو مؤلم كدة
بس أحياناً بنحب حاجات من كتر ما هي بتحبنا وألمها هو اللي بيونسنا في عز وحدتنا
......
 كل اللي يعرفوني يعرفوا إني مش بسهر...لكن بقت كل حاجة في حياتي ليها شكل قدام الناس ...وليها شكل تاني جوايا
......للأسف مش حاجة بإرادتي ولا إني أخبى حقيقة عن نفسي
لأ... دي حاجة غصب عني بقت بتخلي اللي جوايا أوي مبيظهرش
وبيفضل بردان جوايا...ده شيء صعب أحياناً...لكن ...بيحصل
...
...
........نرجع تاني
....كنت بتكلم عن الليل
كثير اتمنيت يبقى عندي كرسي هزاز في بلكونة كبيرة...أقعد فيها في عز البرد...وعز الليل
أفكر وأنا لوحدي...أمسك في إيدي كوباية كاكاو باللبن عشان اتدفي
 وأشغل فيروز...وأغمض عيني
منكرش إني عملت الحكاية دي كذا مرة بس مش بنفس الوصف كدة
لأن عمري ما كنت لوحدي.... "شكلاً" برضه
...
!!!!....للدرجة دي بقيت بتمنى الوحدة وبحبها
....أيوة
صدقوني وحدة الانسان في احساسه أصعب بكتير من وحدته لو مافيش أشخاص حواليه
والوحدة من كل النواحي أفضل ما تبقى وحدة شكلية قدام الدنيا كل الناس حواليك ومن جواك لوحدك
................
مع إني بحب الشتا اووي أوووي
....إلا اني الفترة اللي فاتت دي لما كنت بحس البرد..مكنتش قادرة احس بالدفا مهما عملت
......ساعتها.....عرفت يعني إيه حد يبقى وحيد بجد...ومافيش حتى كلمة تدفيه
..
بحب كمان أشوف نقط المطر وهى نازلة على الإزاز....بشوفها قد إيه رقيقة...كأنها خايفة تقع على الأرض وبتحاول تمسك في أي
....حاجة في سكتها
....بتفكرني بيا
لما حاجة تنزلني من سمايا غصب عني واقعد أخبط أخبط... لحد ما أقع
.......

ووووووبس

بالمناسبة بحب الأغنية دي أووي
ليه القمر غالي عليا...يمكن عشان في نوره وبعده فيه حاجة منك
ليه الشتا في قلبي حزين...يمكن عشان برد وقساوته فيه حاجة منك
ليه السحاب بعشق بياضه....يمكن عشان زي قلبي في قربي منك
ليه المطر بيصعب عليا..يمكن عشان زي دمعي في بعدي عنك
ليه لما تبعد عن عنيا بخاف عليك.... وبخاف عليه برده منك
....ليه لما بشوف في السما نجوم كتيرمنها بغير...يمكن عشان
قد السما...وقد النجوم......بـــحــــــبـــــك

قد الحروف ..أصالة


 انا بجد كويسة واحسن من الفترة اللي فاتت الحمد لله بس ده مجرد كلام  حاساه قلت أقوله هنا برضه
شكراً لكل اللي سأل عليا واهتم يقوللي ولو كلمة تخفف عني
:))