Monday, July 07, 2008

لوحدي.....طاب وماله
الوحدة احساس قاسي.....أحيانا
بالذات لما تحس إن اقرب الناس إليك محدش حاسس بيك أو فاهمك
وان الناس اللي بتبعدك عنهم مسافات طويلة قريبين قوي وكأنهم عايشين معاك في كل لحظة
تعرف إن ممكن حتى نفسك متكونش فاهماك ولا قادرة تتحملك حتى دموعك مش قادرة تنزل عشان تخفف عنك شوية
ولو بكيت حتبكي لوحدك بالليل عشان محدش يحس بيك
وتخيل لو بتيكي عشان حد بتحبه وخايف عليه وهو مش حاسس بيك....... او حتي من كتر ما فيه ناس بتوحشك بتبكي ويمكن هما في نفس الوقت بيضحكوا وناسيينك
تعرف ان من كتر الوحدة بناخد عليها ولو حسيت ان فيه حد معاك مش بتكون مبسوط ومش بتعرف تقول حاجة
بتحس انك في دنيا لوحدك......ساعات بتضحك مع الناس وتخرج وتعمل كل حاجة وحواليك ملايين ....لكن لوحدك.....بتفكر في حاجات تانية وعايش مع نفسك وبس....واسعد لحظات لما بتكون ماشي لوحدك في الشارع محدش حاسس بيك
اعتقد إني لو حسيت إن حياتي مش فارقه مع أي حد اعرفه......أكيد لازم اعرف إن حياتي ملهاش لازمه
عايشة او ميتة ....تعبانة أو كويسة مش فارقه مجرد واحدة زي أي واحدة
لسبب بسيط جدا ....ان الكومبارس عمره ما بيكون ليه دور في الفيلم موجود أو لأ الفيلم حيكمل ومفيش حاجة حتحصل لان وجوده زي عدمه
لما أحس إني مجرد كومبارس في حياة كل اللي اعرفهم......واني.....بشحت الحب او بتحايل علي الناس عشان يسألوا عني ولما يكون رد الفعل من كل الناس واحد يبقي اكيد الغلط عندي..................اكيد
صدقوني لو لقيت لوجودي أهمية حتى لو لشخص واحد بس مش اكتر....يمكن ساعتها يبقي ليا سبب أتمسك بالحياة وأحبها......يمكن

5 comments:

Hu-man said...

حرام عليكي والله ..شهر بحاله ماتكتبيش ..وتقوليلي حاسه بالوحده ؟؟؟
كلامك متناقض ..أنتي قلتي انك الوحيد بتكون تعيسه و سعيده ؟؟
يمكن الأتنين مع بعض
بصي أنا تقريباً الكلام اللي انتي قولتيه منطبق عليا بس انا الصراحة لسه ماوصلتش للدرجه دي
...
بشحت وكومبارس كلام المفروض مايطلعش منك ..لأنك بطلة قصتك انتي ..من غيرك فيلمك مش هايكمل
أنتي واحده بس في الكون مافيش غيرك اللي مايسألش مايسألش هو اللي خسران ونصيحه مني أتعرفي على ناس تانية مختلفين قابلي وشوش كتير
وغلط الكلام اللي انتي بتقوليه ده مافيش حاجه اسمها سبب عشان اتمسك بالحياة
انت ذات نفسك سبب وجودك ..النفس اللي طالع قدريه
أسف طولت عليك بس كلامك زعلني
..

أحمد سلامــة said...

مبدأيا مين قاللك ان الكومبارس من غيره الفيلم بيكمل
؟؟؟؟؟؟؟؟؟؟؟؟
ومين اللي قال ان الكومبارس مالوش دور فيا لفيلم
ده مفهوم خاطيء تماما ، ومش بدعوكي لمعايةش دور الكومبارس رغم انه عمل عادي جدا لا يفرق عن دور البطوله في شيء سو عدد الكادرات ، لكن أكم من كومبارس اروع من ال بطل
نصيحتى ليكي اهم انسان محتاجة تحسي انك فارقة معاه هو انتي
عشان تقدري تفرقي مع الناس لازم تكوين فارقة جدا مع نفسك ، بشخصيتك وطباعك واخلاقك وخبراتك في الحياة

تفائلي خير ، الدنيا اكبر من شاشة السينما بمراحل

عايش ولكن said...

اولا الكومبارس ساعات بيكون دوره مبنى عليه الفيلم كله

بس مش ده موضوعنا
بصى فى بيتين لصلاح جاهين كان بيقول
حبيت
.. لكن حب من غير حنان
وصاحبت.. لكن صحبه مالهاش أمان
رحت لحكيم واكتر ،
لقيت بلوتى
إن اللى جوه القلب مش عاللسان
عجبى !!
ياما صادفت صحاب وما صحبتهمش
وكاسات خمور وشراب وما شربتهمش
أندم على الفرص اللى أنا سبتهم
والا على الفرص اللى ماسبتهمش
!!عجبى !!

اعتقد هو ده اللى بتعانى منه
ومش انتى لوحدك
انا وانتى وغيرنا كتير
بس فى الاخر هتقابلى حد يستاهلك بجد
وبعدين حاولى تخرجى من المود ده لان مش هيفيد كله بيرجعلك فى الاخر ومادام لو زعلنا مش هيفيد ولو ضحكنا مش هيضر
يبقى نضحك احسن ما نبكى

اسف للاطاله
تحياتى
علاء

هدى said...

صباحك أصحاب

مريت كتير بالحالة اللي انتي بتقوللي عنها

حتى في عز الزحمة كتير بحس بوحدة بس بعتبرها انها احساس ايجابي هيخليني احس بالناس الي حواليا اكتر واكتر

لما ارجعلهم تاني

تحياتي

حبيبـــــــة القمـــــر said...

ايه ياجميل الكلام اللي يوجع دا
بقى اغيب حبتين ارجع الاقي كي كده
الشعور بالوحده بينتاب ناس كتير
لكن دا مش مبرر للاعتقاد بعدم اهميتنا عند غيرنا
بالعكس اوقات احنا اللي بنغمض عنينا ومش بنحاول نشوف الناس حوالينا
او حتى مش بنديهم الاهميه في حياتنا وبنفضل نبعد عنهم
لحد مايتحول دا لأمر واقع منقدرش نغيره رغم اننا احنا اللي اختارناه من البدايه