Monday, December 19, 2011

مجرد كلام

أنا مش عارفة داخلة عشان اكتب إيه...حبيت اسيب ايدي تتكلم بما اني صوتي مبقاش قادر يطلع ولا قادرة اتكلم مع اي حد قلت يمكن اعرف اكتب وعارفة ان كلامي هنا ميهمش اي حد ومافيش فايدة اني اخلي حد يقرأ حاجة تضايقه ولا تنكد عليه
بس صدقوني
واعزروني
انا فعلاً ملقتش مكان اتكلم فيه غير هنا
.............
انا صح؟؟؟
!!!!!.....معرفش
غلط؟؟؟؟
برضه معرفش
عاقلة؟؟؟؟
معرفش
مجنونة؟؟؟
احتماااال
بس اللي انا عارفاه اني مبقتش فاهمة حاجة من الدنيا حواليا خااااالص
ومش عارفة عشان هي دنيا عاملة كدة واللا عشان انا كدة فهي كدة معايا
!!!!!!!!!
طبعاً محدش فاهم حاجة
بس برضه معلش خلوني اتكلم كدة وخلاص اللي وصل لهنا ومستفادش حاجة انصحه يطلع وميحيش المدونة هنا تاني
................
المشكلة كلها اللي انا عارفاها ومتاكدة منها اني مش عارفة اتغير ولا امشي اموري ولا اكبر دماغي ولا مزعلش ولا ماحبش بقلبي اوي
عمركوا شوفتوا حد غلط عشان بيحب اللي حواليه بقلبه وبكل احساسه وبيزعل لما الناس تعامله كأنه ولا حاجة...ده يمكن الولا حاجة دي بتبقي كمان ليها قيمة عند الناس لكن هو لا
وبعدين نفضل نقول ماهو مش كل الناس
واللي مش كل الناس في لحظة بيبقوا كل الناس
والناس مش اي ناس
لا
ناس قريبين اووووي وعارفين ايه اللي بيزعلك وايه اللي بيجرحك وبرضه بيعملوه
أصعب احساس في الدنيا ان حد تبقي معتقد انه قريب منك ومش محتاج منه غير انه يكون جمبك وانت محتاجه حتى لو متكلمتوش لكن تلاقي تصرف معاكس تماما وبعد وجفاء من غير سبب اللي يضايق اكتر ان الانسان ده يعاملك بطريقة هو نفسه بيكره يتعامل بيها
المهم في كل ده
انك تطلع في الاخر غلطان
من كل النواحي
غلطان انك بتحب
وغلطان انك بتحس
وغلطان انك بتقول الحق
وغلطان انك بتتنرفز
وغلطان انك مش بتسكت وتعدي
طيب لما ابقي كدة
اتغير ازاااااااااااااااااي
الناس عايزيني اتغير
عشان انا غلط طبعاااااااااااا
وانا مش شايفة كدة
انا شايفة اني اللي يعرفني يعرفني زي ما انا
بجنوني
بعقلي
بحنيتي
بقسوتي
يحبني عشان بقول الحق ولو على رقبتي
ويحبني من غير سبب
يحبني عشان الأصحاب بجد بيعملوا كدة
ولو مش كدة يبقي برضه انا حكون غلط
عشان ببقي موهومة بعلاقاتي كلها مع الناس ومش قادرة احدد
مين يستحق اني احبه بجد ومين لا
 نفسي في اخر كل الكلام ده ارجع بعد يومين اقول انا ازاي قلته والدنيا رجعت تاني حلوة وانا كنت مكبرة المواضيع بجد نفسي اقول اني  قلت الكلام ده كله في لحظة يأس مكنتش اقصدها
.....لكن
.......للأسف
انا حاسة ان حاجات كتير اتكسرت
...مش بيني وبين ناس كتير
!!!....لا
حاجات جوايا اتكسرت ومش حعرف أرجعها زي الأول
...بجد انا اسفة
اسفة علي الازعاج زي ما قلتلكم المرة اللي فاتت
اسفة عشان الوحدة احيانا بتبقي افضل من اي صديق
اسفة لأي حد ضايقته أو زعلته بسبب كلامي ده واعرفوا انه غصب عني كان لازم اطلع اللي جوايا
لأني بجد كنت وصلت لمرحلة اني مبتكلمش مع حد

11 comments:

دعاء العطار said...

بصى ياسهاد

اللى مايستحملكيش فى اسوا حالاتك يبقى مايستاهلكيش فى احسن حالاتك

الصديق اللى بجد اللى بيقدم اعذار لصديقه ويستحمله حتى لو عمل ايه

ماتضايقيش نفسك وحبى من قلبك بجد بس حبى اللى يستاهل الحب ده

كونى بخير :)

reemaas said...

كنت حالفة انه لو سياسة انى مش هرد

ياريته طلع سياسة:)

بصى يا سهاد

مش ديما الناس بتبقى عاوزاكى تتغيرى او رافضاكى علشان انتى غلط لا بالعكس فى اغلب الحالات بيبقى علشان انتى صح

بس وبمنتهى البساطة هم مش عاوزين الصح

وانك تبقى صح ده مستحيل يتغير لانه بيببقى طبع اكتسب لدرجة انه بيشبه التكوين

فى الحاله دى معاكى خيارين
انك تعملى اللى عاوزينه وتسكتى علشان ماتخسريش او انك تعملى اللى فى دماغك وزى ماترسى دقلها

وطالما انتى تعبانة كده مش هتقدرى تعملى الاولى فى الغالب

يبقى دوسى لان مش هيحصل معاكى اكتر من اللى حاصل ومش هتتوجعى اكتر منتى موجوعه يبقى اقله تبقى راضيه عن نفسك

Anonymous said...

صباح الغاردينيا سهاد
وأكيد كل الي بيحبوكي هيكونو هنا ادي احلى دودو في الدنيا جات عشانك واجمل نور جات عشانك والصغننه الغلبانه ريماس جات عشان خاطر عيونك الحلوة الي مش لايق عليها الزعل والحزن ابداً عارفة يااغلى سهاد لما كنت بجي صفحتك كنت ببص للصورة الي فوق وللاغاني الي بتسيبيها ولرومانسيتك وحنانك في الحرف كنت بحس يكي حاجة بتشبهني اوي كنت بجد بحس براحة هنا وكنت عارفة أن صحبة المدونة دي انسانة حساسة ورقيقة ماتتغيريش ياسهاد مهما الناس تغيرت وماتكسريش حاجات حلوة جواكي مهما الناس كانت قاسية وتأكدي ألي يحبك هيحبك بكل حالاتك احنا مش ملايكة لكن محتاجين حب ملايكي طاهر برئ وصدق ونقاء في المشاعر والتعامل يلا بقى فكي التكشيرة انا حالفة يمين اما تقري تعليقي تبتسمي :)
ابتسمتي صح والله مانتي كسفاني هههههه
حهديكي اغنية دي بس عشان تضحكي ...

؛؛
؛
أكتر حاجة بحبها فيكي هودا قلبك
http://www.youtube.com/watch?v=MuMJM_yEOL8&feature=related
؛؛
؛
ودي بقي للعيون الحلوة ..
http://www.youtube.com/watch?v=apLIsQE1QC4
؛؛
؛
ربنا ياسهاد يديكي احلى سعادة وأبتسامة وأشوفك دايما سعيدة
؛؛
؛
لروحك عبق الغاردينيا
كانت هنا
reemaas

نهر الحب said...

دعاء
اقولك ايه بس
:))


ريماس

بس وبمنتهى البساطة هم مش عاوزين الصح

هنا المشكلة كلها لان الصح في وجهة نظري غلط في وجهة نظرهم والعكس
ومافيش حد قادر يستوعب التاني
الموضوع كبير وواسع اوي
ممكن ابسطهالك ان السياسة واللي بيحصل في البلد مصغر لمشكاكلنا الباقية


ريماس
انتي جميلة اوي
:))
اهو يا ستي ولا تزعلي

P A S H A said...

على فرض إنك مش متوائمة مع الظروف اللي حواليكي - ما باقولش انتي صح ولا غلط - يبقى على الأقل خدي هدنة وحاولي تنسجمي وتستمتعي بنفسك الفترة دي .. لأنها جايز تكون مفتقداكي وبتدور عليكي .. يمكن ساعتها تشوفوا الأمر مختلف .. وإذا ما ظل استمرار الوضع على ما هو عليه ، أعتقد أنه يلزمك بعض التغير لإحداث تغيير .
:)

نهر الحب said...

pasha
احيانا لما حاجات بتحصللك بتبقي مش قادر تستمتع باي حاجة حواليك وتبقي مش قادر تقولم بأبسط الافعال زي الاكل والشرب والكلام تخيل بقي بحاجة بتحب تعملها
...

رحاب صالح said...

يا هلا بكي ف عالم الرقة والاحساس
يا بنتي انا كنت بحسب النادي بتاعنا اتقفل خلاص ومش هنلاقي شخص حساس تاني كدة زي حالاتنا ينضم لينا بس اتضح لي اني واهمة
لا تزعلي نفسك ولا تقولي لنا معلش
احنا قبلك مرينا بالظروف دي
ومازلنا لكننا تعودنا
وان شاء الله تتعودي
سيبي نفسك زي ما هي ومتتغيريش عشان حد
خليكي حساسة زي ما انت ومتسأليش ف حد
هههههههههه مفترية انا صح

نهر الحب said...

رحاب
حاضر
:))

Anonymous said...

انتى رائــــــــــــــــعة

Anonymous said...

انتى رائــــــــــــــــعة

نهر الحب said...

Anonymous
مممم..
أحب اعرف مين اللي بيقول عني رائعة من غير ما يعرفني؟؟؟؟؟؟؟؟