Monday, February 08, 2010

سيب الوردة تقول

* لما أشوفَك.......حتقول....؟؟؟

- حقول إيه......؟؟؟؟

* قول أي حاجة

* واللا أقولك.....سيبها هي تقول

- هي مين دي.....؟؟؟؟

* الوردة

- هو أنا حجيبلك وردة

* أيوة....بس يا تري لونها إيه؟؟؟

- أبيض

* إشمعني؟؟؟

- زي قلبِك

* هو انا قلبي أبيض...واللا أحمر...؟؟؟

- أبيض طبعاً

* بس لو سألت دكتور حيقولك إنه أحمر

- لا....الدكاترة دول عندهم عمي ألوان

* طاب ما أنا..... دكتورة

- آه صحيح...بس مش لايق عليكي

- انتي كده.....كده يعني

* كده ايه......؟؟؟

- يعني .....مش مهم......مش مهم

*ليه لما بشوفك ما بتتكلمش؟؟

-بحب اسمعك

*طيب ما انا كمان عايزة اسمعك

*ها ....قول

حقول اهه

- وحشتيني

* طيب

- هي طيب دي يعني(شكرا)ا

- والا يعني(وأنت كمان)ا

- سكتت قائلةً......!!!!ا

- أ.....أ........أ...أ

* يوووووووووه.....اي حاجة

- حقولِك حاجة

لما تحسي بحاجة حلوة

ابتسمي.....اضحكي ...قوي

إعملي ما سمعتيش

مش واخدة بالك

حقولها تاني وتالت

لحد ما تسمعيها وتاخدي بالك

وساعتها بس حتقولي(وأنا كمان)ا

وحعمل نفسي مش واخد بالي

عادي يعني

ما انتي عارفاني

ساكتة ليه.....؟؟

* أقول إيه.....؟؟؟!!ا

- أي حاجة

* طيب ما تسيبها هي تقول

- مين دي.....؟؟؟

* الوردة

- يوووووووووووه.........تاني


ملاحظة....الصورة من عند المدون العزيز ايهاب...صدفة جميلة

7 comments:

أحمد الصعيدي said...

ياورد مزين غصونك محلا دلالك وعطفك
ياورد يامين يصونك الندل ناوى لقطفك


علي فكرة الوردة الابيض بيدل علي الخصام

لــــ زهــــــراء ــــولا said...

تحفه بجد
تسلم الايادى يا هبه يارقيقه انتى ارق من الورد الابيض والاحمر والفل والقرنفل

WhItE HeArT said...

جميله جدا

بجد ملهاش حل

اسلوب حوار بعفوية جميل فعلا

تحياتي

♥نبع الغرام♥♪≈ said...

جميله أووى
ربنا يسعدك حبيبتى

وحشتينى مووووووووووووووت

صدفة جميلة said...

السلام عليكم
يابخته ياستى
كفايه انك وصفتى قلبه بانه ابيض
طيب
اقولك اشوف وشك على خير
وربنا يحفظك من كل سوء
وياريت مش تنسى الورد العندى يعنى لو ترشى مايه وتنوريه ينوبك ثواب
ودورى كده يمكن تعجبك مدونتى وبكده اكون دخلت التاريخ
سلام
دعواتك يادكتوره

نهر الحب said...

شكرا لكم جميعا

Tamer Moghazy said...

جميلة طريقة الحوار اللي يتخلي المشاهد يقوم بدور المصمم للمشهد والوجوه دي :)
انا عندي صندوق مليان ورد...لفريدة وبسس :)