Wednesday, October 26, 2011

ليه حزينة؟؟؟



كتير بحس ان حياتي عاملة زي واحد بيجري في سباق..
عمال يجري يجري....
وكل ما يحس انه قرب لخط النهاية يقولوله لسه في لفة كمان...
يفضل يجري ونفسه عمال يضعف ويضيع وبرضه مش عاوز يقف
وفي الاخر يكتشف انه لوحده في السباق مافيش حد معاه...
كأنه بيسابق نفسه ومش واخد باله..


*****
بحس كمان كأني ديماً حاطة سماعات  في وداني وحواليا ناس كتير بيتكلموا والموسيقي اللي شغالة مش مخلياني اسمع اي حاجة حواليا...
كأن مفيش حد أصلاً حواليا...
وفي نفس الوقت انا مش ببقى سامعة حاجة من الموسيقي ....!!!
مش عارفة المشكلة فيا واللا في الناس واللا في المشاكل اللي مش بتخلص ؟؟!!
****
لما بكون حزينة بعمل حاجات كتير ...ساعات بكون مش واخدة بالي أصلاً إني بعملها ومش مركزة فيها...
بمشي ع البحر أو أقف أبص للموج وهو بيخبط في الصخر....
بحس ان الحكاية دي بتريحني وبتقول اللي جوايا

بفضل ماشية وانا مروحة البيت ببقي مش عايزة أوصل...
وكتير باخد أطول طريق عشان أمشي أكتر...
وعشان كمان أروح تعبانة وأنام من التعب ومفكرش ...
بحب أشرب حاجة بحبها...
زي الكوكتيل اللي عند بتاع العصير صديقي...
بحب أسمع أغنية فيروز..قديش كان فيه ناس..
بحسها بتوصفني...بتخليني حزينة اكتر بس بحب أسمعها أوي وانا حزينة

بمسك الموبايل وأسأل على أصحابي اللي مسألتش عنهم بقالي زمان ...
أقول مجرد كلمتين اعرف اخبارهم واقفل وخلاص
ساعات بحاول اعمل أي حاجة تبسط حد بحبه حتى لو اضطريت اضحك واهزر عشان اللي حواليا يكونوا مبسوطين واحاول افرح معاهم


*******
في الحالة الحزينة دي بحس ان الدنيا واقفة جمبي
بحس ان السما وهي مغيمة حزينة زيي ولما تشتي
بتبقي عايزاني أبكي...
البحر يبقي هايج
والقطة الجميلة صديقتي بتقعد جمبي بحس انها بتطبطب عليا

*******
المشكلة اني ديماً معنديش سبب معين للحزن....
بتبقي اسباب كتيرة متجمعة وصلتني في الاخر للحالة دي
 مجرد احساس جوايا اني وحيدة ومش معناها اني مفيش ناس حواليا او مفيش اصحاب او ناس بيحبوني
 لا للأسف فيه ناس بيكونوا موجودين ويمكن ده الاصعب

أرجع اقول لنفسي ان الحياة كلها كدة..
وبعد المشاكل فيه لحظة حلوة....
واللحظة الحلوة بتعدي..وهكذا..
بس احساس الحزن بيكون غصب عني....
ديماً بقول ان الحياة لحظات...
عمري ما حتوقع الحياة كلها لحظات سعيدة ولا حتي حزينة..
ولا التفاؤل بيكون ديما ولا الدنيا بتسود طول العمر
أهو كلها لقطات زي فيلم طويل... وممكن يكون قصير...
 بتعدي المشاهد بتاعته ورا بعض محدش يعرف المشهد اللي جاي ايه
ولا نهاية الفيلم ممكن تخلص ازاي وامتي....
................
وووووبس




14 comments:

دعاء العطار said...

المشكلة اني ديماً معنديش سبب معين للحزن....
بتبقي اسباب كتيرة متجمعة وصلتني في الاخر للحالة دي
مجرد احساس جوايا اني وحيدة ومش معناها اني مفيش ناس حواليا او مفيش اصحاب او ناس بيحبوني
لا للأسف فيه ناس بيكونوا موجودين ويمكن ده الاصعب


كانك بتكلمى عنى ياسهاد .. حواليا ناس كتير اووى لكن برضه حاسه انى وحيده

لما بحزن واتضايق مش بحزن من حاجه معينه ... بتبقى حاجات ممكن تكون صغيره اووووى وتراكمت

بس عارفه ..

فى عز حزنى ببقى عارفه ان بكره احلى .. يعنى ممكن اكون متضايقه لكن مش يأسانه

عشان كده صدقينى .. الجاى احلى :)

كونى بخير :) :)

reemaas said...

فى لقطة سمعات المزيكا اللى مش سامعه منها حاجة ولا مخلياكى سامعه اللى حواليكى وفى لقطة ان مافيش سبب معين لحزنك فانا حساكى بتتكلمى عنى جدااااااااااااااااااااا

sydalany-وش مكرمش said...

ياااااااااه
لسة فيه ناس بتدون
http://www.facebook.com/MahmoudSamySoliman

ده لينك صفحتي على الفيس اللي عايش فيه من 2008
و للعلم الصفحة جديدة لسة

وشششششششششش

EMA said...

ياااااه ..مش عارفة اقولك ايه بجد غير قلبتي عليا المواجع ههههههه

و الله بجد كأني انا اللى كاتبة الكلام دا حسيته جدا ..مش هقول اكتر من كدا سطورك بتتكلم لوحدها

تقبلي وجودي يا قمر ..ربنايسعدك يا رب

Anonymous said...

مساء الورد نهر الحب

طيب نهر الحب مش مفروض يكون أكبر مثال على الحب والسعادة مهما كانت الظروف ؟؟؟

بحس هنا يا نهر الحب بحزن عميق أكبر من مجرد موقف أو حكاية لأني بحس أن الموضوع له علاقة بالقلب وشعور خفي بالوحدة برغم أصحابك وعائلتك الملتفين حواليك بس برضه كانت وحدة من نوع ثاني لا يفهمها إلا من يعرف الحب ومعنى المشاركة ويمكن أكون غلطان بس صدقيني هذا اللي حسيته من كلماتك بس بتمنى عليك لو بداخلك شوية حزن ترميه للبحر حتى لا يزيد عليك الهم وشوفي الفرح في أبسط التفاصيل يمكن وردة في يدك يمكن في بوسة على جبين والدتك أو حتى مشوار بسيط لدار أيتام صدقيني نهر الحب كل شي حوالين يمكن يكون حزين لكن بذكاء نحوله لشيء سعيد بس ننسى مصطلح الحزن ونبدله بالفرح ...

أتمنى تكوني بخير

تحياتي وإحترامي

عازفة الالحان said...

لآ احد يتبع الحُزنْ
ولكن هو يعشقنآا
عبآرة تنطبق علينآا

دمتي بخير

نهر الحب said...

دودو
اكيد والله مش يائسة عشان عارفة زي ما قلت كل لحظة بتعدي وراها لحظة تانية ومحجدش يعرف بكرة فيه ايه
:)

نهر الحب said...

ريماس
:)
مانا عارفة اانا وانتي ودعاء نسخ نسخ
ربنا يستر
:D

نهر الحب said...

وش مكرمش
طبعا لسه فيه ناس بتدون
المدونة هي اوضتي الغيرة الفيس بوك كان اوضتك مفتوحة علي الشارع عارف الفرق
:)

نهر الحب said...

ema
والله مصدقاكي
:)
يا رب يبعد عن كل الناس اي لحظة حزن

نهر الحب said...

ريبال بيهس
احساسك صحيح
بس نهر الحب بيروي كل الناس....لكن بيفضل عطشان
!!!
انا بخير والله

نهر الحب said...

عازفة الالحان
صح جداااا
احنا ساعات بنتعود ع الحزن كانه حاجة مننا
:)
منورة

اميرة الصمت said...

والله ده احساسي في جوايا احساس بالوحده بالرغم انو في حواليا ناس كثيييير بحبهم وبحبوني وبحاول املا وقتي كله بس الاحساس ده مرافقني في اي مكان وما بعرف ليه يا ترى في اجابه للشعور ده

نهر الحب said...

اميرة الصمت
في اجابات كتير من تصرفات ناس حوالينا ويمكن تكون غلطة مننا اننا مش قادرين كمان نتواصل معاهم ويمكن كلنا عكلنا المدونات وكان السبب الاساسي الوحدة وان محدش فاهمنا صح

عايزة اقرالك حاجة فين بقي كتاباتك؟