Wednesday, May 14, 2008

تاج
من زمان جداااااااااا.........من أول ما عملت المدونة وأنا بلاحظ حكاية التاج دي وكانت ديما بتلفت نظري وديما كنت بسال .........هو ايه التاج ده واذاي يجيلي ؟؟؟
المهم نسيت الحكاية دي .....وإذ فجأتن الاقي "human"- انسان يعني- صاحب مدونة وشوشة في القلب بيقول ان ليا حاجة عنده وازور مدونته الاقيه بيهديلي تاج عبارة عن اني اتكلم عن نفسي واوصف شخصيتي- زي ما فهمت يعني-
أولا بشكر إنسان جدا لأنه اعتبرني من أصدقاءه وأهداني التاج ، لكن يظهر انه بينتقم مني " مع اني معملتش حاجة خالص" لان حكاية اني اوصف نفسي دي صعبة جداااااا مش صعبة لاني مش حعرف...لا صعبة لانها ممكن تكون ضدي وممكن اطلع وحشة قوي وممكن كلامي عن نفسي يخليني مغرورة .....وبعدين انا علي فكرة طلبت من ....ناس ....انهم يوصفوني ورفضوا !!! او بمعني اخر ...معرفوش ....يبقي انا حعرف!!!

علي العموم حكون شجاعة كده وحوافق ....بس حبدأ من الاخر
انسان...قال اني المفروض بعد ما اخلص اهدي التاج لخمسة من اصدقائي ....وطبعا اكيد انتوا ملاحظين قد ايه زواري في المدونة كتير ومش عارفة اختار مين واللا مين...... J
علي فكرة ....اللي بيزوروني قليلين جدا لاني بكتب كل مدة عشان كده الناس بتنساني انا مش بلومهم دي غلطتي ...ما علينا
المهم.....بهدي التاج ل"ابراهيم......معايا" , ومحمد هشام , وساعة الغروب, وشريف غريب, وعمرو احمد
وعلي العموم ...عشان محدش يزعل أي حد يعدي عليا وعايز التاج يتفضله بالهنا والشفا.......حلو الكلام
احم ...احم... نبدأ بقه.....مش عارفة ابدا بالعيوب والا بالمميزات والا اتكلم عامة ...! حسيب القلم يتصرف ...ماشي
اهم العيوب اني عصبية .....مش قوي يعني ...بس حسب الوقت والموقف بس ناس كتير قالوا لي اني بطلع بطلع وبنزل علي مفيش يعني بكلمة خلاص الموضوع بينتهي
اللي بيحصل اني لما بتضايق بسيب الناس وبمشي واروح أي مكان لوحدي واقعد ومكلمش حد خالص واعيط مع نفسي .....فيه حاجة برضه بتضايق اصحابي اني لما بزعل من حد وبالذات لو حد بعزه قوي تلاقيني خاصمت الدنيا كلها ومش طايقة ابص في وش حد
ولما الدنيا بتسود بتسود كلها وبتاخد فترة لحد ما تتعدل ولما بتضحك بتضحك كلها برضه ....بس مش بتفضل كده كتير
المهم بقه ان فيه.... ناس... قالولي اني لما بتنرفز بفضل اقول
" ايووووووه" – الاسكندراني – عارفينها وعشان كده بيحبوا ينرفزوني..... ماشي ما علينا
لما بزعل برضه مش بعرف اسامح اللي مزعلني الا لما اقوله كل الي في قلبي ...انت عملت كذا وكذا لحد ما يبقي يا عيني مش عارف يقول ايه ....عملتها كتييييييييير في .....ناس...اصحابي , وبعد ما بعمل كده بزعل قوي من نفسي وبحس ان كنت قاسية قوي ....طيب اعمل ايه بيكونوا غلطانين والله ومش بعرف اكون بوشين ...يعني معرفش اضحك في وش حد بكرهه او جوايا ليه حاجه مزعلاني منه .....انا كده معلش بقه اللي مش عاجبه....يستحمل
بس الحمد لله كله اجمع اني طيبة ....بعد كل ده تخيلوا ...مش عارفة اذاي؟؟؟ يعني ....بيقولوا اني ....معطاءة جدا...ولما بحب حد بديه كل اللي اقدر عليه عشان اشوفه سعيد ....اصحابي يشهدوا .....وهما عارفين ان اكتر حاجة بتضايقني لما بيكون حد فيهم تعبان او زعلان او عنده مشكلة
الحمد لله......بيقولوا برضه اني بقف جمبهم وبساعدهم علي قد ما بقدر
بالمناسبة ....انا فعلا ماليش اصحاب مدونين كتير بس لو حد عنده اعتراض او لو حد عرافني ...كويس وعايز يقول حاجة واقفة في زوره والا حاجه يتفضل ...عادي مش حزعل واللي مش مصدقني وعايز يتأكد....هو حر ...لو عايز يسأل يسأل ....عادي برضه

نرجع تاني...
بيقولوا اني عنيدة ..زاه بصراحة شويه...بس مش العند اللي هو غلاسة ...لأ لما بكون مقتنعة بحاجة خلاص بقه هيه كده
وبحب اعمل اللي نفسي اعمله وواثقة انه صح من غير ما احس اني متكتفة او خايفة
بحب كمان اكتب اللي جوايا وبزعل لما مش بلاقي وقت
جريئة ....مع القريبين مني واالي انا واثقة فيهم ,,وفي نفس ذات الوقتJ
ساعة الجد بتكسف جدا ومش بعرف اتكلم ...وحالتي بتبقي صعبة ...برضه
شوية بيقوالوا اني علي طول بضحك وشويه تانيين بيقولوا اني مع اني مبتسمة وبضحك علي طول الا ان فيه نظرة حزينه بحاول اداريها بالضحك
وناس تانيه بيقولوا اني مش بعرف افرح...او بخاف افرح وده صح علي فكره
بيقولاوا اني ذكية... وماله جايز برضه ....بفهمة اللي قدامي من غير ما يتكلم وفيا حاجه غريبة قوي ....بعرف من العيون الشخص اللي قدامي ده بيحب حد والا لأ ...ومحدش يسال اذاي....بس بجد بعرف
رومانسية جداااااااااا,........اللي يشوفني وانا ماشية في الشارع ممكن يقول عليه مجنونه ليه بقه؟؟؟
لما بسمع صوت العصافير- اصحابي- تلاقيني بضحك , ولما بلاقي يمامة جميلة ماشية في الشارع بفرح جدا , ولما بشوف البحر لازم ابكي ولما بشوف فيلم من الافلام اللي انا بحبها – اللي انتوا عارفينها دي – بتقي حالتي صعبة ...جداااااااا
نفسي كل الي اعرفهم وكل الناس يكونوا سعداء ونفسي كل اتنين بيحبوا بعض – بجد – يتجوزوا –في اخر الفيلم- ويعيشوا حياتهم سعيدة زي ما بيتمنوها .

ايوووووووووووووه............كفاية بقه بجد تعبت جدااا واكيد انتوا كمان زهقتوا
وبعدين فيه حد يتكلم عن نفسه كل ده ....اكيد مغرورة ...مغرورة قوي جدا كمان...........بس خلاص

8 comments:

Human said...

إيه الحظ الجامد ده ...بس بالصدفه بجد ...أو تعليق على التاج
.....
على العموم إجابات التاج عفوية جدا ..وده عجبني
أما الغريب ..إنتي إزاي بتعرفي تقري العيون وتعرفي هو بيحب ولالاء ..غريبه شويه
...
أما موضوع العناد ده مشكله على فكره ...هو في بعض الأحيان بيكون غلط ..إنتي ممكن بكون العناد على حاجه صح بش إمتي الواحد بيكون عارف ان هو صح
.....
لأني كتير بكون متأكد من حاجه ميه في الميه وفجأة أعلاف ان هي غلط

Yasser_best said...

تحياتي أيتها الصيدلانية الجميلة

أنت إنسانة نقية وتصرفاتك التلقائية تجسد شخصيتك التي تتطلع إلى الحياة بنوع من البساطة والحيرة لأنك تحاولين معرفة مكان خطواتك
جميل أن تكون ضحكتك مرتبطة بزقزقة العصافير
إنها البساطة التي تمنحك كل ميزاتك وعيوبك

عرفة فاروق السيوطى ( الاديب العاشق) said...

مساء الحب
يا نهر الحب
كل الكلام ده وموصفتيش نفسك عارفة ليه علشان الانسان لما بيوصف نفسة بيتكلم عن حاجات كتير الحاجات اللى بيحبها والناس اللى بيحبهم وهواياته وحاجات تانى
المهم انتى وصفتى جزء من شخصيتك وهى علاقتك بالاخرين وازاى بتعامليهم وكمان علاقتك بالعصافير والافلام
وبعدين ازاى ؟؟؟؟
الثقة والجرأة والعناد صفات جميلة اتمنى الناس كلها تكون كدة
النرفزة والزعل الكتير
يارب سلم
وكل واحد ليه احزانه
ونهاية الافلام مش واحدة دائما
ومش شرط اللى يحبوا بعض يكونوا اتنين بس يارب الناس كلها تحب بعضها
معلهش كلامى قصير قوى وطويل
تحياتى

عرفة فاروق السيوطى ( الاديب العاشق) said...

نهر الحب
انا كتبت تعليق على بوست
بحبك................................1
انتى مردتيش يمكن علشان مقريتهوش
مستنى تعليقك عليه وعلى مدونتى

إبـراهيم ... معـايــا said...

طب والله ، وماليكي عليا يمين عديت ع التاج ده بتاع ثلاث أربع مرات، ولاحظت إنك باعتاهووولي .......
وعاجباااني قوووي فضفضتك عن نفســـك

بتحسسني إني بقرب منك شوية ....
تحياااتي يا جميــــلة

نهر الحب said...

human

بجد بتشرفني كلماتك جدا وصداقتك

ومعلش انا كده بقه والناس مستحمليني بالعافيه

استاذي العزيز :ياسر

اسمك وتعليقك يزينان مدونتي
اتمني اكون ديما عند حسن ظنكم

الاديب العاشق
شكرا لزيارتك وتحياتي ليك

ابراهيم.....معايا
لما انت عارف ان التاج مبعوت ليك
ليه مش تجاوب عليه؟؟؟؟
شكرااااااااا

Timo.. said...

قد ايه كلامك عفوي وحلو يا هوبة.
(شوفتي عرفت اسمك كمان ازاي؟)
(';')

نهر الحب said...

:)
معرفش ليه كان نفسي انك تقرأ البوست ده والحلو اني الايام دي بتمني حاجات
بتحصل بالظبط زي ما بتمناها

بس للأسف واللي طلع منك آوت اني مش اسمي هبة
عشان فيه حد قاللي هبة قبل كدة عشان كان فيها كذا واحدة اسمها نهر الحب وهما اتلغبطوا
حاول تاني وحتعرف اسمي بسهولة جداااا