Tuesday, February 12, 2008


والله وعملوها الرجالة

بجد مش عارفة اقول ايه بس مبرووووووووووك مليون مبروك البطولة كانت رائعة والفريق بجد عمل اللي عليه وزيادة اوي فعلا رجالة وجدعان اوي وفرحتنا بيهم اجمل.
يمكن ناس تقول احنا مالنا هما يعني حيدونا فلوس لما يكسبوا واللا حتي يخسروا مش حنزيد ولا ننقص لكن الحقيقة الحكاية اكبر من كده بكتيييييير فيه حاجة من جوانا هيه اللي مخليانا نفرح كده الناس كان نفسهم يفرحوا ..........تفتكروا فيه حاجة تانية ممكن تفرح؟؟؟
بلاش نكون مستكترين الفرحة علي نفسنا كده وكأننا خايفين نفرح وخايفين نكتشف اننا فعلا بنحب مصر وكمان بنعشقها بغض النظر عن اللي حاصل في البلد بوجه عام لكن حبنا وانتمائنا لمصر موجود والحمد لله ان فيه حاجات بتحصل بتأكد ده ........بجد انا فرحانة جدا ومش عارفة اقول ايه بس فيه نقطة مهمه جدا وهيه ان يوم الخميس ان شاء الله عيد الحب...........كل سنة وانتم طيبين وعلي فكرة الموضوع مرتبط جدا لأني شايفة ان (الحب) هو السبب الرئيسي لفوزنا........عارفين ليه اولا لان اللاعبين بيحبوا بعض قوي –في الله- وبيحبوا ربنا قوي عشان كده ربنا كمان بيحبهم وخلا الناس تحبهم وكانوا السبب في فرحة الناس.
عشان كده الحب فعلا هو المفتاح لكل حاجة نفسي كل الناس تحب بعض وتخاف علي بعض وتقف جمب بعض عيد حب او لأ مش حتفرق. واحب اسميه يوم الحب مش عيد الحب واعتبره مجرد فرصه للبعض للتعبير عن حاجة يمكن في اي وقت تاني ميقدروش يعبروا عنها , فرصة كمان لاي حد زعلان من حد انهم يتصالحوا
فرصة اننا نفتكر اننا بنحب بعض....الحاجة الوحيدة اللي بتضايقني اني مش بلاقي حد يديني وردة ولا بلاقي حد اديله وردة......ما علينا
المهم اني بهدي وردة لكل الناس اللي بحبهم في اسكندرية وبره اسكندرية و اكيد للمنتخب الجميل وبوكيه ورد مخصوص لابو تريكة المحترم اللي ربنا راضي عنه بجد والعسول قويييييييييي زيزو او زيدان والاسكندراني شادي محمد واحسن لاعب حسني عبد ربه والمقاتل عمرو زكي و اكيد عماد المتعب قوي والرائع جدا جدااااااا الحضري ربنا يكرمه وكلهم وابراهيم.....سعيد اللي بينزل اخر خمس دقايق بس ما علينا اكيد نسيت كتير بس اعزروني

مبروووووووووووك وكل عيد حب واحنا بنحب بعض

5 comments:

إبـراهيم ... معـايــا said...

كويــس إني آآآجي الأول !!


بالمناسبة إبراهيم .... مش سعيد ..، أي نعم هوا مش حزين، أو متضايق، بـس حاسس شوية بالغربة ! ، أو إن كل الدنيـا ف وادي تاني !! ، مش عاوز أعكنن عليكي فرحتك !، بس أنا خرجت، ورحت وجيت !!، وعرفت إن الفرح .. مش كده

Human said...

ألف مبروك وكل سنة وانت طيبة ,,,والصراحة الشباب دول سبولنا أقوى تحدي وإصرار ممكن نستفيد منه

..........
انا متفق معاكي ان فعلاً سبب نجاحهم هو الحب

حبهم لبعضهم وحبهم لبلدهم

حسن ارابيسك said...

مبروك على مصر كلها
مبروك الفرحة الكبيرة دي
الناس كانت نفسها تفرح من زمان
الناس ما صدقت تنسى الهم والنكد والغم شوية الناس ما صدقت لاقت حاجه حقيقية تفرحهم من قلبهم تعيشهم شويه بعيد عن كل معاناة يويمية وشهرية وسنوية وعمرية
كنت فرحان زي الناس بالضبط
بس كنت شايف كل ده انفجار نتيجة لضغوط وحياة صعبة وأصبحت الكرة الحلجة الوحيده بتفرحهم
مبروك علينا وعليهم
وانا من البلد دي
أنا من البلد دي
دي ارض ابويا وجد جدي
انا من البد دي

وحلوة بلادي السمرا بلادي الحرا بلادي
ياأحلى اسم في الوجود يااامصر
مصر
مصر
تحيا مصر

mohamed hesham said...

مبروك ولونها جت متأخرة بس معلش

والسـ ختام ــلام

Estabilizador e Nobreak said...

Hello. This post is likeable, and your blog is very interesting, congratulations :-). I will add in my blogroll =). If possible gives a last there on my blog, it is about the Estabilizador e Nobreak, I hope you enjoy. The address is http://estabilizador-e-nobreak.blogspot.com. A hug.