وحشتني

يااااااه........وحشتني ......وحشتني قوي يا بحر.....نفسي اخدك في حضني يمكن تعرف قد ايه كنت مشتاقة ليك

تعرفي انك اول مرة تقوليلي وحشتني

عندك حق......عشان بخاف اقولها .....حتبقي قليلة عليك

اتمنيت كتير اشوفك في اللحظة دي بالذات ......والشمس بتغرب .....لحد ما الليل يليل ويطلع القمر.....مش ممكن ....البحر والغروب والقمر في يوم واحد .............كتير ....كتير اوي عليا

وكأن حياتي بتزيد لما بشوف حد منكم

يا بحر......قوللي بقه ...امتي حشوفه

واللا الدنيا حتبخل عليا زي كل مرة

تعرف.....حاسه ان عطره مالي الجو.....كفاية احس ان نسمة هوا عدت عليه قبل ما تعدي عليا

اكيد شاف البحر مرة زي ما انا شايفاه ويمكن كلمه وسمع صوته

تعرف يا بحر اني بعشق صوته.....طيب لو بخلت عليا الدنيا اني اشوفه بلاش تبخل عليا حتي بصوته ....بضحكته....بكلامه

يا تري علي باله واللا ناسي.....مش حتفرق....مش حتغير....مش حنسي .....مش حكره....ومش حعيش

يا تري يا بحر مين ملاك دموع كده....كل دول مجروحين!!!!!!1

خايفة في يوم ابقي واحدة منهم

لما بشوفك لازم ابكي ......مش من الجرح...من الحب..من الاشتياق

خايفة المرة اللي جايه ابكي من الجرح

وساعتها عمره ما حيطيب

ارجوك.....المس ايدي...طمني.....دفيني.....لسه خايفة

خايفة اغرق من غير ما أحس

خايفة الموج يوديني في نص البحر وميرجعنيش

ويا عالم ايه مكن يحصل!!!!!!!!!!!!!!!!!!1

لوحدي.....طاب وماله
الوحدة احساس قاسي.....أحيانا
بالذات لما تحس إن اقرب الناس إليك محدش حاسس بيك أو فاهمك
وان الناس اللي بتبعدك عنهم مسافات طويلة قريبين قوي وكأنهم عايشين معاك في كل لحظة
تعرف إن ممكن حتى نفسك متكونش فاهماك ولا قادرة تتحملك حتى دموعك مش قادرة تنزل عشان تخفف عنك شوية
ولو بكيت حتبكي لوحدك بالليل عشان محدش يحس بيك
وتخيل لو بتيكي عشان حد بتحبه وخايف عليه وهو مش حاسس بيك....... او حتي من كتر ما فيه ناس بتوحشك بتبكي ويمكن هما في نفس الوقت بيضحكوا وناسيينك
تعرف ان من كتر الوحدة بناخد عليها ولو حسيت ان فيه حد معاك مش بتكون مبسوط ومش بتعرف تقول حاجة
بتحس انك في دنيا لوحدك......ساعات بتضحك مع الناس وتخرج وتعمل كل حاجة وحواليك ملايين ....لكن لوحدك.....بتفكر في حاجات تانية وعايش مع نفسك وبس....واسعد لحظات لما بتكون ماشي لوحدك في الشارع محدش حاسس بيك
اعتقد إني لو حسيت إن حياتي مش فارقه مع أي حد اعرفه......أكيد لازم اعرف إن حياتي ملهاش لازمه
عايشة او ميتة ....تعبانة أو كويسة مش فارقه مجرد واحدة زي أي واحدة
لسبب بسيط جدا ....ان الكومبارس عمره ما بيكون ليه دور في الفيلم موجود أو لأ الفيلم حيكمل ومفيش حاجة حتحصل لان وجوده زي عدمه
لما أحس إني مجرد كومبارس في حياة كل اللي اعرفهم......واني.....بشحت الحب او بتحايل علي الناس عشان يسألوا عني ولما يكون رد الفعل من كل الناس واحد يبقي اكيد الغلط عندي..................اكيد
صدقوني لو لقيت لوجودي أهمية حتى لو لشخص واحد بس مش اكتر....يمكن ساعتها يبقي ليا سبب أتمسك بالحياة وأحبها......يمكن